Ñanyi ubena kulama ntanda?

BAIBOLO WAAMBA’MBA

“Pano pa ntanda ponse paji mu bulume bwa kwa aye mubi.”—1 Yoano 5:19, Binembelo bya Ntanda Ipya.

‘Mwana Lesa waishile kuba amba onaune mingilo ya kwa Diabola.’—1 Yoano 3:8.

KWITABILA BINO BYAMBO KUKEMUKWASHA MU BWIKALO BWENU

Kyalengela makatazho aji mu ino ntanda.—Lumwekesho 12:12.

Kwitabila amba bintu bikawama kulutwe.—1 Yoano 2:17.

ABYA TWAKONSHA KWITABILA BYAMBO BIJI MU BAIBOLO NYI?

Ee, kuji bintu bisatu byakonsha kwitulengela kwitabila:

• Wakankalwa kulama. Yehoba ubena kusakisha bingi kuba’mba Satana aleke kulama bantu. Walaya amba, ‘ukafumyapo . . . Diabola.’ Kabiji ukawamisha byonse byaonauna Satana.—Bahebelu 2:14.

• Wasala Yesu Kilishitu kulama ino ntanda. Yesu wapusana bingi na kalama wakanama kabiji wa lwiso ubena kulama ino ntanda. Lesa witulaya’mba kalama aye Yesu, “Ukobila lusa mulanda ne muyanji . . . Ukebapokolola ku lumanamo ne ku bukapondo.”—Salamo 72:13, 14.

• Kechi ubepa ne. Bamwambapo mu Baibolo amba: “Lesa ubula kubepa.” (Titusa 1:2) Umvwe Yehoba walaya kintu kechi ukankalwa kwikifikizha ne. (Isaya 55:10, 11) “Mfumu wa pano pa ntanda bakamupangapo.”—Yoano 12:31.