Fundainga ne Kubuulako Bakwenu Bintu byo Mufunda

Kufunda Baibolo kwitukwasha bingi, pano bino twakonsha kumwenamo bingi inge ketubuuleko bakwetu bishinka byo twafunda. Pa Byambo bya Maana 11:25 paamba’mba: “Yense ukokolosha bakwabo naye bakamukokolosha.”

Inge ketubuuleko bakwetu bintu byo twafunda, kino kitulengela kuvuluka bishinka ne kwibyumvwisha. Kabiji na mambo a kuba’mba bakwetu bamwenamo mu bishinka byo twibabuula, kino kitulengela kwikala na kizaku kya kutwajijila kubuulako bantu bintu byo tufunda.​—Byu. 20:35.

Esekai bino: Mulungu ubena kwiya, mukeseke kubuulako muntu bintu byo mwafunda. Mwakonsha kubuulako wa mu kisemi kyenu, ye mupwila nanji, ye mwingila nanji ku nkito, ye mufunda nanji ku sukulu, wakinkalankulo nangwa muntu ye mwataana mu mwingilo wa kusapwila. Pa kubuulako bakwenu bintu byo mufunda, lumbulwilainga bakwenu saka mwakasuluka nobe mubena kwisambatu.

Vulukainga kino kishinka: Buulaingako bakwenu bintu byo mufunda pa kuba’mba mwibatundaike, kechi kwimwesha’mba mwayuka byavula ne.​—1 Ko. 8:1.