Byo Twafwainwa Kutemwa Lesa ne Bakwetu

Nangwa kya kuba bena Kilishitu luno kechi balondela Mizhilo ya Mosesa ne, pano bino muji mikambizho ibiji ikatampe ya kutemwa Lesa ne bakwetu. Abino byo bibena kwitukambizha Yehoba amba tubenga. (Mat 22:37-39) Abuno butemwe kechi tusemwa nabo ne. Twafwainwa kwibikako pa kuba’mba twikale nabo. Pano twakonsha kuba byepi? Twafwainwa kutanganga Baibolo kimye kyonse. Inge saka tulanguluka languluka pa byubilo bya Lesa byapusana pusana byaambapo Binembelo, tukamona “buwame bwa Yehoba.” (Sl 27:4) Kuba bino kuketukwasha kumutemwa bingi kabiji tukamwenanga bintu monka mo ebimwena. Akino kitutundaika kukookela mikambizho ya Lesa, kuvwangakotu ne mukambizho wa kutemwa bakwetu. (Yoa 13:34, 35; 1Yo 5:3) Monai ano mashinda asatu akonsha kwimukwasha kumwenamo inge mubena kutanga Baibolo:

• Fwanyikizhainga byo mubena kutanga ne kulangulukapo. Fwanyikizhai kuba’mba ko muji. Ñanyi bintu byo mwakonsha kumona, kumvwa nangwa kumvwa bwema? Ñanyi bintu byajinga mu milanguluko yabo?

  

• Ingijishai mashinda apusana pusana pa kutanga Baibolo. Mwakonsha kwingijisha ano mashinda: Tangainga na jiwi ja peulu nangwa londelaingamo mu byo batanga. Tangai pa muntu umo ye baambapo mu Baibolo nangwa pa mutwe umo kukila kutangangatu bitango monka mo byalondankena. Mwakonsha kwingijisha Bya Kulumbulula A7 nangwa B12 biji mu Baibolo wa Binembelo bya Ntanda Ipya pa kutanga pe Yesu. Mwakonsha kutanga kitango kyonse mwafuma kinembelo kya juba. Tangainga mabuku a mu Baibolo kwesakana na kimye kyo beanembejilemo.

  

• Tangainga ne kumvwa. Kutanga kitango kimo pa juba pa juba saka mubena kumvwa byo mubena kutanga ne kulanguluka langulukapo kwawama bingi kukila kutanga bitango byavula. Fwanyikizhainga bintu byo byajinga. Monai kyalengejile kwibinemba. Ingijishainga mapu ne binembelo bikwabotu. Inge kuji kishinka kyo mwabula kumvwisha, kebakebaipo. Umvwe kyakonsheka, kyonka kimye kyo mwingijisha pa kutanga kyo kyo mwafwainwa kwingijisha kulanguluka languluka pa bintu byo mwatanga.