Aw fɔ Yuz Odio Rɛkɔdin Dɛn?
1. Apat frɔm di buk ɛn ɔda tin dɛn we de na wi Wɛbsayt fɔ rid, us ɔda tin dɛn de de we go bɛnifit wi?
1 Bɔku pipul dɛn kin lɛk fɔ yuz jw.org fɔ rid bɔt di fayn fayn tin dɛn we de insay Gɔd in Wɔd. (Ɛkli. 12:10) Bɔt yu dɔn ɛva yuz di odio rɛkɔdin dɛn? Dis go gi wi di chans fɔ lisin to bɔku tin dɛn we de na wi Wɛbsayt. Aw dɛn odio rɛkɔdin dɛn ya go bɛnifit wi?
2. Aw wi go yuz odio rɛkɔdin dɛn fɔ du pasɔnal stɔdi ɔ famili stɔdi?
2 Fɔ Pasɔnal Stɔdi ɔ Famili Stɔdi: We wi de lisin to odio rɛkɔdin dɛn frɔm di Baybul, frɔm magazin dɛn, frɔm ɛni buk ɛn ɔda tin dɛn we wi de travul ɔ we wi de du ɔda tin dɛn, dat go ɛp wi fɔ yuz wi tɛm di rayt we. (Ɛfi. 5:15, 16) Wi kin chenj di we aw wi de du wi famili wɔship bay we wi lisin to odio rɛkɔdin dɛn as wi de fala di ridin insay di buk. Wi go bɛnifit mɔ fɔ yuz odio rɛkɔdin we wi de du pasɔnal stɔdi if wi go want fɔ lan aw fɔ rid fayn ɔ if wi de lan nyu langwej.
3. Udat dɛn go bɛnifit frɔm di odio rɛkɔdin dɛn na di say usay wi de prich?
3 We Wi De Prich: Pipul dɛn we kin de na di say usay wi kin prich kin fil se dɛn tu bizi fɔ rid wi buk ɛn ɔda tin dɛn, bɔt dɛn kin want fɔ lisin to wi odio rɛkɔdin dɛn. Ɔ wi go mit pipul dɛn we de tɔk ɔda langwej ɛn we go rili want fɔ no mɔ if dɛn yɛri di gud nyus bɔt Gɔd in Kiŋdɔm insay dɛn “yon laŋwej.” (Di Apɔsul Dɛn Wok [Akt] 2:6-8) Na sɔm eria dɛn, pipul dɛn tink se i impɔtant fɔ lisin we ɔda pɔsin de tɔk. Fɔ ɛgzampul, we di Mɔng pipul dɛn kin want fɔ tɛl dɛn pikin dɛn bɔt dɛn istri, na tɔk dɛn kin tɔk to dɛn ɛn di pikin dɛn kin rili ebul fɔ mɛmba wetin dɛn de tɛl dɛn. Insay bɔku kɔntri dɛn na Afrika pipul dɛn kin lɛk fɔ lan bay we dɛn de lisin to stori.
4. Us kwɛstyɔn dɛn wi go aks wisɛf bɔt aw wi go ebul fɔ ɛp pipul dɛn na di say usay wi de prich?
4 Yu tink se i go bɛnifit di pipul dɛn we de na di say usay wi de prich if wi ple odio rɛkɔdin na dɛn langwej? Yu tink se pɔsin go bɛnifit frɔm wi odio rɛkɔdin dɛn if wi sɛn am tru imel to am? Wi kin dawnlod buk ɔ trakt we dɛn dɔn rɛkɔd, put am na CD ɛn gi am to pɔsin we wi de prich to, ɛn sɔntɛm wi kin ivin gi am di wan we dɛn dɔn print. Wi kin kɔnt ɛni ilɛktronik buk, magazin, ɔ trakt we wi gi pɔsin we wi de prich. Dɛn mek odio rɛkɔdin dɛn fɔ lɛ wi yuz dɛn we wi de du wi pasɔnal stɔdi ɛn fɔ plant di Kiŋdɔm sid na pipul dɛn at.—1 Kɔr. 3:6.