Ayzak Mared Gud Uman

YU SABI udat na dis uman na di pikchɔ? Na in nem Ribɛka. Ɛn di man we i de kam mit na Ayzak. Na Ribɛka ɛn Ayzak de kam mared. Aw dis apin?

Ebraam bin want mek Ayzak mared gud uman. I nɔ bin want mek Ayzak mared uman na Kenan bikɔs di pipul dɛn na Kenan de wɔship lay lay gɔd dɛn. So Ebraam kɔl in savant ɛn tɛl am se: ‘A want mek yu go bak na Eran usay mi fambul dɛn de, ɛn fɛn wɛf fɔ Ayzak.’

Wantɛm wantɛm, Ebraam in savant tek tɛn kamɛl ɛn go dis lɔng patrol. We i dɔn rich nia di ples usay Ebraam in fambul dɛn de, i blo smɔl nia wan watawɛl. Na bin ivintɛm. Na dis tɛm ya di uman dɛn na di tɔŋ kin kam na di wɛl fɔ gɛt wata. So Ebraam in savant pre to Jiova se: ‘Mek di uman we go gi mi ɛn di kamɛl dɛn wata fɔ drink, bi di uman we yu dɔn pik fɔ bi Ayzak in wɛf.’

I nɔ tu te, Ribɛka kam na di wɛl fɔ kam gɛt wata. We di savant tɛl am fɔ gi am wata fɔ drink, i du am. I nɔ tap de, i gɛt wata fɔ ɔl di kamɛl dɛn. Dat nɔto izi wok fɔ du bikɔs kamɛl na animal we de drink bɔku bɔku wata.

We Ribɛka dɔn, Ebraam in savant aks am wetin na in papa in nem. Dɔn i aks am bak if i go ebul slip na dɛn os da nɛt de. Ribɛka se: ‘Na mi papa in nem Bɛtyuɛl, ɛn wi gɛt rum na wi os usay yu go slip.’ Ebraam in savant no se Bɛtyuɛl na Ebraam in brɔda we nem Neɔ, in pikin. So i nil dɔŋ ɛn tɛl Jiova tɛnki fɔ we Jiova dɔn mek i kam to Ebraam in fambul dɛn.

Da nɛt de, Ebraam in savant tɛl Bɛtyuɛl ɛn Ribɛka in brɔda we nem Leban, wetin mek i kam. We i tɛl dɛn, dɛn ɔl tu gri mek Ribɛka go wit Ebraam in savant ɛn mared Ayzak. Yu fil se Ribɛka gri fɔ go we dɛn aks am? Yɛs, i gri fɔ go. So di ɔda de, Ebraam in savant ɛn Ribɛka tek di kamɛl dɛn ɛn bigin di lɔng patrol fɔ go bak na Kenan.

Na ivintɛm dɛn rich. We dɛn rich, Ribɛka si wan man de waka na wan fil. Na bin Ayzak. I bin gladi fɔ si Ribɛka. I dɔn pas tri ia naw we Ayzak in mama day, ɛn dis bin mek in at pwɛl. Bɔt naw Ayzak dɔn gladi bak bikɔs i lɛk Ribɛka bad bad wan.