Nanchi Kujipo Kafulumende Wakonsha Kulama ino Ntanda kwa Kubula Makatazho Nyi?—Baibolo Waambapo’mba Ka?

Makafulumende onse mwaya ntanda abena kupita mu makatazho. Nangwatu mu byalo mumweka nobe muji mutende, mumvwanyika masawakya atama pa bamulwila ntanda, muji bunsaji bwa mazhikakanwa, bamulwila ntanda kechi bomvwañana ne, kabiji bantu babena kulukuka makafulumende.

Baibolo waamba’mba kuji kafulumende umo washikimana. Kampe mwakimumvwapo kala uno kafulumende. Uno ye kafulumende Yesu Kilishitu ye aambilepo mu lulombelo lwanji.

• “Byonkabyo, mwafwainwa kulombanga bino amba: ‘Tata wetu wa mwiulu, jizhina jenu jizhile. Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.’”—Mateo 6:9, 10.

Baibolo waambapo amba ka pa buno Bufumu?

Bufumu—kafulumende wa kishikimana

Buno Bufumu bulamina mwiulu.

• Yesu watelele uno kafulumende amba “Bufumu bwa mwiulu.” (Mateo 4:17; 5:3, 10, 19, 20) Na mambo akino waambile’mba “Bufumu bwami kechi bwa pano pa ntanda ne.”—Yoano 18:36.

Buno Bufumu bukapingakena pa makafulumende onse a bantu.

• Baibolo waamba’mba: “Buno bufumu . . . bukavingakanya ne kupwisha buno bufumu [bwa bantu] bonse kabiji abo bukekala myaka ne myaka.”—Danyela 2:44.

Buno Bufumu bukalamwanga ne Yesu Kilishitu kechi bakebonauna ne.

• Baibolo waamba’mba: “Bukalama bwanji bo bwa myaka ne myaka, kechi bukapwa ne, kabiji bufumu bwanji kechi bakebonauna ne.”—Danyela 7:13, 14.

Buno Bufumu bukaleta mutende ne luzhikijilo pano pa ntanda.

• Baibolo waamba’mba: “Muntu yense ukekala munshi ya muñanzañanza wanji ne munshi ya kichi kyanji kya mukuyu, kabiji kafwako nangwa umo ukebalengesha moyo ne.”—Mika 4:4.

Funjilaipo bikwabo pa buno Bufumu

Yesu byo ajinga pano pa ntanda waingijishe kimye kyanji kyabaya “kusapwila mambo awama a Bufumu.” (Mateo 9:35) Waawile ne kuba’mba:

• “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”—Mateo 24:14.

Lelo jino, mambo awama a Bufumu babena kwiasapwila mu byalo kukila pa 240. Tubena kwimutundaika kufunjilapo byavula pa uno kafulumende ne pa byo mwafwainwa kumwenamo mu bukalama bwanji.

Mwane tambai vidyo wa kuba’mba Bufumu Bwa Lesa bo bu Ka?