Umvwe muntu wafwa, wakonsha kwikala mumi jibiji nyi?

BAIBOLO WAAMBA’MBA

“Kukekala lusanguko.”—Byubilo 24:15, Binembelo bya Ntanda Ipya.

KWITABILA BINO BYAMBO KUKEMUKWASHA MU BWIKALO BWENU

Umvwe twafwisha, kwitabila mu lusanguko kuketutekenesha.—2 Kolinda 1:3, 4.

Kuketulengela kubula kuchina lufu.—Bahebelu 2:15.

Tukekala na luketekelo lwakosa lwa kukamona balongo betu bafwa.​—Yoano 5:28, 29.

ABYA TWAKONSHA KWITABILA BYAMBO BIJI MU BAIBOLO NYI?

Ee, kuji bintu bisatu byakonsha kwitulengela kwitabila:

• Lesa ye walengele bumi. Baibolo wamba’mba Yehoba Lesa “ye upa bantu bonse bumi.” (Byubilo 17:24, 25; Salamo 36:9) Aye wapeele bintu byonse bumi uji na bulume bwa kusangula bantu bonse bafwa.

• Lesa wasangulapo kala bantu. Baibolo watongola banyike ne bakulumpe batanu na basatu Lesa bo asangwile ponka pano pa ntanda. Bamo wibasangwile saka bakyangye ne kwibazhika. Bino umo wamusangwile saka papita moba ana kufuma kimye kyo bamuzhikile!—Yoano 11:39-44.

• Lesa usakisha bingi kusangula bantu bafwa. Yehoba washikwa lufu; wayuka’mba lufu mulwanyi. (1 Kolinda 15:26) Ukebesha kufumyapo uno mulwanyi. Usa kukafumyapo lufu kupichila mu lusanguko. Ukeba kusangula bonse bo avuluka ne kumona’mba baikala ke bomi jibiji pano pa ntanda.—Yoba 14:14, 15.