Byakwingijisha Buku wa Nanchi Baibolo Waamba’mba Ka?

Buku wa Nanchi Baibolo Waamba’mba Ka? ne Baibolo Ufunjisha epasha bingi. Ano mabuku o tufunjishamo bantu aamba pa bukine bumotu kabiji ne ndonda ya mitwe imotu. Pano bino buku wa Nanchi Baibolo Waamba’mba Ka? baingijisha byambo byapeela. Bamunembela kukwasha boba bo kikatazha kumvwisha buku wa Baibolo Ufunjisha. Mu buku wa Nanchi Baibolo Waamba’mba Ka? balumbulula mwatala byambo bimo ne byo tubena kufundapo biji mu mafuka mu kipungu kya byambo byo balumbulula. Bitango kechi biji na mepuzho a kutendekelako nangwa kabokoshi ka kupitulukamo ne. Bino ku mpelo ya bitango kujitu bishinka byo balumbulula mu mafuka. Twakonsha kupa bantu buku wa Nanchi Baibolo Waamba’mba Ka? kimye kyonse byonka byo tuba na buku wa Baibolo Ufunjisha nangwa kya kuba kechi ye ye tubena kusha mu yewo ñondo ne. Pano twakonsha kwingijisha byepi bintu byakatataka byo babiika mu buku wa Nanchi Baibolo Waamba’mba Ka? pa kufunjisha bantu Baibolo?

BISHINKA: Bantu bavula batemwa jishinda jo twingijisha pa kufunjisha ja kutanga mafuka ne kwipuzha mepuzho mu buku wa Nanchi Baibolo Waamba’mba Ka? Pano twakonsha kuba byepi inge kya kuba ye tufunjisha Baibolo kechi wayukisha mulaka ne, kabiji kechi utanga bulongo ne? Inge kyaikala bino, mwakonsha kwingijisha buku wa Nanchi Baibolo Waamba’mba Ka? Kabiji mwakonsha kufunda nanji byambo biji ku mpelo ya bitango pa bishinka ne kumutundaika kwitangila mwine byambo biji mu mafuka. Bishinka byonse biji ku mpelo ya kitango mwakonsha kufunjisha muntu mu maminiti 15. Mu bishinka kechi balumbulula byonse biji mu mafuka ne, onkao mambo, mufunjishi wafwainwa kunengezha bulongo pa kuba’mba ayuke byakonsha kukwasha ye abena kufunjisha. Inge mubena kufunjisha muntu mu kitango, mwafwainwa kwingijisha bishinka pa kupitulukamo.

BYAMBO BYO BALUMBULULA: Byambo ne bishinka biji mu byambo byo balumbulula byakwatankana nabiji mu bitango. Mufunjishi wakonsha kufuukulapo kwisamba byambo byo balumbulula na ye abena kufunjisha nangwa ne, mu buku wa Nanchi Baibolo Waamba’mba Ka?