“Kechi Mbena Kukeba Ne”
1 Bavula byo byo bakumbula ku byambo byetu mu mapunzha amo. Ki ka kiketukwasha kubula kulefulwa umvwe twatana bantu ba misula mu nyaunda? Twakonsha kulengela byepi bantu kutako muchima ku mambo awama?
2 Ikalai Balusekelo: Umvwe sa tuvuluka ene mambo bantu bavula o baikela na misula, kiketukwasha kwikala balusekelo. Bantu bafunjishiwe’mba bilengwa bilengeletu bine nangwa aba bakomejile mu bantu bamba’mba Lesa kafwako, kechi bayuka buneme bwa Baibolo ne. Bamo bakonsha kulefulwa na mambo a bukamfutumfutu bo bamona mu bupopweshi. Bakwabo nabo misula yabo iya na mambo a kulefulwa ne kubula luketekelo. (Efi. 2:12) Bamo na mambo a kunemenwa na bya kutabataba bya buno bwikalo, ‘kechi bayuka ne.’—Mat. 24:37-39.
3 Nangwa kya kuba bantu bamo bo tutana boba misula, twakonsha kwikala balusekelo mu mwingilo, sa twayuka kuba’mba kwibikako kwetu kutumbijika Yehoba. (1 Pe. 4:11) Kunungapo, kwamba pa mambo a bukine nangwatu ku boba babula kwibunemeka, kukosesha lwitabilo lwetu. Twayai twesekenga kumona bantu mu nyaunda yetu byonka Yehoba byo ebamona. Wibobile lusa bantu ba mu Ninevwa babujile “kuyuka mwapusena kuboko kwa kilujo na kwa kipiko.” (Yona 4:11) Bantu bekala mu nyaunda yetu bakebewa mambo awama! Onkao mambo, kechi twafwainwa kukoka ne, twafwainwa kukeba mashinda mwa kutundaikila bantu kutako muchima ku byambo bya mu Baibolo.
4 Isambai pa Bintu Bibena Kukatazha Bantu: Kampe mu byambo byenu bya kutendekelapo mwakonsha kutongolapo kintu kimo kibena kukatazha bantu mu nyaunda yenu kabiji ne kwipuzha mwina nzubo kwambapo milanguluko yanji. Telekai byo abena kwamba, apa bino mumubule byambo bya lutekenesho biji mu Baibolo pa kwisamba pa bintu byamukatazha. Panyuma ya kuponako malwa mu nyaunda imo, Kamonyi umo wapichilengamo ku nzubo ne nzubo na kwambañana na bantu pa oa malwa. Waambile’mba: “Ponkapotu, bantu bakasulukile kwambañana nabo. Nesambile na bantu bavula misambo yawama bingi pa joja juba mambo nebamwesheshe lusekelo.”
5 Makatazho aji onse o babena kupitamo bantu akafumishiwapo na Bufumu bwa Lesa. Esekai kumonapo lukatazho lumo lwakatazha mwina nzubo. Wakonsha kwimuswisha kulondolola byambo bya luketekelo biji mu Baibolo. Inge ne, wakonsha kutemwa kukomvwako “ne jibiji.”—Byubilo 17:32.