Kosaiko na Kusapwila
1 Ano ke moba akatazha. Malwañano a bantu bene, makondo a mishobo, bya malwa biponakotu bine, kabiji ne bintutu bikwabo bilengesha moyo byauba ne wo. Onkao mambo, kukilatu ne kala, luno bantu babena kukebewa mambo awama. Nangwa byonkabyo, misula ya kusula bintu bya ku mupashi ijitu konse. Mu mapunzha amo, kyakonsha kukatazha bingi kutana bantu pa mazubo. Kabiji kyakonsha kukatazha bingi kutana bantu bakonsha kwituteleka nangwa bakonsha kukeba kufunda Baibolo. Nangwa kiji bino, kyanema bingi kukosako na kusapwila mambo awama a Bufumu bwa Lesa bwaikajikwa.—Mat. 24:14.
2 Temwai Bantu: Mwingilo wetu wa kusapwila umwesha butemwe bwa Yehoba boatemwa bantu. Mambo aye kechi ‘usaka nangwa umo konaika ne, poso amba, bonse balapile.’ (2 Pe. 3:9; Ezi. 33:11) Onkao mambo, monka mwaambijile Yesu, Yehoba wakambizha’mba, ‘kyafwainwa ne mambo awama akasapwilwe patanshi ku mikoka yonse ya bantu.’ (Mako 13:10) Lesa ubena kusashijila bantu kumukeba kuba’mba bakapuluke malwa abena kwishila ntanda ya kwa Satana. (Yoe. 2:28, 29, 32; Zefwa. 2:2, 3) Nanchi kechi tusanta kuba’mba Yehoba witupa jino jishuko ne nyi?—1 Timo. 1:12, 13.
3 Sawakya wa ntanda yonse ubena kumwesha kuba’mba kimye kya mwaka wa mwingilo wa 2004, pepi nobe mafunjisho a Baibolo afika ku 6,085,387 afunjishiwenga pa ñondo pa ñondo, kabiji pepi nobe basapwishi 5,000 ba bukumo babatizwenga mulungu ne mulungu! Bamo ba mu bano basapwishi babukumo batanyiwe na mambo a kuba Yehoba wakwashishe basapwishi bebikilengako kwisamba na muntu uji yense mu nyaunda yabo yo bapewa. Kino byo kyabaishapo lusekelo lwa bipwilo, kabiji byo jijipo jishuko ja kwingijila pamo ne Lesa mu uno mwingilo wa kupulusha bantu!—1 Ko. 3:5, 6, 9.
4 Kutota Jizhina ja Lesa: Tutwajijila mu mwingilo wa kusapwila pa kuba’mba tutote Yehoba patoka ne kuzhijika jizhina janji ku bantu bonse. (Hebe. 13:15) Satana ‘wajimbaika ba panopantanda ponse’ kwitabila’mba Lesa kechi uji na bulume bwa kupwisha makatazho abena kupitamo bantu ne, kabiji amba kechi watako muchima ku buyanji bo babena kupitamo ne, nangwatu’mba kechi ko aji ne. (Lum. 12:9) Kupichila mu byo tusapwila, tuzhikijila bukine pa mambo a Shetu wawama wa mwiulu. Twayai tutwajijile kutota jizhina janji luno kabiji ne myaka ya pe.—Sala. 145:1, 2.