Mambo Awama ku Bantu Bonse

Lusanguko lwa kwa Yesu lwalengejile baana banji ba bwanga kushiinwa ne kutundaikwa bingi. Mutumwa Paulo wapitañene monse mwaya kyalo kya Asha Maina ne Meditelanya kulenga bipwilo ne kukosesha bena Kilishitu kuba’mba bakose na mambo a meseko. Nangwa kya kuba kwajinga makatazho avula, bantu bavula baalukile ne kwikala bena Kilishitu.

Paulo bamutayile mu kaleya. Nangwa kya kuba bamukashile mu kaleya, wanembele makalata a kutundaika bena Kilishitu mu bipwilo. Wibajimwineko pa bantu basenduka mu lwitabilo. Na mambo a kuba’mba Paulo watangijilwe na mupashi wazhila wa Lesa, wayukijile jimo kuba’mba kukeya “misuka ikaji” na kufunjisha “mafunjisho aluwankana” akatwela mukachi kabo ne “kongola baana ba bwanga.”—Byubilo 20:29, 30.

Kitota kya myaka kitanshi byo kyapwile, bunsatuki bwatendekele. Pa kyokya kimye Yesu awo wasangukile wamwesheshe mutumwa Yoano Kimwesho kya bintu byo bikekala kulutwe. Byonka byanembeletu Yoano, bakajimbuluzhi nangwa amba bafunjishi babubela kechi balengejile Lesa kubula kufikizha byo akebelenga kubila bantu ne ntanda ne. Mambo awama a Bufumu bwa Lesa bakeomvwa “ku bisaka byonse, mikoka yonse, njimi yonse ne mitundu yonse ya bantu.” (Lumwekesho 14:6) Bonse bakeba kuba kyaswa muchima wa Lesa bakekala mu Paladisa ukabwela jibiji pano pa ntanda.

Nanchi bino byambo ke “mambo awama” kwi anweba ne nyi? Umvwe byobyo kiji, funjilaipo byambo bya Lesa bikwabo bikwasha bantu ano moba ne biji kulutwe bitanwa mu Baibolo.

Mwakonsha ne kwitangila Baibolo pa keyala wetu wa www.jw.org. Pa uno Keyala, mwakonsha ne kutanapo mabuloshuwa nabiji a kuba’mba The Bible—What Is Its Message?, Mambo Awama Afuma kwi Lesa! ne buku wa Nanchi Baibolo Kine Ufunjisha’mba Ka? ne mabukutu akwabo aamba pa ene mambo o twafwainwa kuketekela mu Baibolo ne byo twafwainwa kulondela mafunde ajimo akonsha kwitukwasha mu kisemi kyetu ne pa muntu pa muntu. Nangwa mwakonsha kwipuzha Bakamonyi ba kwa Yehoba pa kuba’mba muyukilepo byavula.

—Byafuma mu Byubilo, Efisesa, Filipai, Kolose, Filemonyi, 1 Yoano, Lumwekesho.