Kitango 41

Baana Basangajika Muchima Wa Lesa

ÑANYI mwana panopantanda ye walanguluka’mba wasangajikile muchima wa Yehoba?— Wajinga Mwananji, Yesu. Akitwaya twisambe pa bintu byaubile Yesu byasangajikile Shanji.

Kisemi kya kwa Yesu kyaikalanga mu muzhi pajinga musinso wa kwenda moba asatu kuya ku Yelusalema, muzhi mwajinga nzubo ya Yehoba ya kitambo. Yesu watelanga nzubo ya Lesa amba “nzubo ya bashanji.” Aye ne kisemi kyanji ko ko bayanga pa mwaka pa mwaka na kutanwa ku kijiilo kya Lupitailo.

Mwaka umo, Yesu saka aji na myaka ya kusemwa 12, kisemi kyanji kyabwelelenga ku nzubo panyuma ya kijiilo kya Lupitailo. Byo bafikile pa mpunzha po balajile bamwene kuba’mba Yesu kechi bajinga nanji ne. Ponkapotu, ba Maliya ne Yosefwa babwelele ku Yelusalema na kumukeba. Walanguluka’mba Yesu wafwainwa wajinga pi?—

Bamutaine mu nzubo ya Lesa. Watelekelenga byaambilenga bafunjishi, kabiji wibepwizhenga mepuzho. Kabiji umvwe bamwipuzha, wibakumbwilenga. Babokaminetu pa kumvwa byo ebakumbwilenga bulongo. Pano wamona kyalengejile Lesa kusekela nyi?—

Ba Maliya ne Yosefwa byo bamutaine Yesu, baumvwine bingi bulongo. Pano bino, Yesu kechi waakaminwe ne. Wayukile amba nzubo ya Lesa ke mpunzha yawama bingi kwikalamo. Wibepwizhe amba: “Kechi mwajikuyuka’mba, nafwainwa kwikala mu nzubo ya Batata nenyi?” Yesu wayukile amba wajinga mu nzubo ya Lesa, kabiji waumvwine bingi bulongo pa kwikala mu ino nzubo.

Palutwe kacheche, ba Maliya ne Yosefwa bamusendele Yesu ku nzubo ku Nazala. Nga Yesu wibamonanga byepi bansemi banji?— Baibolo washimuna’mba ‘watwajijile na kwibanemeka.’ Kino kilumbulula ka?— Kilumbulula’mba wibakokelanga. Ee, waubanga byonse byamukambizhanga bansemi banji, nabiji mwingilo wa kutapula mema.—Luka 2:41-52.

Akilangulukapotu pa kino: Nangwa kya kuba’mba Yesu waolokele, wakokelanga bansemi banji bambulwakoloka. Nanchi kino kyamusangajikanga Lesa nyi?— Ee, kyamusangajikanga, mambo Mambo a Lesa akambizha baana amba: “Kokelai bemusema.” (Efisesa 6:1) Ne obewa wakonsha kumusangajika Lesa umvwe ke ukokele bansemi bobe, byonka byaubile Yesu.

Kabiji jishinda jikwabo jo wakonsha kusangajikilamo Lesa ke kubulako bakwenu pe aye. Bino bantu bamo bakonsha kwamba’mba banyike kechi bafwainwa kuba bino ne. Bantu bamo byo bakebelenga kulekesha banyike kuba bino, Yesu waambile’mba: “Nanchi mukyangye kutanga ne amba, mu tunwa twa twanyike ne twana twa lukeke mo mwanengezhezhe kutota?” (Mateo 21:16) Onkao mambo atweba bonse twafwainwa kwambanga pe Yehoba ku bakwetu, kuba’mba ke Lesa wawama bingi. Kabiji umvwe ke tube bino tukamusangajikanga Lesa.

Kwepi ko tufunda bintu byaamba pe Lesa byo twakonsha kubulako bakwetu?— Bintu byo tufunda mu Baibolo ku nzubo. Kabiji tufunda bintu byavula pa mapunzha papwila bantu ba Lesa na kufunda. Nga bantu banji twakonsha kwibayuka byepi?—

Nga bantu bo ba ka pa mapunzha po bapwila? Nanchi bafunjisha byanembwa mu Baibolo nyi? Abya batanga Baibolo ne kwisambapo pa byo aamba nyi? Bino byo byo tumvwa kwi Lesa, ke ibyo nenyi?— Kabiji pa kupwila kwa bwina Kilishitu po pambiwa byambo bya Lesa, ke ibyo nenyi?— Pano ibyepi umvwe bantu kebambe amba kechi wafwainwa kubanga byamba Baibolo ne? Wakonsha kwamba’mba bantu bamba bino ke bantu ba Lesa nyi?—

Akilanguluka ne pa kino. Baibolo waamba’mba bantu ba Lesa bafwainwa kwikala bantu bapatulwa “na mambo a jizhina janji.” (Byubilo 15:14) Jizhina ja Lesa ke Yehoba, onkao mambo twakonsha kushikisha bantu umvwe Yehoba ye Lesa wabo. Umvwe bakana, ko kuba’mba kechi bantu banji ne. Bantu ba Lesa babulako bakwabo Bufumu bwa Lesa. Kabiji bamwesha’mba batemwa Lesa kupichila mu kulama mafunde anji.—1 Yoano 5:3.

Umvwe kuji bantu boba bintu bya uno mutundu, wafwainwa kupwilanga nabo pamo. Kimye kya kupwila, wafwainwa kutelekeshanga ne kukumbulapo umvwe ke bepuzhe mepuzho. Yesu naye byo byo aubile kimye kyo ajinga mu nzubo ya Lesa. Kabiji umvwe ke ube bino bintu, ukasangajikanga Lesa, byonka byaubile Yesu.

Abya wakonsha kuvulukapo banyike bakwabo batongolwa mu Baibolo basangajikanga muchima wa Lesa nyi?— Mwanyike umo wajinga Timoti. Bashanji kechi baitabijile mwi Yehoba ne. Pano bino bainanji ba Yunisa ne bankambo yanji babakazhi abo ba Loisa baitabijile. Timoti wamuyukile Yehoba kupichila mu kuteleka ne kufunda kwi abo.

Timoti byo akomene, mutumwa Paulo waile na kufwakasha mu muzhi mo aikalanga. Wamwene kuba’mba Timoti ukeba bingi kwingijila Yehoba. Paulo wamusendele Timoti kuba’mba bengijilenga pamo. Konse ko bayanga basapwilanga Bufumu bwa Lesa ku bantu ne kwamba pe Yesu.—Byubilo 16:1-5; 2 Timoti 1:5; 3:14, 15.

Nanchi mu Baibolo mujitu bya kumwenako bya bansongwalume bonka bonka basangajikile muchima wa Lesa nyi?— Ine. Akimona kamwale mwina Isalela wasangajikile Lesa. Mu yoya myaka, bena Silya ne bena Isalela kechi baumvwañananga ne. Juba jimo bena Silya balwile na bena Isalela kabiji basendele yewa kamwale mu buzha. Bamutwajile kwi Nemani, mukulumpe wa nzhita. Waikele ke kalume wa kwa muka Nemani.

Nemani waishile kubela kikola kya mbumba. Badokotala bonse bakankelwe kumubuka. Pano bino uno kamwale wayukile kuba’mba ngauzhi wa Lesa wakonsha kumubuka. Nangwa byonkabyo, Nemani ne mukazhanji kechi bapopwelanga Yehoba ne. Nanchi uno kamwale wibabujile bintu byo ayukile nyi? Inge wajinga obewa, umvwe waubile byepi?—

Uno kamwale waambile’mba: ‘Inge bankambo ba Nemani baya kuji ngauzhi wa Yehoba mu Isalela, wakonsha kwibabuka mbumba yabo.’ Nemani waumvwijile byaambile yewa kamwale, kabiji wayile ku ngauzhi wa Yehoba. Byo aubile bintu bya mubujile ngauzhi wa Lesa, wabukilwe. Kino kyalengejile Nemani kutendeka kupopwela Lesa wakine.—2 Bamfumu 5:1-15.

Nanchi ne obewa ukeba kufunjisha bantu biji Yehoba ne byo akonsha kuba, byonka byaubile yewa kamwale nyi? Ñanyi ye wakonsha kukwasha?— Ee, kimye kimo bakonsha kulanguluka amba kuba wibakwasha ne. Bino wakonsha kwisamba nabo pa bintu byawama byuba Yehoba. Bakonsha kukumvwa. Ee, kuba bino kwakonsha kusangajika Lesa.

Byambo bikwabo bitundaika banyike amba bafwainwa kwingijilanga Lesa bitanwa pa Salamo 122:1; 148:12,13; Musapwishi 12:1; 1 Timoti 4:12; ne Bahebelu 10:23-25.

[Bipikichala pa jipa 213]

Yesu byo akijingatu mwanyike wasangajikile byepi Lesa?

[Kipikichala pa jipa 215]

Nangwa kya kuba Bashanji kechi bajinga ba kalume ba Lesa ne, Timoti wakebelenga kuba ka?

[Kipikichala pa jipa 216]

Awe kamwale mwina Isalela wasangajikile byepi Lesa?