Bantu Bepuzha’mba . . .
Mambo ka Lesa o aambijile Abalahama kulambula mwananji?
▪ Byonka byo kyanembwa mu buku wa mu Baibolo wa Ntendekelo, Yehoba Lesa waambijile Abalahama kulambula mwananji Izaka. (Ntendekelo 22:2) Bamo batanga Baibolo kibakatazha bingi kumvwisha jino jishimikila. Shayuka umo aye Carol waambile’mba: “Kimye kitanshi kyo naumvwine jino jishimikila sankijitu mwanyike, jamfichishe bingi ku muchima. Kandanguluke ne kuba’mba, Lesa wa mutundu ka wakonsha kwambila muntu kuba bino?” Nangwa kyakuba bantu bakonsha kulanguluka bino, kyanema bingi kuyuka bishinka ne byo kyajinga.
Kitanshi, langulukai pa byabujile kuba Yehoba. Kechi waswishishe Abalahama kulambula mwananji nangwa kya kuba winengezhe kuba bino ne. Kabiji Lesa kechi wa kyambilapo muntu mukwabo kuba bino ne. Yehoba ukeba bapopweshi banji bonse ne banyike pamo kutwajijila kwikala na bumi mu bwikalo bwawama.
Kishinka kya bubiji, Baibolo waamba kyamulengejile Yehoba kwambila Abalahama kulambula mwananji Izaka. Lesa wayukile kuba’mba pa kupitapo myaka yavula ukatuma Mwananji,a Yesu kwiya na kwitufwila atweba bonse. (Mateo 20:28) Yehoba wakebelenga’mba tuyuke kubaya kwa kitapisho kyo akapana. Wapaine kyakumwenako kya bikekala kitapisho kyo akapana kupichila mu byo aambijile Abalahama kuba. Mu ñanyi jishinda?
Akilangulukai pa byambo Yehoba byo aambijile Abalahama bya kuba’mba: “Utwale mwanobe, yenkawa ye watemwisha . . . ukamulambule ke mulambo wa kusoka.” (Ntendekelo 22:2) Yehoba waambile’mba, Izaka mwanobe “ye watemwisha.” Yehoba wayukile byo anemene Izaka kwi Abalahama. Kabiji Lesa wayukile byo eumvwinenga pa Mwananji, aye Yesu. Yehoba watemenwe bingi Yesu kyo kyalengejile kwamba pa bimye bibiji kufuma mwiulu amba: “Obewa wi Mwanami ye natemwa.”—Mako 1:11; 9:7.
Kabiji Yehoba wamwambijile Abalahama na mushingi. Shayuka umo wa Baibolo waambile’mba: “NKAMBO wayukile byakatezhe kyo amwambijile kuba.” Umvwe mwafwanyikizha byo kyajinga, kino kyafwainwa kyamuletejile bingi bulanda Abalahama. Kyo kimotu inge twafwanyikizha biumvwine Yehoba, kyamukolele bingi ku muchima pa kumona mwananji byo amanamine kufika ne ku lufu. Kyafwainwa kyo kintu kyakizhizhemo kumukozha ku muchima pa byonse byamwekele kala nangwatu bikamweka kulutwe.
Nangwa kya kuba Yehoba kyo aambijile Abalahama kuba kyakonsha kwitufichisha bingi ku muchima, kyanema bingi kuvuluka kuba’mba Yehoba kechi waswishishe uno mushakulu wakishinka kulambula mwananji ne. Wamukainye kuba kintu kikozha bingi bansemi ku muchima ne kuzhikijila Izaka ku lufu. Bino Yehoba “kechi wakaine kupana Mwananji ne, wamupaine na mambo a atweba bonse.” (Loma 8:32) Mambo ka Yehoba o aswishishe kintu kyamukozhezhe bingi ku muchima? Wamupaine “kuba amba tukekale na bumi.” (1 Yoano 4:9) Kino kintu kitulengela kuyuka Yehoba byo etutemwa. Nanchi kechi kitutundaika kumwesha byo twamutemwa nenyi?b
[Tubyambo twa mushi]
a Baibolo kechi ufunjisha’mba Lesa wajinga na mukazhi mo asemejile Yesu ne. Yehoba Lesa walengele kino kilengwa kya mupashi akyo kyo aishile kutuma pano pa ntanda kupichila mwi kisungu Maliya ne kusemwa. Byo aji Mulenga kyailamo kumutela Yehoba, amba Shetu.
b Pa kuba’mba muyukilepo byavula pa ene mambo lufu lwa kwa Yesu kyo lwanemena ne bya kumwesha lusanchilo, monai kitango 5 mu buku wa Nanchi Baibolo Kine Ufunjisha’mba Ka?