BAIBOLO UPIMPULA BWIKALO BWA BANTU

“Natendekele kulanguluka bingi pa bikekala bwikalo bwami kulutwe”

Byashimikizha ba Allan Hancock

MWAKA WA KUSEMWA: 1941

KYALO: AUSTRALIA

MWAPITA BWIKALO BWABO: KUPEPA FWANKA NE KUKIZHAMO KUTOMA MAALWA

MWAPITA BWIKALO: Nakomejile mu Warialda ka muzhi kacheche kaji mu kyalo kya New South Wales. Warialda ke muzhi mubiwa bya bunjimi byavula bingi nabiji kujima kajo ne kulela mikoko ne bañombe. Uno muzhi kechi mwavula bumbanzhi ne.

Na mambo a kuba’mba yami najinga mubeji mu kisemi kyetu mo twajinga jikumi, natendekele kwingila pa kuba’mba nkwashenga kisemi saka nkijitu na myaka 13. Byo kiji kuba’mba kechi nafunjile sukulu kufika palepa ne, naingilangatu mu majimi. Byo nafikizhe myaka 15, natendekele kwingila mwingilo wa kufunga bambili.

Kwingijila mu majimi wajinga mwingilo wavwangilemo byawama ne byatama. Kitanshitu, naumvwanga bingi bulongo kwingila uno mwingilo ne mpunzhatu ine. Kimye kimo, naikalanga ku mujilo kimye kya bufuku ne kutendeka kutala ñondo ne tubangabanga saka kubena kupupa ne kamwela. Kabiji nalangulukanga kuba’mba kwafwainwa kuji walengele bino bintu byonse byawama. Kintu kikwabo, natendekele kwikala na byubilo byatama byajinga na bantu mu majimi mo naingilanga. Javula naumvwanga saka bamba mwenga kabiji natendekele kupepa fwanka. Kupepa fwanka ne kwamba mwenga byo bintu byo natendekele kuba.

Byo nafikizhe myaka 18, nayile ku kyalo kya Sydney. Naesekele bingi kuba’mba ntwele nkito mu nzhita ya bashilikale, bino kechi banswishishe ne na mambo a kubula kufunda kufika palepa. Nangwa byonkabyo, nataine nkito mu Sydney ne kwikalamo mwaka umo. Pa kino kimye,popo nasambakene na Bakamonyi ba kwa Yehoba. Bangichile kuya na kutanwa kukupwila kwabo kabiji nayile. Mu kimyetu kicheche, nashiinwe kuba’mba byo bafunjishenga byajinga bya kine.

Kechi pabanjile ne kubandatu ne, nafuukwilepo jibiji kubwela mungye. Natendekele kwikala mu muzhi wa Goondiwindi mu Queensland. Natendekele kwingila, nasongola ne kusongola, pano bino kyataminekotu, natendekele kutoma jibiji.

Twajinga na baana babiji. Panyuma ya kwikala na baana babiji, natendekele kulanguluka bingi pa bikekala bwikalo bwami kulutwe. Navulukile bintu byo naumvwine pa kupwila kwa Bakamonyi mu Sydney kabiji kino kyandengejile kufuukula kubapo bimo.

Nataine Kyamba kya Usopa kya kala kyajinga na keyala wa ofweshi wa musampi wa Bakamonyi ba kwa Yehoba wa mu Australia. Nanembele nkalata kulomba muntu wa kunkwasha. Nobe mukukopatu kwa jiso, Kamonyi umo waishile na kumfwakesha, kabiji watendekele kumfunjisha Baibolo.

BAIBOLO BYO APIMPWILE BWIKALO BWAMI: Byo natwajijile na kufunda Baibolo, namwene kuba’mba nakebelenga kupimpula bwikalo bwami. Kyepelo kimo kya mu Baibolo kyamfikile bingi pa muchima ke kya 2 Kolinda 7:1. Akino kyepelo kitutundaika ‘kwitokesha ku bubipisho bonse bwa mubiji.’

Nafuukwilepo kuleka kupepa fwanka ne kutoma. Kechi kyapelele kuleka ne, mambo natendekele kala kuba bino byubilo. Pano bino, nakebeshe bingi kwikala bwikalo butokesha Lesa ku muchima. Kintu kikatampe kyankwashishe ke kulondela jifunde janembwa pa Loma 12:2 jaamba’mba: “Kechi mulondelenga mashinda a buno bwikalo ne, bino mwalulukenga kupichila mu kupimpula milanguluko yenu.” Navulukile kuba’mba pa kuba’mba mpimpule byubilo byami, nafwainwe kupimpula ndangulukilo yami ne kumona byubilo byami byonka Lesa byo ebimwenenga amba byatama. Na bukwasho bwanji, nalekele kupepa ne kutoma.

Nangwa byonkabyo, kyankatezhe kukilamo ke kuleka mwenga. Nayukile lujimuno lwa mu Baibolo lwanembwa mu Efisesa 4:29 lwaamba’mba: “Kechi muleke byambo byatama bilupuke mu kanwa kenu ne.” Bino kechi nafikenejiletu kuleka ñambilo yami ya mwenga ne. Kulangulukalanguluka pa byambo biji pa Isaya 40:26 kwankwashishe bingi. Kino kyepelo kyamba pa jiulu jayula tubangabanga amba: “Inukai, mutale kuno kwiulu, mumone. Ñanyi walengele bino? yenkaye wibisolola bya mwiulu byonse, saka ebibala ne kwibitela byonse pa mazhina; na mambo a bukata bwa ngovu yanji, ne na mambo a kukosa kwa bulume bwanji, kafwako nangwa kamo kabulwako ne.” Natendekele kulanguluka kuba’mba inge Lesa uji na bulume bwa kulenga bino bintu byonse, byawama byo neyowanga kutamba, ko kuba’mba wakonsha kumpa bulume bwakunkwasha kupimpula byubilo byami ne kumutokesha ku muchima. Na mambo a kwibikako ne kulomba na mukoyo, nalekele ñambilo ya mwenga.

BYO NAMWENAMO: Byo naingilanga mwingilo wa kufunga bambili, kechi naikalanga na kimye kya kwisamba na bantu ne, mambo mu majimi mo naingijilanga kwajingatu bantu bacheche. Bino kupichila mu kufunda ne bukwasho bo natambwijile pa kupwila kwa Bakamonyi ba kwa Yehoba, nafunda ñambilo yawama. Kabiji kununga pa bino, kuno kufunda kwankwasha kubulako bantu mambo awama a Bufumu bwa Lesa.—Mateo 6:9, 10; 24:14.

Pa myaka yavula yapitapo, nji na lusekelo bingi pa kwingila nobe mukulumpe mu kipwilo. Ke kintu kyanema bingi kukwasha bena Kilishitu ba kwetu. Ne bintu byawama byo namwenamo, ke kukwatankena pamo na mwinakwami wakishinka ne baana mu kwingijila Yehoba.

Nsanchila Yehoba pa kumfunjisha nangwa kya kuba kechi nafunda sukulu kufika palepa ne. (Isaya 54:13) Nashiinwa na byambo biji mu Byambo bya Mana 10:22 byaamba’mba: “Mapesho a Yehoba o alengela muntu kunonka.” Amiwa ne kisemi tutalatu kulutwe kufunjilapo bikwabo pe Yehoba ne kutwajijila na kumwingijila myaka ne myaka.

[Mabulañano pa peja 9]

“Naishile kuyuka amba pa kuba’mba pimpule byubilo byami, nafwainwe kwalula milanguluko yami”