Kabokoshi Ka Mepuzho
◼ Nanchi bamulume ne mukazhi bakonsha kunemba kimye kyo bengijisha pa lufunjisho lwa kisemi lubiwa kimye kyonse nyi?
Nangwa kya kuba nsemi wamulume ye uji na mutembo wa kukomesha baana “ne kwibafunjisha ne kwibajimuna monka mwaswila aye Nkambo,” bonse bamulume ne mukazhi bakonsha kufunjisha baana babo. (Efi. 6:4) Baibolo watundaika baana kuba’mba: “Mwanami, umvwa mafunde a bashobe, kabiji kechi ukane bikufunjisha bainobe ne.” (Mana. 1:8) Jishindatu jimo janema kufunjishishamo baana ke kwikala na lufunjisho lwa Baibolo lwa kisemi.
Kunyuma kwe, nsemi watangijilanga lufunjisho lwa kisemi na baana babula kubatizwa, ye wanembanga kimye nangwatu kya kuba bonse bamulume ne mukazhi bevwangangamo mu mwisambo. Nangwa byonkabyo, kino kyapimpulwa. Umvwe kimye kya lufunjisho lwa kisemi bonse babiji bamulume ne mukazhi babena kusunsapo pa kufunjisha baana, bonse babiji bakonsha kunemba awala umo pa mulungu umo pa sawakya wa mu mwingilo. Kya kine, bansemi bekala na kimye kyabaya bingi kukila pa awala umo mu mulungu na kufunjisha baana babo. Kufunjisha baana ke mwingilo bansemi bonse babiji ye bafwainwa kuba kimye kyonse. (Mpitu. 6:6-9) Nangwa byonkabyo, sawakya wa mu mwingilo wa pa ñondo pa ñondo wafwainwa kumweshatu kikatakata bibena kwingijiwa mwingilo wa mu bujimi. Onkao mambo, kechi mwafwainwa kubala kukila pa awala umo mu mulungu umo, nangwa kya kuba lufunjisho lwaubiwe pa kimye kyabaya, kutangijila kukila pa mulungu umo nangwa mwafunjishenga mwana bunke bunke ne. Nsemi umo ye wafwainwatu kubala lufunjisho lwa Baibolo ne kubwelako kumo mu mulungu umo mo mwafunjishishe lufunjisho.