“Baana Baji na Lūsa lwa Kukoma ku Mupashi”

PA 9 December 2008, kipamo kitala pa Lūsa lwa Baana ba Sukulu mu kyalo kya Sweden (Swedish Academy for the Rights of the Child) kyapwijile pamo na kwisamba pa mutwe wa kuba’mba “Baana Baji na Lūsa lwa Kukoma ku Mupashi.” Bañambi baimenejilengako Chechi ya ku Sweden, machechi akwabo a Kilishitendomu, ba Islam ne bipanyi bikwabo bichochekelepo bingi pa uno mutwe.

Pa bano bañambi pajinga ne ntangi wa mu bupopweshi waambile’mba: “Kafwako muntu wakonsha kulumbulula bulongo kya kine pa buneme bwa mashimikila a mu Baibolo byo akonsha kukwasha baana kukoma ku mupashi ne.” Pano nanchi bibaaba bya mu Binembelo bikwasha byepi baana ku mupashi?

Ntangi wa mu bupopweshi waambile’mba: “Baana bakonsha kulangulukapo bene bunke bwabo pa byo batanga mu Binembelo ne mashimikila.” Waambile pa “jishimikila ja kwa Adama ne Evwa, Kaina ne Abela, Davida ne Goliata, kusemwa kwa kwa Yesu, Zakyasa wajinga musonkeshi, kishimpi kya mwana walubile, ne mwina Samaliya.” Bino wibyambilepo kuba’mba o “mashimikila amo a kumwenako mu kukwasha [baana] pa byo bafwainwa kuba mu bwikalo mu byo balangulukapo pa mambo a bintu bimo nabiji bujimbijimbi, kulekelwa mambo, kushikwa, kutama kwa bintu, kupwanañana jibiji ne kutemwa balongo kya kine.” Wanungilepo amba: “Mu bino binembelo muji bintu byakonsha kukwasha muntu kupimpula bwikalo bwanji, kuba bintu byo atanga ne kushimikizhako bino bintu ku bantu bakwabo.”

Kya kine kuba’mba kijitu bulongo kutundaika muntu kutanganga Baibolo. Pano nanchi baana kine bakonsha “kulangulukapo bene bunke bwabo” pa byo batanga mu Binembelo ne kwibyumvwisha nyi?

Nangwatu bakulumpe nabo bakebewa kwibalumbulwila mwatala bibaaba bya mu Binembelo. Kyakumwenako, Baibolo witubula pa mwanamulume umo wakankelwe kwikala na bumupashi bwa kine na mambo a “kulangulukapo mwine bunke bwanji.” Uno mwanamulume wajinga kinemanga wa ku Etiopya. Watangilenga bungauzhi bwa kwa Isaya, pano kechi waumvwine mo bwatajile ne. Pakuba byo akebelenga kumvwa mwatajile byobya byambo bya kwa ngauzhi, waswile kumulondolwela ku mwana wa bwanga Filipa. (Byu. 8:26-40) Awa mwina Etiopya kechi ye yenka wakebelenga kumulumbulwila kuba’mba omvwe Binembelo ne. Atweba bonse, kikatakata baana, tukebewa kwitulumbulwila bulongo mwatala Binembelo.

Baibolo wajimunañana amba: “Kukosama kwakakachila mu muchima wa mwanyike.” (Mana. 22:15) Baana bakebewa kwibatangijila, kabiji bansemi babo baji na mutembo wa kwibapa lufunjisho lwa ku mubiji ne ku mupashi lwaimena pa Baibolo ne mafunjisho a mu kipwilo kya bwina Kilishitu. Baana baji na lūsa lwa kufunda. Kufumatu ku bwanyike bwabo, bakebewa kwibakwasha kuba’mba bayuke bulongo Baibolo pa kuba’mba bakomenengako ku mupashi ne kwikala ‘bakoma ... baji na maana alumbuluka a kupima ne kuyuka byawama ne byatama mambo a kupijila nabyo.’—Hebe. 5:14.