Kwashai Bantu Babula Kuyuka Kutanga Bulongo

1. Ñanyi lukatazho lwikalako pa kufunjisha bantu babula kuyuka kutanga bulongo?

¹ Bena nzubo bamo babula kuyuka kutanga bulongo bakonsha kukeba kufunda Baibolo, pano bino, bomvwa moyo na mambo a kubula kuyuka kutanga bulongo. Bimye byavula, kupana buku wa Baibolo Ufunjisha ku bano bantu kechi kukwasha ne. Twakonsha kukwasha byepi bano bantu kwikala na bulunda na Lesa? Basapwishi babanda mu bukine bafuma mu byalo 20 baambilepo byo boba pa kukwasha bantu ba uno mutundu. Mashinda alondelapo o o bengijisha.

2. Ñanyi bingijisho bingila bulongo pa kukwasha muntu ubula kutanga bulongo?

² Umvwe muntu ubena kufunda Baibolo kechi wayuka kutanga bulongo ne, mwakonsha kwingijisha mabuloshuwa, nabiji a kuba’mba Umvwainga Byamba Lesa nangwa Umvwainga Byamba Lesa Mukekale Myaka. Painiya umo mu kyalo kya United States of America umwesha onse ano mabuloshuwa ku muntu ukeba kufunda ne kumwambila mwine wasalapo buloshuwa ye akonsha kutanga. Ofweshi wa musampi mu kyalo kya Kenya washimuna kuba’mba ano mabuloshuwa akwasha bantu bavula bingi mu kyalo kyabo mambo mwayila kisho kya bena Africa, bantu bafunda byavula kupichila mu bishimi kukila mu misambo ya mepuzho ne mikumbu. Muntu wafunda wakonsha kutanga ne kukumbulatu bulongo mepuzho, pano kino kyakonsha kukatazha bingi muntu wabula kufunda. Basapwishi bavula inge bamona amba muntu wayukako pacheche kutanga, batendeka kumufunjisha mu mabuloshuwa nabiji a kuba’mba Mambo Awama Afuma Kwi Lesa!, Mwakonsha Kwikala Balunda na Lesa!, nangwa Buku Wami wa Mashimikila a mu Baibolo.

3. Ñanyi bintu byakonsha kwitukwasha kufunjisha bulongo bantu babula kuyuka kutanga?

³ Basanchilai pa Mikumbu Yabo: Javula, bantu babula kuyuka kutanga bomvwa bingi bumvu, kabiji bakonsha ne kwilengulula abo bene. Onkao mambo, kintu kitanshi kyo mwafwainwa kuba pa kuba’mba mwibafunjishe bukine ke kwibatundaika kwikala bakasuluka. Bantu bavula babula kuyuka kutanga baji bingi na maana kabiji bakonsha kufunda bintu bukiji. Kimye kyo mubena kufunda nabo, banemekainga ne kwibamwesha mushingi. (1 Pe. 3:15) Inge kemwibakwashe kumona buwame bubena kufumamo mu kwibikako kwabo ne byo babena kuyilako palutwe mu kuyuka bukine, kino kikebatundaika bingi kutwajijila kufunda. Onkao mambo basanchilainga kufuma panshi ya muchima.

4. Twakonsha kutundaika byepi bantu babula kutanga bulongo kunengezhezha jimo lufunjisho?

⁴ Nangwa ye mufunjisha kechi wayuka kutanga bulongo ne, mutundaikainga kunengezhezha jimo lufunjisho. Basapwishi bamo mu kyalo kya South Africa batundaika muntu ye babena kufunjisha Baibolo kwipuzhapo umo mu kisemi kyanji wayuka kutanga kuba’mba amukwasheko kunengezha lufunjisho. Musapwishi umo mu kyalo kya Britain utola buku wanji ye anengezhezha jimo ne kupa muntu ye afunjisha pa kuba’mba engijishe uno buku kimye kyo babena kufunda. Inge muntu ubena kufunda wamona byo kyapela kutana mikumbu mu buku wanengezhiwa jimo, naye utundaikwa bingi kunengezhezha jimo mu buku wanji. Mulongo umo mu kyalo kya India utundaika bo afunjisha Baibolo kumona bipikichala biji mu mafuka o bakafundanga mulungu ukalondelapo ne kulangulukilapo jimo.

5. Twakonsha kumwesha byepi butekanye kimye kyo tubena kufunjisha muntu Baibolo?

⁵ Batekenyai: Buku uji yense ye mubena kwingijisha, tainga maana ku bishinka bikatampe ne kukwasha bo mufunjisha Baibolo kumvwisha bino bishinka. Mu moba atanshi a kwibafunjisha, kyafwainwa kuwama inge misambo yenu yaikalatu ipi nabiji ya maminiti 10 nangwa 15. Kange mwibafunjishe mu mafuka avula pa kimye kimotu ne. Batekenyai inge babena kutanga pache pache. Inge batendeka kuyuka byavula pe Yehoba, bakatendeka kwibikako abo bene kufunda kutanga bulongo. Kyawama kwita bantu bo mufunjisha ku kupwila inge mukeba kwibakwasha kuba bino.

6. Twakonsha kukwasha byepi bantu kuyuka kutanga?

⁶ Inge muntu ye tufunjisha Baibolo wafunda kutanga, ukakoma bukiji mu kuyuka bukine. (Sala. 1:1-3) Basapwishi bavula bakwasha bantu kwingijisha buloshuwa wa Taiko Muchima Muyuke Kutanga ne Kunemba kupichila mu kutanga uno buloshuwa pa maminiti acheche panyuma ya lufunjisho lwa Baibolo. Umvwe muntu ye mubena kufunjisha Baibolo walefulwa, mwakonsha kumutundaika kupichila mu kwambapo bintu bimo byo afunda na mambo a kwibikako kwanji. Mukwashai kuyuka’mba Yehoba ukamupesha pa byo abena kwibikako, ne kumutundaika kulomba amba Yehoba amukwashe. (Mana. 16:3; 1 Yoa. 5:14, 15) Basapwishi bamo mu Britain batundaika bantu bo bafunjisha Baibolo kwibikila bikonkwanyi byaesakana, ne kunungilapo bikwabo pache pache. Bakonsha kwibikila kikonkwanyi kya kuyuka bisopelo, kuyuka bya kukebakeba binembelo mu Baibolo ne kwibitanga, apa bino ne kutanga mabuku etu muji byambo byapeela kutanga. Pa kukwasha muntu kuyuka kutanga, kechi tumufunjishatu byo batanga ne. Bino twafwainwa kumulengela kwikala na kizaku kya kukebesha kuyuka kutanga.

7. Mambo ka o twafwainwa kubujila kukankazhama kufunjisha bukine ku bantu babula kutanga bulongo?

⁷ Yehoba kechi ulengulula bantu babula kufunda kufika palepa mu sukulu wa ku mubiji ne. (Yoba 34:19) Kine kintu Yehoba kyo akebakeba ke muchima wa muntu. (1 Moba. 28:9) Onkao mambo, kange mukankazhamenga kufunjisha bukine ku bantu babula kuyuka kutanga ne. Muji na bingijisho byavula bya kutendekelapo kwibafunjisha. Inge mwamona’mba batendeka kuyuka bintu, mwafwainwa kutendeka kwingijisha buku wa Baibolo Ufunjisha ne kwibakwasha kukwatakanya bulongo mwayila Binembelo.