Funjishainga Bantu Babula Kutanga Bulongo
1. Lukatazho ka lo twikala nalo kimye kimo mu mwingilo?
1 Umvwe tuji mu mwingilo, kimye kimo kitukatazha bingi kufunjisha bukine bantu bakabakana pa kutanga. Twakonsha kuba byepi?
2. Twakonsha kunemeka byepi bantu babula kutanga bulongo kabiji mambo ka?
2 Banemekai: Kintu kyanema kwi Yehoba ke muchima wa muntu byo aji, kechi kufunda ko afunda sukulu wa ku mubiji ne. (1 Sam. 16:7; Mana. 21:2) Onkao mambo, kechi tulengulula bantu babula kutanga bulongo ne. Bantu ba uno mutundu bakonsha kuswa kwibakwasha umvwe twibanemeka ne kwibatekenya. (1 Pe. 3:15) Kino kyavwangwamo kubula kwibakanjikizha kutanga binembelo nangwa mafuka. Monka mu kufunda bukine bwa mu Baibolo, awo muntu wakonsha kwikala na kizaku kya kukeba kuyuka kutanga bulongo kuba’mba akamonenga lusekelo lufuma mu kwitangila Mambo a Lesa ne ‘kwialangulukangapo mute ne bufuku.’—Sala. 1:2, 3.
3. Ñanyi mashinda amo akufunjishishamo bantu babula kutanga bulongo?
3 Mashinda a Kufunjishishamo Mafunjisho a Baibolo: Bipikichala byawama bingi kwibingijisha pa kufunjisha, mambo bikwasha muntu kubula kulubamo. Mwakonsha kwipuzha ye mu bena kufunjisha Baibolo kwambapo pa byo amona pa kipikichala kiji mu buku ye mubena kwingijisha. Apa bino mwamwipuzha mepuzho akonsha kumukwasha kumvwisha mwatala lufunjisho lwa kyokyo kipikichala. Tangai binembelo bibena kwamba pa bishinka biji mu kyokyo kipikichala. Kabiji mwakonsha ne kwingijisha bipikichala pa kupitulukamo mu lufunjisho. Kechi mwafwainwa kwibafunjisha byavula pa kimye kimo ne. Ambishaipo pa kishina ne pa bishinka bikatampe biji mu lolo lufunjisho, kabiji kange mwambe pa bintu byabulamo ne. Tangai binembelo mu Baibolo ne kushikisha mepuzho kuba’mba ye mubena kufunjisha omvwishe byo mwatanga. Kuba bino kwakonsha kumulengela kukeba kuyuka kutanga kuba’mba epesele peselenga mwine bukine bwa mu Baibolo.
4. Twakonsha kukwasha byepi ye tufunjisha kuyuka kutanga bulongo?
4 Bintu Byakonsha Kwibakwasha Kuyuka Kutanga: Bantu babula kutanga bulongo bakonsha kumvwa ne kulabijila bintu byo bafunda. Mwakonsha kwibatundaika kuteleka ku mabuku etu o bakopela pa matepu umvwe muji nao mu mulaka wenu. Umvwe keatelekeshe ku byo babena kutanga mu tepu aku saka alondelamo mu buku wanji, kabiji ne kusombolwela byambo mu muchima wanji, kikamukwasha kuyuka kutanga bulongo. Kabiji kutelekesha ne kulondela aba batanga bulongo pa kupwila kwetu kukwasha bingi aba bakeba kuyuka kutanga bulongo. Kabuku ka Taiko Muchima Muyuke Kutanga ne Kunemba nako kakonsha kwibakwasha. Ku mapunzha amo, bakulumpe mu kipwilo bambila bantu bakeba kuyuka kutanga kuba’mba banembeshe mazhina batatule kwibafunjisha. Ae mashinda akonsha kwitukwasha kukwasha bantu babula kutanga bulongo kuyuka “binembelo byazhila” byakonsha kwibalengela kumona lupulukilo.—2 Timo. 3:15.