Mambo ka kyo Mubujila Kulwako Nkondo?
Bino bishinka byo bilengela Bakamonyi ba kwa Yehoba kubula kulwa nkondo:
Bakokela Lesa. Baibolo wamba’mba bamwingilo ba kwa Lesa “bakabundanga mapoko abo ne kwialula ke bya kujimako.” Kechi “bakafundanga bya kulwa nkondo jibiji” ne.—Isaya 2:4.
Bakokela Yesu. Yesu waambijile mutumwa Petelo amba: “Bwezha mpoko yobe mu kikwa, mambo bonse basenda mpoko bakafwa ku mpoko.” (Mateo 26:52) Onkao mambo Yesu wafunjishe baana banji ba bwanga amba kechi bafwainwa kwikala na byela bya nkondo ne.
Baana ba bwanga ba kwa Yesu bakokela mukambizho wa kuba’mba “kechi bo ba pano pa ntanda ne” pa kubula kwivwanga mu bya bumulwila ntanda. (Yoano 17:16) Kechi bakanya bantu balwa nkondo nangwa basalapo mwingilo wa bushilikale ne.
Batemwa bakwabo. Yesu wakambizhe baana banji ba bwanga amba “mwitemwe anwe bene na bene.” (Yoano 13:34, 35) Onkao mambo, baana banji ba bwanga baumvwañenenga nobe banabankazhi kya kuba kechi bakonsheshe kulwa mulwabo ne.—1 Yoano 3:10-12.
Bena Kilishitu batanshi. Buku umo waambapo amba: “Baana ba bwanga ba kwa Yesu batanshi kechi balwilepo nkondo nangwa kwikala bashilikale ne. Bayukile kuba’mba bino byubilo “kechi byaswañene na butemwe bwaambile Yesu ne mukambizho wa kuba’mba muntu wafwainwa kutemwa mulwanyi wanji ne.” (Encyclopedia of Religion and War) Nangwatu shayuka wa bya bupopweshi mwina German aye Peter Meinhold waambilepo pa baana ba bwanga ba kwa Yesu amba: “Bwina Kilishitu ne bushilikale kechi byendela pamo ne.”
Kukwasha Bantu
Bakamonyi ba kwa Yehoba ke bantu bawama bingi kabiji kechi boba bintu byatama mu byalo mo bekala ne. Banemeka bantu bebalama. Balondela mikambizho iji mu Baibolo:
“Bonse bakokelenga bakulumpe balama kyalo”—Loma 13:1.
Panai bintu bya kwa Kesala kwi Kesala kabiji bintu bya kwa Lesa, kwi Lesa.”—Mateo 22:21.
Onkao mambo, tulondela mizhilo,kupana misonko ne kulondela bintu bimo bitubila kafulumende.