Mu muzhi wa Uze mwajinga mwanamulume wapopwelanga Yehoba. Jizhina janji wajinga Yoba. Wajinga na kisemi kikatampe ne na bunonshi bwavula bingi. Wajinga na kifyele, kabiji wakwashanga bayanji, banabakazhi bafwilwa, ne baana bakishale. Nanchi kuba byawama kwamulengejile Yoba kubula kupita mu makatazho nyi?

Yoba kechi wayukile’mba Satana Diabola ubena kumumona ne. Yehoba waipwizhe Satana amba: ‘Wamumona kalume wami Yoba nyi? Pa ntanda kafwapo muntu uji nobe aye ne. Umvwa byo ñamba kabiji uba byawama kimye kyonse.’ Satana wakumbwile’mba: ‘Ibyo, Yoba wimukookela, mambo mumuzhikijila kabiji mwamupesha bingi. Mwamupa mpunzha pa kwikala ne banyama. Mwangatai bino byonse, ne aye ukaleka kwimwingijila.’ Yehoba waambijile Satana amba: ‘Mweseke. Pano bino, kange umwipaye ne.’ Mambo ka Yehoba o aswishishe Satana kweseka Yoba? Mambo washiinwe kuba’mba Yoba ukatwajijila kwikala wa kishinka.

Satana watendekele kuletela Yoba bya malwa byapusana pusana. Patanshi, walengejile bena Saba kwiba bañombe ne bambongolo ba kwa Yoba. Kabiji mujilo wasokele mikooko ya kwa Yoba yonse. Kyalondejilepo, jibumba ja bena Kalodeya jayibile bangamela banji. Bakalume balaminenga bano banyama bebepayile. Kepo Yoba atambwijile sawakya mukwabo watama bingi. Baana banji bonse bafwile mambo nzubo mo bajiijilenga kijiilo ibakundukijile. Uno sawakya waletejile Yoba bulanda bukatampe, bino Yoba kechi walekele kupopwela Yehoba ne.

Satana waletejile Yoba bya malwa bikwabo. Walengejile Yoba kwikala na bilonda mubiji yense, kabiji bino bilonda byakolelenga bingi. Yoba kechi wayukile kyalengejile’mba bintu byatama bimumwekelenga ne. Nangwa byonkabyo, Yoba watwajijile kupopwela Yehoba. Lesa wamwene byonse byamwekelenga, kabiji waumvwine bulongo mambo Yoba watwajijile kuba byawama.

Kufuma popo, Satana watumine banabalume basatu amba beseke Yoba. Bano banabalume baambijilenga Yoba amba: ‘Kampe paji mambo o walenga pano ubena kufya. Kyamweka Lesa ye wakukambula.’ Yoba waambile’mba: ‘Kafwapo mambo o nalenga ne.’ Pano bino, Yoba watendekele kulanguluka’mba Yehoba ye ubena kumuletela ano makatazho, kabiji waambile’mba Lesa ubena kumuba nshiji.

Kimye kyo baambilenga bino byonse, nsongwalume wa jizhina ja Elihu waikeletu nzoo saka ateleka. Kepo Elihu aambile’mba: ‘Byonse byo mubena kwamba kechi bya kine ne. Kafwako waesakana ne Yehoba ne. Yehoba kechi uba byatama ne. Umona byonse bimweka pano pa ntanda kabiji ukwasha bantu inge baji na makatazho.’

Kepo Yehoba aipwizhe Yoba amba: ‘Wajinga pi byo nalengelenga jiulu ne ntanda? Mambo ka o waambila’mba nakuba nshiji? Ubena kwambatu kwa kubula kuyuka kyalengela’mba bino bintu bimweke.’ Yoba waswile’mba byambo byanji byatamine. Kabiji waambile’mba; ‘Nalubankanya. Kala naumvwangatu pe anweba Lesa, pano luno nemuyuka bulongo. Kafwako kyo mwakonsha kukankalwa ne. Ndekelaiko mambo pa byo naambile.’

Makatazho a kwa Yoba onse byo apwile, Yehoba wabukile bilonda bya kwa Yoba ne kumupa bintu byavula kukila byo ajinga nabyo kala. Yoba waikele myaka yavula kabiji wajinga na lusekelo. Yehoba wamupesheshe mambo Yoba wamumvwinanga nangwatu inge uji na makatazho. Nanchi ne obewa ukeba kwikala nobe Yoba nyi? Ukeba kupopwelanga Yehoba nangwatu inge uji na makatazho nyi?

Mu Ijipita, kisemi kya kwa Yakoba batendekele kwikitela’mba bena Isalela. Byo papichile myaka yavula, Yakoba ne Yosefwa bafwile. Kabiji Felo ungi watendekele kulama kyalo kya Ijipita. Uno Felo wamwene’mba bena Isalela batendeka kuvula ne kwikala na ngovu kukila bena Ijipita. Onkao mambo, Felo walengejile bena Isalela kwikala bazha. Wibakanjikizhenga kufyatula matafwali ne kwingila mingilo yakosa mu majimi. Nangwa kya kuba bena Ijipita bamanyikilenga bena Isalela, bino bena Isalela bavujijilengakotu. Felo kechi watemenwe ne. Onkao mambo, wakambizhe’mba bena Isalela inge basema mwana wamulume, awo mwana bafwainwa kumwipaya. Kino kyalengejile bena Isalela kumvwa bingi moyo.

Kwajinga mwanamukazhi umo mwina Isalela. Jizhina janji wajinga Yokebeda. Yokebeda wasemene mwana wamulume walamba bingi. Kechi wakebelenga’mba mwananji bamwipaye ne. Wamubikile mu ntumbe ne kumufya mu matete a mu Mukola wa Nile. Kolojanji uno mwana wajinga Milyama, kabiji waimene ku mukola na kumona bisakumwekela uno mwana.

Mwana wa mukazhi wa kwa Felo byo aishile ku mukola na kowa, wamwene ino ntumbe. Byo amwene mwana mu ntumbe, waumvwine bingi lusa. Kepo Milyama amwipwizhe’mba: ‘Ngye na kwita mwana mukazhi wakonsha kwamisha uno mwana nyi?’ Mwana wa kwa Felo waambile’mba: ‘Ee, yanga.’ Ponkapo, Milyama wakechile bainanji, ba Yokebeda. Mwana wa kwa Felo wibambijile’mba: ‘Sendai uno mwana mumwamishenga. Nsakwimupanga mali.’

Uno mwana byo akomeneko, Yokebeda wamutwajile ku mwana wa mukazhi wa kwa Felo. Wamutumbile jizhina amba Mosesa ne kumukomeshatu nobe mwananji. Mosesa wakomenenga nobe mwana mfumu kabiji kechi wakajilwanga kintu nangwa kimo ne. Bino Mosesa kechi walubileko Yehoba ne. Wayukile’mba wajinga mwina Isalela, kechi mwina Ijipita ne. Kabiji wasajilepo kupopwela Yehoba.

Byo afikizhe myaka 40, Mosesa wafuukwilepo kukwasha balongo banji. Kimye kyo amwene mwina Ijipita ubena kupuma mwina Isalela muzha, Mosesa wapumine uno mwina Ijipita kya kuba wafwile ne kufwa. Mosesa wamutolele ne kumuzhika mu busenga. Felo pa kumvwa byamwekele, wakebelenga kwipaya Mosesa. Bino Mosesa wanyemene ne kuya ku kyalo kya Mijanyi. Akwa, Yehoba wamulaminenga.