Kwingijila Pamo Kukwasha Kisemi Kukomenako ku Mupashi

KWINGIJILA pamo kukebewa bingi ku boba basaka kwikala na kisemi kya bumupashi. Yehoba byo alengele bamulume ne mukazhi batanshi, wamwesheshe buneme bwa kwingijila pamo. Evwa wafwainwe kwikala “nkwasho” wa kwa Adama. (Nte. 2:18) Masongola afwainwa kwikala a bulunda, kabiji ba mulume ne mukazhi bafwainwa kwingijila pamo ne kwikwasha. (Sapwi. 4:9-12) Bansemi ne baana bafwainwa kwingijila pamo pa kuba’mba bafikizhe mwingilo ye bebapa kwi Yehoba.

Kupopwela kwa Kisemi

Ba Barry ne ba Heidi baji na baana batanu. Bekimona kuba’mba kwikala na lufunjisho lwa Baibolo lwa kisemi kimye kyonse kwibakwasha kununguluka ku mupashi. Ba Barry baamba’mba: “Kimye kya lufunjisho lwa kisemi saka kikyangye kufika, mpana tumingilo tucheche ku baana pa kimye pa kimye. Nebambila kunengezha byambo bya kwambapo kufuma mu magazini wa Awake! Kabiji tunengezha ne bya kwamba mu mwingilo wa mu bujimi pa kuba’mba mwana yense ekale winengezha kwambapo.” Ba Heidi banungapo’mba: “Bonse bwetu twikala na bikonkwanyi bya ku mupashi byo tusaka kufikizha, kabiji tupituluka mu bino pa kimye ne kimye pa lufunjisho lwa kisemi ne kumona umvwe kisemi kibena kununguluka.” Bano bamulume ne mukazhi batana kuba’mba kwikalako na moba amo mu mulungu a kubula kutamba malangalanga kukwasha kisemi kwikala na kimye kya kutanga.

Kupwila Kwa Kipwilo

Ba Mike ne ba Denise bakomesha baana bana. Nga kisemi kyabo kyamwenejilemo byepi mu kwingijila pamo? Ba Mike baamba’mba: “Bimye bimo, nangwa kya kuba twanengezha bulongo kuya ku kupwila, lunengezho lwetu kechi lwingila bulongo ne, pano bino kwingijila pamo kwitukwasha kufika bukiji ku kupwila.” Ba Denise balumbulula’mba: “Baana byo bakomenenga, yense waikalanga na mwingilo wa kuba. Mwanetu wamukazhi wa jizhina ja Kim, watekanga ne kunengezha bya kuja.” Mwanabo wamulume wa jizhina ja Michael uvuluka’mba: “Pa Kibiji bufuku twaikalanga na lufunjisho lwa kipwilo mu nzubo yetu. Onkao mambo twawamishanga mu kibamba ne kutanchinka bipona bulongo.” Mwana mukwabo wa mulume wa jizhina ja Matthew, wanungilepo’mba: “Batata bafikanga bukiji pa nzubo kufuma ku nkito kwiya na kwitukwasha kwinengezha pa kuba’mba tutanweko.” Ki ka kyafuminemo?

Kikebewa Kwibikako

Ba Mike baamba’mba: “Mu 1987, ba Denise ne amiwa twatendekele bupainiya. Pa kyokya kimye, baana betu babalume basatu bakijinga pa nzubo. Baana babiji, wamulume ne wamukazhi nabo baikele bapainiya, bakwabo babalume baingijilenga mwingilo wa buntungi bwa pa Betele. Kintu kikwabo kituletela lusekelo mu kisemi ke byo twakwasha bantu makumi ana kwipana kwi Yehoba ne kubatizwa. Kabiji kisemi kyonse twajinga na jishuko ja kwingilako mwingilo wa buntungi, ne mu byalotu bikwabo.”

Kya kine, mu kwingijila pamo kisemi kyonse mufuma mfweto. Nanchi ne anweba mwakonsha kutanapo mashinda akwabo o mwakonsha kukwatankenamo bonse mu kisemi kyenu nyi? Mwakonsha kusumininwa kuba’mba kwingijila pamo kukakwasha kisemi kyenu kukomenako ku mupashi.

[Kipikichala pa peja 28]

Kunengezhezha jimo kukwasha bingi kuba bulongo mu mwingilo wa mu bujimi