BAIBOLO UPIMPULA BWIKALO BWA BANTU

“Nashinchile bingi”

Byashimikizha ba Esa Leinonen

MWAKA WA KUSEMWA: 1960

KYALO: FINLAND

MWAPITA BWIKALO BWABO: NYIMBI WA NYIMBO YATAMA

MWAPITA BWIKALO: Nakomejile mu nyaunda ya ku kiito kya ku Turku mwajinga bayanji. Batata bakayanga kisela kya makofi kabiji bayile bingi nkuwa. Amiwa ne nkasami twatemenwe bingi kino kisela. Byo najinga ku sukulu natanwanga mu bulwi bwa makofi. Byo najinga ukitwala, natwelele mu kipanyi kya bantu babula kumvwa kabiji kino kyandetejile makatazho. Natendekele kwimba nyimbo yatama kabiji natonganga nkuya nkuwa mu bya bunyimbi.

Napotele ñoma ne kulenga kipanyi kya banyimbi. Kechi papichile ne kimye ne natendekele kutangijila jibumba ja banyimbi. Kabiji natemenwe bingi kuba nobe mukonye inge mbena kwimba pa mvula bantu. Na mambo a kuba’mba jibumba jetu jayile nkuwa, twajinga bingi na kanwa. Twatendekele kwimba pa mvula bantu. Twaimbileko nyimbo icheche, ayo imo yatemenwe bantu. Mu myaka yapeleleko ya mu ma 1980, twayile ku United States na kwimba pa kuba’mba jibumba jetu jiyukanyikwe. Twaimbileko pacheche mu New York ne mu Los Angeles kabiji twaumvwañene na bashayuka batala pa bya kwimba saka tukyangye kubwela ku Finland.

Nangwa kya kuba naumvwanga bulongo kwikala mu kipanyi kya banyimbi, nakebanga kuyuka kyakonsha kundetela lusekelo mu bwikalo bwami. Kechi natemenwe byubilo bya kwikyombesha byajinga na banyimbi bakwetu ne. Nalefwilwe na mambo a byubilo byami byatama. Neumvwanga kuba’mba najinga muntu watama kabiji nachinanga kupya mu mujilo wa helo. Naesekele kukeba pa byamba pa helo mu mabuku a bupopweshi apusana pusana. Nangwa kya kuba neumvwanga kuba’mba Lesa kechi wanta muchima ne, bino nalombele bingi kuba’mba ankwashe.

BAIBOLO BYO APIMPWILE BWIKALO BWAMI: Naingilanga ku ofweshi wa ku poshitako makalata, pa kuba’mba mwenengamo mwa kwikwashisha. Juba jimo nataine kuba’mba ye naingilanga nanji wajinga Kamonyi wa kwa Yehoba. Namushikishe mepuzho avula bingi. Mikumbu yanji yaimena pa Binembelo yamfikile pa muchima kabiji naswile kutendeka kufunda Baibolo ne aye. Panyuma ya kufunda pa milungu ibiji jibumba jo natangijilanga jajinga na mwingilo wa kufyatula selechi ku United States. Namwene kuba’mba kino ke kimye kya kumonapo mali mu bwikalo bwami.

Naambijile Kamonyi wamfunjishanga Baibolo kuba’mba mbena kukeba kulupula selechi umotu, bino pa nkatwajijile kulondela mafunde a mu Baibolo. Kechi waambile byo alangulukilenga ne, bino wañambijiletu kutanga byambo bya kwa Yesu byanembwa pa Mateo 6:24. Patangwa’mba: “Kafwako muntu wakonsha kwingijila bankambo babiji ne.” Nakuminye bingi pa kuyuka mwayijile byambo bya kwa Yesu. Pano bino pa kupitapo moba acheche, wamfunjishanga Baibolo wakuminye pa byo nafuukwilepo kuba. Ne mubujile amba naleka bunyimbi mambo mbena kukeba kwikala mwana wa bwanga wa kwa Yesu.

Baibolo waikele nobe kimbonyi kya kwimwenako patama. (Yakoba 1:22-25) Byubilo byami byatamine bingi, kabiji najinga wa bwitote. Najinga na ñambilo yatama, kanwa, kupepa ne kutoma bingi. Byo nayukile amba byubilo byami byapusenejilemo na mafunde a mu Baibolo, kyankolele bingi ku muchima. Nangwa kyakatezhe kuleka bino byubilo, nakebele kupimpula.—Efisesa 4:22-24.

Kimye kitanshi naumvwanga bingi bulanda pa byubilo byami byo naubanga. Kamonyi wafunjishanga Baibolo wankwashishe bingi. Wamwesheshe byamba Baibolo pa Isaya 1:18, amba “Nangwa mambo enu achilatu nge, akekala ke atokatu to nobe sino; nangwa achila nobe mashi, akekala ke pamo nobe boya bwa mukoko utoka.” Kino kyepelo ne bikwabo biji mu Baibolo byamfunjishe kuba’mba Shetu wa mwiulu uji na lusa, kabiji ulekela mambo a boba balapila kya kine.

Byo nayukile Yehoba ne butemwe bo aji nabo, nakebele kwipana bumi bwami ne kumwingijila. (Salamo 40:8) Pa kushonkena kwa kukonkana kwa byalo kwa Bakamonyi ba kwa Yehoba kwajingako mu 1992 mu St. Petersburg mu Russia, na batizhiwe.

BYO NAMWENAMO: Luno njina balunda bavula bingi mu bapopweshi ba kwa Yehoba. Inge papita kimye, tusambakana pamo ne kwimba nyimbo yawama na kwiyowa buno bupe bwa kwimba bwitupa Lesa. (Yakoba 1:17) Mapesho akwabo ke mwinakwami aye Kristina, ye natemwa bingi. Ne aye twapita mu bintu byavula bingi, byawama ne makatazho.

Umvwe ne kwikala Kamonyi wa kwa Yehoba ne, inge nafwiletu kala. Pa myaka ya kunyuma najinga na makatazho apusana pusana, pano luno nji bingi na lusekelo mu bwikalo.

[Kipikichala pa peja 8]

[Kipikichala pa peja 8]

[Byambo bya Muntu Ungi]

© Kaj Ewart

[Mabulañano pa peja 9]

“Shetu wa mwiulu uji na lusa, kabiji ulekela mambo aba balapila kya kine”