Lufunjisho 17

Pa Kuba’mba Musungijile Mulunda, Mwafwainwa Kwikala Mulunda Nanji

Bulunda bwaimana pa butemwe. Inge mwafunda byavula pe Yehoba mukamutemwa pakatampe. Butemwe bwenu bwa kutemwa Lesa byo bukoma, lusako lwenu lwa kumwingijila nalo lukakomenako. Kino kikemutundaika kwikala mwana wa bwanga wa kwa Yesu Kilishitu. (Mateo 28:19) Kupichila mu kwinunga ku kisemi kya lusekelo kya Bakamonyi ba kwa Yehoba, mwakonsha kwikala na bulunda na Lesa myaka ne myaka. Nanchi kika kyo mwakonsha kuba?

Mwafwainwa kumwesha kuba’mba mwatemwa Lesa kupichila mu kulama mizhilo yanji. “Mambo kutemwa Lesa ko ko kuno, amba, tulame mikambizho yanji: kabiji mikambizho yanji kechi yakatazha ne.”—1 Yoano 5:3.

Ingijishai byo mufunda. Yesu washimikizhe kyano kimwesha kino. Muntu wa mana watungijile nzubo yanji pa jibwe. Bino muntu wakosama aye watungijile nzubo yanji pa musenga. Kipuupu kikatampe pakwiya, nzubo yatungijilwe pa jibwe kechi yakundukile ne, bino yatungijilwe pa musenga yo yakundukile. Yesu waambile kuba’mba aba bomvwa lufunjisho lwanji ne kwiluba bapasha muntu wa mana watungile nzubo pa jibwe. Bino aba bateleka ku lufunjisho lwanji ne kwilubane bapasha muntu wakosama watungile nzubo pa musenga. Ñanyi pa bano ye mukeba kupasha?—Mateo 7:24-27.

Kwipana. Kino kyatala mu kuba’mba mu lulombelo muya kwi Yehoba nakumubula kuba’mba mukeba kuba kyaswa muchima wanji myaka ne myaka. Kuba kyaswa muchima wa Lesa kumwesha kuba’mba mwi bana ba bwanga ba kwa Yesu.—Mateo 11:29.

Lubatizho. “Ubatizwe, owe bubi bobe, witenga pa jizhina janji.”—Byubilo bya Batumwa 22:16.

Mu kwingijila Lesa ivwangaimo pakatampe. “Byonse byo muba, nangwa ki ka, nangwa ki ka, ubai na muchima yense, nobe kwi Nkambo, kechi ku bantu ne.”—Kolose 3:23.