Kechi Nafwile mu Milukuchi ya Kipanyi kya Bumulwila Ntanda Ne

PA 1 OCTOBER 1965, bashilikale batundaikanga Kipanyi kya Indonesia kyalwishanga kafulumende byo kyakebelenga kufumyapo ndamakyalo, kyaipayile bakulumpe ba bashilikale batanu na umo. Kafulumende waingijilepo bukiji. Ino milukuchi ya kyalo kyonse, yalengejile bantu 500,000 ba mu kino kipanyi kufwa.

Byo papichile milungu yavula, akya kipanyi kyakebelenga kufumyapo ndamakyalo byo kyakankelwe, mukulumpe wa bashilikale wambuujile’mba jizhina jami jiji pa mutanchi wa bantangi ba bupopweshi ba mu mpunzha bo bakebelenga kwipaya ku kino kipanyi. Wakebelenga ne kummwesha kilende kyo bapoyijile jimo kya kunzhiikamo, bino nakaine. Na mambo a milukuchi ya bya bumulwila ntanda yajingako, kechi nakebelenga kutanwa nanji ne, kuchina’mba nakonauna jizhina jami jawama ja bwina Kilishitu.