Mepuzho Afuma ku Batanga
Ñanyi “mulanguluko” Yehoba ye akabika mu michima ya bisaka bya bantu katataka kulutwe?
Kinembelo kya Lumwekesho 17:16, 17 kyaamba pa bikatendeka malwa akatampe amba: “Aya nsengo jikumi ne awa lukinyama byo waji kumona, bikamushikwa pite ne kumonauna ne kumuvuula, kabiji bikaja nyama yanji ne kumusokatu pelu na mujilo. Mambo Lesa wabika mu michima yabyo kuba kyaswa muchima wanji, kine, kuba’mba bifikizhe mulanguluko wabyo umo kupichila mu kwibalengela kupa yewa lukinyama bufumu ne luusa lwabo.” Kala, mu mabuku etu twaambanga’mba “mulanguluko” Yehoba ye akabika mu michima ya bisaka bya bantu ke wa konauna bupopweshi bwa bubela.
Nangwa byonkabyo, ino ñumvwino twafwainwa kwiipimpulako, mambo “mulanguluko” Yehoba ye akabika mu michima ya bisaka bya bantu ke wa “kupa yewa lukinyama bufumu.” Pa kuba’mba tumvwishe buno bungauzhi byo bukafika, twayai tumone mikumbu ya ano mepuzho.
Bañanyi bo babena kwambapo mu buno bungauzhi? “Pite” utelwa ne kuba’mba “Babilona Mukatampe”; wimenako bupopweshi bonse bwa bubela buji pano pa ntanda. “Lukinyama wachijisha” wimenako mu bukifwanyikizho kipamo kitala pa mutende kyatendekele kwingila mu mwaka wa 1919, kyatelwanga kala amba League of Nations, mu ano moba kitelwa’mba United Nations. (Lum. 17:3-5) “Nsengo jikumi” imenako makafulumende onse atundaika uno lukinyama.
Bulunda bwa mutundu ka pite bo aji nabo na uno lukinyama wachijisha? Pite “waikala” pa uno lukinyama ye utundaika ne kukwasha uno lukinyama ne kumutangijila.
Ñanyi kintu kikamwekela pite? Lukinyama pamo na nsengo jikumi imutundaika “bikamushikwa pite.” Na mambo a kumushikwa, bakapukula bunonshi bwanji ne kusolola patoka bubi bwanji. Kabiji bakafikizha bunchibamambo bwa Yehoba pe aye, ko kuba’mba bakamonaunatu pelu. (Lum. 17:1; 18:8) Ino yo ikekala mpelo ya bipamo byonse bya bupopweshi bwa bubela. Nangwa byonkabyo, kino saka kikyangye kumweka, Yehoba ukalengela bisaka bya bantu kuba kintu kikyangye kubiwapo kufumatu ne kala mu bukalama bwa bantu.
Ñanyi kintu Yehoba kyo akalengela bisaka bya bantu kuba? Yehoba ukabika mu michima ya yoya nsengo jikumi “mulanguluko” wanji ko kuba’mba kwibalengela ‘kupana bulume ne luusa lwabo ku yewa lukinyama [wachijisha], ko kuba’mba kipamo kya United Nations. (Lum. 17:13) Akilangulukai pa kino byo kibena kulumbulula. Nanchi makafulumende a bantu akafuukulapotu ao ene kupana bulume ne luusa lwabo ku uno lukinyama nyi? Ine! Mambo buno bungauzhi bwaamba’mba Lesa ye ukebalengela kuba kyaswa muchima wanji. (Maana 21:1; esakanyaiko ne Isaya 44:28.) Nanchi buno bulume bakebupana pachepache nyi? Ine! Kyamwekeshatu patoka kuba’mba kikobiwa bukiji, kyakubazhimukilatu! Kepo uno lukinyama ye bakapa bulume akafikizha bunchibamambo bwa Yehoba pa bipamo byonse bya bupopweshi bwa bubela ne kwibizhiya kikupu.
Pano ñanyi bintu byo twafwainwa kutengelanga? Kechi twafwainwa kutengelanga kumvwa masawakya akambanga pa makafulumende byo akatendeka kutundaika kipamo kya United Nations ne. Pakuba twafwainwa kutengelanga kuba’mba: Kwakubula kuketekela, Yehoba ukabika mu michima ya bisaka bya bantu mulanguluko wa kupana bulume ku lukinyama. Kino inge kyaubiwa, popo tukayuka’mba malwa akatampe aji pepi kutendeka. Pa kino kimye, twayai “tulabenga ne kwikala bajimuka,” mambo bino bintu bikobiwa bingi bukiji kwakubula kuketekela.—1 Tesa. 5:6.