Mapesho a kwa Yehoba Etunonkesha
1 Bwikalo bwawama bwa muntu bupiminwa ku mali o afola. O ene mambo bantu bavula o bamwena kuba’mba ba mali bo baji na lusekelo kabiji bo bekala bulongo. Nangwa byonkabyo, bantu balanguluka kuba’mba mali akonsha kuleta lusekelo baya mungi. (Sapwi. 5:12) Aba ‘baji na muchima usaka bunonshi’ bwa pano pa ntanda kechi bekala na lusekelo lwa twajijila ne. (1 Timo. 6:9) Mu kupusanako, bakalume ba kwa Yehoba bo baji na lusekelo lwa kine kine kabiji bo bantu banonkesha pano pa ntanda. (Mana. 10:22; Lum. 2:9) Mu ñanyi jishinda?
2 Kiyukisho kya Bunonshi Bwetu: Tuji na mana a ku mupashi kabiji tumvwisha Kyambo kya kwa Lesa, Baibolo. Yehoba kupichila mu jibumba janji ja pano pa ntanda utwajijila kwitufunjisha byubilo byanji ne bya Mwananji pa kuba’mba tumwenengamo kikupu. Kumvwisha kwa luñama kulengela kuba’mba tufwenye ku bwipi na Yehoba ne kwiyowa bulunda ne aye. (Yako. 4:8) Kuyuka kyawama ne kyatama ne kulondela mizhilo ya kwa Lesa kwituvimbila ku bikola bimo ne ku mapuso. Twaketekela kuba’mba Yehoba uketupa byo tukeba kabiji kino kitulengela kwikala na kwikushiwa kwa bulesa ne kwikala na milanguluko yawama.—Mat. 6:33.
3 Twiyowa mutende ne lumvwañano mu bulongo bwetu bwa ku mupashi mambo twibikako kunungulula bipangwa bya mupashi wa kwa Lesa. Twakwatankana pamo mu mfungwa ya butemwe, onkao mambo kechi twiumvwa kuba’mba Lesa nangwa balongo betulekelesha, mu kimye kya malwa ne.—Nga. 6:10.
4 Bumi bwetu buji na bwaluluzhi bwine bwine kabiji buji ne na nkebelo. Kusapwila mambo awama mwaya ntanda yonse twikumona kwikala jishuko jawamisha. Kino kituletela lusekelo lwa myaka ne myaka byo tubena kukwasha bantu bakwetu kwikala balunda bawama ba kwa Lesa ne kwingila mu kukwatankana pamo ne atweba mu bupopweshi bwa kine. Nsabo ifuma mu butumwa ileta munema kwi Yehoba kabiji itulengela kwikushiwa kuba’mba tubena kwingila mwingilo wa kutumbijika jizhina janji. Tutwajijila kwikala na muchima wawama, pa kuyuka kuba’mba luketekelo lwetu lwa kimye kya kulutwe bukumotu lufikizhiwe.
5 Mweshai Lusanchilo lwenu: Kimye kyonse tusanchilenga mapesho a kwa Yehoba etulengela kwikala bantu banonkesha pano pa ntanda. (Mana. 22:4) Kila juba kwikala na kimye kya kulanguluka-languluka pa byo tuji nabyo kwitutundaika kusanchila Yehoba pa mambo a butemwe bwanji ne kutwajijila kumupopwela aye yenka.