Ambainga pa Bintu Byatemwa Bantu

Byaubanga Yesu

VIDYO: Yesu uji na Mwanamukazhi ku Mushima

1. Tambai VIDYO, nangwa tangai Yoano 4:6-9. Apa bino mwisambe ano mepuzho:

1. Ñanyi kintu Yesu kyo amwene patanshi kyaubilenga uno mwanamukazhi saka akyangye kutendeka kwisamba nanji?

2. Yesu waambile’mba: “Mpepo mema.” Mambo ka kutendeka mwisambo bino o kwawamijile?

Ñanyi Bintu byo Twafunjilako kwi Yesu?

2. Kitupeelela bingi kwisamba bulongo na bantu inge twasala mutwe ye batemwa.

Ubainga Byaubanga Yesu

3. Pimpulai pimpulainga mwisambo. Kange mukoselengatu kwisamba na bantu pa mutwe yenka ye mwaji kunengezha ne. Ambai pa bintu bibena kwambapo bantu pa jo jo juba. Iipuzhai’mba:

1. ‘Ñanyi bintu byamweka byo babena kwambapo pa waileshi nangwa pa TV?’

2. ‘Ñanyi bintu bibena kwambapo bantu bo ngikala nabo kipikipi, mo twingijila nkito nangwa bakwetu mo tufunjila sukulu?’

4. Monainga bintu byo biji. Iipuzhai’mba:

1. ‘Ñanyi bintu bibena kuba muntu pa kyokyo kimye kyo mwamutaana? Ñanyi bintu byo abena kulanguluka?’

2. ‘Nanchi mvwajilo ya muntu, mmwekelo yanji nangwatu nzubo yanji bibena kumbuulapo ñanyi bintu pa byo aitabilamo nangwa kisho kyanji?’

3. ‘Nanchi kino kyo kimye kyafwainwa kwisamba na uno muntu nyi?’

5. Telekainga.

1. Kange mulolobwelenga pa kwisamba na bantu ne.

2. Tundaikainga muntu ye mubena kwisamba nanji kwambapo. Inge kyakonsheka, mwipuzhaingako ne mepuzho akwabo.