Byo Kilumbulula Kubula Kwivwanga mu bya Pano pa Ntanda

Yesu wafunjishe baana banji ba bwanga kuba’mba kechi bafwainwa “kwikala ba pano pa ntanda” ne. (Yoano 15:19) Kubula kwivwanga mu bya pano pa ntanda kulumbulula kubula kutundaika bya bumulwilantanda ne nkondo. Kwambatu kine, kyapeela bingi muntu kwivwanga mu bya pano pa ntanda. Bantu betwendeleka mambo kechi twivwanga mu bya pano pa ntanda ne. Twakonsha kuba byepi pa kuba’mba tubule kwivwanga mu bya pano pa ntanda ne kutwajijila kwikala bakishinka kwi Yehoba Lesa?

1. Nanchi bena Kilishitu ba kine bamona byepi makafulumende?

Bena Kilishitu banemeka makafulumende. Tulondela byonka byaambile Yesu kuba’mba “panai bintu bya kwa Kesala kwi Kesala,” ko kuba’mba tukookela mizhilo ya ntanda nabiji kupana misonko. (Mako 12:17) Baibolo witubuula’mba makafulumende a bantu abena kulama bantu mambo Yehoba ye wiaswisha. (Loma 13:1) Onkao mambo, twayuka’mba makafulumende a bantu kechi aji na bulume kukila Lesa ne. O ene mambo o twaketekela mwi Lesa ne mu Bufumu bwanji bwa mwiulu kuba’mba bo bukapwishatu makatazho onse abena kupitamo bantu.

2. Tumwesha byepi amba kechi twivwanga mu bya pano pa ntanda ne?

Byonkatu byajinga Yesu, ne atweba kechi twivwanga mu bya bumulwilantanda ne. Bantu byo bamwene Yesu na kuba bya kukumya bakebelenga’mba bamusale ekale mfumu wabo pano pa ntanda. Bino aye wakaine. (Yoano 6:15) Mambo ka o akanyijile? Wakaine mambo waambile’mba: “Bufumu bwami kechi bwa pano pa ntanda ne.” (Yoano 18:36) Byo tuji baana ba bwanga ba kwa Yesu, tumwesha mu mashinda apusana pusana amba kechi twivwanga mu bya pano pa ntanda ne. Atweba kechi tuya ku nkondo ne. (Tangai Mika 4:3.) Kabiji twanemeka mbandela, pano bino kechi twiipopwela ne. (1 Yoano 5:21) Kabiji atweba kechi tutundaika nangwa kushikwa kipanyi kimo nangwa muntu waimana kuba’mba bamusale ne. Onkao mambo, kubula kuba bino kumwesha’mba tubena kutundaika mu bukishinka kafulumende wa Lesa nangwa’mba Bufumu bwanji.

FUNJILAIPO BIKWABO

3. Bena Kilishitu ba kine kechi bevwanga mu bya pano pa ntanda ne

Yesu ne baana banji ba bwanga kechi bevwangilepo mu bya pano pa ntanda ne. Tangai Loma 13:1, 5-7 ne 1 Petelo 2:13, 14. Kabiji tambai VIDYO ne kwisamba ano mepuzho.

VIDYO: Bena Kilishitu ba Kine Kechi Bevwanga mu bya Pano pa Ntanda Ne—Lubaji 1 (4:28)

• Mambo ka o twafwainwa kunemekela makafulumende a bantu?

• Ñanyi mashinda amo mo tumweshesha’mba tunekenena makafulumende?

Mu kimye kya nkondo, byalo bimo byamba’mba kechi bivwanga mu nkondo ne, pano bino bikwashako byalo bikwabo kuba’mba bishinde. Nanchi kilumbulula ka kubula kwivwanga mu bya pano pa ntanda? Tangai Yoano 17:16. Kabiji tambai VIDYO ne kwisamba ano mepuzho.

VIDYO: Bena Kilishitu ba Kine Kechi Bevwanga mu bya Pano pa Ntanda Ne—Lubaji 2 (3:11)

• Nanchi kilumbulula ka kubula kwivwanga mu bya pano pa ntanda?

Mwafwainwa kuba byepi inge kafulumende ubena kwimukanjikizha kuba bintu bilala mizhilo ya Lesa? Tangai Byubilo 5:28, 29. Kabiji tambai VIDYO ne kwisamba ano mepuzho.

VIDYO: Bena Kilishitu ba Kine Kechi Bevwanga mu bya Pano pa Ntanda Ne—Lubaji 3 (1:18)

• Ñanyi ye twafwainwa kukookela inge mizhilo ya bantu yapusenamo na mizhilo ya Lesa?

• Ñanyi bintu bimo byakonsha kulengela bena Kilishitu kubula kukookela mizhilo ya kafulumende?

4. Kange mwivwangenga mu bya pano pa ntanda mu milanguluko ne mu byubilo byenu ne

Tangai 1 Yoano 5:21. Kabiji tambai VIDYO ne kwisamba ano mepuzho.

VIDYO: Ene Mambo Bena Kilishitu ba Kine o Bafwainwa Kubujila Kwikala na Moyo—Kubula Kwivwanga mu bya Pano pa Ntanda (2:49)

• Mu vidyo ye mwatamba, mambo ka ba Ayenge o babujijile kutwela mu kipanyi kya bumulwilantanda nangwa kupana mushingi ku mbandela?

• Mwalanguluka’mba kintu kyo baubile kyawamine nyi?

Ñanyi bintu bikwabo byakonsha kwitulengela kwivwanga mu bya pano pa ntanda? Tambai VIDYO, ne kwisamba ano mepuzho.

VIDYO: Byo Tufunjilako mu Kyamba kya Usopa—Twajijilai Kubula Kwivwanga mu bya Pano pa Ntanda mu Ino Ntanda Yaabenamo (5:16)

• Twakonsha kubula kwivwanga byepi mu bya pano pa ntanda inge tubena kutamba mpila?

• Twakonsha kubula kwivwanga byepi mu bya pano pa ntanda nangwa kya kuba bifuukulapo bamulwilantanda bilengela ne atweba kuyanjilamo?

• Nanchi kiketupeelela kubula kwivwanga mu bya pano pa ntanda inge kya kuba twatemwa kuteleka ku masawakya amba pa bamulwilantanda nangwa tupwanañana na bantu batemwa kwamba pa bya bumulwilantanda nyi?

ÑANYI BISHINKA BYO MWAFUNDA?

Bena Kilishitu bebikako bingi mu milanguluko, mu ñambilo ne mu byubilo byabo kubula kwivwanga mu bya pano pa ntanda.

Mepuzho a kupitulukamo

• Ñanyi bintu byo twafwainwa kupana ku makafulumende a bantu?

• Mambo ka o tubujila kwivwanga mu bya pano pa ntanda?

• Ñanyi bintu byakonsha kwitulengela kwivwanga mu bya pano pa ntanda?

KEBAI BISHINKA BIKWABO

Ñanyi bintu byo twafwainwa kuba pa kuba’mba tutwajijile kubula kwivwanga mu bya pano pa ntanda?

Yehoba Ukyangye Kundekelelapo Ne (3:14)

Ñanyi bintu byafwainwa kubanga bisemi bikebakwasha kubula kwivwanganga mu bya pano pa ntanda?

Twajijilai Kubula Kwivwanga mu bya Pano pa Ntanda Konse ko Muji (4:25)

Mambo ka o kyatamina muntu kulwilako kyalo kyanji?

“Kafwako Bintu Byakatazha kwi Lesa Ne” (5:19)

Monai bintu byafwainwa kwimukwasha kubula “kwikala ba pano pa ntanda” pa kusala nkito.

“Bonse pa Muntu pa Muntu, Bakasenda Bisendwa Byabo Bene au Kyanji au Kyanji” (Kyamba kya Usopa, April 1, 2006)