‘Atweba Kechi Twakonsha Kuleka Kwamba Ne’
1 Yesu Kilishitu ubena kusopa mwingilo wa kusapwila. (Mat. 28:20; Mako 13:10) Nangwa kya kuba paji bakataya mbila babambakana bafika pepi na 6 milyoni babena kusapwila mu byalo 234, kechi twafwainwa kulanguluka kuba’mba mwingilo wetu wa kusapwila wapwa ne. “Atweba kechi twakonsha kuleka kwamba” bintu byo twafunda ne, kana mwine Lesa akambe’mba mwingilo waingijiwa.—Byu. 4:20.
2 Ketekelai mu Mupashi wa kwa Lesa: Satana ukeba kwitulefula kupichila mu kwituletela makatazho. (Lum. 12:17) Mubiji wetu wa bumbulwakoloka naye wituyanjisha na makatazho avula. Bintu bya uno mutundu byakonsha kwitulengela kubula kuta mana ku mwingilo wetu mukatampe wa busapwishi. Nangwa kiji byonkabyo, umvwe twaketekela mwi Yehoba, mupashi wanji uketukwasha kushinda makatazho aji onse.
3 Kimye kyayanjishiwe kipwilo kya Bwina Kilishitu kya mu myaka-kitota kitanshi, balongo balombele kwi Lesa kuba’mba ebakwashe kwamba kyambo kyanji na kuchinchika. Yehoba wakumbwile lulombelo lwabo, kabiji wibakoseshe na mupashi wanji ne kwibapa wibapele kizaku ne bukose bwakebewenga kuba’mba batwajijile kusapwila. Kino kibalengejile kutwajijila kusapwila mambo awama na kuchinchika kwa kubula kubwela pa nyuma.—Byu. 4:29, 31; 5:42.
4 Kange Muchine Byambo bya Bubela ne: Byambo bya bubela bitubepela bantu byakonsha kwituchinya. Nangwa byonkabyo, vulukai mawi a kuchinchika a kwa Petelo ne batumwa bakwabo ku kije kya Saniedilini, anembwa pa Byubilo bya Batumwa 5:29-32. Byonka byaitabile Mufunjishi wa Mizhilo aye Ngamaliela, mwingilo wa kwa Lesa kechi wakonsha kuchakulwapo ne. Mambo kechi wingijiwa na bulume bwetu ne. Uno mwingilo mukatampe utundaikwa na Lesa, kabiji mwine ye wakonsha kumupwisha!—Zeka. 4:6.
5 Kimye kyonse tusashijilenga Yehoba kwitupa mupashi wanji wa kwitukwasha kusapwila mambo awama na kizaku. Twayai twambe byonka byaambile Yelemiya’mba mbila ya Bufumu iji nobe mujilo utema ye bashinkila mu bikupa byetu. (Yele. 20:9) Kuba twazhindamatu nzoo ne!