Funjilai ku Bangauzhi—Zefwaniya
1. Ñanyi bintu byamwekelenga kimye Zefwaniya kyo ajinga ngauzhi, kabiji tufunjilako ka kwi aye lelo jino?
1 Mu myaka ya mu ma 600 B.C.E, bupopweshi bwa Baela bwavujile bingi mu mukoka wa bena Yuda. Mfumu wakanamine bingi aye Amonyi bamwipaile kabiji mwananji aye Yosiya watendekele kulama saka akijitu mwanyike. (2 Moba. 33:21–34:1) Pa kyonkakya kimye, Yehoba watumine Zefwaniya kuya na kubulañana byambo bya bukaji bwa Yehoba. Zefwaniya wasemekelwe mu kisemi kya mafumu a bena Yuda. Nangwa byonkabyo, kechi wachiine kwamba byambo bya bukaji bwa Yehoba ku bakalama ba mukoka wa Yuda ne. (Zefwa. 1:1; 3:1-4) Ne atweba lelo jino tulondela kuchinchika kwa kwa Zefwaniya. Kechi tuswisha balongo betu kubwezha bupopweshi bwetu kwi Yehoba panyuma ne. (Mat. 10:34-37) Ñanyi byambo byo abulañene Zefwaniya, kabiji ñanyi bintu byafuminemo?
2. Ñanyi byubilo byo twafwainwa kwikala nabyo pa kuba’mba tukapuluke mu juba ja bukaji bwa Yehoba?
2 Mukebai Yehoba: Yehoba ye yenkatu wakonsha kupulusha bantu mu juba ja bukaji bwanji. Onkao mambo, Zefwaniya wakambizhe bantu ba mu Yuda kukeba Yehoba, kukeba bololoke ne kukeba bukimote juba ja Lesa saka jikyangye kwiya. (Zefwa. 2:2, 3) Byo byo kiji ne lelo jino. Byonka byaubanga Zefwaniya, ne atweba tukambizha bantu kukeba Yehoba. Nangwa tuba byobyo, twafwainwa kwingijilapo pa uno mukambizho pa kuba’mba tubule kubwela munyuma ne kuleka ‘kulondela Yehoba.’ (Zefwa. 1:6) Tukeba Yehoba kupichila mu kutanga Baibolo ne kulomba kwi aye kimye kyonse pa kuba’mba etutangijilenga. Tukeba bololoke kupichila mu kwikala na byubilo byaoloka mu bwikalo bwetu. Kabiji tukeba bukimote kupichila mu kukokela ne kulondela mikambizho ifuma ku jibumba ja Yehoba.
3. Mambo ka o twafwainwa kuketekela buwame kufumamo mu mwingilo wetu wa kusapwila?
3 Byawama Bifumamo: Byambo bya kwa Zefwaniya byafikile bantu bamo mu Yuda pa muchima. Kabiji byalengejile Yosiya kutendeka kukeba Yehoba kimye kyo akijingatu mwanyike. Onkao mambo, Yosiya watatwile mukwekele wakonauna bupopweshi bwa bankishi bonse mu kyalo. (2 Moba. 34:2-5) Ne lelo jino, nkunwa ya bukine imo iponena kunsa ya jishinda, pa kibangabwe, ne mu miba. Bino, nkunwa ikwabo iponena pa mushiji wawama kabiji ipanga bipangwa byawama. (Mat. 13:18-23) Twaketekela kuba’mba Yehoba ukatwajijila kupesha mingilo yetu byo tubena kusampanya nkunwa ya mambo a Bufumu na mukoyo.—Sala. 126:6.
4. Mambo ka o twafwainwa kutengelanga Yehoba?
4 Bantu bamo mu Yuda balangulukilenga amba Yehoba kafwako byo akoba ne. Bino Yehoba wakambizhe amba juba janji jajinga pepi. (Zefwa. 1:12, 14) Aba bafyaminenga mwi Yehoba bo bonkatu bakonsheshe kupuluka. (Zefwa. 3:12, 17) Byo tubena kutengela Yehoba, twayai tukwatankene pamo na bapopweshi bakwetu ne kumwena lusekelo mu kwingijila Lesa.—Zefwa. 3:8, 9.