Bintu bikekala byepi kulutwe na lwendo?

BAIBOLO WAAMBA’MBA

“Lesa. . . ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”—Lumwekesho 21:3, 4, Binembelo bya Ntanda Ipya.

KWITABILA UNO MULAYE KUKEMUKWASHA MU BWIKALO BWENU

Mukengilanga mingilo yawama ne kwikala ba lusekelo.—Isaya 65:21-23.

Mukayuka kuba’mba kechi mukakolwanga nangwa kuyanda ne.—Isaya 25:8; 33:24.

Mukekalanga na lusekelo myaka ne myaka pamo na balongo benu ne balunda nenu.—Salamo 37:11, 29.

ABYA TWAKONSHA KWITABILA BYAMBO BIJI MU BAIBOLO NYI?

Ee, kuji bintu bibiji byakonsha kwitulengela kwitabila:

• Lesa uji na bulume bwa kufikizha kyo alaya. Mu Baibolo Yehoba Lesa bamutongola amba “wa Bulume Bonse,” mambo uji bingi na bulume. (Lumwekesho 15:3) Onkao mambo, ukafikizha mulaye wanji wa kupimpula ino ntanda kwikala yawama. Baibolo waamba’mba, “kwi Lesa bintu byonse kechi byakatazha ne.”—Mateo 19:26.

• Lesa usakisha kufikizha mulaye wanji. Yehoba ukebesha bingi kusangula bantu bafwa.—Yoba 14:14, 15.

  Kabiji Baibolo waamba’mba Mwana Lesa aye Yesu wabukile bakolelwe. Mambo ka kyo ebabukijile? Mambo wasakishe bingi kwibabuka. (Mako 1:40, 41) Yesu wasakishe bingi kukwasha bantu byonkatu biji Shanji.—Yoano 14:9.

  Onkao mambo, twafwainwa kuketekela’mba Yehoba ne Yesu bakeba kwitukwasha kabiji basaka atweba kukekala ba lusekelo kulutwe na lwendo.—Salamo 72:12-14; 145:16; 2 Petelo 3:9.