Kushonkena kwa pa Mwaka pa Mwaka ke Kimye kya Kumwesha byo Twatemwa Bakwetu

Mambo ka o twiyowela kushonkena pa mwaka pa mwaka? Byonka byo kyaikalanga ku bena Isalela kala, ne mu ano moba kushonkena kwitulengela kupopwela Yehoba mu jibumba jikatampe ja bapopweshi bakwetu. Kabiji pa kushonkena tufunda bintu byavula bingi bikosesha bulunda bwetu ne Yehoba. Kabiji twiyowa bingi kupwanañana na balunda ne na ba mu bisemi byetu. O ene mambo o twibikilako kutanwako moba onse asatu a kushonkena.

Inge twapwila pamo, kechi tulangulukatu pa byo tusakumwenamo ne. Bino tulanguluka ne pa mwakumweshesha byo twatemwa bakwetu. (Nga 6:10; Heb 10:24, 25) Kabiji tumwesha byo twata muchima bakwetu inge twakasuluka pa kupwanañana na balongo ne banyenga, ne kukwachilatu bipona po tusakwikala kwapwa. (Fp 2:3, 4) Kushonkena ke kimye kyawama bingi kulenga balunda bakatataka. Kushonkena saka kukyangye kutendeka, pa kupwisha ne pachaile ke kimye kya kuyuka balongo ne banyenga bo twabula kuyuka. (2Ko 6:13) Bulunda bo tulenga pa bimye bya uno mutundu bukosa bingi! Kabiji kyakila pa byonse, inge bantu bemwena butemwe bwa kine mu byo tubena kwiubila mulwetu, bakonsha kufuukulapo kutendeka kupopwela Yehoba pamo ne atweba.—Yoa 13:35.

TAMBAI VIDYO WA KUBA’MBA KUKONKANA KWA BYALO KWA KUBA’MBA “BUTEMWE KECHI BUPWA NE”! APA BINO MUKUMBULE ANO MEPUZHO:

• 

  Bayile na kupwila ku kukonkana kwa byalo kwa mu 2019 bebamwesheshe byepi butemwe?

• 

  Mambo ka kukwatankana ne butemwe bwa bantu ba Yehoba o byaikela bya kukumya?

• 

  Ñanyi mashinda mwakumweshesha butemwe bwa bwina Kilishitu aambilepo bingi ba mu Jibumba Jitangijila?

• 

  Balongo ne banyenga bamwesheshe byepi butemwe mu kyalo kya Germany ne ku South Korea?

• Ñanyi kintu kyo twafwainwa kufuukulapo atweba bonse?