Twajijilai Kuwamishako bya Kusapwila
1. Ñanyi bya kumwenako bya kala bimwesha kuba’mba twafwainwa kutwajijila kuwamishako bya kusapwila?
1 Bena Kilishitu bafwainwa kuwamishangako bya kusapwila. O ene mambo Yesu o atwajijile na kufunjisha baana banji ba bwanga bya kusapwila mu mwingilo. (Luka 9:1-5; 10:1-11) Kyo kyalengejile Akwila ne Pilisila kuya ne Apolosa ne “kumulumbulwila bulongo jishinda ja Lesa.” (Byu. 18:24-26) Kabiji Paulo naye watundaikile Timoti wayukile bya kusapwila bulongo kutesha muchima ku kufunjisha pa kuba’mba kuyilako palutwe kwanji “kumweke ku bantu bonse.” (1 Timo. 4:13-15) Nangwa kya kuba twaingijila Nkambo pa myaka yavula na kusapwila mambo awama, bino twafwainwa kutwajijila na kuwamishako bya kusapwila.
2. Twakonsha kuba byepi pa kuba’mba tufunjile ku bakwetu?
2 Funjilainga ku Bakwenu: Jishinda jimo jakonsha kwitukwasha kuwamishangako bya kusapwila ke kufunjila ku bakwetu. (Maana 27:17) Onkao mambo, teshaingako muchima inge ye mubena kwingila nanji ubena kusapwila. Ipuzhaiko basapwishi bayuka bulongo bya kwisamba na bantu mu mwingilo ne kutelekesha ku byo babena kwimubula. (Maana 1:5) Nanchi kechi mwayuka bya kubwela ku bantu, kutendeka lufunjisho lwa Baibolo nangwa mashindatu akwabo a kusapwilamo nenyi? Umvwe byobyo kiji, ipuzhai kalama wa jibumba ja mwingilo nangwa musapwishi wapilwa mu mwingilo. Yukai’mba mupashi wa Yehoba wakonsha kwitukwasha. Onkao mambo, lombainga mupashi wa Lesa kimye kyonse.—Luka 11:13.
3. Twafwainwa kuba byepi inge betubulako mwa kuwamishako, kampe kechi mwalomba ne bukwasho ne?
3 Umvwe musapwishi witubulako mo twafwainwa kuwamishako, kechi twafwainwa kuzhingila nangwa kya kuba kechi mwalomba bukwasho ne. (Sapwi. 7:9) Byonkatu byaubile Apolosa, tambwilai bukwasho ne kusanta. Kuba bino kumwesha amba muji na maana.—Maana 12:15.
4. Mambo ka o kyanemena kutwajijila na kuwamishangako bya kusapwila byonka byaambile Yesu?
4 Kuwamishako bya Kusapwila Kuleta Lukumo kwi Lesa: Yesu watundaikile baana banji ba bwanga kuwamishangako bya kusapwila kupichila mu kwingijisha kishimpi. Wiesakenye ku kichi kya muñanzañanza kabiji baana banji ba bwanga bashingwa ku misampi. Waambile’mba Batata batokesha musampi yense upanga bipangwa pa “kuba’mba apangenga bipangwa byavula.” (Yoa. 15:2) Byonkatu njimi wa miñanzañanza byo akeba amba misampi ipangenga miñanzañanza yavula, Yehoba naye ukeba’mba tutwajijile kuwamishangako bya kusapwila ne kufumya “bipangwa bya byatunwa byetu.” (Hebe. 13:15) Ñanyi bintu byawama bikafumamo inge twatwajijila na kuwamishako bya kusapwila? Yesu wakumbula amba: “Batata batumbijikilwa mu kyonka kino, kuba’mba anweba mupangenga bipangwa byavula.”—Yoa. 15:8.