Kutangizhako Mwingilo wa Kusapwila Mwaya Ntanda

PA KISATU pa 23 September, 2015, Jibumba Jitangijila jabuujile ba mu kisemi kya Betele mwaya ntanda lupimpu lwapusana pusana lwaubiwenga mu jibumba ja Lesa pa kuba’mba bakepesheko mali o bengijisha. Kepo pa Kibelushi pa 3 October, 2015, Jibumba Jitangijila jalumbulwile’mba: “Kinembelo kya Filipai 1:10 kitubuula’mba twafwainwa ‘kuyuka bintu byanemesha.’ Kwesakana na bino byambo, atweba [Jibumba Jitangijila] tubena kukeba kutangizhako mingilo yanema ikwasha bantu kwikala balunda na Lesa ne kutwala palutwe mwingilo wa kusapwila mambo awama kuzhokoloka ntanda yonse.”

Pa JW Broadcasting, Mulongo Stephen Lett wa mu Jibumba Jitangijila walumbulwile bulongo luno lupimpu amba: “Jibumba Jitangijila jata bingi muchima pa kutwala palutwe mwingilo wa Bufumu mu bipwilo, o ene mambo o twafuukwilapo kukepeshako ba mingilo pa misampi pa kuba’mba mali avula engilenga mu mwingilo wa kusapwila. Onkao mambo, mingilo imo yo baingilanga pa Betele pa myaka yavula babena kwiikepeshako, kabiji ikwabo babena kwiilekesha. Na mambo a kino, kukakebewangatu bantu bacheche ba kwingijila pa Betele.”

Onkao mambo, kutendeka mu September 2015, ba mu kisemi kya Betele 5,500 mwaya ntanda yonse, bebabwezhezhe mu bipwilo. Nangwa kya kuba luno lupimpu lwalengejile bintu byavula kupimpulwa, bino Yehoba ubena kupesha luno lupimpu, kabiji lwalengela mwingilo wa kusapwila ne kufunjisha kuyilako bingi palutwe.

Ba mukazhi ne mulume mu kyalo kya Sri Lanka bo bafumishe pa Betele ne kwibatuma kuya pa kipwilo na kusapwila bamwene’mba luno lupimpu lwibalengejile kumwesha luketekelo lwabo mwi Yehoba ne jibumba janji. Banembele’mba: “Kechi twayukile byo tukekalanga ne. Bino twashiinwe’mba Yehoba kechi uketulekelela ne. Onkao mambo, twalombele’mba, ‘Anweba Yehoba, mu bintu byonse byo tusakupitangamo, tukwashai kupimpulako bwikalo pa kuba’mba twingilenga bupainiya bwa kimye kyonse.’ Mu ñondo mutanshi, kechi twajinga na bintu byavula ne. Nangwa byonkabyo, twimwenejile butemwe ne bukwasho bwa Yehoba, kabiji luno tuji na mwa kumwena bikebewa mu bwikalo. Tupayankana bingi kwingila mingilo ya pa nzubo, nkito, ne bupainiya. Bino na mambo a bintu byo twafunjile pa Betele, twayuka bya kwabanya bulongo kimye. Kukwasha bantu kufunda bukine ye mwingilo wawama bingi, kabiji tuji bingi na lusekelo kuba bino mu mwingilo wa bupainiya.”

Bamo bafumine pa Betele ku Colombia bafunda mulaka mukwabo kabiji bavilukila ku mapunzha a kwalepa na kusapwila mambo a Bufumu. Bano balongo ne banyenga babena kukwasha bingi bipwilo. Kalama wa mwanzo umo waambile pa ba mulume ne mukazhi bayile na kwingijila pa kipwilo kiji mu mwanzo wanji amba: “Balongo ne banyenga mu kipwilo kyo bajimo bebasanchila bingi pa byo babena kwibakwasha. Balongo ne banyenga mu kipwilo bavula batendeka kuya mu mwingilo kimye kyonse, kabiji babena kufunjisha ne balongo bya kwingila mingilo mu kipwilo.” Bavula bajinga pa Betele bepana kufuma ku mazubo abo kwiya na kwingilako mingilo imo pa Betele pa juba jimo nangwa kukilapo mu mulungu.

Mulongo waingijijile pa Betele wa mu Japan pa myaka 31 bamutumine pa kipwilo pajingatu bakulumpe babiji. Na mambo a kuba’mba kino kipwilo kyajinga na mwingilo wa kuwamisha Nzubo ya Bufumu, wafuukwilepo kubula kwingila nkito yanji pa milungu ibiji. Bino byo kwashajiletu pacheche kuba’mba batendeke uno mwingilo, mu mpunzha ya Kumamoto monka mwaikejile kipwilo mwapichile kitentanshi kikatampe. Na mambo a kuba’mba wafuukwilepo kubula kwingila nkito yanji, uno mulongo ye watangijilenga mwingilo wa kukwasha baponejilwe na bya malwa, ne kwingila mwingilo wa bukafunga. Waambile’mba: “Namwene kuba’mba Yehoba wantumine ku mpunzha kwakebewenga bingi bukwasho.”

Ba Phil ne ba Sugar bajinga pa musampi wa mu Australasia balumbulwile’mba: “Byo betubuujile kufuma pa musampi, twafuukwilepo kutwajijila kwikala bwikalo bwapeela. Twalombele kwi Yehoba kuba’mba etutangijile pa kufuukulapo bya kuba ne kwitupesha. Twakebeshe bingi kuya na kwingijila mu kyalo kingi. Kine, Yehoba wapesheshe byo twafuukwilepo kabiji tubena kumwingijila na muchima yense!” Luno baji mu jibumba jingijisha Kizungu pa jikuji ja Samal, mu kibunji kya Davao mu kyalo kya Philippines, muji basapwishi 34 ne bapainiya ba kimye kyonse 9. Kabiji baji na mazhina ne makeyala a bantu 120 bo bafwainwa kubwelako na kwibafunjisha bukine. Baambile’mba: “Mwingilo wa kusapwila uleta bingi lusekelo. Tuji bingi na lusekelo na mambo a kuketekela mwi Yehoba na muchima yense. Twakosesha bingi lwitabilo lwetu mwi aye kabiji butemwe bwetu bo twamutemwa bwabayilako.”

Nyenga umo muzhike wafumine pa Betele ku Russia ye batumine kuya na kwingila bupainiya bwiikajila washimikizhe’mba: “Bupainiya bundengela kwingilako pakatampe mwingilo wanema bingi ukabula kubwelapo ne, wa kusapwila Bufumu bwa Lesa. Nji bingi na lusekelo mambo nayuka’mba nekingijisho kya Yehoba.” Pa kino kimye, ufunjisha bantu batanu na umo Baibolo. Pa bantu bo afunjisha paji bafuma ku Iraq, Nigeria, Sri Lanka, Syria ne Zambia.

Bavula bafumine pa Betele mu Zambia bebatumine kuya na kwingila bupainiya bwa kimye kyonse. Baji bingi na lusekelo pa kwingilako pakatampe mwingilo wa kusapwila. Mulongo Andrew ubena kwingila bupainiya pamo na mwinakwanji washimikizhe’mba: “Kechi papichile ne kimye kyabaya ne, kufuma kimye kyo twafumine pa Betele, twakwashishe bantu babiji kufunda kutanga ne kunemba. Umo pa bantu bo tufunjisha Baibolo, mwanyike wa myaka 10, katatakatu akambe jashi janji jitanshi mu kupwila kwa mukachi ka mulungu. Ba mukazhi ne mulume bamo bo twasapwijileko bataainwe ku Kivuluko kabiji kufumatu kyokya kimye kechi bashala ku kupwila ne. Babena kukwatakanya bingi bulongo bintu byo bafunda mu Baibolo. Tulanguluka’mba inge kya kuba kechi twalondejile lutangijilo lwa Yehoba ne, abino byonse inge kechi byaubiwe ne. Twimwena Lesa byo abena kwitukwasha ne kwitupesha.”

Mulongo Edson ne mwinakwanji aye Artness nabo bekala mu Zambia, baikeletu bañondo bacheche mu masongola kimye kyo bebabuujile kufuma pa musampi. Nyenga Artness washimikizhe’mba: “Bintu byo twafunjile pa Betele bitukwasha kuyuka bya kwingijisha mali acheche o tuji nao ne kutwajijila kwikala na lusekelo kwa kubula kwibika mu makongole. Kechi twilangulusha pa byo twafuukwilepo kuya na kwingijila pa Betele ne. Twafunda bya kupimpulako bikonkwanyi byo twibikila mu mwingilo wa Lesa kabiji Yehoba witukwasha kufikizha bikonkwanyi byetu. Lwitabilo lwetu mwi Yehoba lwakoselako, kabiji twipana kutwajijila kwikala ba kishinka kwi Yehoba.”