Kwashai Bampofu Kufunda pe Yehoba

1. Yesu wibobijile byepi lusa bampofu?

¹ Kwashajiletu moba acheche kuba’mba Yesu afwe. Byo afuminenga mu muzhi wa Yeliko, bampofu babiji balulombo babijikile amba: “Nkambo, tubilai lusa!” Nangwa kya kuba Yesu walangulukilenga pa meseko o akapitamo, waimene ne kwita bano banabalume babiji ne kwibabuka. (Mat. 20:29-34) Twakonsha kwikala byepi na lusa ku bampofu byonka byajinga Yesu?

2. Twakonsha kusapwila byepi ku bampofu bo tutaana mu mapunzha mwavula bantu?

² Bakwashainga: Inge mwataana mpofu, kampe pa mvula bantu, mubuulai jizhina jenu ne kumubuula’mba mubena kukeba kumukwasha. Byo kiji kuba’mba bano bantu batemwa kwibajiila makusu pa mutwe, mpofu wakonsha kwimuzhinauka patanshi. Nangwa byonkabyo, inge mwamumwesha bulunda bwa kine ne kumuta muchima, mukamulengela kukasuluka. Mwafwainwa kuyuka’mba bampofu bapusana pusana, kabiji kino kyakonsha kwimukwasha kuyuka byo mwakonsha kumukwasha. Panyuma ya kumukwasha, kampe mwakonsha kumubuula’mba muji na mwingilo wa kufunjisha bantu Baibolo. Mutangilai kinembelo nabiji Salamo 146:8 nangwa Isaya 35:5, 6. Umvwe kya kuba wakonsha kutanga mabuku a bampofu, mwipuzhai inge wakonsha kutemwa kumupapo buku wa mu mulaka wa bampofu wa kumukwasha kufunjilapo byavula bya mu Baibolo. Mwakonsha ne kumukwasha kukopolola byo batangila jimo pa jw.org. Inge kompyuta wanji uji na pologalamu utanga byanembwa pa kompyuta, wakonsha kutemwa bibaaba bya mu mabuku biji pa jw.org byo akonsha kukopolola mu musango wa RTF (Rich Text Format).—Monai kakitenguluzha ka kuba’mba “Pa Kukwasha Bampofu . . .”

3. Twakonsha kukeba byepi bampofu mu nyaunda yetu?

³ Kebainga Bampofu: Javula kechi tutaana bampofu mu mwingilo wa ku nzubo ku nzubo ne, mambo bavula kechi bakasuluka kwisamba na benyi pa mazubo abo ne. Onkao mambo, kikeba kwibikako pa ‘kukeba’ bantu ba uno mutundu pa kuba’mba twibasapwile. (Mat. 10:11) Nanchi ku nkito nangwa ku sukulu kujipo mpofu nyi? Tendekelaipo kwisamba nanji. Inge kya kuba mu nyaunda yenu mujipo sukulu wa bampofu, mwafwainwa kwibapapo mabuku a bampofu a kubika mu laibulale wa pa sukulu. Nanchi mwayukapo bamo baji na bampofu mu kisemi nyi? Nanchi mu nyaunda yenu mujipo kipamo kikwasha bampofu nangwa kukwasha bisemi biji na bampofu nyi? Isambai na wa mu kisemi, utambwila benyi nangwa mukulumpe wa kyo kyo kipamo kuba’mba Bakamonyi ba kwa Yehoba bakebesha bingi kukwasha bampofu, kabiji babuulai’mba mukebaletelapo mabuku a mu mulaka wa bampofu nangwa o batangila jimo. Bamweshai mulaye wa mu Baibolo wa kuba’mba katatakatu Lesa ukalabisha bampofu kikupu. Mwakonsha ne kwibatambisha vidyo wa pa jw.org uji na mutwe wa kuba’mba Without It, I Would Feel Lost, waamba pa mwanamulume mpofu wamwenejilemo mu kutanga Baibolo wanembwa mu mulaka wa bampofu. Inge mwibabuula ene mambo o mwafwakashisha, bakonsha kwimuswisha kwisamba na bampofu.

4. Twafunjilako ka ku kyamwekejile Janet?

⁴ Nyenga umo mpofu aye Janet wayile pa kishimikwa kimo pekala bampofu. Watendekele kwisamba na nsongwakazhi. Janet wamubuujile’mba “Yesu wabukile bampofu pa kuba’mba amweshe byo akobila bonse bampofu.” Batangile Lumwekesho 21:3, 4, kabiji Janet walumbulwile Bufumu bwa Lesa byo bukafikizha uno mulaye. Mwanamukazhi wazhindaminetu nzoo kabiji waambile’mba: “Nkyangye kumvwapo bino kutazha ku bampofu. Bantu bavula baitabila’mba kyalengela kupofula ke na mambo a bintu byo baubile nangwa byaubile bashakulu babo.” Janet wamutumijile buku wa Baibolo Ufunjisha pa intaneti, kabiji pa kino kimye bafunda Baibolo jibiji mu mulungu.

5. Nangwa kya kuba kechi twakonsha kulabisha bampofu byonka byaubile Yesu ne, ñanyi mapesho afuma mu kumwesha lusekelo bampofu?

⁵ Kechi twakonsha kulabisha bampofu byonka byaubile Yesu ne, bino twakonsha kukwasha bonse bo bapofula michima kwi lesa wa buno bwikalo, kuvwangakotu ne bapofula meso, kumvwa bukine bwa Mambo a Lesa. (2 Ko. 4:4) Yesu wabukile banabalume babiji mambo ‘wibobijile lusa.’ (Mat. 20:34) Inge twamwesha lusekelo lwa uno mutundu ku bampofu, twakonsha kwibakwasha kufunda pe Yehoba yenka ukalabisha bampofu kikupu.