Bufumu bwa Lesa bo bu Ka?
Nanchi mwakonsha kukumbula’mba . . .
buji mukachi ka muchima wenu nyi?
ñambilo ya kifwanyikizho nyi?
inyi kafulumende wa mwiulu?
BAIBOLO WAAMBA’MBA
“Lesa wa mwiulu ukaleta bufumu bo bakabula konauna.”—Danyela 2:44, Binembelo bya Ntanda Ipya.
“Betupa mwana wa mulume; kabiji bakamupa bufumu.”—Isaya 9:6; tubyambo twa munshi.
KWITABILA BINO BYAMBO KUKEMUKWASHA MU BWIKALO BWENU
Kafulumende wawama ukemukwasha kumwenamo byawama.—Isaya 48:17, 18.
Mu ntanda ipya, bantu bakekala na butuntulu bwa mubiji bwalumbuluka, kabiji bakekala na lusekelo.—Lumwekesho 21:3, 4.
ABYA TWAKONSHA KWITABILA BYAMBO BIJI MU BAIBOLO NYI?
Ee, kuji bintu bibiji byakonsha kwitulengela kwitabila:
Yesu wamwesheshe bintu bikoba Bufumu bwa Lesa. Wafunjishe baana banji ba bwanga kulomba’mba Bufumu bwa Lesa bwiye, kabiji amba bube kyaswa muchima wa Lesa pano pa ntanda. (Mateo 6:9, 10) Byaubile Yesu bimwesha’mba Lesa ukakumbula luno lulombelo.
Yesu byo ajinga pano pa ntanda wajishishe bajinga na nzala, wabukile bakolelwe kabiji wasangwile bafu! (Mateo 15:29-38; Yoano 11:38-44) Yesu mfumu wa mu Bufumu bwa Lesa waubile bintu bimo Bufumu byo bukobila bangikazhi.—Lumwekesho 11:15.
Bintu bibena kumweka mu ntanda byamweshatu patoka’mba Bufumu bwa Lesa katataka bwiye. Yesu waambijile jimo amba Bufumu saka bukyangye kuleta mutende pano pa ntanda, mu ntanda mukekala makondo, bipowe bya nzala ne bitentanshi.—Mateo 24:3, 7.
Bino byonse tubena kwibimona ano moba. Onkao mambo, twakonsha kuswa’mba Bufumu bwa Lesa katatakatu bukafumyepo ano makatazho onse.
KYO MWAKONSHA KULANGULUKANGAPO
Tukekalanga byepi kimye kikalamanga Bufumu bwa Lesa?
Buno bwipuzho bwakumbulwa mu Baibolo mu SALAMO 37:29 ne mu ISAYA 65:21-23.