Kuwamishako Busendwe Bwetu Bwa Kusapwila​—Kusapwila Bampofu

ENE MAMBO O KYANEMENA: Bampofu bavula kechi bakasuluka kwamba na bantu bo babula kuyuka ne. Onkao mambo, twafwainwa kuyuka mashinda awama a kusapwila bano bantu. Yehoba wibata bingi muchima bampofu. (Le 19:14) Ne atweba twakonsha kumwesha byo twibata muchima inge twibikako kwibakwasha kufunda pe Yehoba.

BYA KUBA:

• ‘Kebainga’ bampofu mu nyaunda yenu. (Mat 10:11) Nanchi kujipo bamo bo mwayuka baji na mulongo wabo mpofu nyi? Nga mu nyaunda yenu, nanchi mujipo masukulu nangwa bipatela byakonsha kukebako mabuku a bampofu nyi?

• Bamweshai’mba mwibata muchima. Inge mwibakasulukila ne kwibata muchima, ne abo bakakasuluka kwisamba ne anweba. Esekai kwisamba nabo pa bintu byo batemwa nangwa byo balangulukapo.

• Bakwashai kufunda pe Yehoba. Jibumba jetu janengezha mabuku mu misango yapusana pusana a kukwasha bampofu ne boba babula kumona bulongo. Onkao mambo, mwafwainwa kwipuzha mutundu wa buku ye akeba kwingijisha pa kufunda. Pa kuoda ano mabuku, kalama wa mwingilo mu kipwilo wafwainwa kumona kuba’mba nkwasho utala pa mabuku wanemba bulongo musango wa buku ubena kukebewa.