BAIBOLO UPIMPULA BWIKALO BWA BANTU
“Nakebelenga Kwikala Pulishiti”
Byashimikizha ba Roberto Pacheco
MWAKA WA KUSEMWA: 1957
KYALO: MEXICO
MWAPITA BWIKALO BWABO: UBENA KUFUNDA BYA BUPULISHITI; WA KANWA
MWAPITA BWIKALO: Nasemekejilwe mu muzhi mucheche wa Texcoco. Pa kyo kya kimye, mikwakwa kechi yajinga na taala ne. Bantu baletanga bya kupotesha pa ba mbongolo kufuma ku mizhi yajinga pepi. Mu kisemi kyetu twajinga 9 kabiji najinga wa butanu na bubiji. Bataata basonanga nkwabilo kabiji momo balaminanga kisemi. Bafwile saka nkiji na myaka 7. Kufuma kyokya kimye, bamaama kibakatazhanga bingi pa kukeba kajo ka kisemi.
Ba nkambo bajizhanga kidali kabiji batangijilanga jibumba ja banyimbi baimbanga nyimbo ya bupopweshi. Bavula bamu kisemi kyetu bajizhanga bijimba. Bamama baimbanga mu jibumba jiimba nyimbo ya ku chechi, kabiji bamwinsho baimbanga nyimbo kwingijisha kijimba kya piyano. Twajinga Bakatolika, kabiji najinga kampenga ne kusakisha kwikala mishonale wa Bakatolika. Pa kimye kimotu, natemenwe bingi kutamba mafilimu a bulwi bwa karate. Kuba bino, kwandengejile kwikala na kanwa bingi.
Mu muzhi wa Puebla natendekele kuya ku sukulu wa bupopweshi po bafunda bya bupulishiti. Nakebeshe bingi kwikala pulishiti wa mu kipwilo kya Katolika. Mu mwaka wapeleleko kufunda, nalefwilwe bingi na byubilo byajinga mu Chechi ya Katolika. Nsongwakazhi wa mu chechi watendekele kumfwalama. Nangwa kya kuba nakaine kulaala nanji, bino kyandetejile milanguluko ya kukeba kusongola. Nayukile amba bapulishiti bavula bajinga na byubilo bya bukamfutumfutu. Mu kuya kwa moba, nalekele kukeba kwikala pulishiti.
Nafuukwilepo kutendeka kufunda nyimbo pa sukulu wa National Conservatory of Music mu muzhi wa Mexico po bafunjisha bya kwimba nyimbo. Byo napwishishe sukulu, nasongwele kabiji kechi papichile ne kimye kyabaya ne twajinga na baana bana. Namwenanga kisemi mwakujiila kupichila mu kwimba nyimbo ya pa kusekelela kijiilo kyapeleleko kya kwa Kilishitu mu Chechi wa Katolika.
Kufuma kimye kyo twisongwele twajinga na makatazho bingi mu masongola etu. Amiwa ne mukazhami twalwangatu kimye kyonse na mambo a kwisungila mfika ku muchima. Kimye kitanshi twitoboshangatu, bino ko kyakayanga twatendekele ne kulwa. Panyuma ya myaka 13, twaabene kabiji mu kuya kwa moba twiikaine.
BAIBOLO BYO APIMPWILE BWIKALO BWAMI: Nasambakene na Bakamonyi ba kwa Yehoba saka tukyangye kwabana na bakazhi bami. Bakamonyi babiji baishile pa nzubo yami na kunsapwila. Nalangulukilenga amba nayuka byavula pa bya bupopweshi, onkao mambo nakebelenga kuba’mba bayuke amba byo baitabilamo byajinga bya bubela. Ne bepwizhenga mepuzho o namwenenga kuba’mba akatazha kukumbula. Kyankumishekotu, bakumbwilenga kwingijisha Baibolo. Popo namwene amba nayukakotu bicheche. Bakazhi bami bajinga bingi na bitaala ku Bakamonyi, kabiji ne amiwa kechi najinga na kimye ne, onkao mambo Bakamonyi bekilekele kwiya.
Byo papichile myaka 5, natendekele kwikala na mwanamukazhi mukwabo wa jizhina ja Elvira, kyo kimye kyo nasambakene jibiji Bakamonyi ba kwa Yehoba. Elvira kechi wakaine Bakamonyi ne, onkao mambo kyampelejile bingi kufunda Baibolo javula. Nangwa byonkabyo, papichile myaka yavula bingi pa kuba’mba mpimpule bwikalo bwami.
Inge mbena kukeba kumwingijila Yehoba na muchima yense, nafwainwa kupimpula bwikalo bwami. Kintu kitanshi kyo naubile, nalekele kwimba nyimbo ya pa kusekelela kijiilo kyapelako kya kwa Kilishitu mu Chechi wa Katolika, ko kuba’mba nafwainwe kukeba jishinda jikwabo mwakumwena. (Lumwekesho 18:4) Nakebelenga ne kunembesha masongola ami ne Elvira.
Kintu kimo kyankosejile ke kuyuka bya kuba na bukaji bo najinga nabo. Binembelo bya mu Baibolo byankwashishe bingi: Masalamo 11:5, waamba’mba Yehoba washikwa lupata, kabiji 1 Petelo 3:7, nafunjilepo kuba’mba inge mbena kukeba Yehoba kumvwa milombelo yami, nafwainwa kwikala na mushingi ku bakazhi. Byo nalangulukilenga pa bino byepelo ne kulomba bukwasho kwi Yehoba, nayukile bya kuba na bukaji bo najinga nabo.
BYO NAMWENAMO: Luno mu kisemi kyami muji bingi lusekelo. Mbena kukebesha bingi kubwezha bulunda na baana bami bo nasemejile mu mwanamukazhi mutanshi ne kukwasha kisemi kyami kukosesha bulunda ne Lesa.
Byo najinga mwanyike, nakebelenga kwikala pulishiti ne kukwashanga bantu. Pa kino kimye, nji bingi na lusekelo. Mwena mwakujila kupichila mu kufunjisha bya kwimba nyimbo. Namusanchila bingi Yehoba pa kuntekenya ne kunkwasha kuba’mba ngikale ke muntu wawama.
[Mabulañano pa peja 8]
Saka nji kampenga, nakebeshanga bingi kwikala mishonale wa ba Katolika, bino natemenwe bingi kutamba mafilimu a bulwi bwa karate kabiji andengejile kwikala na kanwa
[Mabulañano pa peja 9]
Baibolo wafunjishe kuba’mba inge mbena kukeba Yehoba kumvwa milombelo yami, nafwainwa kupa mushingi mukazhami