Kwashainga bo Mufunjisha Baibolo Kwikala Basapwishi ba Mambo Awama a Bufumu
1 Kwesakana na byaamba Mateo 28:19, 20, mwingilo Yesu ye apele baana banji ba bwanga wabayile bingi. Baana ba bwanga ba kwa Kilishitu bakambizhiwe kulenga baana ba bwanga bavula kuba’mba nabo bakatwajijile na mwingilo wa kulenga baana ba bwanga bakwabo. Mu jino jishinda, baajijile jimo kitendekesho kya kusapwila busapwishi bwa kapelampako bwa mambo awama a Bufumu bwa Lesa mwaya ntanda yonse mu kino kimye kya kumpelo kyo tujimo luno lo tubena kwamba.—Mat. 24:14.
2 Bantu bo tufunjisha Baibolo bakonsha kwikala baana betu nangwa bantutu bakwabo bakeba kufunda Baibolo ne atweba. Tukeba bingi kukwasha bano bantu kuyuka ne kufikizha mutembo wabo wa kukwasha bakwabo nabo kwikala baana ba bwanga ba kwa Yesu Kilishitu.—Luka 6:40.
3 Bakwashainga Kuyuka bya Kusapwila: Tundaikainga boba bo mufunjisha kubulako bakwabo bintu byo babena kufunda. Babulaingako bintu byawama byo mwataine mu mwingilo wa mu bujimi. Funjishainga baana benu kufumatu ku bwanyike kwingilako mu mwingilo kwesakana na papelela bulume bwabo. (Sala. 148:12, 13) Mweshainga mu byo mwamba ne mu byo muba amba mwamunemeka bingi uno mwingilo mu bwikalo bwenu.—1 Timo. 1:12.
4 Yehoba wingijishatu boba baswa ne kukokela mizhilo yanji yaoloka. Ibyo ee kuba’mba basapwishi bakatataka kechi bayuka byavula byonka byayuka bamwingilo ba Bufumu babandamo, bepana kabiji babatizwe kala ne, pano bino bafwainwa kwitabila ne kukonsha kulumbulula mafunjisho atanshi a mu Baibolo. (Monai buku wa Bakwatankana, pe. 79-82.) Byo bepatulako kikupu ku “Babilona Mukatampe” ne ku bya bumulwila ntanda byonse, bafwainwa kutanwanga ku kupwila kwa kipwilo kimye kyonse.—Lum. 18:2, 4; Yoa. 17:16; Hebe. 10:24, 25.
5 Aku mumonatu amba muntu ye mufunjisha Baibolo wafikilamo kwikala musapwishi wabula kubatizwa, mwakonsha kubula mukulumpe utangijila. Uno mukulumpe ukamonapo bakulumpe bakwabo babiji bakumonañana nenu pamo na ye mufunjisha Baibolo kuba’mba bamone kana awo muntu kine wafikilamo kwikala musapwishi wabula kubatizwa wa mambo awama a Bufumu wakwingijila pamo na kipwilo. Umvwe kyatanyiwa’mba wafikilamo kwikala musapwishi wabula kubatizwa, jikekala pano ke jishuko jenu jikatampe bingi ja kutwajijila na kumufunjisha pa kwingila nanji pamo mu mwingilo wa mu bujimi.