Jizɔs Lɛk Smɔl Pikin Dɛn

LUK Jizɔs we i ol di smɔl bɔbɔ. Dis de sho se Jizɔs bisin bɔt smɔl pikin dɛn. Na in apɔsul dɛn de wach am so. Wetin Jizɔs de tɛl dɛn? Lɛ wi si.

Jizɔs ɛn in disaypul dɛn jɔs dɔn kɔmɔt wan lɔng patrol. We dɛn bin de kam, di apɔsul dɛn bin de kam ɛn agyu. We dɛn rich, Jizɔs aks dɛn se: ‘Wetin una bin de kam ɛn agyu bɔt na rod?’ Jizɔs no wetin dɛn bin de agyu bɔt. Bɔt i aks dɛn fɔ lɛ i si if dɛn go tɛl am.

Di apɔsul dɛn nɔ ansa bikɔs dɛn bin de kam ɛn agyu bɔt uswan pan dɛn impɔtant pas dɛn ɔl. Sɔm pan di apɔsul dɛn want fɔ de oba dɛn kɔmpin dɛn. Aw Jizɔs go tɛl dɛn se i nɔ fayn fɔ lɛ pɔsin mek insɛf impɔtant pas in kɔmpin dɛn?

Jizɔs kɔl wan smɔl bɔbɔ, ɛn mek i tinap bifo dɛn ɔl. Dɔn i tɛl in disaypul dɛn se: ‘A want mek una no fɔ tru se, una nɔ go de na Gɔd in kiŋdɔm, if una nɔ chenj una we ɛn tan lɛk smɔl pikin. Di pɔsin we impɔtant pas ɔlman na Gɔd in kiŋdɔm, na di wan we mek insɛf lɛk dis smɔl pikin.’ Yu no wetin mek Jizɔs tɔk so?

Na bikɔs smɔl pikin dɛn nɔ want no if dɛn impɔtant pas ɔda pɔsin. So di apɔsul dɛn fɔ lan fɔ tan lɛk smɔl pikin, ɛn dɛn fɔ lɛf fɔ agyu bɔt udat impɔtant pas in kɔmpin.

Nɔto wan tɛm nɔmɔ Jizɔs sho se i bisin bɔt smɔl pikin dɛn. Afta sɔm tɛm, sɔm pipul dɛn kɛr dɛn pikin dɛn go to Jizɔs. Bɔt di apɔsul dɛn tray fɔ stɔp dɛn. Bɔt Jizɔs tɛl in apɔsul dɛn se: ‘Una lɛf di pikin dɛn lɛ dɛn kam to mi. Una nɔ stɔp dɛn, bikɔs na dɛn kayn pipul ya go de na Gɔd in kiŋdɔm.’ Dɔn Jizɔs ol di pikin dɛn, ɛn blɛs dɛn. Yu gladi fɔ no se Jizɔs lɛk smɔl pikin dɛn, nɔto so?