Bakyanyike Babena Kusama Pamo Nobe Byeya
1. Baibolo umwesha byepi kuba’mba bena Kilishitu bakekala bapusanako na bakwabo, kabiji bino byambo bilamata byepi bena Kilishitu bakyanyike lelo jino?
1 Yesu wabujile baana banji ba bwanga’mba: “Anweba mwi kyeya kya panopantanda.” (Mat. 5:14, 16) Byonka biji muzhi ye batungila pa mutumba ubena kubeka na mambo a kyeya, nabo bakekala bapusanako. Ano moba, bakyanyike bavula babena ‘kusama pamo nobe byeya panopantanda’ kupichila mu byubilo byabo byawama ne kusapwila na mukoyo.—Fili. 2:15; Mala. 3:18.
2. Mashinda ka amo o mwakonsha kusapwilamo bafunjishi ne bo mufunda nabo?
2 Pa Sukulu: Mwakonsha kusapwila byepi pa sukulu? Bakyanyike bamo bashukilwa misambo ikala mu sukulu pa mitwe ya kuba nobe, bizhima, bilengwa bilengeletu abyo bine, ne kuvila kwa bantu bavula mu makondo—kutongolapotu bicheche. Nyenga umo bamwambijile kunemba nsombelo pa bumbanzhi, kabiji waingijishe jino jishinda kupana bukamonyi pa mambo a Bufumu bwa Lesa amba bo bonkatu bwafwainwa kuketekela muntu. Mufunjishi watemenwe bingi nembelo yo anembejilemo uno nyenga sawakya, kabiji kino kyashinkwile jishinda ja kwisambilapo bintu bikwabo.
3. Mwakonsha kuleka byepi kyeya kyenu kusama pa sukulu kupichila mu byubilo byenu?
3 Jishinda jikwabo ja kusaminamo pamo nobe kyeya, ke kupichila mu byubilo byenu ne mvwajilo yawama ne mwekelo. (1 Ko. 4:9; 1 Timo. 2:9) Umvwe bo mufunda nabo ne bafunjishi bamona kuba’mba mwapusanako na bakwenu mu byubilo, bamo bakonsha kwiya mu bukine na mambo a byubilo byenu byawama kabiji ne kwimupa jishuko ja kwisamba nabo bukine bwa mu Baibolo. (1 Pe. 2:12; 3:1, 2) Kumwesha byubilo bya Lesa kwakonsha kukatazha bingi, pano bino Yehoba ukemupesha pakatampe. (1 Pe. 3:16, 17; 4:14) Pa kubaisha lusekelo mu bantu lwa mambo awama, mwakonsha kutanganga mabuku alumbulula Baibolo pa kukokoloka nangwa kusha patoka pa kuba’mba bantu beamonenga.
4. Mfweto ka ifuma mu kusapwila pa sukulu?
4 Kuleka kyeya kyenu kusamanga pa sukulu kukosesha lwitabilo lwenu ne kwimukwasha kwikala na muchima wa kwingijila Yehoba. (Yele. 9:24) Mu jishinda jikwabo kizhikijila bingi. Nyenga umo waambile’mba, “Kwamba pa lwitabilo lwami mufuma byawama mambo bakwetu mo tufunjila kechi bankanjikizha kuba bintu byakanya Baibolo ne.”
5. (a) Bakyanyike bamo babena kubaishako byepi mwingilo wabo? (b) Bikonkwanyi ka bya ku mupashi byo mwibikila?
5 Kubaishako Mwingilo: Jishinda jikwabo bakyanyike bavula mo babena kusamina pamo nobe byeya ke kupichila mu kubaishako mwingilo wabo. Panyuma ya kupwisha sukulu, mulongo umo wavilukijile kwajinga kukajilwa kukatampe kwa basapwishi ba Bufumu. Wajinga pa boba bajinga mu kipwilo kicheche kyajingatu na mukulumpe umo. Wanembejile mukwabo amba:“Kuno mbena kwiyowa bingi kabiji busapwishi nabo bubena kuwama bingi! Twisamba maminiti 20 pa nzubo iji yonse mambo bantu bavula kuno bakeba kumvwa ku byonse byo twibabula.” Wanungilepo kuba’mba: “Ndangulukapo bingi kuba’mba nanchi inge banyike bonse baubilenga kintu kiji nobe kino kabiji ne kumvwa byonka byo mbena kwiumvwa. Kafwako kyawama kukila kwingijila Yehoba na byonse byo tuji nabyo ne.”
6. Ki ka kimulengela kutemwa bakyanyike baji mu kipwilo kyenu?
6 Byo twimutemwapo anweba bakyanyike mubena kusama pamo nobe byeya panopantanda! (1 Tesa. 2:20) Byo mubena kwingijila Yehoba na muchima wenu yense, mweo wenu yense, milanguluko yenu yonse, ne na bulume bwenu bonse, mukanowa “mu yonka yino myaka kitota kya mu kintu kimo . . . kabiji ne mu myaka ikeya namo bumi bwa myaka.”—Mako 10:29, 30; 12:30.