Kuchinchika Meseko Kwitulengejile Kuketekela mwi Yehoba

Byashimikizha ba Ada Dello Stritto

Po po napwishishetu kunemba byambo mu kabuku kami byo nafumishe mu kabuku ka kinembelo kya juba. Nji na myaka ya kusemwa 36, pano bino kunemba bino byambo bichechetu kwansendejile maola abiji. Mambo ka? Bamama basakulondolola ene mambo o kyaikejile bino.—Joel

AMIWA ne bamwatawami twabatizwe kwikala Bakamonyi ba kwa Yehoba mu 1968. Panyuma ya kwikala na baana babiji ba balume bajinga na butuntulu bwa mubiji, David ne Marc, twasemene mwana wamulume wa busatu, wa jizhina ja Joel. Wasemenwe mubishi mu 1973 ku kipatela mu taunyi wa Binche wa mu Belgium, nobe makilomita 60 ku kabeta ka ku bulenge bwa Brussels. Uno mwana wanemenetu makilogalamu 1.7. Byo betufumishe mu kipatela, twafwainwe kumuta bingi muchima Joel pa kuba’mba abayeko.

Byo papichile milungu icheche panyuma ya kuba twamona kuba amba uno mwana kechi ubena kukosa ne, amiwa ne bamwata wami ba Luigi twamutwajile kwi dokotala wa baana. Byo apwishishe kumupima Joel, dokotala waambile amba: “Kyatama bingi. Kyamweka Joel uji na lukatazho lwabulapo bakolojanji.” Byo aambile bino, twaubiletu nzoo. Pa kyokya kimye nayukile namba mwanetu wajinga na kikola kikatampe bingi. Ponkapo dokotala watwajile ba mwata wami kwabengakana ne kwibambila’mba: “Mwanenu wakolwa kikola kilubankanya bongo (trisomy 21),” kitelwa ne kuba amba Kikola kya Kulemanatu Mubiji Yense (Down syndrome).a

Na mambo a bino byambo bitubujile uno dokotala wa baana, twafukwilepo kumona dokotala mukwabo wayukisha. Wamupimine joel pepi na jiola jimo kwakubula kwamba kyambo nangwa kimo ne. Amiwa ne ba Luigi, twamwenengatu nobe kino kikola kechi kikapwa ne. Dokotala witutajile ne kwamba amba, “Mwanenu ukakebewanga bingi anweba kumukwasha.” Kepo aambile na kifyele amba, “Joel ukekalanga bingi na lusekelo mambo bansemi banji bamutemwa.” Bino byambo byo bitufikile pa muchima, twashikwile Joel ne kumusenda ku nzubo. Pa kyokya kimye saka ajitu na milungu itanu na isatu ya kusemwa.

Kupwila kwa Bwina Kilishitu ne Mwingilo Bitutundaikile Bingi

Byo bamupimine jikwabo ku kipatela bataine kuba’mba Joel wajinga na kikola kikwabo kya kulemana muchima, kabiji wajinga bingi na ngobe. Na mambo a kuba muchima wanji wabayile, wakunkwilenga ku mapwapwa, kabiji kino kyamuletelanga ne bikola bikwabo. Kechi papichile ne kimye kyabaya ne, byo afikizhe bañondo bana bakusemwa, Joel waikele na kikola kilengela kubula kupema bulongo na mambo a kushinka kwa mishipa ya ku mapwapwa, kabiji twabwelele jibiji ku kipatela ko bakamubikile mu mwanya. Twaumvwanga bingi bulanda umvwe twamona byo abena kumanama. Twasakanga bingi kumulela ne kumubukata, bino pa milungu jikumi yo akolelwe kechi betuswishishe kumukwata ne. Amiwa ne ba Luigi twamutalangatu, saka twikwata ne kulomba.

Byo twapichilenga mu ano malwa, twatwajijile kutanwa ku kupwila kwa kipwilo pamo ne David wajinga na myaka ya kusemwa itanu na umo ne Marc wajinga na myaka isatu. Umvwe tuji pa Nzubo ya Bufumu twaumvwangatu nobe tuji mu maboko a Yehoba. Maola o twaikalanga pamo na balongo ne banyenga yetu ba bwina Kilishitu, twaumvwangatu nobe twapana kisendwa kyetu kwi Yehoba, kabiji twakasulukanga bingi. (Sala. 55:22) Nangwatu bamanase basunganga Joel baambile amba bamwene kutanwa ku kupwila byo kwitukwashanga kuchinchika.

Kabiji nalombanga Yehoba kumpa bulume bwa kuya mu mwingilo. Mu kifulo kya kwikala pa nzubo na kujila, nasakanga kuya na kubulako bakwetu ene mambo kuketekela milaye ya Lesa ya ntanda ipya mukabula bikola byo kwankoseshe. Kimye kyonse kyo naingilangako mu mwingilo, namonanga kuba’mba Yehoba wakumbula milombelo yami.

“Kino Kintu ke kya Kukumya!”

Byo kituletejilepo lusekelo Joel byo bamufumishe mu kipatela! Juba jalondejilepo, twaikele na bulanda jibiji. Kikola kya kwa Joel kyaswezhezhe kabiji twamutwajile bukiji ku kipatela. Panyuma ya kumutalatala, dokotala witwambijile amba: “Joel washalatu na bañondo batanu na umo kuba’mba afwe.” Byo papichile bañondo babiji, byo ajinga na bañondo batanu na bana ba kusemwa, byaambile dokotala byamwekele nobe byajinga bya kine, mambo kikola kya kwa Joel kyabayile. Byo twisambilenga ne dokotala witwambijile amba: “Kyatama bingi. Kafwako mukwabo mo twakonsha kumukwashisha ne.” Kabiji wanungilepo amba: “Yehoba ye wakonshatu kumukwasha pa kino kimye.”

Nabwelele mu kibamba mwajinga Joel mu kipatela. Nangwa kya kuba najinga na bulanda ne kukoka, kechi nafumine kumwanya ko ajinga ne. Banyenga ba bwina Kilishitu bavula bepimpulanga kungikeshapo umvwe ba Luigi baya na kumona baana betu bakwabo ba balume babiji ku nzubo. Byo papichile mulungu, Joel wakolelwe kikola kya muchima. Bamanase banyemejile mu kibamba moajinga bino bakankelwe kumukwasha. Byo papichile ka kimye kacheche, manase umo waambile na jiwi ja munshi amba, “Pano kyapwa ...” Nakokele, kabiji natendekele kujila ne kulupuka mu kibamba. Naesekele kulomba kwi Yehoba, pano bino nakankelwe kulumbulula byo kyankolele. Byo papichile maminiti 15, waishile na kuñambila amba, “Joel waumvwako bulongo!” Kepo ankwachile ku kuboko ne kuñambila amba, “Pano twaya umumone.” Byo nayile kwi Joel, nataine kuba’mba ubena kupema jibiji. Kyafikenejiletu kuya nchuu! amba wapuupuluka. Bamanase ne badokotala baishile na kumumona, kabiji bavula baambile amba, “Kino kintu ke kya kukumya!”

Pa Myaka ya Kusemwa Ina, Waubile Kintu kya Kukumya

Kimye Joel kyo akijinga mwanyike, dokotala wa baana witwambilanga amba “Joel ukebewa kumutemwa bingi.” Amiwa ne ba Luigi kikatakata byo twamwene kuba’mba Yehoba witutele muchima pa kusemwa kwa kwa Joel, ne atweba twakebele kuta muchima mwanetu wa mulume. Twafwainwe kuba bino mambo wakebewanga kumukwasha mu byonse byo aubanga.

Pa myaka itanu na ibiji ya kusemwa kwa kwa Joel, twapitangatu mu makatazho antu amo. Pakachi ka ñondo wa Ntundwe ne Kisaka, waubangatu mwafuma kiki kikola mwaiya kikwabo, kabiji twakebewanga kumutwala ku kipatela javula. Kabiji nakebewanga ne kwikalako na kimye kya kuta muchima baana betu ba balume ba David ne Marc. Ne abo bamukwashanga bingi Joel pa kuba’mba akose, kabiji ne kukosa wakosele. Kyakumwenako, badokotala betwambilanga amba Joel kechi ukenda ne. Pano juba jimo byo ajinga na myaka ina ya kusemwa, Marc mwanetu wa mulume waambile amba, “Kosako Joel, bamweshe Bamama amba wakonsha kwenda.” Nobe mu kukopa kwa jiso, namwenetu Joel watendeka kutampula. Twatemenwe bingi, kabiji twalombejile pamo kisemi kyonse kwi Yehoba ne kumusanchila kufuma panshi ya michima yetu. Pa bimye bikwabo, twamusanchilanga bingi Joel umvwe ke ebikeko kuba bintu bimo byo abulanga kuba ne.

Kufunjisha Joel pe Lesa Kufuma ku Bwanyike Mwafuma Byawama

Javula twayanga ne Joel na kupwila ku Nzubo ya Bufumu. Pa kuba’mba tumuzhikijile ku twishi twakonsheshe kumulengela kukolwa, twamubikanga mu kakinga ka baana twazhikapo ne kipepala kya pulasitiki kyapulangila. Nangwa kya kuba twamuzhikanga bino, waumvwanga bingi bulongo kwikala pamo na kipwilo.

Balongo ne banyenga yetu bena Kilishitu betukoseshanga bingi, kwitutemwa kabiji ne kwitukwasha mu byo twakajilwanga. Mulongo umo wituvululangamo byambo biji pa Isaya 59:1 byaamba amba: “Umvwai, kuboko kwa Yehoba kechi kwaipipa amba kukankalwe kupulusha ne; kabiji kutwi kwanji kechi kwashinka amba kukankalwe kumvwa ne.” Bino byambo bitukwashishe kuketekela mwi Yehoba.

Joel byo akomenenga, twibikilengako kumukwasha kuba’mba akengijilenga Yehoba mu bwikalo bwanji. Kimye kyonse twisambanga nanji pe Yehoba mu jishinda ja kumukwasha kutemwa Shanji wa mwiulu. Twalombanga Yehoba kwitupesha pa kuba’mba bintu byo afundanga bikamukwashenga mu bwikalo bwanji.

Byo akijile pa myaka jikumi na ibiji, twatemenwe bingi pa kumona amba Joel ubena kubulako bantu bukine bwa mu Baibolo. Byo afikizhe myaka 14 ya kusemwa, ne butuntulu bwanji bwa mubiji byo bwayilenga na kuwama panyuma ya kumutumbula, naumvwine bingi bulongo juba jimo Joel byo anshikishe amba, “Mama, namupe dokotala utumbulañana buku wa kuba’mba Live Forever nyi? Byo papichiletu myaka icheche, Joel bafwainwe kumutumbula jibiji. Twamwene kuba’mba pano usakukafwa. Saka bakyangye kumutumbula, Joel wapele badokotala banji nkalata yo twanembejile nanji pamo. Yalondolwele lwitabilo lwanji pa mambo a kwingijisha mashi. Dokotala utumbulañana washikishe Joel amba, “Waswa nyi?” Joel wakumbwile amba, “Ee mwane ba Dokotala.” Twatemenwe bingi mwanetu wamulume byo aketekejile mwi Mulenga ne kusakisha kumutokesha ku muchima. Wa mwingilo mu kipatela wamukwashishe bingi, kabiji twamusanchijile kufuma panshi ya muchima.

Joel byo Anungulukile ku Mupashi

Byo afikizhe myaka ya kusemwa 17, Joel wamwesheshe kwipana kwanji kwi Lesa kupichila mu lubatizhilo lwa mu mema. Kechi tukalubamo jino juba ne. Twikala bingi balusekelo pa kumona byo abena kununguluka ku mupashi. Kufumatu pa kyokya kimye kufika ne lelo jino, butemwe bwanji pe Yehoba ne kizaku kyanji kya kukeba kuyuka bukine kechi byapwa ne. Ku bantu bonse bo asambakana, Joel watemwa kwamba amba, “Bukine bo bumi bwami!”

Byo anangijilenga ku myaka 20, Joel wafunjile kutanga ne kunemba. Kechi kyamupelejile kuba bino ne. Mambo wakabakananga bingi pa kubatu amba anembe kyambo kimo. Kufuma kyokya kimye, pa juba pa juba ubalaula kinembelo kya juba mu ka buku ka Kubalaula Binembelo Moba Onse. Panyuma ya bino, unemba bulongo bino binembelo mu kabuku kanji mo anemba bishinka, kabiji luno muji bishinka byawama bingi!

Moba a kupwila, Joel ukeba amba tuyenga bukiji ku Nzubo ya Bufumu pa kuba’mba emunenga bonse babena kutwela. Kimye kya kupwila, umvwa bingi bulongo kukumbulapo ne kubako bimwesho. Kabiji ukwasha kupana biñambañamba bya kwambilamo ne kwingilakotu mingilo ikwabo. Pa mulungu pa mulungu umvwe waumvwako bulongo, tuya nanji pamo mu mwingilo wa kusapwila. Mu mwaka wa 2007, Joel bamubijikile kuba’mba watongolwa kwikala nkwasho mu kipwilo. Twajijile mipolo ya lusekelo. Yehoba byo etupesheshepo mu lusa lwanji!

Tumona Bukwasho bwa Yehoba

Mu mwaka wa 1999, twapichile mu lweseko lukwabo. Motoka wetu bamupakile ku dalaivwa waendeshenga motoka wanji kutama, kabiji ba Luigi bebakozhezhe kyatama bingi. Bebachibile kulu kumo, kabiji bebatumbwile javula mulongololo. Kabiji kupichila mu kuketekela mwi Yehoba, twatambwijile bukwasho bo akwashapo bakalume banji bapita mu makatazho. (Fili. 4:13) Nangwa kya kuba ba Luigi balemana, tulangulukatu pa bintu byawama. Byo babula kukonsha kwingila mingilo ya ku mubiji, bekala na kimye kyabaya kya kusunga Joel. Kino kinkwasha bingi kwikala na kimye kyabaya kya kwingilako mingilo ya ku mupashi. Ba Luigi bata bingi muchima kisemi kyetu ku mupashi ne bobatu ba mu kipwilo, mo bengila mwingilo wa kukwatankanya mingilo ya bakulumpe mu kipwilo.

Na mambo a ano makatazho, twikala na kimye kyabaya kya kwisamba na kisemi. Pano luno twafunda kwesakanya bintu ne kutondwa na byonkatu byo tuji nabyo. Moba amo o tulefulwa, tumubula Yehoba byo tubena kwiumvwa mu lulombelo. Kya bulandatu ke kya kuba’mba, baana betu ba David ne Marc byo bakomene ne kutendeka kwiikela, bekilekele kwingijila Yehoba. Tulomba kuba’mba bakabwele jibiji kwi Yehoba.—Luka 15:17-24.

Pa myaka yonse ye, twamona bukwasho bwa Yehoba kabiji twafunda kuketekela mwi aye mu makatazho onse o tupitamo. Byambo bitutundaika ke byobya biji mu Isaya 41:13 byaamba amba: “Amiwa, Yehoba Lesa wobe, nkakukwata pa kuboko kwa kilujo; ye amiwa nakwambila namba: Kuba moyo ne; amiwa nkakukwasha.” Kitutekenesha bingi kuyuka kuba’mba Yehoba witukwata ku maboko. Kya kine, twakonsha kwamba na muchima yense kuba’mba kuchinchika meseko kwitukwashishe kuketekela mwi Shetu wa mwiulu, aye Yehoba.

[Tubyambo twa mushi]

[Bipikichala pa peja 16, 17]

Joel ne bainanji ba Ada

[Kipikichala pa peja 18]

Ba Ada, Joel, ne ba Luigi

[Kipikichala pa peja 19]

Joel umvwa bingi bulongo kutambwila balongo ne banyenga pa Nzubo ya Bufumu