Lufunjisho 4

Byo Mwakonsha Kufunda Pe Lesa

Mwakonsha kufunda pe Yehoba kupichila mu kutanga mu Baibolo. Kala kene Lesa wasajile bantu bamo kunemba byambo byanji. Abyo binembelo bitelwa’mba Baibolo. Lelo jino, tufunda pe Lesa kupichila mu kutanga Baibolo. Na mambo a kuba’mba mu Baibolo muji kyambo kya kwa Yehoba, nangwa’mba jiwi, itelwa’mba Kyambo kya kwa Lesa. Twakonsha kwitabila byamba Baibolo mambo Yehoba kechi ubepa ne. “Kuba Lesa wabepa ne.” (Bahebelu 6:18, NW) Mu kyambo kya kwa Lesa mo muji bukine.—Yoano 17:17.

Baibolo iji pakachi ka bya bupe bya kwa Lesa byakila mukunema kwi atweba. Iji nobe nkalata, yafuma kwi shetu wa butemwe yo atuma ku bana banji. Itubula pa mulaye wa kwa Lesa wa kupimpula ntanda kwikala mpunzha yawamisha ya kwikalamo—paladisa. Itubula byo auba mu kimye kya ku nyuma, byo abena kuba luno, ne pa byo akobila bana banji bakishinka kulutwe nalwendo. Kabiji itukwasha kupwisha makatazho etu ne kutana lusekelo.—2 Timoti 3:16, 17.

Bakamonyi ba kwa Yehoba balunda na Lesa; bakemukwasha kukwatakanya bifunjisha Baibolo. Mwibabuletu kuba’mba musaka kufunda Baibolo. Kechi balipilisha mali pa kino ne. (Mateo 10:8) Mu kunungapotu, mwakonsha kutanwa ku kupwila kwa Bwina Kilishitu. Kuno kupwila kwikalako mu bifulo byo batela’mba Mazubo a Bufumu. Inge saka mutanwako ku kupwila kwa Bwina Kilishitu, mukakoma lubilo mu kuyuka Lesa kwenu.

Mwakonsha kufunda pe Lesa kupichila mu bilengwa byo alenga. Ku kya kumwenako, Baibolo ishimuna’mba: “Lesa walengele bya mwiulu ne ntanda.” (Ntendekelo 1:1) Yehoba byo alengele “bya mwiulu,” walengele ne juba. Pano nanchi kino kitubulapo ka pe Lesa? Kino kitubula kuba’mba Yehoba uji na bulume bukatampe. Ye yenka wakonsha kulenga kintu kiji na bulume bukatampe nobe juba. Kabiji ishimuna’mba Yehoba wa mana, mambo kya kebewenga mana pa kulenga juba, jitwisha kyuya ne kusamisha kyeya kabiji kechi jisunguluka ne.

Bilengwa bya kwa Yehoba bimwesha kuba’mba witutemwa. Langulukai pa mitundu ne mitundu ya bipangwa biji pano pa ntanda. Yehoba mu kusaka kwanji inge witupeletu mutundu umo wa bipangwa—nangwa inge wikilekeletu. Mu kifulo kya byo byo, Yehoba witupele bipangwa byavula byapusana-pusana bya misango ne misango, byapusana mu kubaya, mu mwekelo, kabiji biji na ntobelo yapusana-pusana. Kino kimwesha kuba’mba Yehoba kechi Lesa wa butemwetu ne, bino wa bupanyi ne milangwe kabiji wa kifyele.—Masalamo 104:24.