Mambo a Yehoba o Omi
Bishinka Bikatampe Kufuma mu Buku wa Bubiji wa Masalamo
ATWEBA bakalume ba Yehoba tupita bingi mu meseko. Mutumwa Paulo wanembele’mba: “Bonse bakeba kwikala na munema wa kunemeka Lesa mwi Kilishitu Yesu bakapatwanga.” (2 Timoti 3:12) Pa kuba’mba tumweshe’mba twibakishinka kwi Lesa, ki ka kyakonsha kwitukwasha kuchinchika meseko ne lupato?
Buku wa bubiji wa masalamo ye wakonsha kwitukwasha. Masalamo 42 kufika ku 72 amweshatu patoka’mba inge tukeba kuchinchika meseko, twafwainwa kuketekela mwi Yehoba na muchima wetu yense ne kumupembelela amba aketupulushe. Luno lufunjisho byo lwawamapo! Byonka bijitu byambo byonse bya Lesa, byambo biji mu Buku wa Bubiji wa Masalamo nabyo kine ‘byumi, ne kwingila bingila’ ano moba.—Bahebelu 4:12
YEHOBA YE “KYETU KYAKUFYAMAMO YE NGOVU YETU”
Mwina Levi umo wajinga mu buzha. Byo aumvwine ku muchima kutama na mambo a kuba’mba kechi wakonsheshe kuya ku nzubo yazhila na kupopwela Yehoba ne, witekeneshe aye mwine na bino byambo bya kuba’mba: “Obewa muchima wami, wapopomenwa ka? Ne kyo walukuchila munda kyo ki ka? Ketekela mwi Lesa.” (Masalamo 42:5, 11; 43:5) Kino kyepelo kyo kyanungakanya byambo bya mu Salamo 42 ne 43. Salamo 44 ke lulombelo lwa kulombelako Yuda mukoka wajinga mu lumanamo, kampe kimye kyo bamulukukile ku bena Asilya mu moba a Mfumu Hezekiya.
Salamo 45 ke lwimbo wa masongola a mfumu, byambo bya bungauzhi bya Bufumu bwa Bumesiasa. Kabiji masalamo 46, 47, ne 48 aamba pe Yehoba amba ‘kyakufyamamo kabiji ye ngovu,’ ye “Mfumu mukatampe wa panopantanda ponse,” kabiji amba ye “kyamba kya kunyemenamo.” (Masalamo 46:1; 47:2; 48:3) Salamo 49 wamweshatu patoka’mba muntu kechi “wakonsha kumukula mulongo wanji ne.” (Masalamo 49:7) Baana ba kwa Kola bo banembele masalamo onse atanu na asatu mu Buku wa Bubiji. Salamo wa butanu na buna, ko kuba’mba, Salamo 50, wanembelwe na Asafwa.
Mepuzho a mu Binembelo Akumbulwa:
44:19—Nga mpunzha ‘mwikala balubwala’ yo ika? Nyimbi wa Masalamo kampe waambilenga pa mpunzha po balwila nkondo, kya kuba aba baipaiwa baikala ke kajo ka balubwala.
45:13, 14a—“Mwana wa mukazhi wa mfumu ukatwalwa kuji mfumu” ye ñanyi? Ke mwana wa mukazhi wa “Mfumu wa myaka,” aye Yehoba Lesa. (Lumwekesho 15:3) Yehoba waalula kipwilo kya bena Kilishitu bashingwa na mupashi ba 144,000, ke baana banji, kabiji bo baimenwako na uno mwana wa mukazhi. (Loma 8:16) Uno “mwana wa mukazhi” wa kwa Yehoba, “wanengezhiwa jimo nobe musongwa wavwajila bulongo mwata wanji,” ukaletwa ku musongoshi ko kuba’mba Mfumu wa Bufumu bwa Bumesiasa.—Lumwekesho 21:2.
45:14b, 15—Nga “bazhike” bemenako bañanyi? Ke “jibumba jikatampe” ja bapopweshi bakine, benunga kabiji bakwasha bena Kilishitu bashingwa bashalapo. Byo bakafuma mu “malwa akatampe” saka baji bomi, bakatwajijila na kwikala panopantanda kimye kikobiwanga masongola a Mfumu wa Bufumu bwa Bumesiasa mwiulu. (Lumwekesho 7:9, 13, 14) Pa kyokya kimye, bakekala na ‘lusekelo kabiji bakasangalala.’
45:16—Mu ñanyi jishinda baana mo bakapingakena pajinga bashabo? Yesu byo asemenwe panopantanda, wajinga na bashanji ba bumuntu. Bakekala ke baana banji byo akebasangula kimye kyo Akalamanga Myaka Kiumbi Kimo. Bamo mu bano bakekala ke ba “bitumbafumu panopantanda ponse.”
50:2—Mambo ka Yelusalema o atelelwanga amba wa “buya bwalumbuluka?” Kino kechi kyajinga na mambo a byamwekanyikanga muzhi ne. Yelusalema wayile nkuwa mambo waingijishiwanga na Yehoba kabiji wajinga na buya mambo mo mwajinga nzubo ya Lesa kabiji ye wajinga muzhi wa bufumu.
Lufunjisho kotuji:
42:1-3. Byonka kasha mitumba kaji mu ntanda yauma byo koba kipemfu na kusakisha tukola twa mema, bena Levi nabo byo byo bakebelenga Yehoba. Byo byajinga ne bulanda bwa muntu wabulanga kutanwa pa nzubo ya Lesa mambo kechi wakonsheshe kupopwela Yehoba ne, onkao mambo ‘mipolo yanji yajingatu nobe kajo mute ne bufuku’ kabiji kechi wajinga na kijiika ne. Netuwa twafwainwa kupwilanga pamo na bakwetu na kupopwela Yehoba.
42:4, 5, 11; 43:3-5. Na mambo a makatazho, kimye kimo kampe twakonsha kwamuka ku kipwilo kya bwina Kilishitu pa ka kimye kacheche. Pano bino kuvuluka bintu byo twaubanga kwakonsha kwituletela bingi lusekelo. Nangwa kya kuba kwamuka ku kipwilo kwakonsha kwitulengela kumvwa mukose, kino kyonka kyakonsha ne kwituvululako amba Lesa ye kyetu kya kufyamamo kabiji twafwainwa kumupembelela.
46:1-3. Nangwatu tuponenwe na malwa a byepi nangwa byepi, twafwainwatu kwikala na luketekelo amba “Lesa ye kyetu kyakufyamamo, ye ngovu yetu.”
50:16-19. Yense wamba bya bujimbijimbi kabiji uba bintu byatama kechi wafwainwa kumwimenako Lesa ne.
50:20. Twafwainwa kulubakotu ku bilubo bya bakwetu kechi kuya na kulolobwela ne.—Kolose 3:13.
“OBEWA MUCHIMA WAMI UMUPEMBELELE LESA”
Ano masalamo atendeka na byambo bya lulombelo lwalombele Davida kimye kyo alengele mambo na Batesheba. Masalamo 52 kufika ku 57 amwesha’mba Yehoba ukapulusha aba bela bisendwa byabo koaji kabiji ne kupembelela amba ebapulushe. Byonka byo kyaambiwa mu Masalamo 58 kufika ku 64, kimye kyonse kyo ajinga mu malwa, Davida waketekejile mwi Yehoba. Waimbile’mba: “Obewa muchima wami, umupembelele Lesa yenka saka uzhindama; mambo luketekelo lwami luji mwi aye.”—Masalamo 62:5.
Umvwe twaikala balunda na Mupokolweshi wetu po po twakonsha ‘kwimba ya kutota lukumo lwa jizhina janji.’ (Masalamo 66:2) Mu Salamo 65, Yehoba watotwa amba mpanyi, kabiji mu Salamo 67 ne 68 amba upulushañana, mu Salamo 70 ne 71 amba Mupokolweshi.
Mepuzho a mu Binembelo Akumbulwa:
51:12—“Muchima wakoka” Davida ye alombelenga wajinga uba ñanyi? Kechi walombelenga kyaswa muchima wa Lesa nangwa mupashi wazhila wa Yehoba ne, wajinga muchima wanji aye mwine Davida. Walombelenga kwi Lesa amba amukwashe obenga byawama.
53:1—Mambo ka muntu ukana amba Lesa ufwako kyo ‘akosamina’? Kukosama kwaambiwapo kechi kubula maana ne. Byubilo bya muntu wakosama bimwekanyikatu patoka byonka byo kyaambiwa pa Salamo 53:1-4.
58:3-5—Mu ñanyi jishinda babi mo baikelatu nobe muloolo? Bubela bo babepela bakwabo bujitu nobe bulembe bwa muloolo. Batamisha mazhina a bakwabo. Byonka biji “kipiji ubula kumvwa,” babi kechi bomvwa byo bebabula ne.
58:7—Babi bakonsha kuzhimañana byepi “pamo nobe mema apita”? Davida kyamweka walangulukilenga pa mema a mu tukola twa mu Ntanda ya Mulaye. Nangwa kya kuba tuno tukola twayulangatu lelele, kechi twabandanga kuma ne. Ko kuba’mba Davida walombelenga’mba babi bapelawizhe kuzhimañana.
68:13—Nga ‘byapi bya bembe byakumbene byepi na siliva kabiji tumindwa twanji twakumbene byepi na ngolode ichila’? Minkufwe imo iji na tumayona twalezhima bingi pa byapi. Mayona onse abekaukatu nobe mabwe a buneme. Davida wafwainwa wafwanyikizhenga bena Isalela bafuminenga ku nkondo saka bashinda ku bembe, ñonyi utumbuka kuya miseke yalepa kabiji umwekanyika kitambo. Bashayuka bamo ba Baibolo bamba’mba bino byambo bingijishiwa ne ku mwingilo waingijiwa na mananka, nangwa munchinya ye basenda ke kipukulwa. Davida waambilenga pa bantu ba Yehoba byo bashinjile balwanyi babo.
68:18—Nga “bya bupe mukachi ka bantu” bajinga bañanyi? Bano bajinga banabalume basendelwe mu buzha kimye bena Isalela kyo bashinjilenga mizhi yajinga kipikipi na Ntanda ya Mulaye. Bano banabalume palutwe kacheche mwingilo wabo wajinga wa kukwashako bena Levi.—Ezela 8:20.
68:30—Nga lulombelo lwa kuba’mba “kanyai kijanyi kya mu matete” lwatala mwepi? Davida byo aambilenga pa balwanyi ba bantu ba Yehoba mu bukifwanyikizho amba kijanyi, walombelenga amba Lesa ebalengeshe bumvu, nangwa amba ebangate bulume bwa kuba byatama.
69:23—Nga byambo bya kuba’mba “mulenge misana yabo izakamenga” bilumbulula ka? Musana wingila mingilo yanema bingi nabiji kubandama pa kushikula kintu. Umvwe musana ke azakame ko kuba’mba bulume kafwako. Onkao mambo, Davida walombelenga amba bulume bwibazomboloke balwanyi banji.
Lufunjisho kotuji:
51:1-4, 17. Kulenga mambo kechi kupwisha bulunda bwetu na Yehoba Lesa ne. Umvwe twalapila, witubila bibusa.
51:5, 7-10. Umvwe twalenga mambo, twafwainwa kulomba lulekelo lwa mambo kwi Yehoba mambo twibandengamambo. Kabiji twafwainwa kumulomba amba etutokeshe ne kwitupupulula muchima kuba’mba tuleke byubilo byetu bya bundengamambo, ne kwikala na muchima washikimanatu.
51:18. Bundengamambo bwa kwa Davida bwabikile bumi bwa kisaka kyonse mu kizumba. Onkao mambo, walombele amba kyaswa muchima wa Lesa kyubiwe kwi Ziona. Umvwe twalenga mambo a bulala, kilengela jizhina ja Lesa ne kipwilo kunenwa mwenga. Twafwainwa kulomba kwi Lesa amba etulekeleko mambo.
52:8. Twakonsha kwikala nobe “kichi kyatalala kya olivi kiji mu nzubo ya Lesa,” ko kuba’mba kufwenya kwipi ne Yehoba saka twingila mwingilo wanji mu lukokelo ne kumvwina byo etukambizha.—Bahebelu 12:5, 6.
55:4, 5, 12-14, 16-18. Bukitu bwa mwananji Abisalomo ne bunsatuki bwa kwa Ahitofela bwalengejile muchima wa kwa Davida kutanta bingi. Pano bino, kino kechi kyamulengejile kuleka kuketekela mwi Yehoba ne. Kechi twafwainwa kuleka bya malwa kwitulengela kuleka kuketekela mwi Lesa ne.
55:22. Tumutwika byepi Yehoba bisendwa byetu? Tuba bino kupichila mu (1) kumubula bintu bibena kwitukatazha mu lulombelo, (2) kuketekela mu lutangijilo ne bukwasho bwa byambo ne jibumba janji, kabiji (3) kuba bintu byakonsha kupwisha lo lo lukatazho.—Byambo bya Mana 3:5, 6; 11:14; 15:22; Filipai 4:6, 7.
56:8. Yehoba wayuka makatazho onse o tupitamo.
62:11. Kafwako kintu kyonse kyakonsha kumupa bulume Lesa ne. Aye ye mwine wa bulume bonse. “Bulume bo bwa kwa Lesa.”
63:3. Lusa lwa Lesa “lwakila bumi mu kuwama” mambo kwakubula lusa lwa Lesa, bumi kuba bwawama ne. Onkao mambo kyanema bingi kwikala balunda na Yehoba.
63:6. Kimye kya bufuku kyo kimye kyawama kya kulanguluka langulukapo.
64:2-4. Miyebe itamisha jizhina ja muntu. Kechi twafwainwa kuteleka ku miyebe nangwa kwiisampanya ne.
69:4. Pa kuba’mba twikale mu mutende, kyawama bingi kulomba lulekelo lwa mambo, nangwa kya kuba kechi yetu twatamisha ne.
70:1-5. Yehoba umvwa lusashijilo lwetu. (1 Tesalonika 5:17; Yakoba 1:13; 2 Petelo 2:9) Lesa wakonsha kuswisha lweseko, pano bino witupa maana a kuyuka mwakubila ne byo twakonsha kuchinchika. Kechi uleka’mba tumone lweseko lwakila pa bulume bwetu ne.—1 Kolinda 10:13; Bahebelu 10:36; Yakoba 1:5-8.
71:5, 17. Davida waikele na bulume bwa kuchinchika mambo waketekejile mwi Yehoba kufuma ku bwanyike saka akyangye nangwa kwipaya Goliata kitonzhi wa bena Filishitiya ne. (1 Samwela 17:34-37) Bakyanyike bafwainwa kuketekela mwi Yehoba mu byonse byo boba.
“Panopantanda Ponse Payule na Lukumo Lwanji”
Lwimbo wapelako mu buku wa bubiji wa masalamo, mu Salamo 72, waamba pa bukalama bwa kwa Solomone, kabiji bumwesha bintu byo bikekala mu bukalama bwa kwa Mesiasa. Bintu byo bikawamapo kimye kya buno bukalama! Mambo mutende ukavula, bukapondo ne bumbazhi bikapwa, kabiji panopantanda pakekala kajo kavula bingi. Abya netuwa tukobilwako bino bibusa ne bintutu bikwabo bikobiwanga kimye kya buno bukalama nyi? Netuwa tukobilwa bibusa nobe nyimbi wa masalamo, umvwe saka tumupembelela Yehoba ne kumwalula ke kyetu kyakufyamamo.
“Milombelo ya Davida . . . yapwa” na byambo bya kuba’mba: “Atotwe Yehoba Lesa, Lesa wa Isalela, ye yenka uba bya kukumya. Kabiji jitotwe jizhina janji ja lukumo myaka ne myaka; Ne panopantanda ponse payule na lukumo lwanji. Amena ne Amena.” (Masalamo 72:18-20) Netuwa twayai tutotenga Yehoba na muchima wetu yense ne kutota jizhina janji ja lukumo.
[Kipikichala pa peja 9]
Nanchi mwayuka wafwanyikizhiwa ku “mwana wa mukazhi” wa mfumu nyi?
[Kipikichala pa peja 10]
Nanchi mwayuka Yelusalema kyo atelelwa’mba “buya bwalumbuluka” nyi?