၃ မိၤၡ့

၁ ဒီးယဟိဝၤယွၤ ကိးန့ၢ်ဝဲစီၤမိၤၡ့ ဒီးတဲတၢ်ဒီးအီၤဖဲ တၢ်အိၣ်ဖှိၣ်အဒဲ+ ဒီးတဲအီၤလၢ ၂ “တဲဘၣ်​ ပှၤအံၣ်စရ့လးဖိလၢ ‘သုဝဲတဂၤဂၤ မ့ၢ်ကဟ့ၣ်လုၢ်ထီၣ်​ ဆၣ်ဖိကီၢ်ဖိအဒၢ တဒုဒု ဆူယဟိဝၤယွၤ အအိၣ်န့ၣ်​ သုဘၣ်ဟ့ၣ်လုၢ်ထီၣ်ကျီၢ်, သိ မ့တမ့ၢ် မဲာ်တဲးလဲးလီၤ.+

၃ “‘ပှၤတဂၤ မ့ၢ်ဟ့ၣ်လုၢ်ထီၣ်​ ကျီၢ်တဒု ဒ်တၢ်လုၢ်ဒွဲၣ်အူ အသိးန့ၣ်​ အဝဲ ကဘၣ်ဟ့ၣ်လုၢ်ထီၣ်​ ကျီၢ်ဖါတဒုလၢ အလၢအပှဲၤလီၤ.+ ဒီးအဝဲ ကဘၣ်ဟ့ၣ်လုၢ်ထီၣ်ဝဲလၢ တၢ်သးအိၣ်​ နီၢ်ကီၢ်အပူၤ+ လၢယဟိဝၤယွၤ အမဲာ်ညါ ဖဲတၢ်အိၣ်ဖှိၣ်အဒဲ အတၢ်နုာ်လီၤ အလီၢ်လီၤ. ၄ အဝဲကပာ်အစုလၢ ဆၣ်ဖိကီၢ်ဖိလၢ တၢ်ကလုၢ်ထီၣ်အီၤ ဒ်တၢ်လုၢ်ဒွဲၣ်အူန့ၣ်​ အခိၣ်လိၤ ဒီးကစၢ်ယွၤ ကတူၢ်လိာ် တၢ်လုၢ်အံၤ ဒီးကပျၢ်ကွံာ် အတၢ်ဒဲးဘးလီၤ.

၅ “‘ဒီးကျီၢ်ဖါဖိန့ၣ်​ ကဘၣ်တၢ်မၤသံအီၤ လၢယဟိဝၤယွၤ အမဲာ်ညါ ဒီးစီၤအၤဟရိၣ်​ အဖိခွါတဖၣ်​ လၢအမ့ၢ် ပှၤလုၢ်တၢ်ဒိၣ်န့ၣ်+ ကပာ်ဖျါထီၣ်​ တၢ်သွံၣ်လၢ ကစၢ်ယွၤ အမဲာ်ညါ ဒီးကဖှံဝဲ တၢ်သွံၣ်အံၤလၢ တၢ်လုၢ်လီၢ်အလိၤ ကိးကပၤဒဲး+ ဖဲတၢ်အိၣ်ဖှိၣ်အဒဲ အတၢ်နုာ်လီၤ အလီၢ်လီၤ. ၆ ဒီးဆၣ်ဖိကီၢ်ဖိလၢ တၢ်လုၢ်ဒွဲၣ်အူအဂီၢ်န့ၣ်​ ပှၤကဘၣ်​ ကုၣ်ကွံာ်အဘ့ၣ်​ ဒီးဒီၣ်တဲာ်အီၤ တကူာ်တကူာ်လီၤ.+ ၇ ဒီးစီၤအၤဟရိၣ်​ အဖိခွါတဖၣ်​ လၢအမ့ၢ် ပှၤလုၢ်တၢ်ဒိၣ်န့ၣ်​ ကဘၣ်ပာ်လီၤ မ့ၣ်အူလၢ တၢ်လုၢ်လီၢ် အဖီခိၣ်+ ဒီးရဲၣ်လီၤ သ့ၣ်မုၣ်လၢမ့ၣ်အူ အဖီခိၣ်လီၤ. ၈ ဒီးစီၤအၤဟရိၣ်​ အဖိခွါတဖၣ်​ လၢအမ့ၢ် ပှၤလုၢ်တၢ်ဒိၣ်န့ၣ်​ ကရဲၣ်လီၤ ဆၣ်ဖိကီၢ်ဖိအံၤ အကူာ်တဖၣ်+ ဃုာ်ဒီးအခိၣ်သၣ်ဃံ ဒီးအသိလၢ သ့ၣ်မုၣ်လၢ အကဲၤအလိၤလၢ တၢ်လုၢ်လီၢ် အဖီခိၣ်လီၤ. ၉ ဒီးအပှံာ် ဒီးအခီၣ်န့ၣ်* ကဘၣ်တၢ်သ့အီၤလၢထံ ဒီးဒ်အမ့ၢ် တၢ်လုၢ်ဒွဲၣ်အူအသိး ပှၤလုၢ်တၢ်ဒိၣ်​ ကဘၣ်ဒွဲၣ်အူထီၣ်ဝဲ ခဲလၢာ်လၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ. ဒီးအမ့ၢ်ဝဲ တၢ်လုၢ်လၢမ့ၣ်အူ ဒီးကဲထီၣ်​ တၢ်နၢမူလၢ အမၤမုာ် ယဟိဝၤယွၤ အသးလီၤ.+

၁၀ “‘အဝဲမ့ၢ်ဟ့ၣ်လုၢ်ထီၣ်​ သိ မ့တမ့ၢ် မဲာ်တဲးလဲး ဒ်တၢ်လုၢ်ဒွဲၣ်အူ အသိးန့ၣ်+ အဝဲကဘၣ်​ ဟ့ၣ်လုၢ်ထီၣ်​ အဖါတဒုလၢ အလၢအပှဲၤလီၤ.+ ၁၁ ဒီးပှၤကဘၣ်မၤသံအီၤလၢ တၢ်လုၢ်လီၢ် အကလံၤစိး တကပၤ လၢယဟိဝၤယွၤ အမဲာ်ညါလီၤ. ဒီးစီၤအၤဟရိၣ်​ အဖိခွါတဖၣ်​ လၢအမ့ၢ် ပှၤလုၢ်တၢ်ဒိၣ်န့ၣ်​ ကဖှံဝဲ တၢ်သွံၣ်အံၤလၢ တၢ်လုၢ်လီၢ်အလိၤ ကိးကပၤဒဲးလီၤ.+ ၁၂ ဒီးအဝဲ ကဒီၣ်တဲာ်ဝဲ တကူာ်တကူာ် ဒီးပှၤလုၢ်တၢ်ဒိၣ်​ ကရဲၣ်လီၤ တၢ်အကူာ်အခီတဖၣ်အံၤ ဃုာ်ဒီး အခိၣ်သၣ်ဃံ ဒီးအသိလၢ သ့ၣ်မုၣ်လၢ အကဲၤအလိၤလၢ တၢ်လုၢ်လီၢ် အဖီခိၣ်လီၤ. ၁၃ အဝဲကသ့ဝဲ အပှံာ် ဒီးအခီၣ်လၢထံ ဒီးပှၤလုၢ်တၢ်ဒိၣ်​ ကဟ့ၣ်လုၢ်ထီၣ်အီၤခဲလၢာ် ဒီးဒွဲၣ်အူထီၣ်အီၤလၢ တၢ်လုၢ်လီၢ်အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ. အမ့ၢ်ဝဲ တၢ်လုၢ်ဒွဲၣ်အူ ဒီးတၢ်လုၢ်လၢမ့ၣ်အူ ဒီးကဲထီၣ်​ တၢ်နၢမူလၢ အမၤမုာ် ယဟိဝၤယွၤ အသးလီၤ.

၁၄ “‘ဘၣ်ဆၣ်​ အဝဲ မ့ၢ်လုၢ်ထီၣ်ဝဲ ထိၣ်တဖၣ်​ ဒ်တၢ်လုၢ်ဒွဲၣ်အူအသိး လၢယဟိဝၤယွၤ အအိၣ်န့ၣ်​ အဝဲကဘၣ်​ ဟ့ၣ်လုၢ်ထီၣ်ဝဲ ထိၣ်လွံၢ်တဖၣ်​ မ့တမ့ၢ် ထိၣ်ကးက့ၣ်ဖိတဖၣ်လီၤ.+ ၁၅ ပှၤလုၢ်တၢ်ဒိၣ်​ ကဘၣ်ဟ့ၣ်လုၢ်ထီၣ်အီၤလၢ တၢ်လုၢ်လီၢ် ဒီးကစိၢ်တဲာ် အကိာ်ယူၢ်ဘိ ဒီးဒုးယွၤလီၤ အသွံၣ်လၢ တၢ်လုၢ်လီၢ် အဒူၣ်ကပၤ ဝံၤဒီး ဒွဲၣ်အူထီၣ်အီၤလၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ. ၁၆ အဝဲကဘၣ်​ ထုးထီၣ်ကွံာ် အကနံ ဒီးထဲးထီၣ်ကွံာ် အဆူၣ်​ ဒီးကွံာ်လီၤဝဲလၢ တၢ်လုၢ်လီၢ်ကပၤလၢ မုၢ်ထီၣ်တခီ လၢဖၣ်ဆါ အလီၢ်န့ၣ်လီၤ.+ ၁၇ အဝဲ ကဘၣ်ဖှီသ့ၣ်ဖးအီၤဖဲ အဒံးဆ့အိၣ်အလီၢ် ဘၣ်ဆၣ်​ တဘၣ်မၤတဲာ်အီၤ ခံက့ဘၣ်. ဝံၤဒီး ပှၤလုၢ်တၢ်ဒိၣ်​ ကဘၣ်ပာ်ထီၣ်အီၤလၢ သ့ၣ်မုၣ်လၢအကဲၤအလိၤ လၢတၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ. ဒီးအမ့ၢ်ဝဲ တၢ်လုၢ်ဒွဲၣ်အူ, တၢ်လုၢ်လၢမ့ၣ်အူ ဒီးကဲထီၣ်​ တၢ်နၢမူလၢ အမၤမုာ် ယဟိဝၤယွၤ အသးလီၤ.

၂ “‘ပှၤတဂၤဂၤ မ့ၢ်ဟ့ၣ်လုၢ်ထီၣ်​ တၢ်လုၢ်ဘု+ လၢယဟိဝၤယွၤ အအိၣ်န့ၣ်​ အတၢ်လုၢ် ကဘၣ်မ့ၢ်ဝဲ ကိၣ်ကမူၣ်​ လၢအဂ့ၤလီၤ. ဒီးအဝဲ ကဘၣ်လူလီၤသိလၢ ကိၣ်ကမူၣ်လၢ အဂ့ၤအလိၤ ဒီးပာ်လီၤ လီၢ်ဘၣ်* လၢအဖီခိၣ်လီၤ.+ ၂ ဒီးအဝဲ ကဘၣ်ဟဲစိာ်ဝဲလၢ စီၤအၤဟရိၣ်​ အဖိခွါတဖၣ်​ လၢအမ့ၢ် ပှၤလုၢ်တၢ်ဒိၣ်တဖၣ်​ အအိၣ်လီၤ. ဒီးကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ ဃုာ်ဒီး အလီၢ်ဘၣ်ခဲလၢာ်န့ၣ်​ ပှၤလုၢ်တၢ်ဒိၣ်​ ကဟံးန့ၢ်ဝဲလၢ အစုတစှီၤလီၤ. ဒီးအဝဲ ကဒွဲၣ်အူထီၣ်အီၤ ဒ်တၢ်လၢအခၢၣ်စး တၢ်လုၢ်ဒီတခါ အသိးလၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ.+ ဒီးအမ့ၢ်ဝဲ တၢ်လုၢ်လၢမ့ၣ်အူ ဒီးကဲထီၣ်​ တၢ်နၢမူလၢ အမၤမုာ် ယဟိဝၤယွၤ အသးလီၤ. ၃ ဒီးတၢ်လၢ အအိၣ်တ့ၢ်လၢ တၢ်လုၢ်ဘုအကျါန့ၣ်​ မ့ၢ်ဝဲ စီၤအၤဟရိၣ်​ ဒီးအဖိခွါတဖၣ်​ အတၢ်လီၤ.+ တၢ်လၢ အအိၣ်တ့ၢ်တဖၣ်န့ၣ်​ ပၣ်ဃုာ်လၢ ယဟိဝၤယွၤ အတၢ်လုၢ် လၢမ့ၣ်အူတဖၣ် အကျါ ဒီးမ့ၢ်တၢ်လၢ အစီဆှံ နီၢ်ကီၢ်လီၤ.+

၄ “‘နမ့ၢ်ဟ့ၣ်လုၢ်ထီၣ်​ တၢ်လုၢ်ဘုလၢ ပှၤကုၢ်အီၤလၢ ဖၣ်ကပူၤန့ၣ်​ ကဘၣ်မ့ၢ် ကိၣ်ကမူၣ်​ လၢအဂ့ၤ, ကိၣ်လၢ အတပၣ်ဒီး ကိၣ်မံၣ်ဘၣ်​ လၢအဘၣ်တၢ်တ့အီၤ ဃုာ်ဒီးသိ ဒီးအလီၤဂာ်ဒ် ကိၣ်ထံဖှံၣ်အသိး မ့တမ့ၢ် ကိၣ်ဘူဘူဖိလၢ အတပၣ်ဒီး ကိၣ်မံၣ်ဘၣ်လၢ တၢ်ဖှူအီၤ လၢသိလီၤ.+

၅ “‘နမ့ၢ်ဟ့ၣ်လုၢ်ထီၣ်​ တၢ်လုၢ်ဘုလၢ တၢ်တ့အီၤလၢ သပၢၤထးဘံၣ်ဘၣ်အပူၤန့ၣ်+ ကဘၣ်မ့ၢ် ကိၣ်ကမူၣ်​ လၢအဂ့ၤလၢ အတပၣ်ဒီး ကိၣ်မံၣ်ဘၣ်​ လၢအဘၣ်တၢ် ဃါဃုာ်အသးဒီးသိလီၤ. ၆ ဒီးတၢ်ကဘၣ်​ ဘိးကၢ်အီၤ တက့တက့ ဒီးနကဘၣ်​ လူလီၤသိလၢ အလိၤလီၤ.+ အဝဲအံၤ မ့ၢ်ဝဲ တၢ်လုၢ်ဘု တခါလီၤ.

၇ “‘နမ့ၢ်ဟ့ၣ်လုၢ်ထီၣ်​ တၢ်လုၢ်ဘုလၢ ပှၤတ့အီၤလၢ သပၢၤဘံၣ်သလၣ်​ အပူၤန့ၣ်​ ကဘၣ်မ့ၢ် ကိၣ်ကမူၣ်​ လၢအဂ့ၤ လၢအဘၣ်တၢ် ဃါဃုာ်အီၤဒီး သိလီၤ. ၈ ဒီးနဘၣ်လဲၤစိာ် နတၢ်လုၢ်ဘုန့ၣ်လၢ ယဟိဝၤယွၤအအိၣ်​ ဒီးနဘၣ်ဟ့ၣ်လီၤ ပှၤလုၢ်တၢ်ဒိၣ်​ ဒီးအဝဲ ကလဲၤစိာ်ဝဲလၢ တၢ်လုၢ်လီၢ် အကပၤလီၤ. ၉ ဒီးပှၤလုၢ်တၢ်ဒိၣ်​ ကဟံးန့ၢ်ဝဲ တၢ်လုၢ်ဘုတနီၤ ဒ်တၢ်လၢ အခၢၣ်စး တၢ်လုၢ်ဒီတခါအသိး ဒီးကဒွဲၣ်အူထီၣ်ဝဲလၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ.+ ဒီးအမ့ၢ်ဝဲ တၢ်လုၢ်လၢမ့ၣ်အူ ဒီးကဲထီၣ်​ တၢ်နၢမူလၢ အမၤမုာ် ယဟိဝၤယွၤ အသးလီၤ.+ ၁၀ ဒီးတၢ်လၢ အအိၣ်တ့ၢ်လၢ တၢ်လုၢ်ဘုအကျါန့ၣ်​ မ့ၢ်ဝဲ စီၤအၤဟရိၣ်​ ဒီးအဖိခွါတဖၣ်​ အတၢ်လီၤ. တၢ်လၢ အအိၣ်တ့ၢ်တဖၣ်န့ၣ်​ ပၣ်ဃုာ်လၢ ယဟိဝၤယွၤ အတၢ်လုၢ်လၢ မ့ၣ်အူတဖၣ်အကျါ ဒီးမ့ၢ်တၢ်လၢ အစီဆှံနီၢ်ကီၢ်လီၤ.+

၁၁ “‘တၢ်လုၢ်ဘုလၢ နဟ့ၣ်လုၢ်ထီၣ်အီၤလၢ ယဟိဝၤယွၤ အအိၣ်န့ၣ်​ တဘၣ်ပၣ်ဃုာ်ဒီး ကိၣ်မံၣ်ဘၣ်.+ ကိၣ်မံၣ်မ့ၢ်ဂ့ၤ, သ့ၣ်သၣ်အစီထံ* မ့ၢ်ဂ့ၤ နတဘၣ်​ ဒွဲၣ်အူထီၣ်အီၤ ဒ်တၢ်လုၢ်လၢ မ့ၣ်အူလၢ ယဟိဝၤယွၤ အအိၣ်အသိးဘၣ်.

၁၂ “‘နကဘၣ်​ ဟ့ၣ်လုၢ်ထီၣ်​ တၢ်သ့ၣ်တဖၣ်အံၤ လၢယဟိဝၤယွၤ အအိၣ်​ ဒ်အမ့ၢ် တၤသၣ်ဆိ အတၢ်လုၢ်အသိးလီၤ.+ ဘၣ်ဆၣ်​ နတဘၣ်​ ဒွဲၣ်ထီၣ်တၢ်သ့ၣ်တဖၣ်အံၤ လၢတၢ်လုၢ်လီၢ် အဖီခိၣ်​ ဒ်တၢ်နၢမူ အသိးဘၣ်.

၁၃ “‘နတၢ်လုၢ်ဘု ကိးခါဒဲးန့ၣ်​ ကဘၣ်ပၣ်ဃုာ်ဒီး အံသၣ်လီၤ. နတဘၣ်​ သးပ့ၤနီၣ်ဖၢနုာ် အံသၣ်တဂ့ၤ. တၢ်လၢ အံသၣ်န့ၣ်​ ကဒုးသ့ၣ်နီၣ်ထီၣ်နၤလၢ ကစၢ်ယွၤ အတၢ်အၢၣ်လီၤအီလီၤလီၤ. နတၢ်လုၢ်တၢ်ပာ် ခဲလၢာ်န့ၣ်​ ကဘၣ်ပၣ်ဃုာ်ဒီး အံသၣ်လီၤ.+

၁၄ “‘နမ့ၢ်ကဟ့ၣ်လုၢ်ထီၣ်​ တၢ်လုၢ်ဘုလၢ နတၤသၣ်ဆိတဖၣ်အကျါ လၢယဟိဝၤယွၤ အအိၣ်န့ၣ်​ နဘၣ်ဟဲစိာ် ဘုစဲၤသံသိလၢ အဘၣ်တၢ်ဝဲာ်မံအီၤလၢ မ့ၣ်အူ ဒီးတိၢ်သဘှံးအီၤ တစဲးလီၤ.+ ၁၅ နကဘၣ်လူလီၤသိ လၢအလိၤ ဒီးပာ်လီၤ လီၢ်ဘၣ်လၢ အဖီခိၣ်လီၤ. အဝဲန့ၣ်​ မ့ၢ်ဝဲ တၢ်လုၢ်ဘု တခါလီၤ. ၁၆ ဒီးပှၤလုၢ်တၢ်ဒိၣ်​ ကဘၣ်ဟံးန့ၢ် ဘုတနီၤ လၢအဘၣ်​ တၢ်တိၢ်သဘှံးအီၤတစဲး ဒီးသိ ဃုာ်ဒီးအလီၢ်ဘၣ်ခဲလၢာ် ဒီးဒွဲၣ်အူထီၣ်အီၤ ဒ်သိးအကခုၣ်ထီၣ်အဂီၢ် ဒ်တၢ်လၢ အခၢၣ်စး တၢ်လုၢ် ဒီတခါအသိးလီၤ.+ ဒီးအမ့ၢ်ဝဲ တၢ်လုၢ်လၢမ့ၣ်အူ လၢယဟိဝၤယွၤ အအိၣ်လီၤ.

၃ “‘ပှၤတဂၤ မ့ၢ်လုၢ်ထီၣ်​ ကျီၢ်အမိၢ်မ့ၢ်ဂ့ၤ အဖါမ့ၢ်ဂ့ၤ လၢယဟိဝၤယွၤ အမဲာ်ညါ ဒ်တၢ်လုၢ်အိၣ်ဃူအိၣ်ဖိး အသိးန့ၣ်+ အဝဲ ကဘၣ်ဟ့ၣ်လုၢ်ထီၣ်ဝဲ ကျီၢ်လၢ အလၢအပှဲၤ တဒုလီၤ. ၂ အဝဲကဘၣ်​ ပာ်အစုလၢ ကျီၢ်လၢ အကဘၣ်တၢ်ဟ့ၣ်လုၢ်ထီၣ်အီၤတဒု အခိၣ်လိၤ ဒီးကျီၢ်တဒုအံၤ ကဘၣ်​ တၢ်မၤသံအီၤလၢ တၢ်အိၣ်ဖှိၣ်အဒဲ အတၢ်နုာ်လီၤ အလီၢ်လီၤ. ဒီးစီၤအၤဟရိၣ်​ အဖိခွါတဖၣ်​ လၢအမ့ၢ် ပှၤလုၢ်တၢ်ဒိၣ်တဖၣ်န့ၣ်​ ကဘၣ်ဖှံ တၢ်သွံၣ်အံၤလၢ တၢ်လုၢ်လီၢ်အလိၤ ကိးကပၤဒဲးလီၤ. ၃ ဒီးအဝဲ ကလုၢ်ထီၣ်ဝဲ တၢ်လုၢ်အိၣ်ဃူအိၣ်ဖိးအံၤ အကူာ်အခီတနီၤ ဒ်တၢ်လုၢ်လၢ မ့ၣ်အူလၢ ယဟိဝၤယွၤ အအိၣ်လီၤ.+ အကူာ်အခီတဖၣ်အံၤ မ့ၢ်ဝဲအသိလၢ အအိၣ်လၢ အပှံာ်လိၤခဲလၢာ်+ ဒီးအသိလၢ အအိၣ်ဝးတရံးအပှံာ် ၄ ဒီးအကလ့ၢ်ခံဖျၢၣ်​ လၢအအိၣ်ဘူးဒီး အယီၢ်ဒ့ ဃုာ်ဒီးသိလၢ အအိၣ်လၢ အကလ့ၢ် အလိၤလီၤ. ဒီးအဝဲ ကဘၣ်ထုးထီၣ်ကွံာ်စ့ၢ်ကီး အသိလၢ အအိၣ်လၢ အသူၣ်အလိၤ ဃုာ်ဒီး အကလ့ၢ်တဖၣ်လီၤ.+ ၅ စီၤအၤဟရိၣ်​ အဖိခွါတဖၣ်​ ကပာ်တၢ်သ့ၣ်တဖၣ်အံၤ ခဲလၢာ် လၢတၢ်လုၢ်ဒွဲၣ်အူ လၢအအိၣ်ဝဲလၢ တၢ်လုၢ်လီၢ်အဖီခိၣ်​ အလိၤ ဒ်သိး အကခုၣ်ထီၣ်​ အဂီၢ်လီၤ. ဒီးတၢ်လုၢ်ဒွဲၣ်အူန့ၣ်​ အိၣ်ဝဲလၢ တၢ်လုၢ်လီၢ် အဖီခိၣ်လၢ သ့ၣ်မုၣ်လၢ အကဲၤအလိၤလီၤ.+ ဒီးအမ့ၢ်ဝဲ တၢ်လုၢ်လၢမ့ၣ်အူ ဒီးကဲထီၣ်​ တၢ်နၢမူလၢ အမၤမုာ် ယဟိဝၤယွၤ အသးလီၤ.+

၆ “‘ပှၤတဂၤ မ့ၢ်လုၢ်ထီၣ်သိ မ့တမ့ၢ် မဲာ်တဲးလဲး လၢယဟိဝၤယွၤအအိၣ်​ ဒ်တၢ်လုၢ် အိၣ်ဃူအိၣ်ဖိး အသိးန့ၣ်​ အဝဲ ကဘၣ်ဟ့ၣ်လုၢ်ထီၣ်ဝဲ အမိၢ် မ့တမ့ၢ် အဖါတဒုလၢ အလၢအပှဲၤလီၤ.+ ၇ အဝဲ မ့ၢ်ဟ့ၣ်လုၢ်ထီၣ်​ သိဖါဖိ ဒ်တၢ်လုၢ်အသိးန့ၣ်​ အဝဲ ကဘၣ်ဟဲစိာ်ဝဲလၢ ယဟိဝၤယွၤ အမဲာ်ညါလီၤ. ၈ ဒီးအဝဲကပာ်အစုလၢ အဆၣ်ဖိကီၢ်ဖိလၢ အကဘၣ်တၢ်ဟ့ၣ်လုၢ်ထီၣ်အီၤတဒု အခိၣ်လိၤ ဒီးဆၣ်ဖိကီၢ်ဖိအံၤ ကဘၣ်တၢ်မၤသံအီၤ လၢတၢ်အိၣ်ဖှိၣ်အဒဲ အမဲာ်ညါလီၤ. ဒီးစီၤအၤဟရိၣ်​ အဖိခွါတဖၣ်​ ကဖှံဝဲ တၢ်သွံၣ်အံၤလၢ တၢ်လုၢ်လီၢ်အလိၤ ကိးကပၤဒဲးလီၤ. ၉ တၢ်လုၢ်အိၣ်ဃူအိၣ်ဖိး အသိန့ၣ်​ အဝဲ ကဘၣ်ဟ့ၣ်လုၢ်ထီၣ်ဝဲ ဒ်တၢ်လုၢ်လၢ မ့ၣ်အူလၢ ယဟိဝၤယွၤ အအိၣ်လီၤ.+ အဝဲ ကထုးထီၣ်ကွံာ် အခံမဲၢ် လၢအဘီၣ်​ လၢအအိၣ်လၢ အပျိၢ်ဃံ အကတၢၢ်, အသိလၢ အအိၣ်ဝးတရံးအပှံာ် ဒီးအသိလၢ အအိၣ်လၢ အပှံာ်အလိၤ, ၁၀ ဒီးအကလ့ၢ်ခံဖျၢၣ်​ လၢအအိၣ်ဘူးဒီး အယီၢ်ဒ့ ဃုာ်ဒီးသိလၢ အအိၣ်လၢ အကလ့ၢ်အလိၤလီၤ. အဝဲ ကထုးထီၣ်ကွံာ်စ့ၢ်ကီး အသိလၢ အအိၣ်လၢ အသူၣ်လိၤ ဃုာ်ဒီး အကလ့ၢ်တဖၣ်လီၤ.+ ၁၁ ဒီးပှၤလုၢ်တၢ်ဒိၣ်​ ကဒွဲၣ်အူထီၣ်အီၤလၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ. ဒီးအမ့ၢ်ဝဲ တၢ်လုၢ်လၢ မ့ၣ်အူလၢ ယဟိဝၤယွၤအအိၣ်​ ဒ်တၢ်အီၣ်အသိးလီၤ.+

၁၂ “‘ပှၤတဂၤ မ့ၢ်လုၢ်ထီၣ်​ မဲာ်တဲးလဲးတဒုန့ၣ်​ အဝဲကဘၣ်​ ဟဲစိာ်ဝဲလၢ ယဟိဝၤယွၤ အမဲာ်ညါလီၤ. ၁၃ အဝဲကပာ်အစုလၢ မဲာ်တဲးလဲးတဒုအံၤ အခိၣ်လိၤ ဒီးမဲာ်တဲးလဲးအံၤ ကဘၣ်တၢ်မၤသံအီၤ လၢတၢ်အိၣ်ဖှိၣ်အဒဲ အမဲာ်ညါလီၤ. ဒီးစီၤအၤဟရိၣ်​ အဖိခွါတဖၣ်​ ကဖှံဝဲ တၢ်သွံၣ်အံၤလၢ တၢ်လုၢ်လီၢ်အလိၤ ကိးကပၤဒဲးလီၤ. ၁၄ တၢ်လၢ အဝဲကဟ့ၣ်လုၢ်ထီၣ်ဝဲဒ် အတၢ်လုၢ်လၢ မ့ၣ်အူလၢ ယဟိဝၤယွၤ အအိၣ်အသိးန့ၣ်​ မ့ၢ်ဝဲ တၢ်အသိလၢ အအိၣ်ဝးတရံးအပှံာ် ဒီးအသိလၢအအိၣ်လၢ အပှံာ်လိၤခဲလၢာ်+ ၁၅ ဒီးအကလ့ၢ် ခံဖျၢၣ်လၢ အအိၣ်ဘူးဒီး အယီၢ်ဒ့ ဃုာ်ဒီးသိလၢ အအိၣ်လၢ အကလ့ၢ်အလိၤလီၤ. အဝဲ ကထုးထီၣ်ကွံာ်စ့ၢ်ကီး သိလၢအအိၣ်လၢ အသူၣ်လိၤ ဃုာ်ဒီး အကလ့ၢ်တဖၣ်လီၤ. ၁၆ ဒီးပှၤလုၢ်တၢ်ဒိၣ်​ ကဒွဲၣ်အူထီၣ်အီၤလၢ တၢ်လုၢ်လီၢ် အဖီခိၣ်​ ဒ်တၢ်အီၣ်အသိး ဒ်သိး အကခုၣ်ထီၣ်​ အဂီၢ်လီၤ. ဒီးအမ့ၢ်ဝဲ တၢ်လုၢ်လၢမ့ၣ်အူ ဒီးကဲထီၣ်​ တၢ်နၢမူလၢ အမၤမုာ် ကစၢ်ယွၤ အသးလီၤ. တၢ်အသိ ခဲလၢာ်န့ၣ်​ အကဲ ယဟိဝၤယွၤ အတၢ်လီၤ.+

၁၇ “‘တၢ်အသိမ့ၢ်ဂ့ၤ တၢ်အသွံၣ်မ့ၢ်ဂ့ၤ သုတဘၣ်အီၣ်အီၤ နီတမံၤဘၣ်.+ အဝဲန့ၣ်မ့ၢ်ဝဲ တၢ်သိၣ်တၢ်သီလၢ အဂၢၢ်ကျၢၤ လၢသု ဒီးသုစၢၤသုသွဲၣ်အဂီၢ် ဖဲသုအိၣ်လၢတၢ်လီၢ် တပူၤဂ့ၤ တပူၤဂ့ၤလီၤ.’”

၄ ယဟိဝၤယွၤ တဲစီၤမိၤၡ့လၢ ၂ “တဲဘၣ်​ ပှၤအံၣ်စရ့လးဖိတဖၣ်လၢ ‘တၢ်လၢ ယဟိဝၤယွၤ မၤလိာ်ဝဲလၢ မၤတဂ့ၤန့ၣ်​ ပှၤတဂၤဂၤ မ့ၢ်မၤဘၣ်ဝဲလၢ တၢ်တပာ်သူၣ်ပာ်သးအပူၤန့ၣ်+ အဝဲကဘၣ်မၤဝဲ ဒ်အံၤလီၤ.

၃ “‘ပှၤလုၢ်တၢ်ဒိၣ်​ လၢအဘၣ်တၢ်ဒိးဖှူအီၤတဂၤ+ မ့ၢ်မၤဘၣ်​ တၢ်ဒဲးဘး+ ဒီးဒုးလီၤဘၣ်​ တၢ်ကမၣ်လၢ ပှၤဂီၢ်မုၢ် အဖီခိၣ်န့ၣ်​ လၢအတၢ်ဒဲးဘးအဂီၢ် အဝဲ ကဘၣ်ဟ့ၣ်လုၢ်ထီၣ်​ ကျီၢ်ဖါဖိလၢ အလၢအပှဲၤတဒုဆူ ယဟိဝၤယွၤအအိၣ်​ ဒ်တၢ်လုၢ်လၢ တၢ်ဒဲးဘး အဂီၢ်လီၤ.+ ၄ အဝဲ ကဘၣ်ဟဲမူၤ ကျီၢ်ဖါလၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ်+ လၢယဟိဝၤယွၤ အမဲာ်ညါ ဒီးပာ်အစု လၢကျီၢ်ဖါ အခိၣ်လိၤ ဒီးအကဘၣ်​ မၤသံဝဲလၢ ယဟိဝၤယွၤ အမဲာ်ညါလီၤ.+ ၅ ဒီးပှၤလုၢ်တၢ်ဒိၣ်​ လၢအဘၣ်တၢ်ဒိးဖှူအီၤတဂၤ+ ကဘၣ်ဟံးန့ၢ်ဝဲ ကျီၢ်ဖါအသွံၣ်တနီၤ ဒီးလဲၤစိာ်အီၤလၢ တၢ်အိၣ်ဖှိၣ်​ အဒဲပူၤလီၤ. ၆ ဒီးပှၤလုၢ်တၢ်ဒိၣ်န့ၣ်​ ကဘၣ်ဘျၢလီၤ အစုနၢတဘိလၢ တၢ်သွံၣ်အံၤအကျါ+ ဒီးဘၣ်ဆၢထၢၣ်လၢ ယဟိဝၤယွၤ အမဲာ်ညါ ဒီးဖှံလီၤတၢ်သွံၣ်​ နွံဘျီလၢ+ တၢ်လီၢ်စီဆှံအပူၤ လၢယၣ်ဘျးသဒၢ အမဲာ်ညါလီၤ. ၇ ဒီးပှၤလုၢ်တၢ်ဒိၣ်န့ၣ်​ ကထွါတၢ်သွံၣ်အံၤ တနီၤလၢ တၢ်လုၢ်လီၢ်လၢ ပှၤကဒွဲၣ်ထီၣ်​ တၢ်နၢမူအဂီၢ် တဖျၢၣ်န့ၣ်​ အနၢၤတဖၣ်​ အလိၤလီၤ.+ တၢ်လုၢ်လီၢ်အံၤ အိၣ်လၢ ယဟိဝၤယွၤ အမဲာ်ညါ လၢတၢ်အိၣ်ဖှိၣ်​ အဒဲပူၤလီၤ. မ့မ့ၢ် ကျီၢ်ဖါအသွံၣ်လၢ အအိၣ်တ့ၢ် ခဲလၢာ်န့ၣ်​ အဝဲကဘၣ်​ လူလီၤဝဲလၢ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ် အခီၣ်ထံးလီၤ.+ တၢ်လုၢ်လီၢ်အံၤ အိၣ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ် အမဲာ်ညါန့ၣ်လီၤ.

၈ “‘ဒီးကျီၢ်လၢ တၢ်လုၢ်လၢ တၢ်ဒဲးဘးအဂီၢ်န့ၣ်​ အဝဲ ကထုးထီၣ်ကွံာ် အသိခဲလၢာ် ဃုာ်ဒီး အသိလၢအအိၣ်လၢ အပှံာ်လိၤခဲလၢာ် ဒီးအသိလၢ အအိၣ်ဝးတရံး အပှံာ် ၉ ဒီးအကလ့ၢ်ခံဖျၢၣ်​ လၢအအိၣ်ဘူးဒီး အယီၢ်ဒ့ ဃုာ်ဒီးအသိလၢ အအိၣ်လၢ အကလ့ၢ်အလိၤလီၤ. အဝဲကထုးထီၣ်ကွံာ် စ့ၢ်ကီး သိလၢအအိၣ်လၢ အသူၣ်လိၤ ဃုာ်ဒီး အကလ့ၢ်တဖၣ်လီၤ.+ ၁၀ အဝဲ ကထုးထီၣ်ကွံာ် တၢ်သ့ၣ်တဖၣ်အံၤ ဒ်အမၤဝဲကျီၢ်ဖါလၢ တၢ်လုၢ်အိၣ်ဃူအိၣ်ဖိး အဂီၢ်အသိးလီၤ.+ ဒီးပှၤလုၢ်တၢ်ဒိၣ်​ ကဒွဲၣ်အူထီၣ်​ တၢ်သ့ၣ်တဖၣ်အံၤလၢ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ.

၁၁ “‘ဘၣ်ဆၣ်​ မ့မ့ၢ်ကျီၢ်ဖါအဘ့ၣ်​ ဒီးအညၣ်ခဲလၢာ် ဃုာ်ဒီး အခိၣ်သၣ်ဃံ, အခီၣ်,* အပှံာ် ဒီးအအ့ၣ်တဖၣ်+ ၁၂ လၢအမ့ၢ် တၢ်လၢအအိၣ်တ့ၢ်တဖၣ်န့ၣ်​ ကဘၣ်တၢ်လဲၤစိာ်အီၤလၢ ဒဲကဝီၤအချၢ ဆူတၢ်လီၢ်လၢ အကဆှီ ဖဲပှၤတၢၤကွံာ် ဖၣ်ဆါအလီၢ်န့ၣ်လီၤ. ဒီးအဝဲ ကဒွဲၣ်အူထီၣ်​ တၢ်သ့ၣ်တဖၣ်အံၤလၢ မ့ၣ်အူပူၤ လၢသ့ၣ်မုၣ်​ အဖီခိၣ်လီၤ.+ တၢ်သ့ၣ်တဖၣ်အံၤ ကဘၣ်တၢ်ဒွဲၣ်အူထီၣ်အီၤ ဖဲပှၤတၢၤကွံာ် ဖၣ်ဆါ အလီၢ်လီၤ.

၁၃ “‘ပှၤအံၣ်စရ့လးဖိခဲလၢာ် အတၢ်ကမၣ်​ မ့ၢ်အိၣ်​ ခီဖျိလၢ အမၤဘၣ်​ တၢ်ဒဲးဘးလၢ တၢ်တပာ်သူၣ်ပာ်သးဘၣ်အပူၤ+ ဘၣ်ဆၣ်​ တၢ်အိၣ်ဖှိၣ်* မ့ၢ်တသ့ၣ်ညါဝဲလၢ အဝဲသ့ၣ်​ မၤဘၣ်တၢ်လၢ ယဟိဝၤယွၤ မၤလိာ်ဝဲလၢ မၤအီၤတဂ့ၤ+ ၁၄ ဒီးလၢခံ အဝဲသ့ၣ်​ မ့ၢ်သ့ၣ်ညါဝဲလၢ အမၤဘၣ်​ တၢ်ဒဲးဘးန့ၣ်​ တၢ်အိၣ်ဖှိၣ်​ ကဘၣ်ဟဲစိာ် ကျီၢ်ဖါဖိတဒု ဒ်တၢ်လုၢ်လၢ တၢ်ဒဲးဘးအဂီၢ်အသိး ဒီးကဘၣ်​ ဟဲစိာ်အီၤလၢ တၢ်အိၣ်ဖှိၣ်အဒဲ အမဲာ်ညါလီၤ. ၁၅ တၢ်အိၣ်ဖှိၣ်​ အပှၤသူၣ်က့သးပှၢ်တဖၣ်​ ကပာ်အစုလၢ ကျီၢ်ဖါအခိၣ်လိၤ လၢယဟိဝၤယွၤ အမဲာ်ညါ ဒီးကျီၢ်ဖါအံၤ ကဘၣ်တၢ်မၤသံအီၤ လၢယဟိဝၤယွၤ အမဲာ်ညါလီၤ.

၁၆ “‘ဒီးပှၤလုၢ်တၢ်ဒိၣ်လၢ အဘၣ်တၢ်ဒိးဖှူအီၤတဂၤန့ၣ်​ ကဘၣ်ဟဲစိာ်ဝဲ ကျီၢ်ဖါအသွံၣ်တနီၤလၢ တၢ်အိၣ်ဖှိၣ်​ အဒဲပူၤလီၤ. ၁၇ ဒီးပှၤလုၢ်တၢ်ဒိၣ်န့ၣ်​ ကဘၣ်ဘျၢလီၤ အစုနၢတဘိလၢ တၢ်သွံၣ်အံၤအကျါ ဒီးဘၣ်ဆၢထၢၣ်လၢ ယဟိဝၤယွၤ အမဲာ်ညါ ဒီးဖှံလီၤတၢ်သွံၣ်​ နွံဘျီလၢ ယၣ်ဘျးသဒၢ အမဲာ်ညါလီၤ.+ ၁၈ ဒီးအဝဲ ကထွါတၢ်သွံၣ်အံၤတနီၤလၢ တၢ်လုၢ်လီၢ် အနၢၤတဖၣ်​ အလိၤလီၤ.+ တၢ်လုၢ်လီၢ်အံၤ အိၣ်လၢ ယဟိဝၤယွၤ အမဲာ်ညါ လၢတၢ်အိၣ်ဖှိၣ်​ အဒဲပူၤလီၤ. မ့မ့ၢ် ကျီၢ်ဖါအသွံၣ်လၢ အအိၣ်တ့ၢ် ခဲလၢာ်န့ၣ်​ အဝဲကဘၣ်​ လူလီၤဝဲလၢ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ် အခီၣ်ထံးလီၤ. တၢ်လုၢ်လီၢ်အံၤ အိၣ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ် အမဲာ်ညါန့ၣ်လီၤ.+ ၁၉ အဝဲ ကထုးထီၣ်ကွံာ် ကျီၢ်ဖါအသိခဲလၢာ် ဒီးကဒွဲၣ်အူထီၣ်ဝဲ လၢတၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ.+ ၂၀ အဝဲ ကဘၣ်မၤဝဲ ကျီၢ်ဖါအံၤ ဒ်ကျီၢ်ဖါ အဝဲတဒုလၢ တၢ်လုၢ်တၢ်ဒဲးဘးအဂီၢ် အသိးန့ၣ်လီၤ. ဒီးအဝဲ ကမၤဝဲ ဒ်န့ၣ်လီၤ. ဒီးပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤ တၢ်လၢ အဝဲသ့ၣ်အဂီၢ်+ ဒီးအဝဲသ့ၣ်​ အတၢ်ကမၣ်​ ကပျၢ်ဝဲလီၤ. ၂၁ ဒီးပှၤလုၢ်တၢ်ဒိၣ်န့ၣ်​ ကမၢပှၤလဲၤစိာ် ကျီၢ်ဖါအံၤဆူ ဒဲကဝီၤအချၢ ဒီးကဒွဲၣ်အူကွံာ်အီၤ ဒ်အဒွဲၣ်အူဝဲ ကျီၢ်ဖါလၢ အဆိကတၢၢ်တဒု အသိးလီၤ.+ ဒီးအဝဲအံၤမ့ၢ် တၢ်လုၢ်လၢတၢ်ဒဲးဘးလၢ ပှၤအံၣ်စရ့လးဖိခဲလၢာ် အဂီၢ်လီၤ.+

၂၂ “‘ပှၤခိၣ်ပှၤနၢ်တဂၤ+ မ့ၢ်မၤဘၣ်​ တၢ်ဒဲးဘး လၢတၢ်တပာ်သူၣ်ပာ်သးအပူၤ ဒီးအတၢ်ကမၣ်​ မ့ၢ်အိၣ်​ ခီဖျိလၢ အမၤဘၣ်ဝဲ တၢ်လၢ အကစၢ် ယဟိဝၤယွၤ မၤလိာ်ဝဲလၢ မၤအီၤတဂ့ၤ ၂၃ မ့တမ့ၢ် လၢခံ အဝဲမ့ၢ်သ့ၣ်ညါထီၣ်လၢ အမၤကမၣ်ဘၣ်​ ကစၢ်ယွၤ အတၢ်မၤလိာ်န့ၣ်​ အဝဲကဘၣ်​ ဟဲစိာ် မဲာ်တဲးလဲးဖါဖိလၢ အလၢအပှဲၤတဒု ဒ်တၢ်လုၢ်တၢ်ပာ် လၢအဂီၢ် အသိးလီၤ. ၂၄ အဝဲကပာ်အစု လၢမဲာ်တဲးလဲးဖိ အခိၣ်လိၤ ဒီးအကဘၣ်​ မၤသံဝဲလၢ ယဟိဝၤယွၤ အမဲာ်ညါ ဖဲတၢ်လီၢ်လၢ ပှၤမၤသံ ဆၣ်ဖိကီၢ်ဖိ လၢတၢ်လုၢ်ဒွဲၣ်အူ အဂီၢ်လီၤ.+ ဒီးအဝဲအံၤမ့ၢ် တၢ်လုၢ်လၢတၢ်ဒဲးဘး အဂီၢ်လီၤ. ၂၅ ပှၤလုၢ်တၢ်ဒိၣ်​ ကဘၣ်ဘျၢလီၤ အစုနၢတဘိလၢ မဲာ်တဲးလဲးဖိလၢ တၢ်လုၢ်တၢ်ဒဲးဘးအဂီၢ် အသွံၣ်တနီၤအကျါ ဒီးကထွါအီၤလၢ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ်တဖျၢၣ်န့ၣ်​ အနၢၤတဖၣ်​ အလိၤလီၤ.+ မ့မ့ၢ် တၢ်သွံၣ်လၢ အအိၣ်တ့ၢ်ဝဲ ခဲလၢာ်န့ၣ်​ အဝဲ ကဘၣ်လူလီၤဝဲလၢ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ် အခီၣ်ထံးလီၤ.+ ၂၆ အဝဲ ကဒွဲၣ်အူထီၣ်ဝဲ မဲာ်တဲးလဲးဖိ အသိခဲလၢာ် လၢတၢ်လုၢ်လီၢ် အဖီခိၣ်​ ဒ်သိးအကခုၣ်ထီၣ်အဂီၢ်, ဒ်အဒွဲၣ်အူထီၣ်ဝဲ တၢ်အသိလၢ တၢ်လုၢ်အိၣ်ဃူအိၣ်ဖိး အဂီၢ်အသိးလီၤ.+ ဒီးပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤ တၢ်လၢအဂီၢ် ဒီးအတၢ်ကမၣ်​ ကပျၢ်ဝဲလီၤ.

၂၇ “‘ပှၤမုၢ်ဆ့ၣ်မုၢ်ဂီၤဖိတဂၤ မ့ၢ်မၤဘၣ်​ တၢ်ဒဲးဘးလၢ တၢ်တပာ်သူၣ်ပာ်သးအပူၤ ဒီးအတၢ်ကမၣ်​ မ့ၢ်အိၣ်ဝဲ ခီဖျိလၢ အမၤတၢ်တမံၤမံၤလၢ ယဟိဝၤယွၤ မၤလိာ်ဝဲလၢ မၤတဂ့ၤ+ ၂၈ မ့တမ့ၢ် လၢခံ အဝဲမ့ၢ်သ့ၣ်ညါထီၣ်လၢ အမၤဘၣ်​ တၢ်ဒဲးဘး တမံၤမံၤန့ၣ်​ အဝဲကဘၣ်​ ဟဲစိာ် မဲာ်တဲးလဲးမိၢ်ဖိလၢ အလၢအပှဲၤတဒု ဒ်တၢ်လုၢ်တၢ်ပာ်လၢ အတၢ်ဒဲးဘးအဂီၢ် အသိးလီၤ. ၂၉ ဒီးအဝဲ ကပာ်အစုလၢ မဲာ်တဲးလဲးမိၢ်လၢ တၢ်လုၢ်လၢ တၢ်ဒဲးဘးအဂီၢ် အခိၣ်လိၤ ဒီးအကဘၣ်​ မၤသံဝဲလၢ တၢ်လီၢ်တပူၤဃီဖဲ ပှၤမၤသံ ဆၣ်ဖိကီၢ်ဖိလၢ တၢ်လုၢ်ဒွဲၣ်အူ အဂီၢ်လီၤ.+ ၃၀ ပှၤလုၢ်တၢ်ဒိၣ်​ ကဘၣ်ဘျၢလီၤ အစုနၢတဘိလၢ တၢ်သွံၣ်အံၤ တနီၤအကျါ ဒီးကထွါအီၤလၢ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ် တဖျၢၣ်န့ၣ်​ အနၢၤတဖၣ်​ အလိၤလီၤ. မ့မ့ၢ် တၢ်သွံၣ်လၢ အအိၣ်တ့ၢ်ဝဲ ခဲလၢာ်န့ၣ်​ အဝဲ ကဘၣ်လူလီၤဝဲလၢ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ် အခီၣ်ထံးလီၤ.+ ၃၁ ဒီးအဝဲ ကထုးထီၣ်ကွံာ် တၢ်အသိခဲလၢာ်+ ဒ်တၢ်ထုးထီၣ်ကွံာ် တၢ်အသိလၢ တၢ်လုၢ်အိၣ်ဃူအိၣ်ဖိးအဂီၢ် အသိးန့ၣ်လီၤ.+ ဒီးပှၤလုၢ်တၢ်ဒိၣ်န့ၣ်​ ကဒွဲၣ်အူထီၣ်အီၤလၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်အဂီၢ် ဒီးအမ့ၢ်ဝဲ တၢ်နၢမူလၢ အမၤမုာ် ယဟိဝၤယွၤ အသးလီၤ. ဒီးပှၤလုၢ်တၢ်ဒိၣ်န့ၣ်​ ကမၤဘၣ်လိာ်ဖိးဒ့က့ၤတၢ် လၢအဂီၢ် ဒီးအတၢ်ဒဲးဘး ကပျၢ်ဝဲလီၤ.

၃၂ “‘ဘၣ်ဆၣ်​ အဝဲ မ့ၢ်လုၢ်ထီၣ်ဝဲ သိဖိ ဒ်တၢ်လုၢ်လၢ တၢ်ဒဲးဘးအဂီၢ် အသိးန့ၣ်​ အဝဲ ကဘၣ်ဟဲစိာ်ဝဲ သိမိၢ်ဖိ လၢအလၢအပှဲၤ တဒုလီၤ. ၃၃ ဒီးအဝဲ ကပာ်အစုလၢ သိမိၢ်ဖိလၢ တၢ်လုၢ်တၢ်ဒဲးဘးအဂီၢ် အခိၣ်လိၤ ဒီးအကဘၣ်​ မၤသံဝဲလၢ တၢ်လီၢ်လၢ ပှၤမၤသံဝဲ ဆၣ်ဖိကီၢ်ဖိလၢ တၢ်လုၢ်ဒွဲၣ်အူအဂီၢ်လီၤ.+ ၃၄ ပှၤလုၢ်တၢ်ဒိၣ်​ ကဘၣ်ဘျၢလီၤ အစုနၢတဘိလၢ သိမိၢ်လၢ တၢ်လုၢ်လၢ တၢ်ဒဲးဘးအဂီၢ် အသွံၣ်အကျါ ဒီးကထွါအီၤလၢ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ် တဖျၢၣ်န့ၣ်​ အနၢၤတဖၣ်​ အလိၤလီၤ.+ မ့မ့ၢ် တၢ်သွံၣ်လၢ အအိၣ်တ့ၢ်ဝဲ ခဲလၢာ်န့ၣ်​ အဝဲ ကဘၣ်လူလီၤဝဲလၢ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ် အခီၣ်ထံးလီၤ. ၃၅ ဒီးပှၤလုၢ်တၢ်ဒိၣ်​ ကထုးထီၣ်ကွံာ် တၢ်အသိခဲလၢာ် ဒ်တၢ်ထုးထီၣ်ကွံာ် သိဖါဖိအသိလၢ တၢ်လုၢ်အိၣ်ဃူအိၣ်ဖိးအဂီၢ် အသိးန့ၣ်လီၤ. ဒီးပှၤလုၢ်တၢ်ဒိၣ်​ ကပာ်တၢ်အသိ တဖၣ်အံၤလၢ ယဟိဝၤယွၤ အတၢ်လုၢ်လၢ မ့ၣ်အူ လၢအအိၣ်လၢ တၢ်လုၢ်လီၢ်အဖီခိၣ်​ အလိၤ ဒ်သိးအကခုၣ်ထီၣ်​ အဂီၢ်လီၤ.+ ဒီးပှၤလုၢ်တၢ်ဒိၣ်န့ၣ်​ ကမၤဘၣ်လိာ်ဖိးဒ့က့ၤတၢ် လၢအဂီၢ် ဒီးအတၢ်ဒဲးဘး ကပျၢ်ဝဲလီၤ.+

၅ “‘ဘၣ်ဃးဒီး တၢ်ကမၣ်​ တမံၤမံၤန့ၣ်​ ပှၤတဂၤဂၤ မ့ၢ်ထံၣ်ဝဲမ့ၢ်ဂ့ၤ သ့ၣ်ညါဝဲမ့ၢ်ဂ့ၤ အဝဲ မ့ၢ်ပှၤအုၣ်အသးလီၤ. အဃိ အဝဲမ့ၢ်နၢ်ဟူဝဲ တၢ်ဘိးဘၣ်သ့ၣ်ညါ လၢကမျၢၢ် အမဲာ်ညါ+ လၢပှၤကဘၣ်​ ဟဲအုၣ်အသး* ဘၣ်ဃးဒီး ပှၤလၢ အမၤကမၣ်တၢ်တဂၤ ဒီးအဝဲ မ့ၢ်တဟဲ တဲဖျါထီၣ်ဝဲ တၢ်ဂ့ၢ်ဘၣ်န့ၣ်​ အတၢ်ဒဲးဘး အိၣ်ဝဲလီၤ. ဒီးအဝဲကဘၣ်​ ဟ့ၣ်တၢ်စံးဆၢ လၢအတၢ်ဒဲးဘး အဃိလီၤ.

၂ “‘ပှၤတဂၤ မ့ၢ်ထိးဘၣ်​ တၢ်လၢ အတကဆှီဘၣ်​ တမံၤမံၤ ဒ်သိးဒီး ဆၣ်ဖိကီၢ်ဖိအမံၤလၢ အတကဆှီဘၣ်​ အစိၣ်မ့ၢ်ဂ့ၤ, ဆၣ်ဖိကီၢ်ဖိ အဒၢလၢ အတကဆှီဘၣ်​ အစိၣ်မ့ၢ်ဂ့ၤ, တၢ်သးသမူလၢ အလဲၤတၢ် ဒီဖုဒီဂီၢ် လၢအတကဆှီဘၣ်​ တခါခါ အစိၣ်မ့ၢ်ဂ့ၤန့ၣ်​ ပှၤတဂၤအံၤ တကဆှီလၢၤဘၣ်.+ ဒီးအဝဲ မ့ၢ်တသ့ၣ်ညါလီၤအသးလၢ အတကဆှီလၢၤဘၣ်​ သနာ်က့ အတၢ်ကမၣ်​ အိၣ်ဝဲလီၤ. ၃ ပှၤတဂၤ မ့ၢ်တသ့ၣ်ညါလီၤအသးလၢ အထိးဘၣ်ဝဲ တၢ်လၢ အတကဆှီဘၣ်+ တမံၤမံၤ လၢအဒုးကဲထီၣ်အီၤလၢ ပှၤလၢအတကဆှီဘၣ်​ သနာ်က့ အတၢ်ကမၣ်​ အိၣ်ဝဲလီၤ. ဒီးအမ့ၢ်သ့ၣ်ညါထီၣ်က့ၤဝဲ လၢခံသနာ်က့ အတၢ်ကမၣ်​ အိၣ်ဝဲလီၤ.

၄ “‘ပှၤတဂၤ မ့ၢ်ကရီ မၤတၢ်အၢၣ်လီၤတမံၤမံၤ လၢအကမၤတၢ် လၢအဂ့ၤမ့ၢ်ဂ့ၤ အအၢမ့ၢ်ဂ့ၤ ဒီးအဝဲ မ့ၢ်တသ့ၣ်ညါလီၤအသးလၢ အမၤတၢ်အၢၣ်လီၤလၢ တၢ်ကရီကဒးအပူၤဘၣ်​ သနာ်က့ အတၢ်ကမၣ်​ အိၣ်ဝဲလီၤ. ဒီးလၢခံ အမ့ၢ်သ့ၣ်ညါလီၤအသး သနာ်က့ အတၢ်ကမၣ်​ အိၣ်ဝဲလီၤ.*+

၅ “‘အဝဲမ့ၢ်မၤဘၣ်​ တၢ်ကမၣ်တဖၣ်န့ၣ်​ တမံၤမံၤန့ၣ်​ အဝဲကဘၣ်အၢၣ်လီၤဝဲ+ လၢအမၤကမၣ်ဘၣ်တၢ် ဒ်လဲၣ်ဒ်လဲၣ်န့ၣ်လီၤ. ၆ ဒီးအဝဲကဘၣ်ဟဲစိာ်ဝဲ အတၢ်လုၢ်လၢ တၢ်ကမၣ်အဂီၢ် လၢယဟိဝၤယွၤအအိၣ်​ လၢတၢ်ဒဲးဘးလၢ အမၤဘၣ်ဝဲ အဂီၢ်လီၤ.+ အဃိ အဝဲကဘၣ်ဟဲမူၤ သိမိၢ်ဖိတဒု မ့တမ့ၢ် မဲာ်တဲးလဲးမိၢ်ဖိတဒု လၢတၢ်လုၢ်လၢ တၢ်ဒဲးဘး အဂီၢ်လီၤ. ဒီးပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤတၢ်လၢ အတၢ်ဒဲးဘး အဂီၢ်လီၤ.

၇ “‘ဘၣ်ဆၣ်​ ပှၤတဂၤ လၢအမၤတၢ်ဒဲးဘးန့ၣ်​ အတၢ်မ့ၢ်တယၢဘၣ်လၢ ကဟ့ၣ်လီၤ သိတဒုအဂီၢ်ဘၣ်န့ၣ်​ အဝဲကဘၣ်ဟဲစိာ် ထိၣ်လွံၢ် ခံဘ့ၣ်​ မ့တမ့ၢ် ထိၣ်ကးက့ၣ်ဖိ ခံဘ့ၣ်+ ဆူယဟိဝၤယွၤအအိၣ်​ ဒ်တၢ်လုၢ်လၢ တၢ်ကမၣ်အဂီၢ် အသိးလီၤ. အဃိ တဘ့ၣ်န့ၣ်လၢ တၢ်လုၢ်တၢ်ဒဲးဘးအဂီၢ် ဒီးအဝဲတဘ့ၣ်လၢ တၢ်လုၢ်ဒွဲၣ်အူ အဂီၢ်လီၤ.+ ၈ ဒီးအဝဲကဟဲစိာ် ထိၣ်ခံဘ့ၣ်အံၤလၢ ပှၤလုၢ်တၢ်ဒိၣ်​ အအိၣ်လီၤ. ဒီးပှၤလုၢ်တၢ်ဒိၣ်န့ၣ်​ ကဟံးန့ၢ်ဆိဝဲ ထိၣ်တဘ့ၣ်လၢ တၢ်လုၢ်လၢတၢ်ဒဲးဘးအဂီၢ် ဒီးကစိၢ်တဲာ် အကိာ်ယူၢ်ဘိ ဘၣ်ဆၣ်​ တမၤတဲာ်အကိာ်ဘၣ်. ၉ ဒီးအဝဲကဖှံဝဲ ထိၣ်လၢ တၢ်လုၢ်လၢတၢ်ဒဲးဘးအဂီၢ် အသွံၣ်တနီၤလၢ တၢ်လုၢ်လီၢ် အဒူၣ်ကပၤ ဘၣ်ဆၣ်​ တၢ်သွံၣ်လၢ အအိၣ်တ့ၢ်န့ၣ်​ အဝဲကဘၣ်​ ဒုးယွၤလီၤဝဲလၢ တၢ်လုၢ်လီၢ် အခီၣ်ထံးလီၤ.+ အဝဲအံၤ မ့ၢ်တၢ်လုၢ်လၢ တၢ်ဒဲးဘးအဂီၢ်လီၤ. ၁၀ ဒီးအဝဲကမၤ ထိၣ်အဝဲတဘ့ၣ်န့ၣ်​ ဒ်တၢ်ဟံးစုနဲၣ်ကျဲလၢ တၢ်လုၢ်ဒွဲၣ်အူအဂီၢ် အိၣ်ဝဲအသိးလီၤ.+ ဒီးပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤ တၢ်လၢအဂီၢ် ဒီးအတၢ်ကမၣ်​ ကပျၢ်ဝဲလီၤ.+

၁၁ “‘ပှၤတဂၤ လၢအကဟ့ၣ်လုၢ်ထီၣ်တၢ်လၢ အတၢ်ဒဲးဘးအဂီၢ်န့ၣ်​ အတၢ်မ့ၢ်တယၢဘၣ်လၢ အကဟဲစိာ်ဝဲ ထိၣ်လွံၢ် ခံဘ့ၣ်​ မ့တမ့ၢ် ထိၣ်ကးက့ၣ်ဖိ ခံဘ့ၣ်ဘၣ်န့ၣ်​ အကဘၣ်ဟဲစိာ်ဝဲ ကိၣ်ကမူၣ်လၢအဂ့ၤ တကံလိ*+ ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. ဒီးမ့ၢ်လၢ အမ့ၢ်ဝဲ တၢ်လုၢ်လၢ တၢ်ဒဲးဘးအဂီၢ်အဃိ အဝဲတဘၣ်ဖၢနုာ် သိမ့ၢ်ဂ့ၤ လီၢ်ဘၣ်မ့ၢ်ဂ့ၤ လၢအပူၤဘၣ်. ၁၂ အဝဲကဟဲစိာ်ဝဲလၢ ပှၤလုၢ်တၢ်ဒိၣ်အအိၣ်​ ဒီးပှၤလုၢ်တၢ်ဒိၣ်​ ကဟံးန့ၢ်ဝဲ လၢအစုတစှီၤ ဒ်တၢ်လၢအခၢၣ်စး တၢ်လုၢ်ဒီတခါအသိး ဒီးကပာ်ဝဲလၢ ယဟိဝၤယွၤ အတၢ်လုၢ်လၢ မ့ၣ်အူ လၢအအိၣ်လၢ တၢ်လုၢ်လီၢ်အဖီခိၣ်​ အလိၤ ဒ်သိးအကခုၣ်ထီၣ်​ အဂီၢ်လီၤ. အဝဲအံၤ မ့ၢ်တၢ်လုၢ်လၢ တၢ်ဒဲးဘးအဂီၢ်လီၤ. ၁၃ ပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤ တၢ်လၢ အဂီၢ် ဒီးအတၢ်ကမၣ်​ ဒ်တၢ်ပာ်ဖျါအီၤလၢထးအသိး တမံၤဂ့ၤတမံၤဂ့ၤန့ၣ်​ ကပျၢ်ဝဲလီၤ.+ ဒီးတၢ်လၢအအိၣ်တ့ၢ်လၢ တၢ်လုၢ်အကျါန့ၣ်​ ကကဲထီၣ်​ ပှၤလုၢ်တၢ်ဒိၣ်​ အတၢ်+ ဒ်တၢ်လုၢ်ဘု အသိးလီၤ.’”+

၁၄ ယဟိဝၤယွၤ ဆဲးတဲစီၤမိၤၡ့လၢ ၁၅ “ပှၤတဂၤဂၤ မ့ၢ်မၤတၢ်လၢ တၢ်သးတတီဘၣ်​ ခီဖျိ အဝဲ မၤကမၣ်ဘၣ်​ တၢ်လၢ အစီဆှံလၢ ဘၣ်ဃးဒီး ယဟိဝၤယွၤ*+ လၢတၢ်တပာ်သူၣ်ပာ်သး အပူၤန့ၣ်​ အကဘၣ်ဟဲမူၤဝဲ သိဖါလၢ အလၢအပှဲၤတဒု လၢတၢ်လုၢ်လၢ တၢ်ကမၣ်အဂီၢ် ဆူယဟိဝၤယွၤ အအိၣ်လီၤ.+ ဒီးသိဖါတဒုန့ၣ်​ အလုၢ်အပှ့ၤ ကဘၣ်တၢ်ပာ်ပနီၣ်အီၤလၢ စ့ညၣ်​ ၡက့လး ဒ်တၢ်စီဆှံအလီၢ် အၡက့လး အသိးန့ၣ်လီၤ.+ ၁၆ ပှၤတဂၤန့ၣ်​ မၤကမၣ်ဘၣ်​ တၢ်စီဆှံ အလီၢ်အဃိ အကဘၣ်​ လိးက့ၤအပှ့ၤလၢ အတၢ်ဒဲးဘးလၢ အမၤဝဲတခါအံၤအဂီၢ် တကးဒံးဘၣ်​ အကဘၣ်​ ဟ့ၣ်အါထီၣ်အပှ့ၤ ယဲၢ်ပူတပူလီၤ.+ အဝဲ ကဟ့ၣ်လီၤဝဲ ပှၤလုၢ်တၢ်ဒိၣ်​ ဒီးပှၤလုၢ်တၢ်ဒိၣ်​ ကသူဝဲ သိဖါလၢ တၢ်လုၢ်လၢတၢ်ကမၣ်​ အဂီၢ်တဒုအံၤ ဒ်သိး ကမၤဘၣ်လိာ်ဖိးဒ့က့ၤတၢ် လၢအဂီၢ်လီၤ.+ ဒီးအတၢ်ဒဲးဘး ကပျၢ်ဝဲလီၤ.+

၁၇ “ပှၤတဂၤဂၤ မ့ၢ်မၤကမၣ်ဘၣ်တၢ် တမံၤမံၤလၢ ယဟိဝၤယွၤ မၤလိာ်ဝဲလၢ မၤတဂ့ၤန့ၣ်​ အဝဲမ့ၢ်တသ့ၣ်ညါလီၤ အသးဒၣ်လဲာ် အတၢ်ကမၣ်အိၣ်ဝဲ ဒီးအဝဲကဘၣ်​ ဟ့ၣ်တၢ်စံးဆၢ လၢအတၢ်ဒဲးဘး အဃိလီၤ.+ ၁၈ အဝဲ ကဘၣ်ဟဲမူၤဝဲ သိဖါလၢ အလၢအပှဲၤတဒု ဒ်တၢ်ပာ်ပနီၣ်ဝဲ အလုၢ်အပှ့ၤအသိး ဆူပှၤလုၢ်တၢ်ဒိၣ်​ အအိၣ်လၢ တၢ်လုၢ်လၢ တၢ်ကမၣ်အဂီၢ်လီၤ.+ ဒီးပှၤလုၢ်တၢ်ဒိၣ်န့ၣ်​ ကမၤ ဘၣ်လိာ်ဖိးဒ့က့ၤတၢ်လၢ အတၢ်ကမၣ်လၢ အမၤဝဲလၢ တၢ်တပာ်သူၣ်ပာ်သး ဒီးတၢ်တသ့ၣ်ညါဘၣ်​ အပူၤအဂီၢ်လီၤ. ဒီးအတၢ်ဒဲးဘး ကပျၢ်ဝဲလီၤ. ၁၉ ပှၤတဂၤအံၤန့ၣ်​ မၤကမၣ်ဘၣ်​ ယဟိဝၤယွၤ ဒီးအတၢ်ကမၣ်​ အိၣ်ဝဲအဃိ အဝဲကဘၣ်လုၢ်ထီၣ်​ တၢ်လုၢ်လၢ တၢ်ကမၣ်အဂီၢ်လီၤ.”

၆ ယဟိဝၤယွၤ တဲဘၣ်စီၤမိၤၡ့လၢ ၂ “ပှၤတဂၤဂၤ မ့ၢ်မၤ တၢ်ဒဲးဘးဒီး အသးတတီဘၣ်လၢ ယဟိဝၤယွၤ အဖီခိၣ်+ ခီဖျိ အလံၣ်န့ၢ်လီန့ၢ် ပှၤလၢအဃၢၤ ဘၣ်ဃးဒီး တၢ်တမံၤမံၤလၢ အဝဲ ဘၣ်ကွၢ်ထွဲဝဲမ့ၢ်ဂ့ၤ,+ တၢ်တမံၤမံၤလၢ ပှၤဟ့ၣ်လိၢ်အီၤမ့ၢ်ဂ့ၤ မ့တမ့ၢ် အဝဲမ့ၢ်ဟုၣ်​ ပှၤတၢ်မ့ၢ်ဂ့ၤ, သူတၢ်လီတၢ်ဝ့ၤ ဒ်သိး ကမၤန့ၢ် ပှၤလၢအဃၢၤ အတၢ်ဖိတၢ်လံၤမ့ၢ်ဂ့ၤ, ၃ မ့တမ့ၢ် အဝဲမ့ၢ်ထံၣ်န့ၢ်ဝဲ ပှၤဂၤအတၢ်လၢ အလီၤမၢ်တခါခါ ဘၣ်ဆၣ်​ မ့ၢ်တဲလံၣ်ဝဲလၢ အတထံၣ်ဘၣ်ဝဲမ့ၢ်ဂ့ၤ မ့တမ့ၢ် မ့ၢ်အၢၣ်လီၤတၢ် ကဘျံးကဘျၣ်​ ဘၣ်ဃးဒီး တၢ်ဒဲးဘးဒ်န့ၣ်​ တမံၤမံၤလၢ အမၤဘၣ်ဝဲ မ့ၢ်ဂ့ၤန့ၣ်+ အဝဲ ကဘၣ်မၤဝဲ ဒ်အံၤလီၤ. ၄ အဝဲ မ့ၢ်မၤဘၣ်​ တၢ်ဒဲးဘးဒ်န့ၣ်​ ဒီးအတၢ်ကမၣ်​ မ့ၢ်အိၣ်န့ၣ်​ အကဘၣ်ဟ့ၣ်က့ၤ တၢ်လၢ အဟုၣ်န့ၢ်ဝဲမ့ၢ်ဂ့ၤ, တၢ်လၢ အဂုာ်န့ၢ်ဆူၣ်ဝဲမ့ၢ်ဂ့ၤ, တၢ်လၢအမၤန့ၢ်ဝဲ ခီဖျိလၢ အသူတၢ်လီတၢ်ဝ့ၤမ့ၢ်ဂ့ၤ, တၢ်လၢ အကဘၣ်​ ကွၢ်ထွဲဝဲမ့ၢ်ဂ့ၤ, ပှၤဂၤ အတၢ်လၢ အလီၤမၢ်လၢ အထံၣ်န့ၢ်ဝဲမ့ၢ်ဂ့ၤ ၅ မ့တမ့ၢ် အဝဲ မ့ၢ်အၢၣ်လီၤ တၢ်ကဘျံးကဘျၣ်​ ဘၣ်ဃးဒီး တၢ်တမံၤမံၤမ့ၢ်ဂ့ၤန့ၣ်​ အဝဲ ကဘၣ်လိးက့ၤဝဲအပှ့ၤ ခဲလၢာ်ခဲဆ့+ ဒီးကဘၣ်​ ဟ့ၣ်အါထီၣ်ဝဲအပှ့ၤ ယဲၢ်ပူတပူလီၤ. မုၢ်တနံၤလၢ အတၢ်ကမၣ်​ ဖျါထီၣ်န့ၣ်​ အဝဲ ကဘၣ်ဟ့ၣ်လီၤဝဲလၢ တၢ်ဖိတၢ်လံၤ အကစၢ်န့ၣ်လီၤ. ၆ အဝဲ ကဘၣ်ဟဲမူၤဝဲ သိဖါလၢ အလၢအပှဲၤတဒု ဒ်တၢ်ပာ်ပနီၣ်ဝဲ အလုၢ်အပှ့ၤအသိး ဆူပှၤလုၢ်တၢ်ဒိၣ်အအိၣ်​ ဒ်တၢ်လုၢ်လၢ တၢ်ကမၣ်အဂီၢ် လၢယဟိဝၤယွၤ အအိၣ်လီၤ.+ ၇ ပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤတၢ် လၢအဂီၢ် လၢယဟိဝၤယွၤ အမဲာ်ညါ ဒီးတၢ်ကမၣ်လၢ အမၤတ့ၢ်ဝဲ တမံၤဂ့ၤတမံၤဂ့ၤန့ၣ်​ အကဘၣ်​ တၢ်ပျၢ်ကွံာ်အီၤလီၤ.”+

၈ ယဟိဝၤယွၤ ဆဲးတဲ စီၤမိၤၡ့လၢ ၉ “တဲဘၣ်စီၤအၤဟရိၣ်​ ဒီးအဖိခွါတဖၣ်​ ဒ်အံၤ, ‘အအံၤမ့ၢ် တၢ်သိၣ်တၢ်သီလၢ အဘၣ်ဃးဒီး တၢ်လုၢ်ဒွဲၣ်အူလီၤ.+ တၢ်လုၢ်ဒွဲၣ်အူန့ၣ်​ ကဘၣ်အိၣ်လၢ တၢ်လုၢ်လီၢ် အဖၣ်ကပူၤ အဖီခိၣ်​ ဒီတနၤကျၢၤ တုၤလၢ မုၢ်ဝါထီၣ်​ ဒီးမ့ၣ်အူန့ၣ်​ ကဘၣ်ဆဲးကဲၤဝဲလၢ တၢ်လုၢ်လီၢ် အဖီခိၣ်လီၤ. ၁၀ ဝံၤဒီး ပှၤလုၢ်တၢ်ဒိၣ်န့ၣ်​ ကသိးထီၣ်​ ဆ့လီၤလီၤဆီဆီ လၢအညၣ်ဂ့ၤ+ ဒီးကကူထီၣ်ဝဲ ဖျီၣ်ခံဖုၣ်ခီၣ်လၢ အညၣ်ဂ့ၤလီၤ.+ ဒီးအဝဲ ကလဲၤလၢ တၢ်လုၢ်လီၢ် ဒီးထုးထီၣ်​ တၢ်လုၢ်ဒွဲၣ်အူလၢ မ့ၣ်အူအီၣ်ကွံာ်ဝဲ အဖၣ်ဆါတဖၣ်+ ဒီးပာ်လီၤအီၤလၢ တၢ်လုၢ်လီၢ် အကပၤလီၤ. ၁၁ ဝံၤဒီး အဝဲကဘ့ၣ်လီၤကွံာ် အတၢ်ကူတၢ်သိးတဖၣ်+ ဒီးကကူထီၣ်သိးထီၣ်​ တၢ်ကူတၢ်သိး အဂၤတဖၣ်​ ဒီးကလဲၤစိာ်ကွံာ် ဖၣ်ဆါတဖၣ်လၢ တၢ်လီၢ်လၢ အကဆှီ လၢဒဲကဝီၤ အချၢလီၤ.+ ၁၂ ဒီးမ့ၣ်အူန့ၣ်​ ကဘၣ်ဆဲးကဲၤဝဲလၢ တၢ်လုၢ်လီၢ် အဖီခိၣ်လီၤ. ဒီးမ့ၣ်အူန့ၣ်​ တဘၣ်လီၤပံာ်ဝဲဘၣ်. ပှၤလုၢ်တၢ်ဒိၣ်​ ကဘၣ်မၤကဲၤထီၣ်​ သ့ၣ်မုၣ်လၢ+ မ့ၣ်အူအဖီခိၣ်​ ကိးဂီၤဒဲး ဒီးပာ်ထီၣ်​ ဆၣ်ဖိကီၢ်ဖိလၢ တၢ်လုၢ်ဒွဲၣ်အူအဂီၢ် လၢမ့ၣ်အူ အဖီခိၣ်​ ဒီးတၢ်လုၢ်အိၣ်ဃူအိၣ်ဖိးတဖၣ်​ အသိန့ၣ်​ အဝဲ ကပာ်ဝဲလၢ မ့ၣ်အူအဖီခိၣ်​ ဒ်သိး အကခုၣ်ထီၣ်​ အဂီၢ်လီၤ.+ ၁၃ မ့ၣ်အူန့ၣ်​ ကဘၣ်ဆဲးကဲၤဝဲလၢ တၢ်လုၢ်လီၢ် အဖီခိၣ်​ ထီဘိ ဒီးမ့ၣ်အူန့ၣ်​ တဘၣ်လီၤပံာ်ဝဲဘၣ်.

၁၄ “‘ဘၣ်ဃးဒီး တၢ်လုၢ်ဘုန့ၣ်​ တၢ်သိၣ်တၢ်သီ အိၣ်ဝဲဒ်အံၤလီၤ.+ စီၤအၤဟရိၣ်​ အဖိခွါတဖၣ်​ ကဘၣ်ဟဲစိာ် တၢ်လုၢ်ဘု လၢတၢ်လုၢ်လီၢ်လၢ ယဟိဝၤယွၤ အမဲာ်ညါလီၤ. ၁၅ လၢအဝဲသ့ၣ်အကျါတဂၤ ကဘၣ်ဟံးန့ၢ် တၢ်လုၢ်ဘု လၢအမ့ၢ် ကိၣ်ကမူၣ်​ လၢအဂ့ၤ တစှီၤလၢ အဃါဃုာ်ဒီးသိ ဒီးလီၢ်ဘၣ်လၢ အအိၣ်လၢ တၢ်လုၢ်ဘု အဖီခိၣ်​ ခဲလၢာ်လီၤ. ဒီးအဝဲ ဘၣ်ဒွဲၣ်ထီၣ်အီၤဒ် တၢ်လၢအခၢၣ်စး တၢ်လုၢ်ဒီတခါအသိးလၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ. ဒီးအမ့ၢ်ဝဲ တၢ်နၢမူလၢ အမၤမုာ် ယဟိဝၤယွၤ အသးလီၤ.+ ၁၆ ဒီးတၢ်လၢ အအိၣ်တ့ၢ်တဖၣ်န့ၣ်​ စီၤအၤဟရိၣ်​ ဒီးအဖိခွါတဖၣ်​ ကဟံးန့ၢ်ဝဲ+ ဒီးတ့ဝဲကိၣ်လၢ အတပၣ်ဒီး ကိၣ်မံၣ်ဘၣ်​ ဒီးကအီၣ်ဝဲလၢ တၢ်စီဆှံအလီၢ် လၢအမ့ၢ် တၢ်အိၣ်ဖှိၣ်အဒဲ အတၢ်ပျီပူၤ လၢအအိၣ်လၢ ကရၢၢ်ပူၤလီၤ.+ ၁၇ ဒီးကိၣ်န့ၣ်​ ပှၤတဘၣ်​ ကုၢ်အီၤဒီး တၢ်လၢအအိၣ်ဒီး ကိၣ်မံၣ်နီတမံၤဘၣ်.+ ကိၣ်ကမူၣ်လၢ အအိၣ်တ့ၢ်လၢ ယတၢ်လုၢ်လၢ မ့ၣ်အူတဖၣ်အကျါန့ၣ်​ ယဟ့ၣ်လီၤ အဝဲသ့ၣ်လီၤ.+ အဝဲန့ၣ်မ့ၢ်ဝဲ တၢ်လၢ အစီဆှံနီၢ်ကီၢ်+ ဒ်တၢ်လုၢ်လၢ တၢ်ဒဲးဘးအဂီၢ် ဒီးဒ်တၢ်လုၢ်လၢ တၢ်ကမၣ်​ အဂီၢ်အသိးလီၤ. ၁၈ ကယဲၢ်ပှၤပိာ်ခွါလၢ အဟဲလီၤစၢၤလီၤသွဲၣ်လၢ စီၤအၤဟရိၣ်န့ၣ်​ ကအီၣ်ဘၣ်ဝဲလီၤ.+ ဒီးတစိၤဘၣ်တစိၤန့ၣ်​ အမ့ၢ်ဝဲတၢ်လၢ အဝဲသ့ၣ်​ ကန့ၢ်ဘၣ်ဝဲလၢ ယဟိဝၤယွၤ အတၢ်လုၢ်လၢ မ့ၣ်အူတဖၣ်အကျါလီၤ.+ တၢ်ခဲလၢာ်လၢ အဘၣ်ထံးဒီး တၢ်လုၢ်တဖၣ်အံၤန့ၣ်​ ကကဲထီၣ်​ တၢ်လၢအစီဆှံလီၤ.’”

၁၉ ယဟိဝၤယွၤ တဲစီၤမိၤၡ့လၢ ၂၀ “ဖဲစီၤအၤဟရိၣ်​ ဘၣ်တၢ်ဒိးဖှူအီၤ အမုၢ်နံၤန့ၣ်​ အဝဲဒီးအဖိခွါတဖၣ်+ ကဘၣ်ဟဲစိာ်ဝဲ ကိၣ်ကမူၣ်​ လၢအဂ့ၤ တကံလိ*+ ဒ်တၢ်လုၢ်ဘုအသိးလၢ ယဟိဝၤယွၤအဂီၢ်လီၤ.+ တဝာ်န့ၣ်​ ဘၣ်ဟဲစိာ်ဝဲလၢ ဂီၤခီ ဒီးအဝဲတဝာ်န့ၣ်​ လၢဟါခီလီၤ. ၂၁ ဒီးဘၣ်ကုၢ် တၢ်လုၢ်ဘုအံၤလၢ သပၢၤထးဘံၣ်ဘၣ်​ အဖီခိၣ်လီၤ.+ ဝံၤဒီး နဘၣ်ဃါဃုာ်အီၤဒီးသိ ဒီးဘိးကၢ်အီၤ တက့ဘၣ်တက့ ဒီးဟဲစိာ်အီၤ ဒီးကကဲထီၣ်​ တၢ်နၢမူ လၢအမၤမုာ် ယဟိဝၤယွၤအသးလီၤ. ၂၂ ဒီးလၢစီၤအၤဟရိၣ်​ အဖိခွါတဖၣ်အကျါ ပှၤလုၢ်တၢ်ဒိၣ်​ လၢအဘၣ်တၢ်ဒိးဖှူအီၤ လၢအထီၣ်​ စီၤအၤဟရိၣ်အလီၢ်န့ၣ်+ ကဘၣ်လုၢ်ထီၣ်​ တၢ်လုၢ်အဝဲအံၤလီၤ. အဝဲ ကဘၣ်ဒွဲၣ်အူထီၣ်ဝဲ ခဲလၢာ်ခဲဆ့ ဒ်သိး အကခုၣ်ထီၣ်လၢ ယဟိဝၤယွၤ အအိၣ်လီၤ. အဝဲန့ၣ်​ မ့ၢ်တၢ်သိၣ်တၢ်သီလၢ အဂၢၢ်ကျၢၤလီၤ. ၂၃ တၢ်လုၢ်ဘုလၢ ပှၤလုၢ်တၢ်ဒိၣ်အဂီၢ် ကိးခါဒဲးန့ၣ်​ ကဘၣ်​ တၢ်ဒွဲၣ်အူထီၣ်အီၤ ခဲလၢာ်ခဲဆ့ ဒီးပှၤတဘၣ်​ အီၣ်အီၤဘၣ်.”

၂၄ ယဟိဝၤယွၤ တဲစီၤမိၤၡ့လၢ ၂၅ “တဲဘၣ်​ စီၤအၤဟရိၣ်​ ဒီးအဖိခွါတဖၣ်လၢ ‘ဘၣ်ဃးဒီး တၢ်လုၢ်လၢ တၢ်ဒဲးဘးအဂီၢ်န့ၣ်​ တၢ်သိၣ်တၢ်သီ အိၣ်ဝဲ ဒ်အံၤလီၤ.+ ဆၣ်ဖိကီၢ်ဖိလၢ တၢ်လုၢ်လၢ တၢ်ဒဲးဘးအဂီၢ်န့ၣ်​ ပှၤကဘၣ်မၤသံအီၤလၢ ယဟိဝၤယွၤ အမဲာ်ညါ ဖဲတၢ်လီၢ်လၢ ပှၤမၤသံ ဆၣ်ဖိကီၢ်ဖိလၢ တၢ်လုၢ်ဒွဲၣ်အူ အဂီၢ်န့ၣ်လီၤ.+ အဝဲန့ၣ်မ့ၢ်ဝဲ တၢ်လၢ အစီဆှံ နီၢ်ကီၢ်လီၤ. ၂၆ ဒီးပှၤလုၢ်တၢ်ဒိၣ်လၢ အလုၢ်ထီၣ်​ တၢ်လုၢ် လၢတၢ်ဒဲးဘး အဂီၢ်န့ၣ်​ အကအီၣ်ဝဲ တၢ်လုၢ်အံၤလီၤ.+ ဒီးကဘၣ်အီၣ်ဝဲလၢ တၢ်စီဆှံအလီၢ် လၢအမ့ၢ် တၢ်အိၣ်ဖှိၣ်အဒဲ အတၢ်ပျီပူၤ လၢအအိၣ်လၢ ကရၢၢ်ပူၤလီၤ.+

၂၇ “‘တၢ်ခဲလၢာ်လၢ အဘၣ်ထံးဒီး ဆၣ်ဖိကီၢ်ဖိတဒုအံၤအညၣ်န့ၣ်​ ကကဲထီၣ်​ တၢ်လၢအစီဆှံလီၤ. ပှၤတဂၤဂ့ၤ တဂၤဂ့ၤ မ့ၢ်ဖှံဘၣ်​ ဆၣ်ဖိကီၢ်ဖိတဒုအံၤအသွံၣ်​ လၢအတၢ်ကူတၢ်သိး အလိၤန့ၣ်​ အကဘၣ်ဆှုၣ်​ တၢ်လၢတၢ်သွံၣ်​ ဖျိးဘၣ်အီၤတဖၣ်​ လၢတၢ်စီဆှံ အလီၢ်လီၤ. ၂၈ ဒီးသပၢၤဟီၣ်ခိၣ်လၢ ပှၤချီတၢ်ညၣ်တဖၣ်အံၤ လၢအပူၤန့ၣ်​ နကဘၣ်​ မၤသ့ၣ်ဖးအီၤလီၤ. ဘၣ်ဆၣ်​ ပှၤမ့ၢ်ချီအီၤလၢ သပၢၤတိၢ်ဘီအပူၤန့ၣ်​ ပှၤကဘၣ်​ ထူးစီသပၢၤအံၤ ဒီးသ့အီၤလၢထံလီၤ.

၂၉ “‘ထဲဒၣ်​ ပှၤပိာ်ခွါတဖၣ်​ လၢအမ့ၢ် ပှၤလုၢ်တၢ်ဒိၣ်တဖၣ်န့ၣ်​ ကအီၣ်ဝဲ တၢ်ညၣ်အံၤလီၤ.+ အဝဲန့ၣ်မ့ၢ်ဝဲ တၢ်လၢ အစီဆှံ နီၢ်ကီၢ်လီၤ.+ ၃၀ ဘၣ်ဆၣ်​ ဆၣ်ဖိကီၢ်ဖိလၢ တၢ်လုၢ်လၢ တၢ်ဒဲးဘးအဂီၢ်န့ၣ်​ အသွံၣ်တနီၤ မ့ၢ်ဘၣ်တၢ်ဟဲစိာ်အီၤ လၢတၢ်စီဆှံအလီၢ် လၢတၢ်အိၣ်ဖှိၣ်​ အဒဲပူၤ ဒ်သိး တၢ်ကမၤဘၣ်လိာ်ဖိးဒ့က့ၤတၢ် အဂီၢ်န့ၣ်​ ပှၤတဘၣ်အီၣ်​ ဆၣ်ဖိကီၢ်ဖိအံၤ အညၣ်နီတဂၤဘၣ်,+ ကဘၣ်​ ဒွဲၣ်အူထီၣ်ကွံာ်အီၤ လၢမ့ၣ်အူလီၤ.

၇ “‘အဝဲအံၤမ့ၢ် တၢ်သိၣ်တၢ်သီလၢ အဘၣ်ဃးဒီး တၢ်လုၢ်လၢ တၢ်ကမၣ်​ အဂီၢ်လီၤ.+ အမ့ၢ်ဝဲ တၢ်လၢ အစီဆှံ နီၢ်ကီၢ်လီၤ. ၂ ဆၣ်ဖိကီၢ်ဖိလၢ တၢ်လုၢ်လၢ တၢ်ကမၣ်အဂီၢ်န့ၣ်​ အဝဲသ့ၣ်​ ကဘၣ်မၤသံဝဲလၢ တၢ်လီၢ်လၢ အဝဲသ့ၣ်​ မၤသံဝဲ ဆၣ်ဖိကီၢ်ဖိတဖၣ်လၢ တၢ်လုၢ်ဒွဲၣ်အူအဂီၢ် ဒီးအသွံၣ်တဖၣ်န့ၣ်+ ကဘၣ်တၢ်ဖှံအီၤလၢ တၢ်လုၢ်လီၢ်အလိၤ ကိးကပၤဒဲးလီၤ.+ ၃ ဒီးအဝဲကဘၣ်​ ဟဲစိာ်ဝဲ အသိခဲလၢာ်+ ဃုာ်ဒီး အခံမဲၢ် လၢအဘီၣ်, အသိလၢ အအိၣ်လၢ အပှံာ်အလိၤ ၄ ဒီးအကလ့ၢ်ခံဖျၢၣ်​ လၢအအိၣ်ဘူးဒီး အယီၢ်ဒ့ ဃုာ်ဒီး အသိလၢ အအိၣ်လၢ အကလ့ၢ် အလိၤလီၤ. အဝဲ ကဘၣ်ထုးထီၣ်ကွံာ်စ့ၢ်ကီး အသိလၢ အအိၣ်လၢ အသူၣ်လိၤ ဃုာ်ဒီး အကလ့ၢ်တဖၣ်လီၤ.+ ၅ ဒီးပှၤလုၢ်တၢ်ဒိၣ်​ ကဒွဲၣ်အူထီၣ်အီၤလၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်အဂီၢ် ဒ်တၢ်လုၢ်လၢ မ့ၣ်အူလၢ ယဟိဝၤယွၤအအိၣ်​ အသိးန့ၣ်လီၤ.+ အမ့ၢ်ဝဲ တၢ်လုၢ်လၢ တၢ်ကမၣ်​ အဂီၢ်လီၤ. ၆ ထဲဒၣ်​ ပှၤပိာ်ခွါတဖၣ်​ လၢအမ့ၢ် ပှၤလုၢ်တၢ်ဒိၣ်တဖၣ်န့ၣ်​ ကအီၣ်ဝဲ တၢ်ညၣ်အံၤ+ ဒီးကအီၣ်ဝဲလၢ တၢ်စီဆှံ အလီၢ်လီၤ. အမ့ၢ်ဝဲ တၢ်လၢ အစီဆှံ နီၢ်ကီၢ်လီၤ.+ ၇ တၢ်သိၣ်တၢ်သီလၢ အဘၣ်ဃးဒီး တၢ်လုၢ်လၢ တၢ်ဒဲးဘးအဂီၢ်န့ၣ်​ ဘၣ်ထွဲလိာ်အသးဒီး တၢ်လုၢ်လၢ တၢ်ကမၣ်အဂီၢ် စ့ၢ်ကီးလီၤ. အဃိ ဆၣ်ဖိကီၢ်ဖိ အညၣ်လၢ ပှၤလုၢ်တၢ်ဒိၣ်သူဝဲ လၢတၢ်မၤဘၣ်လိာ်ဖိးဒ့က့ၤတၢ် အဂီၢ်န့ၣ်​ မ့ၢ်ဝဲ ပှၤလုၢ်တၢ်ဒိၣ်​ အတၢ်လီၤ.+

၈ “‘ဖဲပှၤလုၢ်တၢ်ဒိၣ်တဂၤ လုၢ်ထီၣ်ဝဲ တၢ်လုၢ်ဒွဲၣ်အူ လၢပှၤတဂၤဂၤ အဂီၢ်အခါ ဆၣ်ဖိကီၢ်ဖိအံၤအဘ့ၣ်+ ကကဲထီၣ်ဝဲ ပှၤလုၢ်တၢ်ဒိၣ်​ အတၢ်လီၤ.

၉ “‘ကယဲၢ်တၢ်လုၢ်ဘုလၢ ပှၤကုၢ်ဝဲလၢ ဖၣ်ကပူၤ အပူၤမ့ၢ်ဂ့ၤ, လၢသပၢၤဘံၣ်သလၣ်​ အပူၤမ့ၢ်ဂ့ၤ မ့တမ့ၢ် လၢသပၢၤထးဘံၣ်ဘၣ်​ အပူၤမ့ၢ်ဂ့ၤ+ ကကဲထီၣ်ဝဲ ပှၤလုၢ်တၢ်ဒိၣ်လၢ အလုၢ်ထီၣ်ဝဲတဂၤ အတၢ်လီၤ.+ ၁၀ တၢ်လုၢ်ဘု တမံၤဂ့ၤတမံၤဂ့ၤ လၢအဘၣ်တၢ်ဃါဃုာ်အီၤဒီး သိမ့ၢ်ဂ့ၤ,+ လၢအဃ့မ့ၢ်ဂ့ၤ+ ကကဲထီၣ်ဝဲ စီၤအၤဟရိၣ်​ အဖိခွါတဖၣ်​ အတၢ် ဒီးအဝဲသ့ၣ်​ ကန့ၢ်ဘၣ်ဝဲ ပှဲၤသိးသိးလီၤ.

၁၁ “‘ဘၣ်ဃးဒီး တၢ်လုၢ်အိၣ်ဃူအိၣ်ဖိးလၢ ပှၤကဟဲစိာ်ဆူ ယဟိဝၤယွၤ အအိၣ်န့ၣ်​ တၢ်သိၣ်တၢ်သီ အိၣ်ဝဲဒ်အံၤလီၤ.+ ၁၂ အဝဲမ့ၢ်ဟဲစိာ် တၢ်လုၢ်အံၤ ဒ်သိး ကပာ်ဖျါထီၣ်​ တၢ်စံးဘျုးစံးဖှိၣ်အဂီၢ်န့ၣ်​ အကမ့ၢ်ဝဲ တၢ်လုၢ်စံးဘျုးစံးဖှိၣ်က့ၤလီၤ.+ ဒီးအဝဲ ကဘၣ်ဟဲစိာ်ဃုာ်ဒီး ကိၣ်လၢအတပၣ်ဒီး ကိၣ်မံၣ်ဘၣ်​ လၢအဘၣ်တၢ်တ့အီၤ ဃုာ်ဒီးသိ ဒီးအလီၤဂာ်ဒ် ကိၣ်ထံဖှံၣ်အသိး, ကိၣ်ဘူဘူဖိလၢ အတပၣ်ဒီးကိၣ်မံၣ်လၢ တၢ်ဖှူအီၤဒီးသိ ဒီးကိၣ်ထံဖှံၣ်လၢ အဘၣ်တၢ်တ့အီၤဒီး ကိၣ်ကမူၣ်လၢ အဂ့ၤလၢ အဘၣ်တၢ်ဃါဃုာ်အီၤဒီး သိဂ့ၤဂ့ၤ ဒီးစုၣ်စီၣ်အီၤလၢ သိလီၤ. ၁၃ တကးဒံးဘၣ်​ အဝဲကဘၣ်ဟဲစိာ်ဝဲ ကိၣ်လၢအပၣ်ဒီးကိၣ်မံၣ်​ လၢအလီၤဂာ်ဒ် ကိၣ်ထံဖှံၣ်အသိး ဃုာ်ဒီး အတၢ်လုၢ်စံးဘျုးစံးဖှိၣ်က့ၤ လၢအမ့ၢ် တၢ်လုၢ်အိၣ်ဃူအိၣ်ဖိးလီၤ. ၁၄ လၢကိၣ်တဖၣ်အံၤ တခါစုာ်စုာ်အကျါန့ၣ်​ အဝဲ ကဟ့ၣ်လုၢ်ထီၣ်ဝဲ တခါတလိၣ်​ ဒ်တၢ်လုၢ်စီဆှံ အသိးလၢ ယဟိဝၤယွၤအအိၣ်လီၤ. ဒီးတၢ်သ့ၣ်တဖၣ်န့ၣ်​ ကကဲထီၣ်​ ပှၤလုၢ်တၢ်ဒိၣ်လၢ အဖှံဝဲ တၢ်သွံၣ်လၢ တၢ်လုၢ်အိၣ်ဃူအိၣ်ဖိး အဂီၢ်န့ၣ်​ အတၢ်လီၤ.+ ၁၅ ဆၣ်ဖိကီၢ်ဖိလၢ တၢ်လုၢ်အိၣ်ဃူအိၣ်ဖိး လၢအမ့ၢ် တၢ်လုၢ်စံးဘျုးစံးဖှိၣ်က့ၤအဂီၢ်န့ၣ်​ ပှၤကဘၣ်အီၣ်အညၣ်​ ဖဲမုၢ်နံၤလၢ အဝဲဟ့ၣ်လုၢ်ထီၣ်အီၤန့ၣ်လီၤ. အဝဲ တဘၣ်ပာ်ဃာ်အီၤ တုၤလီၤလၢ လၢခံတဂီၤ နီတစဲးဘၣ်.+

၁၆ “‘အတၢ်လုၢ်တၢ်ပာ် မ့မ့ၢ် တၢ်လုၢ်လၢ တၢ်အၢၣ်လီၤအဂီၢ်+ မ့တမ့ၢ် တၢ်လုၢ်လၢ တၢ်သးအိၣ်အပူၤန့ၣ်+ ပှၤကဘၣ်အီၣ်အီၤ ဖဲမုၢ်နံၤလၢ အဝဲဟ့ၣ်လုၢ်ထီၣ်အီၤန့ၣ်လီၤ. ဒီးတၢ်လၢ အအိၣ်တ့ၢ်တဖၣ်န့ၣ်​ ပှၤအီၣ်အီၤ လၢခံတသီ သ့ဝဲလီၤ. ၁၇ ဘၣ်ဆၣ်​ ဖဲသၢသီတသီန့ၣ်​ ဆၣ်ဖိကီၢ်ဖိလၢ အဘၣ်တၢ်လုၢ်ထီၣ်အီၤ အညၣ်​ လၢအအိၣ်တ့ၢ်တဖၣ်န့ၣ်​ တၢ်ကဘၣ်​ ဒွဲၣ်အူထီၣ်အီၤ လၢမ့ၣ်အူလီၤ.+ ၁၈ ဖဲသၢသီတသီ ပှၤမ့ၢ်အီၣ်​ အတၢ်လုၢ်အိၣ်ဃူအိၣ်ဖိး အညၣ်န့ၣ်​ ပှၤလၢအဟဲဟ့ၣ်လုၢ်ထီၣ်တၢ်တဂၤ တဒိးန့ၢ်ဘၣ်​ ကစၢ်ယွၤ အတၢ်ဘၣ်သးလၢၤဘၣ်. တၢ်လုၢ်အဝဲန့ၣ်​ တကဲဘျုးလၢ အဂီၢ်လၢၤဘၣ်​ ဒီးကကဲထီၣ်​ တၢ်သးဘၣ်အၢအဃိ ပှၤတဂၤလၢ အအီၣ်ဝဲန့ၣ်​ ကဘၣ်ဟ့ၣ်​ တၢ်စံးဆၢ လၢအတၢ်ကမၣ်​ အဂီၢ်လီၤ.+ ၁၉ တၢ်ညၣ်လၢ အဘၣ်ထံးဒီး တၢ်လၢအတကဆှီဘၣ်​ တမံၤမံၤန့ၣ်​ ပှၤတဘၣ်အီၣ်အီၤဘၣ်. အကဘၣ်​ တၢ်ဒွဲၣ်အူထီၣ်အီၤ လၢမ့ၣ်အူလီၤ. ပှၤလၢအကဆှီ ကိးဂၤဒဲးန့ၣ်​ အီၣ်ဝဲ တၢ်ညၣ်လၢ အကဆှီသ့လီၤ.

၂၀ “‘ဘၣ်ဆၣ်​ ပှၤတဂၤဂၤ လၢအတကဆှီဘၣ်​ ဒီးအအီၣ်ဝဲ တၢ်လုၢ်အိၣ်ဃူအိၣ်ဖိး အညၣ်​ လၢအမ့ၢ်ဝဲလၢ ယဟိဝၤယွၤ အဂီၢ်န့ၣ်​ အကဘၣ်​ တၢ်မၤသံအီၤလီၤ.+ ၂၁ ပှၤတဂၤဂၤလၢအထိးဘၣ်​ တၢ်လၢ အတကဆှီဘၣ်​ တမံၤမံၤ ဒ်သိးဒီး ပှၤလၢ အတကဆှီဘၣ်မ့ၢ်ဂ့ၤ,+ ဆၣ်ဖိကီၢ်ဖိလၢ အတကဆှီဘၣ်မ့ၢ်ဂ့ၤ,+ တၢ်လၢ အလီၤသးဘၣ်အၢ လၢအတကဆှီဘၣ်မ့ၢ်ဂ့ၤန့ၣ်+ အမ့ၢ်အီၣ်ဝဲ တၢ်လုၢ်အိၣ်ဃူအိၣ်ဖိး အညၣ်​ လၢအမ့ၢ်ဝဲလၢ ယဟိဝၤယွၤ အဂီၢ်န့ၣ်​ အကဘၣ်​ တၢ်မၤသံအီၤလီၤ.’”

၂၂ ယဟိဝၤယွၤ ဆဲးတဲ စီၤမိၤၡ့လၢ ၂၃ “တဲဘၣ်​ ပှၤအံၣ်စရ့လးဖိလၢ ‘ကျီၢ်ဖါ အသိမ့ၢ်ဂ့ၤ, သိဖါဖိ အသိမ့ၢ်ဂ့ၤ, မဲာ်တဲးလဲး အသိမ့ၢ်ဂ့ၤန့ၣ်​ သုတဘၣ်အီၣ်အီၤ နီတမံၤတဂ့ၤ.+ ၂၄ ဆၣ်ဖိကီၢ်ဖိ လၢအဘၣ်တၢ်ထံၣ်န့ၢ်အီၤ လၢအသံမ့ၢ်ဂ့ၤ ဆၣ်ဖိကီၢ်ဖိ လၢဆၣ်ဖိကီၢ်ဖိ အဂၤ အ့ၣ်သံအီၤမ့ၢ်ဂ့ၤန့ၣ်​ သုသူအသိလၢ တၢ်အဂၤတမံၤဂ့ၤတမံၤဂ့ၤအဂီၢ် သ့ဝဲဘၣ်ဆၣ်​ သုတဘၣ်​ အီၣ်အီၤ နီတဘျီတဂ့ၤ.+ ၂၅ ပှၤတဂၤဂၤ မ့ၢ်ဟဲစိာ် ဆၣ်ဖိကီၢ်ဖိ ဒ်တၢ်လုၢ်လၢမ့ၣ်အူလၢ ယဟိဝၤယွၤအအိၣ်​ ဒီးအီၣ်ဝဲ ဆၣ်ဖိကီၢ်ဖိအံၤအသိန့ၣ်​ အကဘၣ်​ တၢ်မၤသံအီၤလီၤ.

၂၆ “‘ဖဲသုအိၣ်တၢ်လီၢ် တပူၤဂ့ၤ တပူၤဂ့ၤ သုတဘၣ်အီၣ်​ တၢ်သွံၣ်​ နီတမံၤဘၣ်.+ ထိၣ်တဖၣ်​ အသွံၣ်မ့ၢ်ဂ့ၤ ဆၣ်ဖိကီၢ်ဖိတဖၣ်​ အသွံၣ်မ့ၢ်ဂ့ၤ သုတဘၣ်​ အီၣ်အီၤဘၣ်. ၂၇ ပှၤတဂၤဂ့ၤ တဂၤဂ့ၤ လၢအအီၣ်​ တၢ်သွံၣ်တမံၤဂ့ၤတမံၤဂ့ၤန့ၣ်​ အကဘၣ်​ တၢ်မၤသံအီၤလီၤ.’”+

၂၈ ယဟိဝၤယွၤ တဲဘၣ်​ စီၤမိၤၡ့လၢ ၂၉ “တဲဘၣ်​ ပှၤအံၣ်စရ့လးဖိလၢ ‘ပှၤလၢ အလုၢ်ထီၣ်​ တၢ်လုၢ်အိၣ်ဃူအိၣ်ဖိးလၢ ယဟိဝၤယွၤ အအိၣ်န့ၣ်​ ကဘၣ်ဟဲစိာ် ဆၣ်ဖိကီၢ်ဖိအံၤအကူာ်တဖၣ်​ ဒ်တၢ်လုၢ်လၢ ယဟိဝၤယွၤအအိၣ်လီၤ.+ ၃၀ အဃိ အကဘၣ်ဟဲစိာ် တၢ်အသိ+ ဒီးတၢ်အသးနါပှၢ်လၢ အနီၢ်ကစၢ်အစု ဒ်တၢ်လုၢ်လၢမ့ၣ်အူလၢ ယဟိဝၤယွၤ အအိၣ်အသိးလီၤ. ဒီးအဝဲ ကဝံၢ်ဝၢ်ဝဲ တၢ်အသးနါပှၢ် လၢအလီၢ်ခံ ဒီးအမဲာ်ညါ ဒ်တၢ်လုၢ်ဝံၢ်ဝၢ်အသိးလၢ+ ယဟိဝၤယွၤ အမဲာ်ညါလီၤ. ၃၁ ပှၤလုၢ်တၢ်ဒိၣ်န့ၣ်​ ကဒွဲၣ်အူထီၣ်ဝဲ တၢ်အသိလၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်အဂီၢ်+ ဘၣ်ဆၣ်​ မ့မ့ၢ် အသးနါပှၢ်န့ၣ်​ ကကဲထီၣ်​ စီၤအၤဟရိၣ်​ ဒီးအဖိခွါတဖၣ်​ အတၢ်လီၤ.+

၃၂ “‘လၢသု တၢ်လုၢ်အိၣ်ဃူအိၣ်ဖိး အကျါန့ၣ်​ သုကဘၣ်ဟ့ၣ်လီၤ တၢ်အခီၣ်ထွဲတခီ ဒ်တၢ်လုၢ်စီဆှံ အသိး ဆူပှၤလုၢ်တၢ်ဒိၣ်​ အအိၣ်လီၤ.+ ၃၃ စီၤအၤဟရိၣ်​ အဖိခွါ လၢအလုၢ်ထီၣ်​ တၢ်လုၢ်အိၣ်ဃူအိၣ်ဖိးအသွံၣ်​ ဒီးတၢ်အသိန့ၣ်​ ကဒိးန့ၢ်ဘၣ်ဝဲ တၢ်အခီၣ်ထွဲန့ၣ်လီၤ.+ ၃၄ လၢပှၤအံၣ်စရ့လးဖိတဖၣ်​ အတၢ်လုၢ်အိၣ်ဃူအိၣ်ဖိး အကျါန့ၣ်​ ယဟံးန့ၢ် တၢ်အသးနါပှၢ်လၢ တၢ်လုၢ်ဝံၢ်ဝၢ်အဂီၢ် ဒီးတၢ်အခီၣ်လၢ တၢ်လုၢ်စီဆှံ အဂီၢ်လီၤ. ဒီးယဟ့ၣ်လီၤ တၢ်သ့ၣ်တဖၣ်န့ၣ်ဆူ ပှၤလုၢ်တၢ်ဒိၣ်​ စီၤအၤဟရိၣ်​ ဒီးအဖိခွါတဖၣ်​ အအိၣ်​ ဒ်အမ့ၢ် တၢ်သိၣ်တၢ်သီလၢ အဂၢၢ်ကျၢၤ လၢပှၤအံၣ်စရ့လးဖိတဖၣ်​ အဂီၢ်လီၤ.+

၃၅ “‘လၢယဟိဝၤယွၤ အတၢ်လုၢ်လၢ မ့ၣ်အူတဖၣ်အကျါ တၢ်အကူာ်အခီတဖၣ်အံၤ မ့ၢ်တၢ်လၢ အဘၣ်တၢ်ဟ့ၣ်လီၤ ပှၤလုၢ်တၢ်ဒိၣ်တဖၣ်​ လၢအမ့ၢ် စီၤအၤဟရိၣ်​ ဒီးအဖိခွါတဖၣ်လီၤ. ဒီးတၢ်ဟ့ၣ်လီၤ အဝဲသ့ၣ်​ စးထီၣ်ဖဲ မုၢ်တနံၤလၢ အဝဲ ပာ်လီၤဆီ အဝဲသ့ၣ်​ ဒ်သိး အဝဲသ့ၣ်​ ကမၤပှၤလုၢ်တၢ်ဒိၣ်​ အတၢ်မၤလၢ ယဟိဝၤယွၤ အဂီၢ်လီၤ.+ ၃၆ စးထီၣ်လၢ မုၢ်နံၤလၢ အဝဲဒိးဖှူအဝဲသ့ၣ်န့ၣ်+ ယဟိဝၤယွၤ မၤလိာ်ပှၤအံၣ်စရ့လးဖိတဖၣ်​ လၢကဟ့ၣ်လီၤ အဝဲသ့ၣ်လၢ တၢ်အကူာ်အခီတဖၣ်အံၤလီၤ. အဝဲန့ၣ်​ မ့ၢ်တၢ်သိၣ်တၢ်သီ လၢအဂၢၢ်ကျၢၤ လၢအဝဲသ့ၣ်အဂီၢ် တစိၤဘၣ်တစိၤလီၤ.’”

၃၇ အဝဲန့ၣ်​ မ့ၢ်တၢ်သိၣ်တၢ်သီလၢ အဘၣ်ဃးဒီး တၢ်လုၢ်ဒွဲၣ်အူ,+ တၢ်လုၢ်ဘု,+ တၢ်လုၢ်လၢ တၢ်ဒဲးဘးအဂီၢ်,+ တၢ်လုၢ်လၢ တၢ်ကမၣ်အဂီၢ်,+ တၢ်လုၢ်လၢ ကပာ်ထီၣ်​ ပှၤလုၢ်တၢ်ဒိၣ်တဖၣ်အဂီၢ်+ ဒီးတၢ်လုၢ်အိၣ်ဃူအိၣ်ဖိး,+ ၃၈ ဒ်ယဟိဝၤယွၤ မၤလိာ်စီၤမိၤၡ့ လၢကစၢၢ်စံၤနါ အသိးန့ၣ်လီၤ.+ ဖဲတၢ်တနံၤန့ၣ်​ စီၤမိၤၡ့ မၤလိာ် ပှၤအံၣ်စရ့လးဖိလၢ စံၤနါအပှၢ်မုၢ်ကနၢ လၢအဝဲသ့ၣ်​ ကလုၢ်ထီၣ်​ တၢ်လုၢ်တၢ်ပာ်တဖၣ်လၢ ယဟိဝၤယွၤ အအိၣ်လီၤ.+

၈ ယဟိဝၤယွၤ ဆဲးတဲ စီၤမိၤၡ့လၢ ၂ “ဟဲကိး စီၤအၤဟရိၣ်​ ဒီးအဖိခွါတဖၣ်တက့ၢ်.+ ဟဲစိာ်ဃုာ်ဒီး တၢ်ကူတၢ်သိးတဖၣ်,+ သိလၢ တၢ်ဒိးဖှူတၢ်အဂီၢ်,+ ကျီၢ်ဖါလၢ အဘၣ်တၢ်သူအီၤလၢ တၢ်လုၢ်လၢ တၢ်ဒဲးဘးအဂီၢ်, သိဖါခံဒု ဒီးနာ်တဖျၢၣ်လၢ အိၣ်ဒီး ကိၣ်လၢအတပၣ်ဒီး ကိၣ်မံၣ်ဘၣ်န့ၣ်တက့ၢ်.+ ၃ ဒီးဒုးအိၣ်ဖှိၣ်​ ပှၤဂီၢ်မုၢ်ခဲလၢာ် တပူၤဃီလၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ်တက့ၢ်.”

၄ စီၤမိၤၡ့ မၤဝဲဒ် ယဟိဝၤယွၤ မၤလိာ်အီၤအသိး ဒီးပှၤဂီၢ်မုၢ်ခဲလၢာ် ဟဲပာ်ဖှိၣ်ထီၣ်အသးလၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ်လီၤ. ၅ ဒီးစီၤမိၤၡ့ တဲဘၣ်ပှၤဂီၢ်မုၢ် ခဲလၢာ်လၢ “ယဟိဝၤယွၤ မၤလိာ်ပှၤလၢ ပကဘၣ်မၤဒ်အံၤလီၤ.” ၆ ဒီးစီၤမိၤၡ့ ဟဲကိးဘူးထီၣ်​ စီၤအၤဟရိၣ်​ ဒီးအဖိခွါတဖၣ်​ ဒီးမၤကဆှီ အဝဲသ့ၣ်​ လၢထံလီၤ.*+ ၇ ဝံၤဒီး စီၤမိၤၡ့ ဒုးသိးထီၣ်​ စီၤအၤဟရိၣ်လၢ ဆ့ဖးထီ,+ စၢထီၣ်န့ၢ်အီၤ ယီၢ်တကိးလၢ ဆ့ဖးထီအဂီၢ်,+ ဒုးသိးထီၣ်န့ၢ်အီၤ ဆ့ကၤလၢ အစုဒုၣ်တအိၣ်ဘၣ်,+ ဒုးသိးထီၣ်န့ၢ်အီၤအ့ဖိး+ ဒီးယီၢ်တကိး လၢအဘၣ်​ တၢ်ထါအီၤန့ၣ်+ စီၤမိၤၡ့ စၢထီၣ်န့ၢ်အီၤ လၢအ့ဖိးအလိၤ ကျၢၤကျၢၤလီၤ. ၈ ဝံၤဒီး စီၤမိၤၡ့ ဒုးသိးထီၣ်အီၤ ထၢၣ်ဖိ*+ ဒီးပၢနုာ်ဝဲ အူရံၣ်​ ဒီးတူမံၣ်လၢ+ ထၢၣ်ဖိအပူၤလီၤ. ၉ ဒီးစီၤမိၤၡ့ ဖၢၣ်န့ၢ် စီၤအၤဟရိၣ်အခိၣ်လၢ ခိၣ်ဖၢၣ်လီၤဆီ+ ဒီးလၢခိၣ်ဖၢၣ်အမဲာ်ညါန့ၣ်​ ထီထီၣ်ဝဲ ထူဘ့ၣ်ဘၣ်လၢ အကပြုၢ်ကပြီၤ လၢအမ့ၢ် တၢ်ပနီၣ်စီဆှံတခါ*+ ဒ်ယဟိဝၤယွၤ မၤလိာ်တ့ၢ်အီၤ အသိးလီၤ.

၁၀ စီၤမိၤၡ့ ဟံးန့ၢ်သိလၢ တၢ်ဒိးဖှူတၢ်အဂီၢ် ဒီးဒိးဖှူဝဲ ဒဲစီဆှံ ဒီးတၢ်လၢအအိၣ်လၢအပူၤ ခဲလၢာ်+ ဒီးပာ်စီဆှံဝဲ တၢ်သ့ၣ်တဖၣ်န့ၣ်လီၤ. ၁၁ ဝံၤဒီး စီၤမိၤၡ့ ဖှံဝဲသိအံၤ လၢတၢ်လုၢ်လီၢ်အဖီခိၣ်​ နွံဘျီ ဒီးဒိးဖှူဝဲ တၢ်လုၢ်လီၢ် ဒီးအတၢ်ပီးတၢ်လီခဲလၢာ် ဒီးထံဒၢဖးဒိၣ်​ ဒီးတၢ်တီၣ်ထီၣ်​ ထံဒၢအလီၢ် ဒ်သိး ကပာ်စီဆှံဝဲ တၢ်သ့ၣ်တဖၣ်န့ၣ်​ အဂီၢ်လီၤ. ၁၂ ဒီးစီၤမိၤၡ့ လူလီၤသိလၢ တၢ်ဒိးဖှူတၢ်အဂီၢ် လၢစီၤအၤဟရိၣ်​ အခိၣ်လိၤ ဒီးဒိးဖှူအီၤ ဒ်သိး ကပာ်စီဆှံအီၤ အဂီၢ်လီၤ.+

၁၃ စီၤမိၤၡ့ ဟဲကိးဝဲ စီၤအၤဟရိၣ်​ အဖိခွါတဖၣ်​ ဒီးဒုးသိးထီၣ်​ အဝဲသ့ၣ်လၢ ဆ့ဖးထီ, စၢထီၣ်န့ၢ် အဝဲသ့ၣ်လၢ ယီၢ်တကိးလၢ ဆ့ဖးထီအဂီၢ် ဒီးဒုးဖၢၣ်အဝဲသ့ၣ်​ လၢခိၣ်ဖၢၣ်+ ဒ်ယဟိဝၤယွၤ မၤလိာ်အီၤအသိးလီၤ.

၁၄ ဒီးအဝဲ ဟဲမူၤဝဲ ကျီၢ်ဖါလၢ တၢ်လုၢ်လၢ တၢ်ဒဲးဘးအဂီၢ် ဒီးစီၤအၤဟရိၣ်​ ဒီးအဖိခွါတဖၣ်​ ပာ်ထီၣ်အစုလၢ ကျီၢ်ဖါလၢ တၢ်လုၢ်လၢတၢ်ဒဲးဘးအဂီၢ် အခိၣ်လိၤလီၤ.+ ၁၅ ဒီးစီၤမိၤၡ့ မၤသံဝဲ ကျီၢ်ဖါအံၤ ဒီးဘျၢလီၤ အစုနၢတဘိလၢ ကျီၢ်ဖါအသွံၣ်+ အကျါ ဒီးထွါအီၤလၢ တၢ်လုၢ်လီၢ် အနၢၤတဖၣ်အလိၤ ဒီးမၤကဆှီထီၣ်ဝဲ တၢ်လုၢ်လီၢ်လၢ တၢ်ဒဲးဘးလီၤ. မ့မ့ၢ် တၢ်သွံၣ်လၢ အအိၣ်တ့ၢ်ဝဲခဲလၢာ်န့ၣ်​ အဝဲ လူလီၤဝဲလၢ တၢ်လုၢ်လီၢ် အခီၣ်ထံးလီၤ. အဃိ အဝဲပာ်စီဆှံ တၢ်လုၢ်လီၢ် ဒ်သိး ပှၤကလုၢ်ထီၣ်​ တၢ်လုၢ်တဖၣ်​ လၢတၢ်လုၢ်လီၢ် အဖီခိၣ်​ လၢတၢ်မၤဘၣ်လိာ်ဖိးဒ့က့ၤတၢ် အဂီၢ်လီၤ. ၁၆ ဝံၤဒီး စီၤမိၤၡ့ ဟံးန့ၢ် ကျီၢ်ဖါအသိလၢ အအိၣ်လၢ အပှံာ်လိၤခဲလၢာ်, အသိလၢ အသူၣ်လိၤဒီး အကလ့ၢ်ခံဖျၢၣ်​ ဃုာ်ဒီး သိလၢအအိၣ်လၢအလိၤ ဒီးအဝဲ ဒွဲၣ်အူထီၣ်အီၤ ဒ်သိး အကခုၣ်ထီၣ်လၢ တၢ်လုၢ်လီၢ် အဖီခိၣ်​ အဂီၢ်လီၤ.+ ၁၇ မ့မ့ၢ် ကျီၢ်ဖါအစိၣ်, အဘ့ၣ်, အညၣ်​ ဒီးအအ့ၣ်န့ၣ်​ ဘၣ်တၢ်ဒွဲၣ်အူထီၣ်ကွံာ်အီၤ လၢမ့ၣ်အူ လၢဒဲကဝီၤအချၢ+ ဒ်ယဟိဝၤယွၤ မၤလိာ် စီၤမိၤၡ့ အသိးလီၤ.

၁၈ ဒီးအဝဲဟဲမူၤ သိဖါ လၢတၢ်လုၢ်ဒွဲၣ်အူအဂီၢ် ဒီးစီၤအၤဟရိၣ်​ ဒီးအဖိခွါတဖၣ်​ ပာ်ထီၣ်အစုလၢ သိဖါ အခိၣ်လိၤလီၤ.+ ၁၉ ဒီးစီၤမိၤၡ့ မၤသံဝဲ သိဖါအံၤ ဒီးဖှံဝဲ အသွံၣ်လၢ တၢ်လုၢ်လီၢ်အလိၤ ကိးကပၤဒဲးလီၤ. ၂၀ ဒီးအဝဲ ဒီၣ်တဲာ်သိဖါ တကူာ်တကူာ် ဒီးအခိၣ်သၣ်ဃံ, အကူာ်တဖၣ်​ ဒီးအသိတဖၣ်န့ၣ်​ စီၤမိၤၡ့ ဒွဲၣ်အူထီၣ်ဝဲ ဒ်သိးအကခုၣ်ထီၣ်​ အဂီၢ်လီၤ. ၂၁ ဒီးအဝဲ သ့စီဝဲအပှံာ် ဒီးအခီၣ်တဖၣ်​ ဒီးစီၤမိၤၡ့ ဒွဲၣ်အူထီၣ်ဝဲ သိဖါဒီတဒုလၢ တၢ်လုၢ်လီၢ် ဒ်သိး အကခုၣ်ထီၣ်​ အဂီၢ်လီၤ. ဒီးအမ့ၢ်ဝဲ တၢ်လုၢ်ဒွဲၣ်အူ ဒီးတၢ်နၢမူလၢ အမၤမုာ်ယွၤအသးလီၤ. ဒီးမ့ၢ်ဝဲ တၢ်လုၢ်လၢမ့ၣ်အူ လၢယဟိဝၤယွၤ အဂီၢ် ဒ်ယဟိဝၤယွၤ မၤလိာ်စီၤမိၤၡ့အသိးလီၤ.

၂၂ ဝံၤဒီး နကဘၣ်​ ဟဲမူၤသိဖါ ခံဒုတဒု လၢအမ့ၢ် သိဖါလၢ အဘၣ်​ တၢ်လုၢ်ထီၣ်အီၤလၢ တၢ်ပာ်ထီၣ်​ ပှၤလုၢ်တၢ်ဒိၣ်တဖၣ်​ အဂီၢ်လီၤ.+ ဒီးစီၤအၤဟရိၣ်​ ဒီးအဖိခွါတဖၣ်​ ပာ်အစုလၢ သိဖါတဒုအံၤ အခိၣ်လိၤလီၤ.+ ၂၃ ဒီးစီၤမိၤၡ့ မၤသံဝဲ သိတဒုအံၤ ဒီးဟံးန့ၢ်ဝဲ အသွံၣ်တနီၤ ဒီးဖှူဝဲလၢ စီၤအၤဟရိၣ်​ အနၢ်စဲၤလၢ အနၢ်ထွဲတခီ ဒီးလၢအစုမုၢ်လၢ အစုထွဲတခီ ဒီးလၢအခီၣ်မုၢ်လၢ အခီၣ်ထွဲတခီ အလိၤလီၤ. ၂၄ ဝံၤဒီး စီၤမိၤၡ့ ကိးန့ၢ် စီၤအၤဟရိၣ်​ အဖိခွါတဖၣ်​ ဒီးဖှူဝဲ တၢ်သွံၣ်တနီၤလၢ အဝဲသ့ၣ်​ အနၢ်စဲၤလၢ အနၢ်ထွဲတခီ ဒီးအဝဲသ့ၣ်​ အစုမုၢ်လၢ အစုထွဲတခီ ဒီးအဝဲသ့ၣ်​ အခီၣ်မုၢ်လၢ အခီၣ်ထွဲတခီ အလိၤလီၤ. ဒီးစီၤမိၤၡ့ ဖှံဝဲတၢ်သွံၣ်လၢ အအိၣ်တ့ၢ်တဖၣ်လၢ တၢ်လုၢ်လီၢ်အလိၤ ကိးကပၤဒဲးလီၤ.+

၂၅ ဒီးအဝဲ ဟံးန့ၢ် သိဖါအံၤအသိ, အခံမဲၢ်လၢအဘီၣ်, အသိလၢ အအိၣ်လၢ အပှံာ်လိၤခဲလၢာ်, အသိလၢ အအိၣ်လၢ အသူၣ်လိၤ, အကလ့ၢ်ခံဖျၢၣ်​ ဃုာ်ဒီးသိလၢ အအိၣ်လၢအလိၤ ဒီးအခီၣ်ထွဲ တခီလီၤ.+ ၂၆ ဒီးအဝဲထုးထီၣ်ဝဲ ကိၣ်လၢအကဝီၤတလိၣ်​ ဒီးကိၣ်လၢ အဘၣ်တၢ်တ့အီၤ ဃုာ်ဒီးသိ ဒီးအလီၤဂာ်ဒ် ကိၣ်ထံဖှံၣ်အသိး+ ဒီးကိၣ်ဘူဘူဖိ တဘ့ၣ်လၢ အအိၣ်လၢ နာ်အပူၤလီၤ. နာ်တဖျၢၣ်အံၤ အိၣ်ဝဲလၢ ယဟိဝၤယွၤ အမဲာ်ညါ ဒီးအိၣ်ဒီးကိၣ်လၢ အတပၣ်ဒီး ကိၣ်မံၣ်ဘၣ်န့ၣ်လီၤ.+ ဒီးအဝဲပာ်ထီၣ်ဝဲ ကိၣ်တဖၣ်အံၤလၢ တၢ်အသိတဖၣ်​ ဒီးတၢ်အခီၣ်ထွဲ အလိၤလီၤ. ၂၇ ဝံၤဒီး အဝဲပာ်လီၤဝဲ တၢ်သ့ၣ်တဖၣ်အံၤ လၢစီၤအၤဟရိၣ်​ ဒီးအဖိခွါတဖၣ်​ အစုညါသး ဒီးအဝဲသ့ၣ်​ ဝံၢ်ဝၢ်ဝဲလၢ အလီၢ်ခံ ဒီးအမဲာ်ညါ ဒ်တၢ်လုၢ်ဝံၢ်ဝၢ်အသိး လၢယဟိဝၤယွၤ အမဲာ်ညါလီၤ. ၂၈ ဝံၤဒီးစီၤမိၤၡ့ ဟံးန့ၢ်တၢ်သ့ၣ်တဖၣ်န့ၣ်​ ဒီးပာ်ထီၣ်ဝဲလၢ တၢ်လုၢ်ဒွဲၣ်အူ လၢအအိၣ်ဝဲလၢ တၢ်လုၢ်လီၢ်အဖီခိၣ်အလိၤ ဒ်သိး အကခုၣ်ထီၣ်အဂီၢ်လီၤ. တၢ်သ့ၣ်တဖၣ်အံၤ မ့ၢ်ဝဲ တၢ်လုၢ်လၢ တၢ်ပာ်ထီၣ်​ ပှၤလုၢ်တၢ်ဒိၣ်အဂီၢ် ဒီးအမ့ၢ်ဝဲ တၢ်နၢမူလၢ အမၤမုာ်ယွၤအသးလီၤ. ဒီးမ့ၢ်ဝဲ တၢ်လုၢ် လၢမ့ၣ်အူ လၢယဟိဝၤယွၤ အအိၣ်လီၤ.

၂၉ ဝံၤဒီး စီၤမိၤၡ့ ဟံးန့ၢ်သိဖါအသးနါပှၢ် ဒီးဝံၢ်ဝၢ်ဝဲလၢ အလီၢ်ခံဒီးအမဲာ်ညါ ဒ်တၢ်လုၢ်ဝံၢ်ဝၢ်အသိး လၢယဟိဝၤယွၤ အမဲာ်ညါလီၤ.+ သိဖါလၢ တၢ်ပာ်ထီၣ်​ ပှၤလုၢ်တၢ်ဒိၣ်အဂီၢ် အသးနါပှၢ်န့ၣ်​ မ့ၢ်ဝဲ စီၤမိၤၡ့အတၢ် ဒ်ယဟိဝၤယွၤ မၤလိာ်ဝဲ စီၤမိၤၡ့အသိးလီၤ.+

၃၀ ဒီးစီၤမိၤၡ့ ဟံးန့ၢ်ဝဲ သိလၢတၢ်ဒိးဖှူတၢ်အဂီၢ်+ ဒီးတၢ်အသွံၣ်တနီၤ လၢတၢ်လုၢ်လီၢ်အဖီခိၣ်​ ဒီးဖှံဝဲ စီၤအၤဟရိၣ်​ ဒီးအတၢ်ကူတၢ်သိး ဒီးစီၤအၤဟရိၣ်​ အဖိခွါလၢ အအိၣ်ဒီးအီၤတဖၣ်​ ဒီးအဝဲသ့ၣ်​ အတၢ်ကူတၢ်သိးလီၤ. အဃိ အဝဲပာ်စီဆှံဝဲ စီၤအၤဟရိၣ်​ ဒီးအတၢ်ကူတၢ်သိးတဖၣ်​ ဒီးစီၤအၤဟရိၣ်​ အဖိခွါတဖၣ်+ ဒီးအဝဲသ့ၣ်​ အတၢ်ကူတၢ်သိးတဖၣ်လီၤ.+

၃၁ ဒီးစီၤမိၤၡ့ တဲဘၣ်​ စီၤအၤဟရိၣ်​ ဒီးအဖိခွါတဖၣ်လၢ “ချီ+ တၢ်ညၣ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ် ဒီးဖဲန့ၣ်န့ၣ်​ သုဘၣ်အီၣ်​ တၢ်ညၣ်အံၤ ဃုာ်ဒီး ကိၣ်လၢအအိၣ်လၢနာ်ပူၤ* ဒ်ကစၢ်ယွၤ မၤလိာ်ယၤလၢ ‘စီၤအၤဟရိၣ်​ ဒီးအဖိခွါတဖၣ်​ ကဘၣ်အီၣ်အီၤ’ န့ၣ်အသိးလီၤ.+ ၃၂ တၢ်ညၣ်ဒီးကိၣ်လၢ အအိၣ်တ့ၢ်တဖၣ်န့ၣ်​ သုကဘၣ်​ ဒွဲၣ်အူထီၣ်အီၤလၢ မ့ၣ်အူလီၤ.+ ၃၃ ဒ်သိးတၢ်ကပာ်ထီၣ်သုလၢ ပှၤလုၢ်တၢ်ဒိၣ်အဂီၢ်န့ၣ်​ တၢ်ဆၢကတီၢ် ကယံာ်ဝဲနွံသီအဃိ တၢ်ပာ်ထီၣ်သုလၢ ပှၤလုၢ်တၢ်ဒိၣ်​ အမုၢ်နံၤမုၢ်သီ တချုး ပှဲၤထီၣ်ဒံးဘၣ်န့ၣ်​ သုတဘၣ်ဟးထီၣ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ်ဘၣ်​ နွံသီလီၤ.+ ၃၄ တၢ်လၢပမၤဝံၤအီၤ လၢတနံၤအံၤန့ၣ်​ မ့ၢ်ဝဲ တၢ်လၢယဟိဝၤယွၤ မၢပှၤ ဒ်သိး ကမၤဘၣ်လိာ်ဖိးဒ့က့ၤတၢ် လၢသုဂီၢ်လီၤ.+ ၃၅ ဒီးဒ်ကစၢ်ယွၤ မၤလိာ်ယၤအသိး ဒ်သိး သုသုတသံတဂ့ၤအဂီၢ် သုကဘၣ်အိၣ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ် နွံသီ လၢမုၢ်ဆါ ဒီးလၢမုၢ်နၤ+ ဒီးမၤလၢပှဲၤ မူဒါလၢ ယဟိဝၤယွၤ ဟ့ၣ်လီၤသုလီၤ.”+

၃၆ ဒီးစီၤအၤဟရိၣ်​ ဒီးအဖိခွါတဖၣ်​ မၤဝဲဒ်ယဟိဝၤယွၤ မၤလိာ်ဝဲ စီၤမိၤၡ့အသိး ခဲလၢာ်လီၤ.

၉ ဖဲဃိးသီတသီန့ၣ်+ စီၤမိၤၡ့ ကိးန့ၢ်ဝဲ စီၤအၤဟရိၣ်​ ဒီးအဖိခွါတဖၣ်​ ဒီးအံၣ်စရ့လး အပှၤသူၣ်က့သးပှၢ်တဖၣ်လီၤ. ၂ ဒီးအဝဲတဲဘၣ်​ စီၤအၤဟရိၣ်လၢ “ဟံးန့ၢ်ကျီၢ်ဖိ လၢအလၢအပှဲၤတဒု လၢတၢ်လုၢ် လၢတၢ်ဒဲးဘးအဂီၢ်+ ဒီးသိဖါ လၢအလၢအပှဲၤ တဒုလၢ တၢ်လုၢ်ဒွဲၣ်အူအဂီၢ် ဒီးဟဲမူၤအီၤလၢ ယဟိဝၤယွၤ အမဲာ်ညါတက့ၢ်. ၃ ဘၣ်ဆၣ်​ နကဘၣ်တဲ ပှၤအံၣ်စရ့လးဖိတဖၣ်လၢ ‘ဟံးန့ၢ် မဲာ်တဲးလဲးဖါ တဒုလၢ တၢ်လုၢ်လၢ တၢ်ဒဲးဘးအဂီၢ် ဒီးကျီၢ်ဖိတဒု ဒီးသိဖါဖိတဒု လၢအအိၣ်တနံၣ်​ ဒီးလၢအလၢအပှဲၤ လၢတၢ်လုၢ်ဒွဲၣ်အူအဂီၢ် ၄ ဒီးကျီၢ်ဖါတဒု ဒီးသိဖါတဒုလၢ တၢ်လုၢ်အိၣ်ဃူအိၣ်ဖိးတဖၣ်​ အဂီၢ်+ ဒီးတၢ်လုၢ်ဘုလၢ+ အဃါဃုာ်အသးဒီးသိ ဒ်သိး ကလုၢ်ထီၣ်​ တၢ်သ့ၣ်တဖၣ်အံၤလၢ ယဟိဝၤယွၤအအိၣ်, မ့ၢ်လၢတနံၤအံၤ ယဟိဝၤယွၤ ကလီၣ်ဖျါထီၣ်အသးလၢ သုအိၣ်လီၤ.’”+

၅ အဃိ တၢ်လၢစီၤမိၤၡ့ မၤလိာ်ဝဲတဖၣ်န့ၣ်​ အဝဲသ့ၣ်​ ဟဲစိာ်ဝဲလၢ တၢ်အိၣ်ဖှိၣ်အဒဲ အမဲာ်ညါလီၤ. ဒီးပှၤအံၣ်စရ့လးဖိခဲလၢာ် ဟဲဆၢထၢၣ်​ လၢယဟိဝၤယွၤ အမဲာ်ညါလီၤ. ၆ ဒီးစီၤမိၤၡ့ တဲဝဲလၢ “ယဟိဝၤယွၤ မၤလိာ်သုလၢ သုကမၤ တၢ်သ့ၣ်တဖၣ်န့ၣ်​ ဒ်သိး ယဟိဝၤယွၤ အလၤကပီၤ ကအိၣ်ဖျါထီၣ်​ လၢသုမဲာ်ညါ အဂီၢ်လီၤ.”+ ၇ ဒီးစီၤမိၤၡ့ တဲဘၣ်​ စီၤအၤဟရိၣ်လၢ “လဲၤလၢ တၢ်လုၢ်လီၢ် ဒီးလုၢ်ထီၣ်​ နတၢ်လုၢ်လၢ တၢ်ဒဲးဘးအဂီၢ်+ ဒီးတၢ်လုၢ်ဒွဲၣ်အူ လၢနဂီၢ် ဒီးမၤဘၣ်လိာ်ဖိးဒ့က့ၤတၢ်လၢ နနီၢ်ကစၢ်+ ဒီးနဒူၣ်ဖိထၢဖိ အဂီၢ်တက့ၢ်. ဒီးလုၢ်ထီၣ်​ တၢ်လုၢ်လၢ ပှၤဂီၢ်မုၢ်အဂီၢ်+ ဒီးမၤဘၣ်လိာ်ဖိးဒ့က့ၤတၢ်လၢ အဝဲသ့ၣ်အဂီၢ်+ ဒ်ယဟိဝၤယွၤ မၤလိာ်ဝဲ အသိးန့ၣ်တက့ၢ်.”

၈ တဘျီဃီန့ၣ်​ စီၤအၤဟရိၣ်​ လဲၤလၢတၢ်လုၢ်လီၢ် ဒီးမၤသံဝဲ ကျီၢ်ဖိ လၢအမ့ၢ် တၢ်လုၢ်လၢ အနီၢ်ကစၢ် အတၢ်ဒဲးဘး အဂီၢ်လီၤ.+ ၉ ဒီးစီၤအၤဟရိၣ်​ အဖိခွါတဖၣ်​ လဲၤစိာ်န့ၢ်အီၤ ကျီၢ်ဖိအံၤအသွံၣ်+ ဒီးအဝဲဘျၢလီၤ အစုနၢတဘိလၢ တၢ်သွံၣ်အံၤအကျါ ဒီးထွါအီၤလၢ တၢ်လုၢ်လီၢ်အနၢၤတဖၣ်​ အလိၤလီၤ. မ့မ့ၢ် တၢ်သွံၣ်လၢ အအိၣ်တ့ၢ်ဝဲခဲလၢာ်န့ၣ်​ အဝဲ ကဘၣ်လူလီၤဝဲလၢ တၢ်လုၢ်လီၢ် အခီၣ်ထံးလီၤ.+ ၁၀ ဒ်ယဟိဝၤယွၤ မၤလိာ်ဝဲ စီၤမိၤၡ့အသိး အဝဲ ဒွဲၣ်အူထီၣ်ဝဲ တၢ်လုၢ်လၢတၢ်ဒဲးဘးအဂီၢ်အံၤ အသိ, အကလ့ၢ်တဖၣ်​ ဒီးအသိလၢ အအိၣ်လၢ အသူၣ်လိၤ လၢတၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ.+ ၁၁ ဒီးအဝဲ ဒွဲၣ်အူထီၣ်ဝဲ အညၣ်​ ဒီးအဘ့ၣ်​ လၢမ့ၣ်အူ လၢဒဲကဝီၤ အချၢလီၤ.+

၁၂ ဝံၤဒီး စီၤအၤဟရိၣ်​ မၤသံဝဲ သိဖါလၢ တၢ်လုၢ်ဒွဲၣ်အူအဂီၢ် ဒီးစီၤအၤဟရိၣ်​ အဖိခွါတဖၣ်​ ဟ့ၣ်အီၤ သိဖါအသွံၣ်​ ဒီးအဝဲဖှံဝဲ တၢ်သွံၣ်လၢ တၢ်လုၢ်လီၢ်အလိၤ ကိးကပၤဒဲးလီၤ.+ ၁၃ အဝဲသ့ၣ်​ ဟ့ၣ်လီၤအီၤ တၢ်လုၢ်ဒွဲၣ်အူ အကူာ်တဖၣ်​ ဃုာ်ဒီး အခိၣ်​ ဒီးအဝဲ ဒွဲၣ်အူထီၣ်ဝဲလၢ တၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ. ၁၄ တကးဒံးဘၣ်​ အဝဲ သ့စီဝဲအပှံာ် ဒီးအခီၣ်တဖၣ်​ ဒီးဒွဲၣ်အူထီၣ်ဝဲလၢ တၢ်လုၢ်ဒွဲၣ်အူ အဖီခိၣ်လၢ အအိၣ်ဝဲလၢ တၢ်လုၢ်လီၢ် ဒ်သိး အကခုၣ်ထီၣ်​ အဂီၢ်လီၤ.

၁၅ ဝံၤဒီးအဝဲလဲၤစိာ်ဝဲ တၢ်လုၢ်လၢ ပှၤဂီၢ်မုၢ်တဖၣ်​ အဂီၢ်လီၤ. အဝဲဟံးန့ၢ်ဝဲ မဲာ်တဲးလဲး ဒီးမၤသံဝဲ ဒီးလုၢ်ထီၣ်ဝဲလၢ ပှၤဂီၢ်မုၢ်တဖၣ်​ အတၢ်ဒဲးဘး အဂီၢ်လီၤ. အဝဲ လုၢ်ထီၣ်ဝဲ မဲာ်တဲးလဲးအံၤ ဒ်အလုၢ်ထီၣ်ဝဲ ကျီၢ်ဖိအသိးလီၤ. ၁၆ ဒီးအဝဲ ဟဲစိာ်ဝဲ တၢ်လုၢ်ဒွဲၣ်အူ ဒီးမၤဝဲဒ် တၢ်ဟံးစုနဲၣ်ကျဲလၢ တၢ်လုၢ်ဒွဲၣ်အူအဂီၢ် အိၣ်ဝဲအသိးလီၤ.+

၁၇ ဝံၤဒီးစီၤအၤဟရိၣ်​ ဟဲစိာ်တၢ်လုၢ်ဘု+ ဒီးဟံးန့ၢ်ဝဲတစှီၤ ဒီးဒွဲၣ်အူထီၣ်အီၤ လၢတၢ်လုၢ်လီၢ် အဖီခိၣ်​ ဒ်သိး အကခုၣ်ထီၣ်​ အဂီၢ်လီၤ. အဝဲန့ၣ်​ မ့ၢ်တၢ်လုၢ်အဂၤတခါ ဖဲဂီၤခီ အတၢ်လုၢ်ဒွဲၣ်အူ ဝံၤအလီၢ်ခံလီၤ.+

၁၈ ဝံၤဒီး အဝဲ မၤသံဝဲ ကျီၢ်ဖါ ဒီးသိဖါလၢ တၢ်လုၢ်အိၣ်ဃူအိၣ်ဖိးလၢ ပှၤဂီၢ်မုၢ် အဂီၢ်လီၤ. ဒီးစီၤအၤဟရိၣ်​ အဖိခွါတဖၣ်​ ဟ့ၣ်လီၤအီၤ ဆၣ်ဖိကီၢ်ဖိတဖၣ်အံၤ အသွံၣ်​ ဒီးအဝဲ ဖှံဝဲလၢ တၢ်လုၢ်လီၢ်အလိၤ ကိးကပၤဒဲးလီၤ.+ ၁၉ တၢ်အသိ အကူာ်အခီတဖၣ်​ လၢအမ့ၢ် ကျီၢ်ဖါအသိ,+ သိဖါအခံမဲၢ် လၢအဘီၣ်, တၢ်အသိလၢ အအိၣ်ဝးတရံးအပှံာ်, အကလ့ၢ်တဖၣ်​ ဒီးတၢ်အသိ လၢအအိၣ်လၢ အသူၣ်လိၤန့ၣ်+ ၂၀ အဝဲသ့ၣ်​ ပာ်လီၤဝဲလၢ တၢ်အသးနါပှၢ်အလိၤဝံၤ အဝဲဒွဲၣ်အူထီၣ်ဝဲ တၢ်အသိ အကူာ်အခီတဖၣ်န့ၣ်​ လၢတၢ်လုၢ်လီၢ်အလိၤ ဒ်သိးအကခုၣ်ထီၣ်​ အဂီၢ်လီၤ.+ ၂၁ မ့မ့ၢ် တၢ်အသးနါပှၢ် ဒီးတၢ်အခီၣ်ထွဲန့ၣ်​ စီၤအၤဟရိၣ်​ ဝံၢ်ဝၢ်ဝဲ ဒ်တၢ်လုၢ်ဝံၢ်ဝၢ်အသိး လၢယဟိဝၤယွၤ အမဲာ်ညါ ဒ်စီၤမိၤၡ့ မၤလိာ်ဝဲအသိးလီၤ.+

၂၂ ဖဲစီၤအၤဟရိၣ်​ လုၢ်ထီၣ်ဝဲ တၢ်လုၢ်လၢ တၢ်ဒဲးဘးအဂီၢ်, တၢ်လုၢ်ဒွဲၣ်အူ ဒီးတၢ်လုၢ် အိၣ်ဃူအိၣ်ဖိးတဖၣ်​ ဝံၤအလီၢ်ခံ အဝဲ ယူာ်ထီၣ်အစုလၢ ပှၤဂီၢ်မုၢ်အအိၣ်​ ဒီးဆိၣ်ဂ့ၤ အဝဲသ့ၣ်+ ဒီးအဝဲ ဟဲက့ၤလီၤဝဲလီၤ. ၂၃ လၢခံကတၢၢ်န့ၣ်​ စီၤမိၤၡ့ ဒီးစီၤအၤဟရိၣ်​ လဲၤနုာ်လီၤလၢ တၢ်အိၣ်ဖှိၣ်အဒဲပူၤ ဒီးဟဲက့ၤထီၣ်ဝဲ ဒီးဆိၣ်ဂ့ၤ ပှၤဂီၢ်မုၢ်လီၤ.+

ဒီးယဟိဝၤယွၤ အလၤကပီၤ အိၣ်ဖျါထီၣ်ဝဲလၢ ပှၤဂီၢ်မုၢ်ခဲလၢာ် မဲာ်ညါလီၤ.+ ၂၄ ဒီးမ့ၣ်အူဟးထီၣ်​ လၢယဟိဝၤယွၤအအိၣ်+ ဒီးအီၣ်ကွံာ်ဝဲ တၢ်လုၢ်ဒွဲၣ်အူ ဒီးတၢ်အသိ အကူာ်အခီတဖၣ်​ လၢတၢ်လုၢ်လီၢ် အဖီခိၣ်လီၤ. ဖဲပှၤဂီၢ်မုၢ်ခဲလၢာ် ထံၣ်ဝဲ တၢ်မၤအသးအံၤအခါ အဝဲသ့ၣ်​ ကိးပသူထီၣ်​ ဒီးထိၣ်လီၤပှီၤအသးလီၤ.+

၁၀ လၢခံ စီၤအၤဟရိၣ်​ အဖိခွါတဖၣ်​ လၢအမ့ၢ် စီၤနၤဒး ဒီးစီၤအဘံဟူၤန့ၣ်+ ဟံးန့ၢ်ဝဲ တၢ်စိာ်မ့ၣ်အူအ့ၣ်အခွး တဂၤတဖျၢၣ်​ ဒီးထၢနုာ်ဝဲ မ့ၣ်အူအ့ၣ်လၢအပူၤ+ ဒီးပာ်ဝဲ တၢ်နၢမူလၢ အဖီခိၣ်လီၤ. ယဟိဝၤယွၤ တမၤလိာ် အဝဲသ့ၣ်လၢ ကမၤဝဲ ဒ်အံၤဘၣ်​ သနာ်က့ အဝဲသ့ၣ်​ လုၢ်ထီၣ်မ့ၣ်အူလၢ အတလီၤပလိာ်ဒီး တၢ်သိၣ်တၢ်သီဘၣ်​ လၢယွၤ အမဲာ်ညါလီၤ.+ ၂ ဖဲန့ၣ်န့ၣ်​ မ့ၣ်အူဟးထီၣ်လၢ ယဟိဝၤယွၤအအိၣ်​ ဒီးအီၣ်ကွံာ် အဝဲသ့ၣ်အဃိ+ အဝဲသ့ၣ်​ သံဝဲလၢ ယဟိဝၤယွၤ အမဲာ်ညါလီၤ.+ ၃ စီၤမိၤၡ့တဲဘၣ်​ စီၤအၤဟရိၣ်လၢ “ယဟိဝၤယွၤ တဲဝဲဒ်အံၤ ‘ပှၤလၢ အဟဲဘူးဒီးယၤ+ ကဘၣ်ပာ်စီဆှံယၤ ဒီးယကြၢးဒိးန့ၢ်ဘၣ်​ တၢ်လၤကပီၤလၢ ပှၤခဲလၢာ်အအိၣ်လီၤ.’” ဒီးစီၤအၤဟရိၣ်န့ၣ်​ အိၣ်ဘှ့ၣ်ကလာ်လီၤ.

၄ ဒီးစီၤမိၤၡ့ ကိးန့ၢ်ဝဲ စီၤမံၡအ့လး ဒီးစီၤအလံစဖၣ်​ လၢအမ့ၢ် စီၤအၤဟရိၣ်​ အဖါတံၢ် စီၤဧူးစံၤအ့လး အဖိခွါတဖၣ်+ ဒီးတဲအဝဲသ့ၣ်လၢ “ဟဲလၢအံၤ ဒီးစိာ်ထီၣ်ကွံာ် သုဘူးသုတံၢ်* တဖၣ်အံၤ လၢအအိၣ်ဝဲလၢ တၢ်စီဆှံအလီၢ် အမဲာ်ညါ ဒီးလဲၤစိာ်အီၤလၢ ဒဲကဝီၤ အချၢတက့ၢ်.” ၅ ဒီးဒ်စီၤမိၤၡ့ မၤလိာ်ဝဲအသိး အဝဲသ့ၣ်​ ဟဲဝဲဒီး စိာ်ထီၣ်ကွံာ် ပှၤအစိၣ်တဖၣ်​ လၢအဆ့ဖးထီ အိၣ်ဒံးလၢအလိၤ ဆူတၢ်လီၢ်တတီၤလၢ ဒဲကဝီၤ အချၢလီၤ.

၆ စီၤမိၤၡ့ တဲဘၣ်​ စီၤအၤဟရိၣ်​ ဒီးအဖိခွါအဂၤတဖၣ်​ လၢအမ့ၢ် စီၤအလၤဧစၢ် ဒီးစီၤအံသမၢ်လၢ “ဒ်သိး သုသုတသံဒီး ကစၢ်ယွၤ သုတသးဒိၣ်ထီၣ်​ ပှၤအံၣ်စရ့လးဖိခဲလၢာ် တဂ့ၤအဂီၢ် သုတဘၣ်​ ပာ်သုခိၣ်ဆူၣ်​ ဖုရုတဂ့ၤ ဒီးသုတဘၣ်ဖှီညာ် သုတၢ်ကူတၢ်သိးတဂ့ၤ.+ ပှၤလၢ ယဟိဝၤယွၤ မၤသံဝဲလၢ မ့ၣ်အူန့ၣ်​ သုဒီပုၢ်ဝဲၢ် လၢအမ့ၢ် ပှၤအံၣ်စရ့လးဖိခဲလၢာ် ဟီၣ်ဝဲလၢ အဝဲသ့ၣ်အဃိ သ့လီၤ. ၇ ယဟိဝၤယွၤ အသိလၢ တၢ်ဒိးဖှူတၢ် အဂီၢ်န့ၣ်​ အိၣ်လၢသုလိၤ အဃိ သုတဘၣ်​ ဟးထီၣ်လၢ တၢ်အိၣ်ဖှိၣ်အဒဲ အတၢ်နုာ်လီၤ အလီၢ်ဘၣ်. သုမ့ၢ်ဟးထီၣ်န့ၣ်​ သုကသံလီၤ.”+ ဒီးအဝဲသ့ၣ်​ မၤဝဲဒ် စီၤမိၤၡ့ တဲဝဲအသိးလီၤ.

၈ ဒီးယဟိဝၤယွၤ တဲဘၣ်​ စီၤအၤဟရိၣ်လၢ ၉ “နၤဒီးနဖိခွါတဖၣ်န့ၣ်​ ဖဲသုကလဲၤနုာ်လီၤလၢ တၢ်အိၣ်ဖှိၣ်အဒဲပူၤအခါ ဒ်သိး သုသုတသံတဂ့ၤ အဂီၢ် သုတဘၣ်အီစပံးထံ မ့တမ့ၢ် တၢ်အဂၤလၢ အပၣ်ဃုာ် ဒီးသံးဘၣ်.+ အဝဲန့ၣ်​ မ့ၢ်တၢ်သိၣ်တၢ်သီ လၢအဂၢၢ်ကျၢၤ လၢသုဒီးသုစၢၤသုသွဲၣ်​ တဖၣ်အဂီၢ်လီၤ. ၁၀ အဝဲန့ၣ်​ မ့ၢ်ဒ်သိး သုကပဲာ်ဖးနီၤဖး တၢ်လၢအစီဆှံ ဒီးတၢ်လၢအတစီဆှံဘၣ်, ဒီးတၢ်လၢ အကဆှီ ဒီးတၢ်လၢ အတကဆှီဘၣ်+ ၁၁ ဒီးဒ်သိး သုကသိၣ်လိ ပှၤအံၣ်စရ့လးဖိလၢ တၢ်သိၣ်တၢ်သီ ခဲလၢာ်လၢ ယဟိဝၤယွၤ တဲအဝဲသ့ၣ်​ ခီဖျိ စီၤမိၤၡ့လီၤ.”+

၁၂ ဒီးစီၤမိၤၡ့ တဲတၢ်ဒီး စီၤအၤဟရိၣ်ဒီးအဖိခွါ လၢအအိၣ်တ့ၢ်တဖၣ်​ လၢအမ့ၢ် စီၤအလၤဧစၢ် ဒီးစီၤအံသမၢ် ဒီးတဲဝဲလၢ “တၢ်လုၢ်ဘု လၢအအိၣ်တ့ၢ်လၢ ယဟိဝၤယွၤ အတၢ်လုၢ်လၢ မ့ၣ်အူအကျါန့ၣ်​ ဟံးန့ၢ်အီၤ ဒီးအီၣ်အီၤ ဒ်ကိၣ်လၢ အတပၣ်ဒီးကိၣ်မံၣ်ဘၣ်​ အသိး လၢတၢ်လုၢ်လီၢ် အကပၤတက့ၢ်.+ အမ့ၢ်ဝဲ တၢ်လၢ အစီဆှံ နီၢ်ကီၢ်လီၤ.+ ၁၃ ဒီးအမ့ၢ် နၤဒီးနဖိခွါတဖၣ်အတၢ် လၢအဘၣ်တၢ်ဟ့ၣ်လီၤသုလၢ ယဟိဝၤယွၤ အတၢ်လုၢ်လၢ မ့ၣ်အူအကျါအဃိ ဒ်ကစၢ်ယွၤ မၤလိာ်ယၤအသိး သုကဘၣ်အီၣ်အီၤလၢ တၢ်စီဆှံ အလီၢ်လီၤ.+ ၁၄ နၤဒီး နဖိခွါတဖၣ်​ ဒီးနဖိမုၣ်တဖၣ်န့ၣ်​ ကအီၣ်ဘၣ်ဝဲ တၢ်လုၢ်ဝံၢ်ဝၢ် အသးနါပှၢ် ဒီးတၢ်လုၢ်စီဆှံအခီၣ်+ လၢတၢ်လီၢ်လၢ အကဆှီ အပူၤလီၤ. တၢ်သ့ၣ်တဖၣ်န့ၣ်​ မ့ၢ်တၢ်လၢ အဘၣ်တၢ်ဟ့ၣ်လီၤ နၤဒီးနဖိခွါတဖၣ်+ လၢပှၤအံၣ်စရ့လးဖိ အတၢ်လုၢ်အိၣ်ဃူအိၣ်ဖိးတဖၣ်​ အကျါလီၤ. ၁၅ အဝဲသ့ၣ်​ ကဟဲစိာ်ဝဲ တၢ်လုၢ်စီဆှံအခီၣ်​ ဒီးတၢ်လုၢ်ဝံၢ်ဝၢ်အသးနါပှၢ် ဃုာ်ဒီး တၢ်အသိလၢ အဘၣ်တၢ်လုၢ်ထီၣ်အီၤလၢ မ့ၣ်အူ ဒ်သိး ကဝံၢ်ဝၢ်ဝဲ တၢ်လုၢ်ဝံၢ်ဝၢ်လၢ အလီၢ်ခံ ဒီးအမဲာ်ညါ လၢယဟိဝၤယွၤ အမဲာ်ညါလီၤ. ဒီးဒ်ယဟိဝၤယွၤ မၤလိာ်ဝဲအသိး တၢ်အခီၣ်​ ဒီးတၢ်အသးနါပှၢ် ကကဲထီၣ်​ သုဒီးသုဖိခွါတဖၣ်အတၢ် အစိၤစိၤအဃၣ်ဃၣ်လီၤ.”+

၁၆ ဘၣ်ဃးဒီး မဲာ်တဲးလဲးလၢ တၢ်လုၢ်လၢ တၢ်ဒဲးဘးအဂီၢ်န့ၣ်+ စီၤမိၤၡ့ ဟးသံကွၢ်တၢ် သပှၢ်တၢၢ် ဒီးအဝဲ သ့ၣ်ညါဘၣ်ဝဲလၢ အဘၣ်တၢ်ဒွဲၣ်အူထီၣ်ကွံာ်ဝဲလံ အဃိ စီၤမိၤၡ့ သးဒိၣ်ထီၣ်ဝဲ စီၤအၤဟရိၣ်​ အဖိခွါလၢ အအိၣ်တ့ၢ်တဖၣ်​ လၢအမ့ၢ် စီၤအလၤဧစၢ် ဒီးစီၤအံသမၢ်လီၤ. ဒီးစီၤမိၤၡ့ သံကွၢ်ဝဲလၢ ၁၇ “တၢ်လုၢ်လၢ တၢ်ဒဲးဘးအဂီၢ်န့ၣ်​ မ့ၢ်တၢ်လၢ အစီဆှံနီၢ်ကီၢ် ဒီးကစၢ်ယွၤ ဟ့ၣ်လီၤသု ဒ်သိး သုကဟံးမူဒါ လၢပှၤအံၣ်စရ့လးဖိ အတၢ်ဒဲးဘးအဂီၢ် ဒီးမၤဘၣ်လိာ်ဖိးဒ့က့ၤတၢ်လၢ အဝဲသ့ၣ်အဂီၢ် လၢယဟိဝၤယွၤ အမဲာ်ညါလီၤ. ဘၣ်မနုၤအဃိ သုတအီၣ်အီၤ လၢတၢ်စီဆှံ အလီၢ်ပူၤဘၣ်လဲၣ်.+ ၁၈ တၢ်လုၢ်လၢတၢ်ဒဲးဘးအဂီၢ် အသွံၣ်န့ၣ်​ ပှၤတလဲၤစိာ်အီၤလၢ ဒဲစီဆှံအပူၤဘၣ်.+ အဃိ ဒ်ကစၢ်ယွၤ မၤလိာ်ယၤအသိး တၢ်လုၢ်အံၤ သုကြၢး အီၣ်အီၤလၢ တၢ်စီဆှံအလီၢ် ဝံၤဝဲသပှၢ်တၢၢ်လံ.” ၁၉ ဒီးစီၤအၤဟရိၣ်​ တဲဆၢက့ၤ စီၤမိၤၡ့လၢ “တနံၤအံၤ အဝဲသ့ၣ်​ လုၢ်ထီၣ်​ တၢ်လုၢ်လၢ တၢ်ဒဲးဘးအဂီၢ် ဒီးတၢ်လုၢ်ဒွဲၣ်အူလၢ ယဟိဝၤယွၤ အမဲာ်ညါ+ သနာ်က့ တၢ်ကဲထီၣ်အသးဒီးယၤ ဒ်အံၤဒံး. အဃိ ယမ့ၢ်အီၣ်​ တၢ်လုၢ်လၢ တၢ်ဒဲးဘးအဂီၢ် တနံၤအံၤန့ၣ်​ မ့ၢ်ယဟိဝၤယွၤ ကဘၣ်သူၣ်ဘၣ်သးဝဲ စ့ၢ်ကီးဧါ.” ၂၀ ဖဲစီၤမိၤၡ့ နၢ်ဟူဝဲ ဒ်န့ၣ်အခါ အသးမံဝဲလီၤ.

၁၁ ဒီးယဟိဝၤယွၤ တဲဘၣ်​ စီၤမိၤၡ့ ဒီးစီၤအၤဟရိၣ်လၢ ၂ “တဲဘၣ်​ ပှၤအံၣ်စရ့လးဖိတဖၣ်လၢ ‘ဆၣ်ဖိကီၢ်ဖိ လၢခိခိၣ်​ လၢသုအီၣ်အီၤန့ၢ်န့ၣ်+ မ့ၢ်ဝဲ ၃ ကယဲၢ် ဆၣ်ဖိကီၢ်ဖိလၢ အခီၣ်မ့ၣ်​ သ့ၣ်ဖးဝဲ လၢာ်လၢာ်ဆ့ဆ့ ဒီးကလိာ်ထီၣ်ဝဲ* အဆၣ်ဒီး ဂံာ်အီၣ်က့ၤဝဲ တဖၣ်န့ၣ်​ သုအီၣ်အီၤန့ၢ်ဝဲလီၤ.

၄ “‘ဘၣ်ဆၣ်​ ဆၣ်ဖိကီၢ်ဖိတဖၣ်လၢ အကလိာ်ထီၣ်​ အဆၣ်​ ဒီးဂံာ်အီၣ်က့ၤဝဲ မ့တမ့ၢ် ဆၣ်ဖိကီၢ်ဖိလၢ အခီၣ်မ့ၣ်သ့ၣ်ဖး လၢသုတဘၣ်အီၣ်အီၤဘၣ်န့ၣ်​ အိၣ်ဝဲလီၤ. ကီၤလၤအူးန့ၣ်​ အကလိာ်ထီၣ်​ အဆၣ်​ ဒီးဂံာ်အီၣ်က့ၤဝဲ ဘၣ်ဆၣ်​ အခီၣ်မ့ၣ်​ တသ့ၣ်ဖးဘၣ်​ အဃိ အတကဆှီဘၣ်​ လၢသုဂီၢ်ဘၣ်.+ ၅ ယုၢ်ၡဖၣ်*+ စ့ၢ်ကီး အကလိာ်ထီၣ်အဆၣ်​ ဒီးဂံာ်အီၣ်က့ၤဝဲ ဘၣ်ဆၣ်​ အခီၣ်မ့ၣ်​ တသ့ၣ်ဖးဘၣ်​ အဃိ အတကဆှီဘၣ်​ လၢသုဂီၢ်ဘၣ်. ၆ ပဒဲစ့ၢ်ကီး အကလိာ်ထီၣ်အဆၣ်​ ဒီးဂံာ်အီၣ်က့ၤဝဲ ဘၣ်ဆၣ်​ အခီၣ်မ့ၣ်​ တသ့ၣ်ဖးဘၣ်​ အဃိ အတကဆှီဘၣ်​ လၢသုဂီၢ်ဘၣ်. ၇ ဒီးထိးန့ၣ်+ အခီၣ်မ့ၣ်​ သ့ၣ်ဖး လၢာ်လၢာ်ဆ့ဆ့ ဘၣ်ဆၣ်​ တကလိာ်ထီၣ်အဆၣ်​ ဒီးဂံာ်အီၣ်က့ၤဝဲဘၣ်​ အဃိ အတကဆှီဘၣ်​ လၢသုဂီၢ်ဘၣ်. ၈ သုတဘၣ်အီၣ်​ ဆၣ်ဖိကီၢ်ဖိတဖၣ်န့ၣ်​ အညၣ်ဘၣ်​ ဒီးသုတဘၣ်ထိး အစိၣ်စ့ၢ်ကီးဘၣ်. တၢ်သ့ၣ်တဖၣ်န့ၣ်​ အတကဆှီဘၣ်​ လၢသုဂီၢ်ဘၣ်.+

၉ “‘လၢပီၣ်လဲၣ်ပူၤမ့ၢ်ဂ့ၤ, လၢထံကျိပူၤမ့ၢ်ဂ့ၤ, ကယဲၢ်တၢ်အိၣ်လၢထံကျါ လၢအအိၣ်ဒီး အရု ဒီးအသဘျံးန့ၣ်​ သုအီၣ်အီၤသ့လီၤ.+ ၁၀ ဘၣ်ဆၣ်​ လၢပီၣ်လဲၣ်ပူၤမ့ၢ်ဂ့ၤ, လၢထံကျိပူၤမ့ၢ်ဂ့ၤ ကယဲၢ် တၢ်သးသမူ လၢအလဲၤတၢ် ဒီဖုဒီဂီၢ် ဒီးကယဲၢ် တၢ်သးသမူအဂၤ တမံၤဂ့ၤတမံၤဂ့ၤ မ့ၢ်တအိၣ်ဒီး အရု ဒီးအသဘျံးဘၣ်န့ၣ်​ အကဘၣ်မ့ၢ်တၢ်လၢ အလီၤသးဘၣ်အၢ လၢသုဂီၢ်လီၤ. ၁၁ မ့ၢ်လီၤ, တၢ်သ့ၣ်တဖၣ်န့ၣ်​ ကဘၣ်မ့ၢ်တၢ်လၢ အလီၤသးဘၣ်အၢ လၢသုဂီၢ် ဒီးသုတဘၣ်အီၣ်အညၣ်​ နီတစဲးဘၣ်.+ ဒီးသုကဘၣ်​ သးဘၣ်အၢ စ့ၢ်ကီး အစိၣ်လီၤ. ၁၂ ကယဲၢ်တၢ်လၢ အအိၣ်လၢထံကျါ လၢအတအိၣ်ဒီး အရု ဒီးအသဘျံးဘၣ်န့ၣ်​ ကဘၣ်မ့ၢ်တၢ်လၢ အလီၤသးဘၣ်အၢ လၢသုဂီၢ်လီၤ.

၁၃ “‘တၢ်သးသမူလၢ အယူၤ လၢသုကဘၣ်​ သးဘၣ်အၢအီၤ ဒီးသုတဘၣ်​ အီၣ်အီၤဘၣ်န့ၣ်​ မ့ၢ်ဝဲ လံာ်ကြီကြာ်,+ လံာ်မိၢ်ဃး, လီၤကတာ်သူ,+ ၁၄ လံာ်ဂီၤ ဒီးလံာ်သူ ကိးကလုာ်ဒဲး, ၁၅ စိးဝၣ်ဃး ကိးကလုာ်ဒဲး, ၁၆ ထိၣ်ကီၤလၤအူး, ဒိကအိ, ထိၣ်ၡဃး, လံာ်လ့ ကိးကလုာ်ဒဲး, ၁၇ ဒိကအိဆံးဆံးဖိ, ထိၣ်စီၢ်မီ, ဒိကအိထီနၢ်, ၁၈ ထိၣ်တၤမံၤ, ထိၣ်ဒိၣ်ဖုၣ်ခီၣ်, လီၤကတာ်, ၁၉ ထိၣ်ထီကိာ်, ထိၣ်လဲၤဝါ ကိးကလုာ်ဒဲး, ထိၣ်ဘီစံၣ်ဃီၣ်​ ဒီးဘျါလီၤ. ၂၀ ကယဲၢ်တၢ်ဖိဃၢ်လၢ အအိၣ်ဒီးအဒံး လၢအယူၤသ့ဟးသ့န့ၣ်​ ကဘၣ်မ့ၢ်တၢ်လၢ အလီၤသးဘၣ်အၢ လၢသုဂီၢ်လီၤ.

၂၁ “‘မ့မ့ၢ်တၢ်ဖိဃၢ်လၢ အအိၣ်ဒီးအဒံး လၢအယူၤသ့ဟးသ့ တဖၣ်အကျါန့ၣ်​ သုအီၣ်သ့ထဲဒၣ်​ တၢ်ဖိဃၢ်တဖၣ်လၢ အအိၣ်ဒီး အခီၣ်ဖးထီလၢ ကဖုဝဲ အဂီၢ်လီၤ. ၂၂ လၢတၢ်သ့ၣ်တဖၣ်န့ၣ်အကျါ သုအီၣ်ဝဲ ဒွဲၣ်လၢ အသုးလီၢ်သုးကျဲ ကိးကလုာ်ဒဲး, ဒွဲၣ်အဂၤ လၢပှၤအီၣ်ဝဲတဖၣ်,+ တကံၤတဖၣ်​ ဒီးဒွဲၣ်ဃကာ်တဖၣ်​ သ့လီၤ. ၂၃ ကယဲၢ်တၢ်ဖိဃၢ်အဂၤလၢ အအိၣ်ဒီးအဒံး အယူၤသ့ဟးသ့ တဖၣ်န့ၣ်​ ကဘၣ်မ့ၢ်တၢ်လၢ အလီၤသးဘၣ်အၢ လၢသုဂီၢ်လီၤ. ၂၄ တၢ်သ့ၣ်တဖၣ်န့ၣ်​ ကမၤဘၣ်အၢသုလီၤ. ပှၤတဂၤဂၤ လၢအထိးဘၣ်​ တၢ်သ့ၣ်တဖၣ်န့ၣ်​ အစိၣ်န့ၣ်​ တကဆှီလၢၤဘၣ်​ တုၤလၢ ဟါလီၤခီလီၤ.+ ၂၅ ပှၤတဂၤဂၤလၢ အစိာ်ဘၣ်ဝဲ တၢ်သ့ၣ်တဖၣ်န့ၣ်​ အစိၣ်န့ၣ်​ ကဘၣ်ဆှုၣ်ဝဲ အတၢ်ကူတၢ်ကၤ+ ဒီးအဝဲတကဆှီလၢၤဘၣ်​ တုၤလၢ ဟါလီၤခီလီၤ.

၂၆ “‘ဆၣ်ဖိကီၢ်ဖိလၢ အခီၣ်မ့ၣ်​ တသ့ၣ်ဖး လၢာ်လၢာ်ဆ့ဆ့ဘၣ်​ ဒီးတကလိာ်ထီၣ်အဆၣ်​ ဒီးတက့ၤ ဂံာ်အီၣ်က့ၤဝဲဘၣ်​ တဖၣ်န့ၣ်​ အတကဆှီဘၣ်လၢ သုဂီၢ်ဘၣ်. ပှၤတဂၤဂၤလၢ အထိးဘၣ်ဝဲ ဆၣ်ဖိကီၢ်ဖိတဖၣ်အံၤန့ၣ်​ တကဆှီလၢၤဘၣ်.+ ၂၇ ကယဲၢ်တၢ်သးသမူ အဂၤလၢ အဟးလၢ အခီၣ်လွံၢ်ခီ လၢအခီၣ်ညါသးန့ၣ်​ တကဆှီဘၣ်လၢ သုဂီၢ်ဘၣ်. ပှၤတဂၤဂၤ လၢအထိးဘၣ်ဝဲ တၢ်သ့ၣ်တဖၣ်အံၤ အစိၣ်န့ၣ်​ တကဆှီလၢၤဘၣ်​ တုၤလၢ ဟါလီၤခီလီၤ. ၂၈ ဆၣ်ဖိကီၢ်ဖိတဖၣ်အံၤ တကဆှီဘၣ်လၢ သုဂီၢ်ဘၣ်​ အဃိ ပှၤတဂၤလၢ အစိာ်ဘၣ်ဝဲ ဆၣ်ဖိကီၢ်ဖိတဖၣ်အံၤ အစိၣ်န့ၣ်​ ကဘၣ်ဆှုၣ်ဝဲ အတၢ်ကူတၢ်ကၤ+ ဒီးအဝဲတကဆှီဘၣ်​ တုၤလၢ ဟါလီၤခီလီၤ.+

၂၉ “‘တၢ်သးသမူတဖၣ်လၢ အလဲၤတၢ် ဒီဖုဒီဂီၢ် လၢအအိၣ်​ လၢခိခိၣ်​ လၢအတကဆှီဘၣ်​ လၢသုဂီၢ်ဘၣ်န့ၣ်​ မ့ၢ်ဝဲ ဝံၤတဖၣ်, ယုၢ်တဖၣ်,+ တခွံၣ်​ ကိးကလုာ်ဒဲး, ၃၀ တိတဲာ်, တခူး, ပျိၢ်ဝီ, ခွံၣ်ဒိ ဒီးတခွံၣ်လၢ အဆီတလဲအလွဲၢ်သ့ တဖၣ်လီၤ. ၃၁ တၢ်သးသမူ လၢအလဲၤတၢ် ဒီဖုဒီဂီၢ် တဖၣ်အံၤန့ၣ်​ တကဆှီဘၣ်​ လၢသုဂီၢ်ဘၣ်.+ ပှၤတဂၤဂၤလၢ အထိးဝဲ အစိၣ်တဖၣ်န့ၣ်​ အတကဆှီလၢၤဘၣ်​ တုၤလၢ ဟါလီၤခီလီၤ.+

၃၂ “‘ဖဲအဝဲသ့ၣ်​ သံဒီး လီၤတဲာ်ဘၣ်​ တၢ်တမံၤမံၤ လၢအမ့ၢ် တၢ်ပီးတၢ်လီလၢ ပှၤတ့အီၤလၢ သ့ၣ်မ့ၢ်ဂ့ၤ, တၢ်ကူတၢ်ကၤမ့ၢ်ဂ့ၤ, ဆၣ်ဖိကီၢ်ဖိအဘ့ၣ်မ့ၢ်ဂ့ၤ, ထၢၣ်တၢ်ကံးညာ်* အက့မ့ၢ်ဂ့ၤန့ၣ်​ အတကဆှီလၢၤဘၣ်. တၢ်ပီးတၢ်လီလၢ ပှၤသူအီၤ တမံၤဂ့ၤတမံၤဂ့ၤန့ၣ်​ ပှၤကဘၣ်​ စုၣ်လီၤအီၤ လၢထံကျါ ဒီးတကဆှီလၢၤဘၣ်​ တုၤလၢ ဟါလီၤခီလီၤ. ဝံၤဒီး ကကဆှီထီၣ်က့ၤဝဲလီၤ. ၃၃ ဒီးအမ့ၢ် လီၤတဲာ်လၢ သပၢၤဟီၣ်ခိၣ်​ အပူၤန့ၣ်​ သုကဘၣ်​ မၤသ့ၣ်ဖး သပၢၤအံၤလီၤ. ဒီးတၢ်လၢ အအိၣ်လၢ သပၢၤအံၤ အပူၤန့ၣ်​ တကဆှီလၢၤဘၣ်.+ ၃၄ တၢ်အီၣ်တမံၤဂ့ၤတမံၤဂ့ၤလၢ အဘၣ်ထံးဒီး ထံလၢအအိၣ်လၢ သပၢၤအံၤ အပူၤန့ၣ်​ တကဆှီလၢၤဘၣ်​ ဒီးတၢ်အထံ လၢပှၤအီအီၤသ့ တမံၤဂ့ၤတမံၤဂ့ၤ လၢအအိၣ်လၢ သပၢၤအံၤပူၤန့ၣ်​ တကဆှီလၢၤဘၣ်. ၃၅ ဒီးဆၣ်ဖိကီၢ်ဖိတဖၣ်အံၤ အစိၣ်​ မ့ၢ်လီၤတဲာ်ဝဲလၢ တၢ်တမံၤဂ့ၤတမံၤဂ့ၤ အဖီခိၣ်န့ၣ်​ အကကဲထီၣ်​ တၢ်လၢ အတကဆှီလၢၤဘၣ်လီၤ. အမ့ၢ်လီၤတဲာ်လၢ ဖၣ်ကပူၤ အဖီခိၣ်မ့ၢ်ဂ့ၤ, လၢၢ်ဆီ အဖီခိၣ်မ့ၢ်ဂ့ၤ သုကဘၣ်​ မၤလီၤကလဲအီၤ မ့ၢ်လၢ အတကဆှီလၢၤဘၣ်​ အဃိလီၤ. ဒီးအကဘၣ်မ့ၢ် တၢ်လၢ အတကဆှီလၢ သုဂီၢ်လၢၤဘၣ်. ၃၆ ဘၣ်ဆၣ်​ ဆၣ်ဖိကီၢ်ဖိတဖၣ်အံၤ အစိၣ်​ မ့ၢ်လီၤတဲာ်ဝဲလၢ ထံထီၣ်ပၢၢ် အပူၤမ့ၢ်ဂ့ၤ, တၢ်ပူၤ လၢပှၤပာ်ဖှိၣ်ထံ လၢအပူၤမ့ၢ်ဂ့ၤန့ၣ်​ အကကဆှီ ဒံးဝဲလီၤ. ဘၣ်ဆၣ်​ ပှၤတဂၤဂၤ မ့ၢ်ထိးဘၣ်​ အဝဲသ့ၣ်​ အစိၣ်န့ၣ်​ ပှၤတဂၤအံၤ တကဆှီလၢၤဘၣ်. ၃၇ ဆၣ်ဖိကီၢ်ဖိတဖၣ်အံၤ အစိၣ်မ့ၢ်လီၤတဲာ်လၢ တၢ်ချံလၢ တၢ်ကဖှံလီၤအီၤ အလိၤန့ၣ်​ တၢ်ချံအံၤ ကဆှီဒံးဝဲလီၤ. ၃၈ ဘၣ်ဆၣ်​ တၢ်ချံမ့ၢ်ဘၣ်စီၣ်ဒီးထံ ဒီးဆၣ်ဖိကီၢ်ဖိအံၤ အစိၣ်​ အကူာ်အခီ မ့ၢ်လီၤတဲာ်လၢ အလိၤန့ၣ်​ တၢ်ချံတဖၣ်အံၤ တကဆှီလၢၤဘၣ်.

၃၉ “‘ဆၣ်ဖိကီၢ်ဖိလၢ သုအီၣ်အီၤသ့ တဖၣ်​ မ့ၢ်သံဝဲ ဒီးပှၤတဂၤဂ့ၤ တဂၤဂ့ၤ မ့ၢ်ထိးဘၣ်​ အစိၣ်န့ၣ်​ အဝဲ တကဆှီလၢၤဘၣ်​ တုၤလၢ ဟါလီၤခီလီၤ.+ ၄၀ ပှၤတဂၤဂ့ၤ တဂၤဂ့ၤလၢ အအီၣ်ဝဲ ဆၣ်ဖိကီၢ်ဖိတဖၣ်အံၤ အစိၣ်​ အကူာ်အခီ တမံၤဂ့ၤတမံၤဂ့ၤန့ၣ်​ ကဘၣ်ဆှုၣ်​ အတၢ်ကူတၢ်ကၤတဖၣ်​ ဒီးအဝဲ တကဆှီလၢၤဘၣ်​ တုၤလၢ ဟါလီၤခီလီၤ.+ ဒီးပှၤတဂၤဂ့ၤ တဂၤဂ့ၤလၢ အစိာ်ဝဲ ဆၣ်ဖိကီၢ်ဖိတဖၣ်အံၤ အစိၣ်န့ၣ်​ ကဘၣ်ဆှုၣ်​ အတၢ်ကူတၢ်ကၤတဖၣ်​ ဒီးအဝဲ တကဆှီလၢၤဘၣ်​ တုၤလၢ ဟါလီၤခီလီၤ. ၄၁ ကယဲၢ် တၢ်သးသမူလၢ အလဲၤတၢ် ဒီဖုဒီဂီၢ် လၢခိခိၣ်န့ၣ်​ မ့ၢ်တၢ်လၢ အလီၤသးဘၣ်အၢအဃိ+ သုတဘၣ်​ အီၣ်အီၤဘၣ်. ၄၂ တၢ်သးသမူတဖၣ်​ လၢအဘျိၣ်လၢ အဟၢဖၢမ့ၢ်ဂ့ၤ, လၢအဟးလၢ အခီၣ်လွံၢ်ခီမ့ၢ်ဂ့ၤ, တၢ်သးသမူတဖၣ်​ လၢအခီၣ်အိၣ်ဝဲ အါအါဂီၢ်ဂီၢ် လၢအလဲၤတၢ် ဒီဖုဒီဂီၢ် လၢခိခိၣ်မ့ၢ်ဂ့ၤ မ့ၢ်တၢ်လၢ အလီၤသးဘၣ်အၢ အဃိ သုတဘၣ်အီၣ်အီၤဘၣ်.+ ၄၃ တဘၣ်ဒုးကဲထီၣ်​ သုနီၢ်ကစၢ်လၢ တၢ်လၢ အလီၤသးဘၣ်အၢ ခီဖျိလၢ သုအီၣ်​ တၢ်သးသမူလၢ အလဲၤတၢ် ဒီဖုဒီဂီၢ် အဃိတဂ့ၤ. တဘၣ်မၤဘၣ်အၢလီၤ သုသးဒီး ကဲထီၣ်ပှၤလၢ အတကဆှီလၢၤဘၣ်​ ခီဖျိလၢ အဝဲသ့ၣ်အဃိ တဂ့ၤ.+ ၄၄ ယမ့ၢ်သုကစၢ် ယဟိဝၤယွၤ+ ဒီးခီဖျိလၢ ယစီဆှံအဃိ+ သုကဘၣ်​ ပာ်စီဆှံသုသး ဒီးကဲထီၣ်ပှၤလၢ အစီဆှံလီၤ.+ အဃိ သုတဘၣ်​ မၤဘၣ်အၢလီၤ သုသး ခီဖျိလၢ တၢ်သးသမူ လၢအလဲၤတၢ် ဒီဖုဒီဂီၢ် လၢခိခိၣ်န့ၣ်ဘၣ်. ၄၅ ယမ့ၢ် သုကစၢ် ယဟိဝၤယွၤ လၢအဒုးဟးထီၣ်သုလၢ ကီၢ်အဲၤကူပတူး ဒ်သိး ယကပာ်ဖျါထီၣ်လၢ ယမ့ၢ် သုကစၢ်ယွၤလီၤ.+ ဒီးယစီဆှံအဃိ+ သုကဘၣ်​ စီဆှံလီၤ.+

၄၆ “‘အဝဲန့ၣ်​ မ့ၢ်တၢ်သိၣ်တၢ်သီ လၢအဘၣ်ဃးဒီး ဆၣ်ဖိကီၢ်ဖိတဖၣ်, တၢ်သးသမူလၢ အယူၤဝဲတဖၣ်, တၢ်သးသမူ ခဲလၢာ်လၢ အလဲၤတၢ် လၢထံကျါ ဒီးတၢ်သးသမူလၢ အလဲၤတၢ် ဒီဖုဒီဂီၢ်လၢ ခိခိၣ်တဖၣ်​ ၄၇ ဒ်သိး သုကပဲာ်ဖးနီၤဖး တၢ်လၢအကဆှီ ဒီးတၢ်လၢ အတကဆှီဘၣ်​ ဒီးတၢ်သးသမူလၢ သုအီၣ်အီၤသ့ ဒီးလၢသုအီၣ်အီၤ တသ့ဘၣ်လီၤ.’”+

၁၂ ယဟိဝၤယွၤ တဲဘၣ်​ စီၤမိၤၡ့လၢ ၂ “တဲဘၣ်​ ပှၤအံၣ်စရ့လးဖိတဖၣ်လၢ ‘ပိာ်မုၣ်တဂၤ မ့ၢ်ဒၢထီၣ်​ ဒီးအိၣ်ဖျဲၣ်ထီၣ်​ အဖိခွါန့ၣ်​ အဝဲတကဆှီဘၣ်​ ကအိၣ်ဝဲနွံသီ ဒ်အတကဆှီဘၣ်ဖဲ အလုၢ်အလၢ် ဟဲဝဲအခါ အသိးန့ၣ်လီၤ.+ ၃ ဒီးဖဲဃိးသီတသီန့ၣ်​ အဖိခွါအတၢ်ခိၣ်ဖံးန့ၣ်​ ကဘၣ်တၢ်ကူးတရံးအီၤလီၤ.+ ၄ ဒ်သိး ပိာ်မုၣ်တဂၤအံၤ ကကဆှီထီၣ်က့ၤလၢ အသွံၣ်အဂီၢ် အကဘၣ်​ ဆဲးအိၣ်လၢဟံၣ်​ ၃၃ သီဒံးလီၤ. ဒီးအတဘၣ်​ ဖီၣ်တၢ်လၢ အစီဆှံ နီတမံၤဘၣ်. အဝဲ မၤကဆှီထီၣ်အသး အမုၢ်နံၤတဖၣ်​ မ့ၢ်တပှဲၤထီၣ်ဒံးဘၣ်န့ၣ်​ အဝဲတဘၣ်​ လဲၤနုာ်လၢ တၢ်စီဆှံ အလီၢ်ပူၤဘၣ်.

၅ “‘ပိာ်မုၣ်တဂၤအံၤ မ့ၢ်အိၣ်ဖျဲၣ်ထီၣ်​ အဖိမုၣ်န့ၣ်​ အဝဲတကဆှီဘၣ်​ ကအိၣ်ဝဲ ၁၄ သီ ဒ်ဖဲအလုၢ်အလၢ် ဟဲဝဲအခါ အသိးန့ၣ်လီၤ. ဒ်သိး ပိာ်မုၣ်တဂၤအံၤ ကကဆှီထီၣ်က့ၤလၢ အသွံၣ်အဂီၢ် အကဘၣ်​ ဆဲးအိၣ်လၢဟံၣ်​ ၆၆ သီဒံးလီၤ. ၆ ဖဲပိာ်မုၣ်တဂၤအံၤ မၤကဆှီထီၣ်အသးလၢ အဖိမုၣ်​ အဃိမ့ၢ်ဂ့ၤ အဖိခွါ အဃိမ့ၢ်ဂ့ၤ အမုၢ်နံၤတဖၣ်မ့ၢ် ပှဲၤထီၣ်အခါ အကဘၣ်ဟဲစိာ် သိဖါတဒု လၢအအိၣ်တနံၣ်​ လၢတၢ်လုၢ်ဒွဲၣ်အူအဂီၢ်+ ဒီးထိၣ်ကးက့ၣ်ဖိ တဘ့ၣ်​ မ့တမ့ၢ် ထိၣ်လွံၢ်တဘ့ၣ်​ လၢတၢ်လုၢ်လၢ တၢ်ဒဲးဘးအဂီၢ် ဆူပှၤလုၢ်တၢ်ဒိၣ်အအိၣ်​ လၢတၢ်အိၣ်ဖှိၣ်အဒဲ အတၢ်နုာ်လီၤ အလီၢ်န့ၣ်လီၤ. ၇ ဒီးပှၤလုၢ်တၢ်ဒိၣ်န့ၣ်​ ကလုၢ်ထီၣ်ဝဲ လၢယဟိဝၤယွၤ အမဲာ်ညါ ဒ်သိး ကမၤဘၣ်လိာ်ဖိးဒ့က့ၤတၢ်လၢ ပိာ်မုၣ်တဂၤအံၤ အဂီၢ် ဒီးပိာ်မုၣ်အံၤ ကကဆှီထီၣ်က့ၤ လၢအသွံၣ်လီၤ အဃိလီၤ. အဝဲန့ၣ်​ မ့ၢ်တၢ်သိၣ်တၢ်သီလၢ အဘၣ်ဃးဒီး ပိာ်မုၣ်လၢ အအိၣ်ဖျဲၣ်ထီၣ်​ အဖိမုၣ်​ မ့တမ့ၢ် အဖိခွါ အဂီၢ်လီၤ. ၈ ဘၣ်ဆၣ်​ ပိာ်မုၣ်တဂၤအံၤ အတၢ် မ့ၢ်တယၢဘၣ်လၢ ကဟ့ၣ်လီၤ သိတဒု အဂီၢ်န့ၣ်​ အဝဲ ကဘၣ်ဟဲစိာ် ထိၣ်လွံၢ်ခံဘ့ၣ်​ မ့တမ့ၢ် ထိၣ်ကးက့ၣ်ဖိ ခံဘ့ၣ်လီၤ.+ တဘ့ၣ်န့ၣ်လၢ တၢ်လုၢ်ဒွဲၣ်အူအဂီၢ် ဒီးအဝဲတဘ့ၣ်လၢ တၢ်လုၢ်တၢ်ဒဲးဘး အဂီၢ်လီၤ. ဒီးပှၤလုၢ်တၢ်ဒိၣ်န့ၣ်​ ကမၤဘၣ်လိာ်ဖိးဒ့က့ၤတၢ်လၢ ပိာ်မုၣ်တဂၤအံၤ အဂီၢ် ဒီးပိာ်မုၣ်အံၤ ကကဆှီထီၣ်က့ၤလီၤ.’”

၁၃ ယဟိဝၤယွၤ ဆဲးတဲ စီၤမိၤၡ့ ဒီးစီၤအၤဟရိၣ်လၢ ၂ “ပှၤတဂၤ အဘ့ၣ်​ မ့ၢ်ညိးထီၣ်မ့ၢ်ဂ့ၤ, မ့ၢ်အိၣ်ဒီး တၢ်ပူၤလီၢ် ကိၢ်ဃ့မ့ၢ်ဂ့ၤ မ့တမ့ၢ် တၢ်အကဝီၤဖိ မ့ၢ်ဟဲထီၣ်လၢ အဘ့ၣ်လိၤ ဒီးအကဲထီၣ်​ တၢ်ဆါအၢ+ မ့ၢ်သ့န့ၣ်​ ပှၤကဘၣ်​ လဲၤကိးအီၤလၢ ပှၤလုၢ်တၢ်ဒိၣ်​ စီၤအၤဟရိၣ်အအိၣ်​ မ့တမ့ၢ် လၢစီၤအၤဟရိၣ်​ အဖိခွါတဂၤဂၤ လၢအမ့ၢ် ပှၤလုၢ်တၢ်ဒိၣ်​ အအိၣ်လီၤ.+ ၃ ဒီးပှၤလုၢ်တၢ်ဒိၣ်​ ကသမံသမိးဝဲ တၢ်လၢ အဟဲကဲထီၣ်အသးလၢ ပှၤတဂၤန့ၣ်​ အဘ့ၣ်လိၤလီၤ. ဒီးအဆူၣ်လၢ အအိၣ်လၢ တၢ်ပူၤလီၢ်အပူၤ မ့ၢ်ထီၣ်ဝါ ဒီးတၢ်ပူၤလီၢ်အံၤ မ့ၢ်ဖျါလၢ အနုာ်လီၤလၢ အညၣ်ပူၤန့ၣ်​ အမ့ၢ်ဝဲ တၢ်ဆါအၢလီၤ. အဃိ ပှၤလုၢ်တၢ်ဒိၣ်န့ၣ်​ ကသမံသမိး ဒီးကဘိးဘၣ်သ့ၣ်ညါဝဲလၢ ပှၤတဂၤန့ၣ်​ တကဆှီလၢၤဘၣ်. ၄ ဘၣ်ဆၣ်​ တၢ်အကဝီၤဖိ လၢအဟဲထီၣ်လၢ အဘ့ၣ်လိၤန့ၣ်​ အလွဲၢ်မ့ၢ်ဝါ ဒီးမ့ၢ်တဖျါလၢ အနုာ်လီၤလၢ အညၣ်ပူၤဘၣ်​ ဒီးအဆူၣ်မ့ၢ် တထီၣ်ဝါဘၣ်န့ၣ်​ ပှၤလုၢ်တၢ်ဒိၣ်​ ကပာ်လီၤဆီ ပှၤတဂၤအံၤ ထဲတဂၤ လၢနွံသီ အတီၢ်ပူၤလီၤ.+ ၅ ဒီးဖဲနွံသီတသီန့ၣ်​ ပှၤလုၢ်တၢ်ဒိၣ်​ ကသမံသမိးအီၤ ဒီးအမ့ၢ်ဖျါလၢ တၢ်အကဝီၤဖိ အိၣ်ဒ်အလီၢ်လီၢ် ဒီးတလဲၢ်ထီၣ်ဘၣ်လၢ အဘ့ၣ်လိၤဘၣ်န့ၣ်​ ပှၤလုၢ်တၢ်ဒိၣ်​ ကပာ်လီၤဆီ ကဒီးအီၤ ထဲတဂၤ လၢနွံသီ အတီၢ်ပူၤလီၤ.

၆ “ဖဲနွံသီတသီန့ၣ်​ ပှၤလုၢ်တၢ်ဒိၣ်​ ကသမံသမိးကဒီးအီၤ ဒီးတၢ်အကဝီၤဖိ အလွဲၢ်မ့ၢ်လီၤမၢ် ဒီးမ့ၢ်တလဲၢ်ထီၣ်လၢ အဘ့ၣ်လိၤဘၣ်န့ၣ်​ မ့ၢ်ဒၣ်​ တၢ်ပူၤလီၢ်ကိၢ်ဃ့ ယိယိအဃိ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤန့ၣ်​ ကဆှီလီၤ.+ ပှၤတဂၤအံၤ ကဆှုၣ်​ အတၢ်ကူတၢ်ကၤ ဒီးကကဆှီဝဲလီၤ. ၇ ဘၣ်ဆၣ်​ အဝဲ မ့ၢ်လဲၤပာ်ဖျါထီၣ်အသးလၢ ပှၤလုၢ်တၢ်ဒိၣ်​ အအိၣ်​ ဒီးပှၤလုၢ်တၢ်ဒိၣ်​ မ့ၢ်ဘိးဘၣ်သ့ၣ်ညါဝဲလၢ အကဆှီဝဲလံ သနာ်က့ လၢခံ တၢ်ပူၤလီၢ် ကိၢ်ဃ့အံၤ မ့ၢ်လဲၢ်ထီၣ်လၢ အဘ့ၣ်လိၤန့ၣ် အကဘၣ်​ လဲၤပာ်ဖျါထီၣ်ကဒီး အသးလၢ ပှၤလုၢ်တၢ်ဒိၣ်အအိၣ်​ လၢအသီတဘျီလီၤ. ၈ ဒီးပှၤလုၢ်တၢ်ဒိၣ်​ ကသမံသမိးဝဲ ဒီးတၢ်ပူၤလီၢ် ကိၢ်ဃ့အံၤ မ့ၢ်လဲၢ်ထီၣ်လၢ အဘ့ၣ်လိၤန့ၣ်​ အမ့ၢ်ဝဲ တၢ်ဆါအၢအဃိ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ တကဆှီလၢၤဘၣ်.+

၉ “ပှၤတဂၤ မ့ၢ်ဘၣ်တၢ်ဆါအၢန့ၣ်​ ပှၤကဘၣ်​ လဲၤကိးအီၤလၢ ပှၤလုၢ်တၢ်ဒိၣ်​ အအိၣ်လီၤ. ၁၀ ဒီးပှၤလုၢ်တၢ်ဒိၣ်န့ၣ်​ ကသမံသမိးအီၤလီၤ.+ ဒီးမ့ၢ်ထံၣ်ဝဲ တၢ်ဝါဝါ ဟဲညိးထီၣ်တလိၣ်​ လၢအဘ့ၣ်လိၤ ဒီးအဆူၣ်​ မ့ၢ်ထီၣ်ဝါ ဒီးအပူၤလီၢ် မ့ၢ်အိၣ်ထီၣ်လၢ+ တၢ်ညိးထီၣ်​ အလီၢ်အံၤ အပူၤန့ၣ်​ ၁၁ အမ့ၢ်ဝဲ တၢ်ဆါအၢ ယံာ်ယံာ်ထၢထၢလီၤ. အဃိ ပှၤလုၢ်တၢ်ဒိၣ်န့ၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ တကဆှီလၢၤဘၣ်. ဒီးမ့ၢ်လၢ အတကဆှီဘၣ်အဃိ ပှၤလုၢ်တၢ်ဒိၣ်​ တလိၣ်ပာ်လီၤဆီအီၤ ထဲတဂၤလၢၤဘၣ်.+ ၁၂ တၢ်ဆါအၢ မ့ၢ်ဟဲထီၣ်လၢအဘ့ၣ်လိၤဝးဝး ဒီးပှၤလုၢ်တၢ်ဒိၣ်​ မ့ၢ်ထံၣ်ဘၣ်ဝဲလၢ တၢ်ဆါအၢအံၤ အိၣ်လၢ ပှၤတဂၤန့ၣ်​ အလိၤဒီဂၤ စးထီၣ်လၢ အခိၣ်​ တုၤလၢအခီၣ်န့ၣ်​ ၁၃ ပှၤလုၢ်တၢ်ဒိၣ်​ ကသမံသမိးအီၤ ဒီးမ့ၢ်ထံၣ်ဝဲလၢ တၢ်ဆါအၢ အိၣ်လၢအဘ့ၣ်လိၤ ဝးဝးန့ၣ်​ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤလၢအဘၣ်တၢ်ဆါတဂၤအံၤ ကဆှီဝဲလီၤ.* တၢ်ဆါအၢန့ၣ်​ ထီၣ်ဝါလၢာ်လံ အဃိ ပှၤတဂၤအံၤ ကဆှီဝဲလီၤ. ၁၄ ဘၣ်ဆၣ်​ တၢ်ပူၤလီၢ် မ့ၢ်ဟဲအိၣ်ထီၣ်လၢ အဘ့ၣ်လိၤန့ၣ်​ အဝဲတကဆှီလၢၤဘၣ်. ၁၅ ပှၤလုၢ်တၢ်ဒိၣ်​ မ့ၢ်ထံၣ်ဝဲ တၢ်ပူၤလီၢ်န့ၣ်​ အဝဲ ကဘိးဘၣ်သ့ၣ်ညါဝဲလၢ ပှၤတဂၤအံၤ တကဆှီလၢၤဘၣ်.+ တၢ်ပူၤလီၢ်အံၤန့ၣ်​ တကဆှီဘၣ်​ ဒီးမ့ၢ်ဝဲ တၢ်ဆါအၢလီၤ.+ ၁၆ ဘၣ်ဆၣ်​ လၢခံ အတၢ်ပူၤလီၢ် မ့ၢ်ထီၣ်ဝါကဒီးန့ၣ်​ အဝဲ ကဘၣ်လဲၤကဒီးလၢ ပှၤလုၢ်တၢ်ဒိၣ်​ အအိၣ်လီၤ. ၁၇ ပှၤလုၢ်တၢ်ဒိၣ်​ ကသမံသမိးအီၤ+ ဒီးတၢ်ပူၤလီၢ် မ့ၢ်ထီၣ်ဝါန့ၣ်​ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤလၢအဘၣ်တၢ်ဆါ တဂၤအံၤ ကဆှီဝဲလံ. ဒီးပှၤတဂၤအံၤန့ၣ်​ ကကဆှီဝဲလီၤ.

၁၈ “တၢ်ဝ့ မ့ၢ်ထီၣ်လၢ ပှၤတဂၤအလိၤ ဒီးအမ့ၢ်ဘျါက့ၤဝဲ ၁၉ သနာ်က့ လၢတၢ်ဝ့ထီၣ်​ အလီၢ်န့ၣ်​ တၢ်ဝါဝါ မ့ၢ်ညိးထီၣ်တလိၣ်​ မ့တမ့ၢ် တၢ်အကဝီၤဖိ လၢအလွဲၢ်ဝါဂီၤ မ့ၢ်ဟဲထီၣ်န့ၣ်​ အကဘၣ်​ လဲၤပာ်ဖျါထီၣ်အသးလၢ ပှၤလုၢ်တၢ်ဒိၣ်​ အအိၣ်လီၤ. ၂၀ ပှၤလုၢ်တၢ်ဒိၣ်​ ကသမံသမိးဝဲ+ ဒီးအမ့ၢ်ဖျါလၢ အနုာ်လီၤလၢ အညၣ်ပူၤ ဒီးအဆူၣ်မ့ၢ်ထီၣ်ဝါန့ၣ်​ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ တကဆှီလၢၤဘၣ်. အမ့ၢ်ဝဲ တၢ်ဆါအၢလၢ အဟဲထီၣ်လၢ တၢ်ဝ့အလီၢ်လီၤ. ၂၁ ဘၣ်ဆၣ်​ ဖဲပှၤလုၢ်တၢ်ဒိၣ်​ သမံသမိးအီၤအခါ အမ့ၢ်ထံၣ်ဝဲလၢ အဆူၣ်လၢ တၢ်အကဝီၤအံၤအပူၤ တထီၣ်ဝါဘၣ်​ ဒီးအမ့ၢ်တဖျါလၢ အတနုာ်လီၤလၢ အညၣ်ပူၤဘၣ်​ ဒီးမ့ၢ်ဖျါလၢ အလွဲၢ်လီၤမၢ်လံန့ၣ်​ ပှၤလုၢ်တၢ်ဒိၣ်​ ကပာ်လီၤဆီအီၤ ထဲတဂၤ လၢနွံသီ အတီၢ်ပူၤလီၤ.+ ၂၂ ဘၣ်ဆၣ်​ အမ့ၢ်လဲၢ်ထီၣ်​ လၢအဘ့ၣ်လိၤန့ၣ်​ အမ့ၢ်တၢ်ဆါအၢ အဃိ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤန့ၣ်​ တကဆှီလၢၤဘၣ်. ၂၃ ဘၣ်ဆၣ်​ တၢ်အကဝီၤဖိအံၤ မ့ၢ်အိၣ်အလီၢ်လီၢ် ဒီးမ့ၢ်တလဲၢ်ထီၣ်ဘၣ်န့ၣ်​ အခီပညီ အိၣ်ဒၣ်​ အညိးထီၣ်ဝဲလၢ တၢ်ဝ့တဖျၢၣ်အံၤအဃိလီၤ. အဃိ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ ကဆှီဝဲလီၤ.+

၂၄ “ပှၤတဂၤဂၤ မ့ၢ်အိၣ်ဒီး တၢ်ပူၤလီၢ်လၢ မ့ၣ်အူအီၣ်အီၤအဃိ ဒီးအတၢ်ပူၤလီၢ် အညၣ်လၢ အတဘျါက့ၤ ဂ့ၤဂ့ၤဒံးဘၣ်​ မ့ၢ်ကဲထီၣ်​ တၢ်အကဝီၤဖိလၢ အလွဲၢ်ဂီၤဝါမ့ၢ်ဂ့ၤ, အဝါမ့ၢ်ဂ့ၤန့ၣ်​ ၂၅ ပှၤလုၢ်တၢ်ဒိၣ်​ ကသမံသမိးအီၤလီၤ. ဒီးအဆူၣ်လၢ တၢ်တကဝီၤဖိအပူၤ မ့ၢ်ထီၣ်ဝါ ဒီးအမ့ၢ်ဖျါလၢ အနုာ်လီၤလၢ အညၣ်ပူၤန့ၣ်​ အမ့ၢ်ဝဲ တၢ်ဆါအၢလၢ အဟဲကဲထီၣ်အသးလၢ တၢ်ပူၤလီၢ်အံၤ အပူၤလီၤ. ဒီးပှၤလုၢ်တၢ်ဒိၣ်န့ၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ တကဆှီလၢၤဘၣ်. တၢ်ဆါအဝဲအံၤ မ့ၢ်ဝဲ တၢ်ဆါအၢလီၤ. ၂၆ ဘၣ်ဆၣ်​ ပှၤလုၢ်တၢ်ဒိၣ်​ မ့ၢ်သမံသမိးကွၢ်အီၤ ဒီးမ့ၢ်ထံၣ်ဝဲလၢ အဆူၣ်လၢ တၢ်အကဝီၤဖိအပူၤ တထီၣ်ဝါဘၣ်​ ဒီးအတနုာ်လီၤလၢ အညၣ်ပူၤဘၣ်​ ဒီးအလွဲၢ် မ့ၢ်လီၤမၢ်န့ၣ်​ ပှၤလုၢ်တၢ်ဒိၣ်​ ကပာ်လီၤဆီအီၤ ထဲတဂၤ လၢနွံသီ အတီၢ်ပူၤလီၤ.+ ၂၇ ဖဲနွံသီတသီန့ၣ်​ ပှၤလုၢ်တၢ်ဒိၣ်​ ကသမံသမိးအီၤ ဒီးတၢ်အကဝီၤဖိအံၤ မ့ၢ်လဲၢ်ထီၣ်လၢ အဘ့ၣ်လိၤန့ၣ်​ မ့ၢ်ဝဲ တၢ်ဆါအၢအဃိ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ တကဆှီလၢၤဘၣ်. ၂၈ ဘၣ်ဆၣ်​ တၢ်အကဝီၤဖိ မ့ၢ်အိၣ်အလီၢ်လီၢ် ဒီးမ့ၢ်တလဲၢ်ထီၣ်လၢ အဘ့ၣ်လိၤဘၣ်​ ဒီးမ့ၢ်ဖျါလၢ အလွဲၢ်လီၤမၢ်လံန့ၣ်​ အခီပညီ အိၣ်ဒၣ်​ မ့ၣ်အူအီၣ်အီၤအလီၢ်အံၤ ညိးထီၣ်ဝဲလီၤ. ဒီးမ့ၢ်လၢ မ့ၣ်အူအီၣ်အီၤအလီၢ်အံၤ ညိးထီၣ်အဃိ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ ကဆှီဝဲလီၤ.

၂၉ “ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ တၢ်ဆါတခါ မ့ၢ်ထီၣ်လၢ အခိၣ်​ မ့တမ့ၢ် အခၣ်လိၤန့ၣ်​ ၃၀ ပှၤလုၢ်တၢ်ဒိၣ်​ ကသမံသမိးဝဲလီၤ.+ ဒီးမ့ၢ်ဖျါလၢ အနုာ်လီၤလၢ အညၣ်ပူၤ ဒီးအဆူၣ်မ့ၢ်ဘီ ဒီးဘူန့ၣ်​ မ့ၢ်ဝဲ တၢ်ဆါတခါလၢ အအိၣ်လၢ အခိၣ်ဘ့ၣ်​ မ့တမ့ၢ် လၢအခၣ်ဆူၣ်​ ဒီးပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ တကဆှီဘၣ်. အမ့ၢ်ဝဲတၢ်ဆါအၢလၢ အခိၣ်​ မ့တမ့ၢ် အခၣ်လိၤလီၤ. ၃၁ ဘၣ်ဆၣ်​ ပှၤလုၢ်တၢ်ဒိၣ်​ မ့ၢ်ထံၣ်ဝဲလၢ တၢ်ဆါတခါအံၤ တနုာ်လီၤလၢ အညၣ်ပူၤဘၣ်​ ဒီးအဆူၣ်​ လၢအလွဲၢ်သူ တအိၣ်ဖဲန့ၣ်ဘၣ်န့ၣ်​ ပှၤလုၢ်တၢ်ဒိၣ်​ ကဘၣ်ပာ်လီၤဆီအီၤ ထဲတဂၤ လၢနွံသီ အတီၢ်ပူၤလီၤ.+ ၃၂ ဖဲနွံသီတသီန့ၣ်​ ပှၤလုၢ်တၢ်ဒိၣ်​ ကသမံသမိးအီၤ ဒီးတၢ်ဆါတခါအံၤ မ့ၢ်တလဲၢ်ထီၣ်လၢ အဘ့ၣ်လိၤဘၣ်​ ဒီးအဆူၣ်​ မ့ၢ်တထီၣ်ဘီဘၣ်​ ဒီးမ့ၢ်တဖျါလၢ အနုာ်လီၤလၢ အညၣ်ပူၤဘၣ်န့ၣ်​ ၃၃ ပှၤတဂၤအံၤ ကဘၣ်လူၤအဆူၣ်​ ဘၣ်ဆၣ်​ အဝဲတဘၣ်လူၤဝဲ အဆူၣ်လၢ အအိၣ်လၢ တၢ်ဆါဘၣ်အီၤအလီၢ် န့ၣ်ဘၣ်. ဝံၤဒီး ပှၤလုၢ်တၢ်ဒိၣ်​ ကပာ်လီၤဆီ ပှၤလၢအဘၣ်တၢ်ဆါ တဂၤအံၤ ထဲတဂၤ လၢနွံသီ အတီၢ်ပူၤလီၤ.

၃၄ “ဖဲနွံသီတသီန့ၣ်​ ပှၤလုၢ်တၢ်ဒိၣ်​ ကသမံသမိး ကဒီးဝဲ တၢ်ဆါဘၣ်အီၤ အလီၢ်လီၤ. တၢ်ဆါတခါအံၤလၢ ခိၣ်ဘ့ၣ်လိၤ ဒီးလၢအခၣ်ဆူၣ်​ မ့ၢ်တလဲၢ်ထီၣ်လၢ အဘ့ၣ်လိၤဘၣ်​ ဒီးမ့ၢ်တဖျါလၢ အနုာ်လီၤလၢ အညၣ်ပူၤဘၣ်န့ၣ်​ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ ကဆှီဝဲလီၤ. ဒီးအဝဲ ကဘၣ်ဆှုၣ်ဝဲ အတၢ်ကူတၢ်ကၤ ဒီးအဝဲ ကကဆှီဝဲလီၤ. ၃၅ ဘၣ်ဆၣ်​ ပှၤလုၢ်တၢ်ဒိၣ်​ မ့ၢ်ဘိးဘၣ်သ့ၣ်ညါဝဲလၢ ပှၤတဂၤအံၤ ကဆှီလံ သနာ်က့ လၢခံ တၢ်ဆါတခါအံၤ မ့ၢ်လဲၢ်ထီၣ်ဝဲလၢ အဘ့ၣ်လိၤန့ၣ်​ ၃၆ ပှၤလုၢ်တၢ်ဒိၣ်​ ကသမံသမိးအီၤလီၤ. ဒီးတၢ်ဆါတခါအံၤ မ့ၢ်လဲၢ်ထီၣ်လၢ အဘ့ၣ်လိၤန့ၣ်​ ပှၤတဂၤအံၤ တကဆှီလၢၤဘၣ်အဃိ ပှၤလုၢ်တၢ်ဒိၣ်​ တလိၣ်ဃုကွၢ်ဝဲလၢ မ့ၢ်ပှၤတဂၤအံၤ အဆူၣ်ထီၣ်ဘီဧါ တထီၣ်ဘီဧါန့ၣ်လၢၤဘၣ်. ၃၇ ဘၣ်ဆၣ်​ ဖဲပှၤလုၢ်တၢ်ဒိၣ်​ သမံသမိးကွၢ်အီၤအခါ အမ့ၢ်ထံၣ်ဝဲလၢ တၢ်ဆါတခါအံၤ တလဲၢ်ထီၣ်လၢ အဘ့ၣ်လိၤဘၣ်​ ဒီးအဆူၣ်လၢအလွဲၢ်သူ ဟဲထီၣ်လၢအလိၤဖဲန့ၣ်န့ၣ်​ အခီပညီမ့ၢ်ဒၣ်​ တၢ်ဆါတခါအံၤ ဘျါက့ၤလံ. ဒီးအဝဲ ကဆှီထီၣ်က့ၤ အဃိ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ပှၤတဂၤအံၤ ကဆှီထီၣ်လံ.+

၃၈ “ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ တၢ်အကဝီၤဖိတဖၣ်​ မ့ၢ်ဟဲထီၣ်လၢ အဘ့ၣ်လိၤ ဒီးတၢ်အကဝီၤဖိတဖၣ်အံၤ မ့ၢ်ဝါန့ၣ်​ ၃၉ ပှၤလုၢ်တၢ်ဒိၣ်​ ကသမံသမိးဝဲလီၤ.+ ဒီးအမ့ၢ်ထံၣ်ဝဲလၢ တၢ်အကဝီၤဖိတဖၣ်​ အလွဲၢ်မ့ၢ်လီၤမၢ်န့ၣ်​ မ့ၢ်ဒၣ်​ တၢ်အကဝီၤ ယိယိတဖၣ်​ လၢအဘ့ၣ်လိၤလီၤ. အဃိ ပှၤတဂၤအံၤ ကဆှီဝဲလီၤ.

၄၀ “ဒီးပိာ်ခွါတဂၤ အခိၣ်ဆူၣ်​ မ့ၢ်လီၤထဲး ဒီးအခိၣ်​ မ့ၢ်လ့ၤထီၣ်န့ၣ်​ အဝဲကဆှီဝဲလီၤ. ၄၁ ဒီးအခိၣ်ဆူၣ်​ လၢအမဲာ်ညါ မ့ၢ်လီၤထဲး ဒီးအခိၣ်မ့ၢ်လ့ၤန့ၣ်​ အဝဲကဆှီဝဲလီၤ. ၄၂ ဘၣ်ဆၣ်​ တၢ်ပူၤလီၢ်လၢ အဂီၤဝါ မ့ၢ်အိၣ်ထီၣ်လၢ အခိၣ်လ့ၤအလီၢ် မ့တမ့ၢ် လၢအမဲာ်တူၢ်ခိၣ်န့ၣ်​ အမ့ၢ်ဝဲ တၢ်ဆါအၢလၢ အဟဲကဲထီၣ်လၢ အခိၣ်လ့ၤအလီၢ် မ့တမ့ၢ်လၢ အမဲာ်တူၢ်ခိၣ်န့ၣ်လီၤ. ၄၃ ဒီးပှၤလုၢ်တၢ်ဒိၣ်န့ၣ် ကသမံသမိးအီၤ ဒီးမ့ၢ်ထံၣ်ဝဲ တၢ်လၢ အလွဲၢ်ဂီၤဝါ ဟဲညိးထီၣ်တလိၣ်​ ဒီးမ့ၢ်လီၤဂာ်လၢ အမ့ၢ်တၢ်ဆါအၢလၢ အခိၣ်သၣ်ဃံ အဘ့ၣ်လိၤန့ၣ်​ ၄၄ ပှၤတဂၤအံၤ မ့ၢ်ပှၤဘၣ်​ တၢ်ဆါအၢလီၤ. အဝဲ တကဆှီလၢၤဘၣ်​ ဒီးခီဖျိလၢ အတၢ်ဆါလၢ အိၣ်လၢ အခိၣ်လိၤ အဃိ ပှၤလုၢ်တၢ်ဒိၣ်​ ကဘၣ်​ ဘိးဘၣ်သ့ၣ်ညါဝဲလၢ ပှၤတဂၤအံၤ တကဆှီလၢၤဘၣ်. ၄၅ ဒီးပှၤဘၣ်တၢ်ဆါအၢန့ၣ်​ ကဘၣ်ကူကၤဝဲ တၢ်ကူတၢ်ကၤလၢ အညာ် ဒီးကဘၣ်ပာ် အခိၣ်ဆူၣ်ဖုရု ဒီးအဝဲ ကဘၣ်ကးဘၢ အထးခိၣ်* ဒီးကိးထီၣ်ဝဲလၢ ‘တကဆှီဘၣ်, တကဆှီဘၣ်.’ ၄၆ ဖဲအဝဲ အိၣ်ဒီးတၢ်ဆါအံၤ ဒီတကတီၢ်န့ၣ်​ အဝဲ တကဆှီဘၣ်. ခီဖျိလၢ အဝဲ တကဆှီဘၣ်အဃိ အကဘၣ်​ လဲၤအိၣ်လၢ တၢ်လီၢ်လၢ ပှၤဂၤတအိၣ်ဘၣ်အလီၢ် လၢဒဲကဝီၤ အချၢလီၤ.+

၄၇ “တၢ်ဆါအၢ* မ့ၢ်အိၣ်လၢ တၢ်ကူတၢ်ကၤ လၢအမ့ၢ် သိဆူၣ်​ မ့တမ့ၢ် ဖှီဝါကဆှၣ်​ အလိၤ, ၄၈ လၢအလုၣ်လၢ အဘၣ်တၢ်ထါအီၤတဖၣ်​ အကဆူး, ဆၣ်ဖိကီၢ်ဖိ အဘ့ၣ်လိၤ မ့တမ့ၢ် တၢ်တမံၤမံၤလၢ ပှၤတ့အီၤလၢ ဆၣ်ဖိကီၢ်ဖိ အဘ့ၣ်လိၤ ၄၉ ဒီးအမ့ၢ် ထီၣ်ဘီထီၣ်လါ မ့တမ့ၢ် ထီၣ်ဂီၤလၢ တၢ်ကူတၢ်ကၤ အလိၤမ့ၢ်ဂ့ၤ, ဆၣ်ဖိကီၢ်ဖိအဘ့ၣ်​ အလိၤမ့ၢ်ဂ့ၤ, အလုၣ်လၢ အဘၣ်တၢ်ထါအီၤ တဖၣ်အကဆူးမ့ၢ်ဂ့ၤ, တၢ်တမံၤမံၤလၢ ပှၤတ့အီၤလၢ ဆၣ်ဖိကီၢ်ဖိ အဘ့ၣ်​ အလိၤမ့ၢ်ဂ့ၤန့ၣ်​ အအိၣ်ဒီး တၢ်ဆါအၢ အဃိ ပှၤကဘၣ်​ လဲၤဒုးနဲၣ်ဝဲ ပှၤလုၢ်တၢ်ဒိၣ်လီၤ. ၅၀ ပှၤလုၢ်တၢ်ဒိၣ်​ ကသမံသမိးဝဲ ဒီးကပာ်လီၤဆီဝဲ လၢနွံသီ အတီၢ်ပူၤလီၤ.+ ၅၁ ဒီးဖဲနွံသီတသီ ပှၤလုၢ်တၢ်ဒိၣ်​ ကသမံသမိးဝဲ ဒီးအမ့ၢ်ထံၣ်ဝဲလၢ တၢ်ဆါအံၤအါထီၣ်လၢ တၢ်ကူတၢ်ကၤအလိၤ, လၢလုၣ်လၢ အဘၣ်တၢ်ထါအီၤ တဖၣ်အကဆူး မ့တမ့ၢ် လၢဆၣ်ဖိကီၢ်ဖိ အဘ့ၣ်​ အလိၤ (လၢပှၤသူအီၤလၢ တၢ်တမံၤဂ့ၤတမံၤဂ့ၤအဂီၢ်) န့ၣ်အမ့ၢ်ဝဲ တၢ်ဆါအၢလၢ အမၤဘၣ်ဒိဘၣ်ထံးတၢ် အဃိ အတကဆှီလၢၤဘၣ်.+ ၅၂ တၢ်ကူတၢ်ကၤမ့ၢ်ဂ့ၤ, တၢ်ကံးညာ် လၢဘၣ်တၢ်ထါအီၤ လၢသိဆူၣ်​ မ့တမ့ၢ် ဖီဝါကဆှၣ်မ့ၢ်ဂ့ၤ, တၢ်တမံၤမံၤလၢ ပှၤတ့အီၤလၢ ဆၣ်ဖိကီၢ်ဖိ အဘ့ၣ်မ့ၢ်ဂ့ၤ လၢအအိၣ်ဒီး တၢ်ဆါအၢလၢ အမၤဘၣ်ဒိဘၣ်ထံးတၢ်န့ၣ်​ အဝဲ ကဘၣ်ဒွဲၣ်အူကွံာ်ဝဲ လၢမ့ၣ်အူလီၤ.

၅၃ “ဘၣ်ဆၣ်​ ပှၤလုၢ်တၢ်ဒိၣ်​ မ့ၢ်သမံသမိးကွၢ်ဝဲ ဒီးမ့ၢ်ထံၣ်ဝဲလၢ တၢ်ဆါတခါအံၤ တအါထီၣ်ဘၣ်လၢ တၢ်ကူတၢ်ကၤအလိၤ, လၢလုၣ်တဖၣ်အကဆူး မ့တမ့ၢ်လၢ တၢ်တမံၤမံၤလၢ ပှၤတ့အီၤလၢ ဆၣ်ဖိကီၢ်ဖိ အဘ့ၣ်အလိၤဘၣ်န့ၣ်​ ၅၄ ပှၤလုၢ်တၢ်ဒိၣ်​ ကမၤလိာ်ဝဲလၢ အဝဲသ့ၣ်​ ကဘၣ်ဆှုၣ်ဝဲ တၢ်လၢ အဘၣ်တၢ်ဆါအံၤ ဒီးကပာ်လီၤဆီကဒီးဝဲ လၢနွံသီ အတီၢ်ပူၤလီၤ. ၅၅ ပှၤဆှုၣ်တၢ်လၢ အဘၣ်တၢ်ဆါအံၤ မူာ်မူာ်နီၢ်နီၢ် မ့ၢ်ဝံၤန့ၣ်​ ပှၤလုၢ်တၢ်ဒိၣ်​ ကသမံသမိးကွၢ်ဝဲလီၤ. ဒီးတၢ်ဆါတခါအံၤ မ့ၢ်တအါထီၣ်ဘၣ်​ သနာ်က့ မ့ၢ်ဖျါဒ်အလီၢ်လီၢ်န့ၣ်​ အတကဆှီဘၣ်. ဒီးမ့ၢ်လၢ တၢ်ဆါအီၣ်အီၤ လၢအပူၤ မ့တမ့ၢ် အချၢအဃိ နကဘၣ်​ ဒွဲၣ်အူအီၤ လၢမ့ၣ်အူလီၤ.

၅၆ “ဘၣ်ဆၣ်​ ပှၤဆှုၣ်အီၤ မူာ်မူာ်နီၢ်နီၢ်မ့ၢ်ဝံၤ ဒီးပှၤလုၢ်တၢ်ဒိၣ်​ မ့ၢ်သမံသမိးဝဲ ဒီးမ့ၢ်ထံၣ်ဝဲလၢ တၢ်ကူတၢ်ကၤလၢ အအိၣ်ဒီးတၢ်ဆါ လၢအလိၤ တကဝီၤ အလွဲၢ်လီၤမၢ်လံန့ၣ်​ အဝဲ ကဘၣ်ဖှီညာ်ကွံာ်အီၤလၢ တၢ်ကူတၢ်ကၤအလိၤ, ဆၣ်ဖိကီၢ်ဖိ အဘ့ၣ်အလိၤ မ့တမ့ၢ် လၢလုၣ်လၢ အဘၣ်တၢ်ထါအီၤတဖၣ်​ အကဆူးလီၤ. ၅၇ ဘၣ်ဆၣ်​ တၢ်ဆါတခါအံၤ မ့ၢ်အိၣ်ထီၣ်ကဒီးလၢ တၢ်ကူတၢ်ကၤအံၤအလိၤ တတီၤတီၤဒံး, လုၣ်လၢ အဘၣ်တၢ်ထါအီၤတဖၣ်​ အကဆူး, မ့တမ့ၢ် လၢတၢ်တမံၤမံၤလၢ ပှၤတ့အီၤလၢ ဆၣ်ဖိကီၢ်ဖိ အဘ့ၣ်အလိၤ တတီၤတီၤဒံးန့ၣ်​ မ့ၢ်ဒၣ်​ တၢ်ဆါတခါအံၤ အါထီၣ်ဝဲလီၤ. ဒီးတၢ်တမံၤဂ့ၤ တမံၤဂ့ၤ လၢအအိၣ်ဒီးတၢ်ဆါန့ၣ်​ နကဘၣ်ဒွဲၣ်အူထီၣ်​ လၢမ့ၣ်အူလီၤ.+ ၅၈ ဘၣ်ဆၣ်​ ပှၤမ့ၢ်ဆှုၣ်​ တၢ်ကူတၢ်ကၤမ့ၢ်ဂ့ၤ, တၢ်ကံးညာ်လၢ အဘၣ်တၢ်ထါအီၤမ့ၢ်ဂ့ၤ, တၢ်တမံၤမံၤလၢ ပှၤတ့အီၤလၢ ဆၣ်ဖိကီၢ်ဖိ အဘ့ၣ်မ့ၢ်ဂ့ၤ ဒီးတၢ်ဆါ မ့ၢ်လီၤမၢ်ကွံာ်ဝဲန့ၣ်​ ပှၤကဘၣ်ဆှုၣ်ကဒီးအီၤ လၢအသီတဘျီ ဒီးကကဆှီထီၣ်ဝဲလီၤ.

၅၉ “အဝဲန့ၣ်မ့ၢ်ဝဲ တၢ်သိၣ်တၢ်သီလၢ အဘၣ်ဃးဒီး တၢ်ဆါအၢလၢ အအိၣ်လၢ တၢ်ကူတၢ်ကၤ လၢအမ့ၢ် သိဆူၣ်​ မ့တမ့ၢ် ဖှီဝါကဆှၣ်​ အလိၤ, လၢအလုၣ်လၢ အဘၣ်တၢ်ထါအီၤတဖၣ်​ အကဆူး, မ့တမ့ၢ် လၢတၢ်တမံၤမံၤလၢ ပှၤတ့အီၤလၢ ဆၣ်ဖိကီၢ်ဖိ အဘ့ၣ်လိၤလီၤ. ဒီးတၢ်သိၣ်တၢ်သီအံၤ အိၣ်ဝဲ ဒ်သိး ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ တၢ်သ့ၣ်တဖၣ်အံၤ မ့ၢ်ဝဲအကဆှီ မ့တမ့ၢ် အတကဆှီဘၣ်န့ၣ်လီၤ.”

၁၄ ယဟိဝၤယွၤ ဆဲးတဲ စီၤမိၤၡ့လၢ ၂ “အဝဲအံၤ မ့ၢ်ဝဲ တၢ်သိၣ်တၢ်သီ လၢအဘၣ်ဃးဒီး မုၢ်နံၤ ဖဲပှၤလဲၤကိး ပှၤဘၣ်တၢ်ဆါအၢလၢ ပှၤလုၢ်တၢ်ဒိၣ်အအိၣ်​ ဒ်သိးတၢ်ကပာ်ပနီၣ်အီၤလၢ အကဆှီထီၣ်လံအဂီၢ်လီၤ.+ ၃ ပှၤလုၢ်တၢ်ဒိၣ်​ ကလဲၤလၢ ဒဲကဝီၤအချၢ ဒီးကသမံသမိးအီၤလီၤ. ပှၤဘၣ်တၢ်ဆါအၢတဂၤ မ့ၢ်ဘျါက့ၤလံန့ၣ်​ ၄ ဒ်သိးအက ကဆှီထီၣ်က့ၤအဂီၢ် ပှၤလုၢ်တၢ်ဒိၣ်​ ကမၤလိာ်အီၤလၢ အကဟဲစိာ် ထိၣ်လၢအမူဝဲလၢ အကဆှီခံဘ့ၣ်, သ့ၣ်ဆှိအ့ရ့း, တၢ်ဂီၤဆှုၣ်ကလာ် ဒီးကဖျီၣ်အ့စိးလီၤ.+ ၅ ဒီးပှၤလုၢ်တၢ်ဒိၣ်​ ကမၤလိာ်ဝဲလၢ ပှၤကမၤသံဝဲ ထိၣ်တဘ့ၣ်လၢ ထံဆှံလၢ အအိၣ်လၢ သပၢၤဟီၣ်ခိၣ်အပူၤ အဖီခိၣ်လီၤ. ၆ ဘၣ်ဆၣ်​ ပှၤလုၢ်တၢ်ဒိၣ်​ ကဘၣ်ဟံးန့ၢ် ထိၣ်လၢအမူဝဲတဘ့ၣ်​ ဃုာ်ဒီး သ့ၣ်ဆှိအ့ရ့း, တၢ်ဂီၤဆှုၣ်ကလာ် ဒီးကဖျီၣ်အ့စိးလီၤ. ဒီးအဝဲကဘျၢလီၤ တၢ်သ့ၣ်တဖၣ်အံၤလၢ ထိၣ်လၢအဘၣ်​ တၢ်မၤသံအီၤ လၢထံဆှံအဖီခိၣ်​ တဘ့ၣ်န့ၣ်​ အသွံၣ်ကျါလီၤ. ၇ ဝံၤဒီး ပှၤလုၢ်တၢ်ဒိၣ်​ ကဖှံဝဲတၢ်သွံၣ်အံၤ နွံဘျီလၢ ပှၤလၢအဘၣ်​ တၢ်ဆါအၢလၢ အမၤကဆှီထီၣ်အသး တဂၤန့ၣ်အလိၤ ဒီးကဘိးဘၣ်သ့ၣ်ညါဝဲလၢ ပှၤတဂၤအံၤ ကဆှီဝဲလံ. ဒီးအဝဲကပျၢ်ကွံာ် ထိၣ်လၢ အမူဝဲတဘ့ၣ်န့ၣ်​ လၢတၢ်ပျီပူၤလီၤ.+

၈ “ဒီးပှၤလၢ အမၤကဆှီထီၣ်​ အသးတဂၤန့ၣ်​ ကဘၣ်ဆှုၣ်​ အတၢ်ကူတၢ်ကၤ ဒီးလူၤကွံာ်အဆူၣ်ခဲလၢာ် ဒီးကဘၣ်လုၢ်ထံ ဒီးအကကဆှီထီၣ်ဝဲလီၤ. လၢခံန့ၣ်​ အဝဲ ဟဲက့ၤနုာ်လီၤလၢ ဒဲကဝီၤပူၤသ့ ဘၣ်ဆၣ်​ အကဘၣ်အိၣ်လၢ အနီၢ်ကစၢ် အဒဲချၢ နွံသီလီၤ. ၉ ဖဲနွံသီတသီန့ၣ်​ အဝဲကဘၣ်​ လူၤကွံာ် အဆူၣ်ခဲလၢာ် လၢအခိၣ်လိၤ, အခၣ်လိၤ ဒီးလၢအမဲာ်တူၢ် လိၤလီၤ. ဖဲအဝဲလူၤက့ၤ အဆူၣ်ခဲလၢာ် ဝံၤအလီၢ်ခံ အဝဲ ကဆှုၣ်ကွံာ် အတၢ်ကူတၢ်ကၤ ခဲလၢာ် ဒီးကလုၢ်ထံလုၢ်နိ ဒီးအဝဲ ကကဆှီထီၣ်က့ၤဝဲလီၤ.

၁၀ “ဖဲဃိးသီတသီန့ၣ်​ အဝဲကဘၣ်ဟံးန့ၢ် သိဖါဖိခံဒု လၢအလၢအပှဲၤ ဒီးသိမိၢ်ဖိတဒုလၢ အလၢအပှဲၤ+ လၢအသးအိၣ်တနံၣ်, ကိၣ်ကမူၣ်​ လၢအဂ့ၤ သၢကံလိဒီးတဝာ်* ဃါဃုာ်အသးဒီးသိ ဒ်တၢ်လုၢ်ဘုအသိး+ ဒီးသိတခွးလီၤ.*+ ၁၁ ပှၤလုၢ်တၢ်ဒိၣ်လၢ အဘိးဘၣ်သ့ၣ်ညါဝဲလၢ ပှၤတဂၤအံၤ ကဆှီထီၣ်လံန့ၣ်​ ကဘၣ်​ လဲၤပာ်ဖျါထီၣ်​ ပှၤတဂၤအံၤ ဃုာ်ဒီးအတၢ်လုၢ်တဖၣ်​ လၢယဟိဝၤယွၤ အမဲာ်ညါ ဖဲတၢ်အိၣ်ဖှိၣ်အဒဲ အတၢ်နုာ်လီၤအလီၢ်န့ၣ်လီၤ. ၁၂ ဒီးပှၤလုၢ်တၢ်ဒိၣ်​ ကဟံးန့ၢ် သိဖါဖိတဒု ဃုာ်ဒီးသိတခွး ဒီးကလုၢ်ထီၣ်အီၤလၢ တၢ်လုၢ်လၢ တၢ်ကမၣ်အဂီၢ်+ ဒီးအဝဲ ကဝံၢ်ဝၢ်ဝဲလၢ အလီၢ်ခံဒီးအမဲာ်ညါ ဒ်တၢ်လုၢ်ဝံၢ်ဝၢ်လၢ ယဟိဝၤယွၤ အမဲာ်ညါလီၤ.+ ၁၃ ဒီးအဝဲကမၤသံ သိဖါဖိလၢ တၢ်စီဆှံအလီၢ် ဖဲတၢ်လီၢ်လၢ ညီနုၢ်တၢ်မၤသံ ဆၣ်ဖိကီၢ်ဖိလၢ တၢ်လုၢ်လၢ တၢ်ဒဲးဘးအဂီၢ် ဒီးဆၣ်ဖိကီၢ်ဖိလၢ တၢ်လုၢ်ဒွဲၣ်အူအဂီၢ်န့ၣ်လီၤ.+ ဒ်တၢ်လုၢ်လၢ တၢ်ဒဲးဘးအဂီၢ်အသိး တၢ်လုၢ်လၢ တၢ်ကမၣ်​ အဂီၢ်စ့ၢ်ကီး မ့ၢ်ပှၤလုၢ်တၢ်ဒိၣ်​ အတၢ်လီၤ.+ အမ့ၢ်ဝဲ တၢ်လၢ အစီဆှံ နီၢ်ကီၢ်လီၤ.+

၁၄ “ပှၤလုၢ်တၢ်ဒိၣ်​ ကဟံးန့ၢ်သိဖါဖိလၢ တၢ်လုၢ်လၢ တၢ်ကမၣ်အဂီၢ် အသွံၣ်တနီၤ ဒီးပှၤလုၢ်တၢ်ဒိၣ်​ ကဖှူဝဲ တၢ်သွံၣ်အံၤလၢ ပှၤလၢ အမၤကဆှီထီၣ်​ အသးတဂၤန့ၣ်​ အနၢ်စဲၤလၢ အနၢ်ထွဲတခီ ဒီးအစုမုၢ်လၢ အထွဲတခီ ဒီးအခီၣ်မုၢ်လၢ အထွဲတခီ အလိၤလီၤ. ၁၅ ဒီးလၢသိတခွးအကျါန့ၣ်​ ပှၤလုၢ်တၢ်ဒိၣ်​ ကဟံးန့ၢ် တၢ်အသိတနီၤ+ ဒီးလူလီၤအီၤလၢ အနီၢ်ကစၢ်အစုညါသးလၢ အစ့ၣ်တခီ အပူၤလီၤ. ၁၆ ဝံၤဒီး ပှၤလုၢ်တၢ်ဒိၣ်​ ကဘျၢလီၤ အစုနၢ အထွဲတဘိလၢ သိလၢအအိၣ်လၢ အစုညါသး လၢအစ့ၣ်တခီအပူၤ ဒီးကဖှံသိအံၤ တနီၤလၢ ယဟိဝၤယွၤ အမဲာ်ညါ နွံဘျီလီၤ. ၁၇ ဝံၤဒီး ပှၤလုၢ်တၢ်ဒိၣ်​ ကဟံးန့ၢ် သိတနီၤလၢ အအိၣ်လၢ အစုညါသးအပူၤ ဒီးကဖှူဝဲလၢ တၢ်သွံၣ်အံၤအဖီခိၣ်​ လၢအအိၣ်ဝဲလၢ ပှၤလၢ အမၤကဆှီထီၣ်​ အသးတဂၤန့ၣ်​ အနၢ်စဲၤလၢ အနၢ်ထွဲတခီ ဒီးအစုမုၢ်လၢ အထွဲတခီ ဒီးအခီၣ်မုၢ်လၢ အထွဲတခီ အလိၤလီၤ. ၁၈ ဒီးပှၤလုၢ်တၢ်ဒိၣ်​ ကဟံးန့ၢ် သိလၢအအိၣ်တ့ၢ်ဝဲလၢ အစုညါသးအပူၤ ဒီးကပာ်ထီၣ်ဝဲလၢ ပှၤလၢ အမၤကဆှီထီၣ်အသး တဂၤန့ၣ်​ အခိၣ်လိၤလီၤ. ဒီးပှၤလုၢ်တၢ်ဒိၣ်န့ၣ်​ ကမၤဘၣ်လိာ်ဖိးဒ့က့ၤ တၢ်လၢအဝဲအဂီၢ် လၢယဟိဝၤယွၤ အမဲာ်ညါလီၤ.+

၁၉ “ပှၤလုၢ်တၢ်ဒိၣ်​ ကလုၢ်ထီၣ်ဝဲ တၢ်လုၢ်လၢ တၢ်ဒဲးဘးအဂီၢ်+ ဒီးမၤဘၣ်လိာ်ဖိးဒ့က့ၤ တၢ်လၢ ပှၤလၢ အမၤကဆှီထီၣ်က့ၤအသး အဂီၢ်လီၤ. ဝံၤဒီး အဝဲကမၤသံ ဆၣ်ဖိကီၢ်ဖိလၢ တၢ်လုၢ်ဒွဲၣ်အူ အဂီၢ်လီၤ. ၂၀ ဒီးပှၤလုၢ်တၢ်ဒိၣ်​ ကလုၢ်ထီၣ်​ တၢ်လုၢ်ဒွဲၣ်အူ ဒီးတၢ်လုၢ်ဘု+ လၢတၢ်လုၢ်လီၢ် အဖီခိၣ်လီၤ. ပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤ တၢ်လၢအဂီၢ်+ ဒီးအဝဲ ကကဆှီထီၣ်လီၤ.+

၂၁ “ဘၣ်ဆၣ်​ အဝဲမ့မ့ၢ်ပှၤဖှီၣ်ဖိယာ်ဖိ ဒီးအတၢ်မ့ၢ်တယၢဘၣ်န့ၣ်​ အဝဲကဘၣ်ဟဲမူၤ သိဖါဖိတဒု ဒ်တၢ်လုၢ်လၢ တၢ်ဒဲးဘးအဂီၢ်အသိး ဒီးဝံၢ်ဝၢ်အီၤ ဒ်သိး ကမၤဘၣ်လိာ်ဖိးဒ့က့ၤတၢ် လၢအဂီၢ်လီၤ. ဒီးအကဘၣ်​ ဟဲစိာ်ဃုာ်ဒီး ကိၣ်ကမူၣ်လၢအဂ့ၤ တကံလိ* လၢအဃါဃုာ်အသးဒီးသိ ဒ်တၢ်လုၢ်ဘုအသိး ဒီးသိတခွး ၂၂ ဒီးထိၣ်လွံၢ်ခံဘ့ၣ်​ မ့တမ့ၢ် ထိၣ်ကးက့ၣ်ဖိ ခံဘ့ၣ်​ ဒ်အတၢ်အိၣ်ယၢဝဲ အသိးလီၤ. တဘ့ၣ်န့ၣ်​ လၢတၢ်လုၢ်လၢ တၢ်ဒဲးဘးအဂီၢ် ဒီးအဝဲတဘ့ၣ်န့ၣ်​ လၢတၢ်လုၢ်ဒွဲၣ်အူ အဂီၢ်လီၤ.+ ၂၃ အဃိ ဒ်သိး တၢ်ကပာ်ပနီၣ်အီၤလၢ အကဆှီထီၣ်က့ၤလံ အဂီၢ် ဖဲဃိးသီတသီန့ၣ်+ အဝဲ ကဘၣ်ဟဲစိာ် တၢ်သ့ၣ်တဖၣ်န့ၣ်​ လၢပှၤလုၢ်တၢ်ဒိၣ်အအိၣ်​ လၢတၢ်အိၣ်ဖှိၣ်အဒဲ အတၢ်နုာ်လီၤအလီၢ် လၢယဟိဝၤယွၤ အမဲာ်ညါလီၤ.+

၂၄ “ပှၤလုၢ်တၢ်ဒိၣ်​ ကဟံးန့ၢ် သိဖါဖိလၢ တၢ်လုၢ်လၢ တၢ်ကမၣ်အဂီၢ်+ ဒီးသိတခွးလီၤ. ဒီးပှၤလုၢ်တၢ်ဒိၣ်​ ကဝံၢ်ဝၢ်ဝဲလၢ အလီၢ်ခံဒီးအမဲာ်ညါ ဒ်တၢ်လုၢ်ဝံၢ်ဝၢ်အသိး လၢယဟိဝၤယွၤ အမဲာ်ညါလီၤ.+ ၂၅ ဝံၤဒီး အဝဲကမၤသံဝဲ သိဖါဖိ လၢတၢ်လုၢ်လၢ တၢ်ကမၣ်အဂီၢ် ဒီးပှၤလုၢ်တၢ်ဒိၣ်​ ကဟံးန့ၢ် တၢ်သွံၣ်တနီၤလၢ တၢ်လုၢ်လၢ တၢ်ကမၣ်အဂီၢ် ဒီးကဖှူဝဲ တၢ်သွံၣ်အံၤလၢ ပှၤလၢ အမၤကဆှီထီၣ်​ အသးတဂၤန့ၣ်​ အနၢ်စဲၤလၢ အနၢ်ထွဲတခီ ဒီးအစုမုၢ်လၢ အထွဲတခီ ဒီးအခီၣ်မုၢ်လၢ အထွဲတခီ အလိၤလီၤ.+ ၂၆ ဒီးပှၤလုၢ်တၢ်ဒိၣ်​ ကလူလီၤ သိတနီၤလၢ အနီၢ်ကစၢ်အစုညါသးလၢ အစ့ၣ်တခီ အပူၤလီၤ.+ ၂၇ သိလၢအအိၣ်လၢ အစုညါသးလၢ အစ့ၣ်တခီအပူၤန့ၣ်​ အဝဲကဖှံဝဲလၢ အစုနၢ အထွဲတဘိန့ၣ်​ လၢယဟိဝၤယွၤ အမဲာ်ညါ နွံဘျီလီၤ. ၂၈ ဒီးပှၤလုၢ်တၢ်ဒိၣ်​ ကဟံးန့ၢ် သိတနီၤလၢ အအိၣ်လၢ အစုညါသးအပူၤ ဒီးကဖှူဝဲလၢ ပှၤလၢ အမၤကဆှီထီၣ်အသး တဂၤန့ၣ်​ အနၢ်စဲၤလၢ အနၢ်ထွဲတခီ ဒီးအစုမုၢ်လၢ အထွဲတခီ ဒီးအခီၣ်မုၢ်လၢ အထွဲတခီအလိၤ ဖဲတၢ်လီၢ်တတီၤဃီလၢ အဖှူဝဲ တၢ်သွံၣ်လၢ တၢ်လုၢ်လၢ တၢ်ကမၣ်​ အဂီၢ်န့ၣ်လီၤ. ၂၉ ဝံၤဒီး ပှၤလုၢ်တၢ်ဒိၣ်​ ကဟံးန့ၢ်သိလၢ အအိၣ်တ့ၢ်လၢ အစုညါသးအပူၤ ဒီးကပာ်ထီၣ်ဝဲလၢ ပှၤလၢ အမၤကဆှီထီၣ်​ အသးတဂၤန့ၣ်​ အခိၣ်လိၤ ဒ်သိး ကမၤဘၣ်လိာ်ဖိးဒ့က့ၤတၢ် လၢအဂီၢ် လၢယဟိဝၤယွၤ အမဲာ်ညါလီၤ.

၃၀ “အဝဲကလုၢ်ထီၣ်ဝဲ ထိၣ်လွံၢ်ခံဘ့ၣ်​ မ့တမ့ၢ် ထိၣ်ကးက့ၣ်ဖိခံဘ့ၣ်​ ဒ်အတၢ်အိၣ်ယၢဝဲ အသိးလီၤ.+ ၃၁ တဘ့ၣ်လၢ တၢ်လုၢ်လၢ တၢ်ဒဲးဘးအဂီၢ် ဒီးအဝဲတဘ့ၣ်လၢ တၢ်လုၢ်ဒွဲၣ်အူအဂီၢ်+ ဃုာ်ဒီးတၢ်လုၢ်ဘုလီၤ. ဒီးပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤတၢ်လၢ ပှၤလၢအမၤကဆှီထီၣ်အသး တဂၤန့ၣ်အဂီၢ် လၢယဟိဝၤယွၤ အမဲာ်ညါလီၤ.+

၃၂ “အဝဲန့ၣ်​ မ့ၢ်တၢ်သိၣ်တၢ်သီလၢ ပှၤလၢအအိၣ်ဒီး တၢ်ဆါအၢ ဘၣ်ဆၣ်​ အတၢ်တယၢဘၣ်လၢ အကလုၢ်ထီၣ်တၢ်လၢ ပှၤညီနုၢ် လုၢ်ထီၣ်ဝဲ ဒ်သိး တၢ်ကပာ်ပနီၣ် အဝဲသ့ၣ်လၢ အကဆှီထီၣ်လံ အဂီၢ်လီၤ.”

၃၃ ယဟိဝၤယွၤ တဲဘၣ်​ စီၤမိၤၡ့ ဒီးစီၤအၤဟရိၣ်လၢ ၃၄ “ဖဲသုလဲၤနုာ်လီၤလၢ ကီၢ်ကနၤဧၣ်+ လၢယကဟ့ၣ်လီၤသုဒ် သုတၢ်အသိးအခါ+ ယမ့ၢ်ပျဲလၢ ဟံၣ်တဖျၢၣ်ဖျၢၣ်လၢ သုကီၢ်ပူၤ ဘၣ်တၢ်ဆါအၢန့ၣ်*+ ၃၅ ဟံၣ်ကစၢ် ကဘၣ်လဲၤတဲဘၣ်​ ပှၤလုၢ်တၢ်ဒိၣ်လၢ ‘တၢ်ဆါတခါ ဟဲထီၣ်လၢ ယဟံၣ်ပူၤလံ.’ ၃၆ တချုးလၢ ပှၤလုၢ်တၢ်ဒိၣ်​ လဲၤသမံသမိး တၢ်ဆါတခါအံၤ ဒံးဘၣ်န့ၣ်​ အကမၤလိာ်ဝဲလၢ ပှၤကဘၣ်​ ထုးထီၣ်ကွံာ် တၢ်ခဲလၢာ်လၢ အအိၣ်လၢဟံၣ်ပူၤ ဒ်သိးအသု တဘိးဘၣ်သ့ၣ်ညါဝဲလၢ တၢ်ခဲလၢာ်လၢ အအိၣ်လၢဟံၣ်ပူၤန့ၣ်​ တကဆှီဘၣ်​ တဂ့ၤအဂီၢ်လီၤ. မ့ၢ်ဝံၤဒီး ပှၤလုၢ်တၢ်ဒိၣ်​ ကလဲၤသမံသမိး ဟံၣ်လီၤ. ၃၇ ဒီးအဝဲ ကသမံသမိးဝဲ တၢ်လီၢ်လၢ အအိၣ်ဒီး တၢ်ဆါတခါအံၤလီၤ. ဒီးအဝဲမ့ၢ်ထံၣ်ဘၣ်လၢ ဟံၣ်အဒူၣ်လီၤညၢၣ်​ အိၣ်ဒီး တၢ်လၢအထီၣ်ဘီထီၣ်လါ မ့တမ့ၢ် အထီၣ်ဂီၤ လၢအပူၤန့ၣ်​ ၃၈ ပှၤလုၢ်တၢ်ဒိၣ်​ ကဟးထီၣ်လၢ ဟံၣ်ချၢ ဒီးကကးတံာ်ဃာ် ဟံၣ်တဖျၢၣ်အံၤ နွံသီလီၤ.+

၃၉ “ဝံၤဒီး ဖဲနွံသီတသီန့ၣ်​ ပှၤလုၢ်တၢ်ဒိၣ်​ ကဟဲကဒါက့ၤ ဒီးကသမံသမိးဟံၣ်လီၤ. ဒီးတၢ်ဆါအံၤ မ့ၢ်လဲၢ်ထီၣ်​ လၢဟံၣ်ဒူၣ်အလိၤန့ၣ်​ ၄၀ ပှၤလုၢ်တၢ်ဒိၣ်​ ကမၤလိာ်ဝဲလၢ တၢ်ဒူၣ်အလၢၢ်လၢ တၢ်ဆါဘၣ်အီၤန့ၣ်​ ပှၤကဘၣ်​ ထုးထီၣ်ကွံာ်အီၤ ဒီးလဲၤတၢၤကွံာ်အီၤလၢ ဝ့ၢ်ချၢလၢ တၢ်လီၢ်လၢ အတကဆှီဘၣ်န့ၣ်လီၤ. ၄၁ ဝံၤဒီး အကမၢပှၤကွးဝဲ ဟံၣ်ဒူၣ်ကပၤစီစီ ဒီးကပံာ်ဒီး ဘံလၣ်မၠ့ၤ လၢပှၤထုးထီၣ်ကွံာ်ဝဲတဖၣ်န့ၣ်​ ကဘၣ်​ တၢ်လဲၤတၢၤကွံာ်အီၤလၢ ဝ့ၢ်ချၢလၢ တၢ်လီၢ်လၢ အတကဆှီဘၣ်လီၤ. ၄၂ ဒီးအဝဲသ့ၣ်​ ကပာ်လီၤက့ၤ လၢၢ်အဂၤတဖၣ်လၢ လၢၢ်လၢ ပှၤထုးထီၣ်ကွံာ်ဝဲတဖၣ်​ အလီၢ် ဒီးအကဘၣ်သူဝဲ ကပံာ်လၢအဂၤ ဒ်သိးကဖှူထီၣ်​ အဟံၣ်အဂီၢ်န့ၣ်လီၤ.

၄၃ “ဘၣ်ဆၣ်​ ဖဲပှၤထုးထီၣ်ကွံာ် လၢၢ်တဖၣ်, ကွးဟံၣ်အဒူၣ်ကပၤ ဒီးပှၤက့ၤဖှူထီၣ်က့ၤဟံၣ်​ ဝံၤအလီၢ်ခံ တၢ်ဆါတခါအံၤ မ့ၢ်က့ၤကဲထီၣ်ကဒီးဒံးန့ၣ်​ ၄၄ ပှၤလုၢ်တၢ်ဒိၣ်​ ကဘၣ်လဲၤ သမံသမိးဝဲလီၤ. ဒီးတၢ်ဆါတခါအံၤ မ့ၢ်အါထီၣ်လၢ ဟံၣ်ပူၤန့ၣ်​ အမ့ၢ်ဝဲ တၢ်ဆါအၢလၢဟံၣ်ပူၤ လၢအမၤဘၣ်ဒိဘၣ်ထံးတၢ် တကလုာ်အဃိ+ ဟံၣ်တဖျၢၣ်အံၤ တကဆှီလၢၤဘၣ်. ၄၅ ဒီးအဝဲကမၢ ပှၤမၤလီၤပှီၢ်ဟံၣ်​ အလၢၢ်, အသ့ၣ်ဘ့ၣ်ဘၣ်, အကပံာ် ဒီးအဘံလၣ်မၠ့ၤခဲလၢာ် ဒီးလဲၤစိာ် တၢ်သ့ၣ်တဖၣ်န့ၣ်​ လၢဝ့ၢ်ချၢလၢ တၢ်လီၢ်လၢ အတကဆှီဘၣ်လီၤ.+ ၄၆ ဒီးဖဲဟံၣ်ဘၣ်တၢ် ကးတံာ်ဃာ်အီၤအခါ+ ပှၤတဂၤဂ့ၤတဂၤဂ့ၤ မ့ၢ်လဲၤနုာ်လၢ ဟံၣ်တဖျၢၣ်န့ၣ်အပူၤန့ၣ်​ အဝဲတကဆှီလၢၤဘၣ်​ တုၤလၢ ဟါလီၤခီလီၤ.+ ၄၇ ဒီးပှၤတဂၤဂ့ၤတဂၤဂ့ၤ လၢအမံနီၤလၢ ဟံၣ်တဖျၢၣ်န့ၣ်​ အပူၤန့ၣ်​ အကဘၣ်ဆှုၣ်​ အတၢ်ကူတၢ်ကၤ ဒီးပှၤတဂၤဂ့ၤတဂၤဂ့ၤ လၢအအီၣ်တၢ်လၢ ဟံၣ်တဖျၢၣ်န့ၣ်​ အပူၤန့ၣ်​ အကဘၣ်ဆှုၣ်​ အတၢ်ကူတၢ်ကၤလီၤ.

၄၈ “ဘၣ်ဆၣ်​ ဖဲပှၤဖှူထီၣ်က့ၤ ဟံၣ်တဖျၢၣ်အံၤ ဝံၤအလီၢ်ခံ ပှၤလုၢ်တၢ်ဒိၣ်​ မ့ၢ်ဟဲထံၣ်ဝဲလၢ တၢ်ဆါတခါအံၤ တအါထီၣ်ဝဲလၢ ဟံၣ်ပူၤလၢၤဘၣ်န့ၣ်​ ခီဖျိလၢ တၢ်ဆါအံၤ လီၤမၢ်ဝဲလံအဃိ ပှၤလုၢ်တၢ်ဒိၣ်​ ကဘိးဘၣ်သ့ၣ်ညါဝဲလၢ ဟံၣ်တဖျၢၣ်အံၤ ကဆှီဝဲလီၤ. ၄၉ ဒ်သိး ကမၤကဆှီထီၣ်က့ၤ ဟံၣ်လၢ တၢ်တကဆှီဘၣ်အဂီၢ် အဝဲကဘၣ်ဟံးန့ၢ် ထိၣ်ခံဘ့ၣ်, သ့ၣ်ဆှိအ့ရ့း, တၢ်ဂီၤဆှုၣ်ကလာ် ဒီးကဖျီၣ်အ့စိးလီၤ.+ ၅၀ အဝဲ ကဘၣ်မၤသံဝဲ ထိၣ်တဘ့ၣ်လၢ ထံဆှံလၢအအိၣ်လၢ သပၢၤဟီၣ်ခိၣ်အပူၤ အဖီခိၣ်လီၤ. ၅၁ ဒီးအဝဲ ကဟံးန့ၢ် သ့ၣ်ဆှိအ့ရ့း, ကဖျီၣ်အ့စိး, တၢ်ဂီၤဆှုၣ်ကလာ် ဒီးထိၣ်လၢအမူတဘ့ၣ်လီၤ. ဒီးအဝဲ ကဘျၢလီၤ တၢ်သ့ၣ်တဖၣ်အံၤလၢ ထိၣ်လၢအဘၣ်​ တၢ်မၤသံအီၤတဘ့ၣ်​ အသွံၣ်လၢအအိၣ်လၢ ထံဆှံအကျါ ဝံၤဒီးအဝဲကဘၣ်ဖှံဝဲ ဟံၣ်တဖျၢၣ်အံၤ နွံဘျီလီၤ.+ ၅၂ အဝဲ ကသူဝဲ ထိၣ်အသွံၣ်, ထံဆှံ, ထိၣ်လၢအမူ, သ့ၣ်ဆှိအ့ရ့း, ကဖျီၣ်အ့စိး ဒီးတၢ်ဂီၤဆှုၣ်ကလာ် ဒ်သိး ကမၤကဆှီထီၣ်က့ၤ ဟံၣ်လၢ တၢ်တကဆှီဘၣ်​ အဂီၢ်လီၤ. ၅၃ ဝံၤဒီးအဝဲ ကပျၢ်လီၤဝဲ ထိၣ်လၢ အမူဝဲတဘ့ၣ်န့ၣ်​ လၢဝ့ၢ်ချၢ လၢတၢ်ပျီပူၤ ဒီးမၤဘၣ်လိာ်ဖိးဒ့က့ၤတၢ် လၢဟံၣ်အဂီၢ် ဒီးဟံၣ်န့ၣ်​ ကကဆှီထီၣ်ဝဲလီၤ.

၅၄ “အဝဲန့ၣ်မ့ၢ် တၢ်သိၣ်တၢ်သီလၢ ဘၣ်ဃးဒီး တၢ်ဆါအၢ တမံၤဂ့ၤတမံၤဂ့ၤ, တၢ်ဆါလၢ အဟဲအိၣ်ထီၣ်လၢ ခိၣ်ဘ့ၣ်လိၤ မ့တမ့ၢ် ခၣ်ဆူၣ်,+ ၅၅ တၢ်ဆါအၢလၢ အဟဲအိၣ်ထီၣ်လၢ တၢ်ကူတၢ်ကၤအလိၤ+ မ့တမ့ၢ် လၢဟံၣ်ပူၤ+ ၅၆ ဒီးဘၣ်ဃးဒီး တၢ်လၢအညိးထီၣ်မ့ၢ်ဂ့ၤ, တၢ်ပူၤလီၢ် ကိၢ်ဃ့မ့ၢ်ဂ့ၤ, တၢ်အကဝီၤဖိ လၢဘ့ၣ်လိၤ မ့ၢ်ဂ့ၤန့ၣ်လီၤ.+ ၅၇ တၢ်သိၣ်တၢ်သီလၢ အဘၣ်ဃးဒီး တၢ်ဆါအၢအံၤန့ၣ်+ မ့ၢ်ဒ်သိး ပှၤကသ့ၣ်ညါ တၢ်လၢ အတကဆှီဘၣ်​ ဒီးတၢ်လၢ အကဆှီလီၤ.”+

၁၅ ယဟိဝၤယွၤ ဆဲးတဲစီၤမိၤၡ့ ဒီးစီၤအၤဟရိၣ်လၢ ၂ “တဲဘၣ်​ ပှၤအံၣ်စရ့လးဖိတဖၣ်လၢ ‘တၢ်ဆါအထံ မ့ၢ်ဟးထီၣ်လၢ ပိာ်ခွါတဂၤ အတၢ်န့ၣ်​ အဝဲ တကဆှီဘၣ်လၢ တၢ်ဆါအထံအံၤ အဃိလီၤ.+ ၃ ဒီးတၢ်ဆါအထံအံၤ မ့ၢ်ဆဲးဟးထီၣ်လၢ အတၢ်မ့ၢ်ဂ့ၤ, အတၢ်မ့ၢ်ပံးအသး ခီဖျိ တၢ်ဆါအထံအံၤ အဃိမ့ၢ်ဂ့ၤ အဝဲ တကဆှီလၢၤဘၣ်.

၄ “‘လီၢ်မံတခါဂ့ၤတခါဂ့ၤ လၢပှၤလၢအအိၣ်ဒီး တၢ်ဆါတခါအံၤ မံနီၤဝဲလၢအလိၤ ဒီးတၢ်တမံၤဂ့ၤတမံၤဂ့ၤ လၢအဆ့ၣ်နီၤဝဲလၢ အဖီခိၣ်န့ၣ်​ တကဆှီလၢၤဘၣ်. ၅ ပှၤပိာ်ခွါတဂၤ လၢအထိးဘၣ်ဝဲ ပှၤတဂၤန့ၣ်​ အလီၢ်မံန့ၣ်​ ကဘၣ်ဆှုၣ်​ အတၢ်ကူတၢ်ကၤ ဒီးကဘၣ်လုၢ်ထံ ဒီးအတကဆှီဘၣ်​ တုၤလၢ ဟါလီၤခီလီၤ.+ ၆ ပှၤတဂၤဂၤ မ့ၢ်ဆ့ၣ်နီၤဘၣ်ဝဲလၢ တၢ်တမံၤမံၤလၢ ပှၤလၢအအိၣ်ဒီး တၢ်ဆါတခါအံၤ ဆ့ၣ်နီၤဝဲလၢ အဖီခိၣ်န့ၣ်​ အဝဲကဘၣ်ဆှုၣ်​ အကူအကၤ ဒီးကဘၣ်လုၢ်ထံ ဒီးကကဲထီၣ်ပှၤလၢ အတကဆှီဘၣ်​ တုၤလၢ ဟါလီၤခီလီၤ. ၇ ပှၤတဂၤဂ့ၤတဂၤဂ့ၤ လၢအထိးဘၣ်ဝဲ ပှၤလၢအအိၣ်ဒီး တၢ်ဆါတခါအံၤန့ၣ်​ ကဘၣ်ဆှုၣ်​ အကူအကၤ ဒီးကဘၣ်လုၢ်ထံ ဒီးကကဲထီၣ်ပှၤလၢ အတကဆှီဘၣ်​ တုၤလၢ ဟါလီၤခီလီၤ. ၈ ပှၤလၢ အအိၣ်ဒီးတၢ်ဆါတခါအံၤ မ့ၢ်ထူးပှဲာ်ဘၣ်​ ပှၤလၢအကဆှီတဂၤန့ၣ်​ ပှၤလၢအကဆှီတဂၤအံၤ ကဘၣ်ဆှုၣ်​ အကူအကၤ ဒီးကဘၣ်လုၢ်ထံ ဒီးကကဲထီၣ်ပှၤလၢ အတကဆှီဘၣ်​ တုၤလၢ ဟါလီၤခီလီၤ. ၉ ဂီၤကၢ် လၢပှၤလၢအအိၣ်ဒီး တၢ်ဆါတခါအံၤ ဆ့ၣ်နီၤဝဲလၢ အလိၤန့ၣ်​ တကဆှီလၢၤဘၣ်. ၁၀ ပှၤတဂၤဂၤလၢ အထိးဘၣ်ဝဲ တၢ်ဖိတၢ်လံၤလၢအဝဲ ဆ့ၣ်နီၤဘၣ်ဝဲ တမံၤဂ့ၤ တမံၤဂ့ၤန့ၣ်​ တကဆှီလၢၤဘၣ်​ တုၤလၢ ဟါလီၤခီလီၤ. ဒီးပှၤတဂၤဂၤလၢ အစိာ်ဝဲ တၢ်ဖိတၢ်လံၤတဖၣ်န့ၣ်​ ကဘၣ်ဆှုၣ်​ အကူအကၤ ဒီးကဘၣ်လုၢ်ထံ ဒီးကကဲထီၣ်ပှၤလၢ အတကဆှီဘၣ်​ တုၤလၢ ဟါလီၤခီလီၤ. ၁၁ ပှၤလၢအအိၣ်ဒီး တၢ်ဆါတခါအံၤ+ မ့ၢ်တသ့အစု လၢထံဘၣ်​ ဒီးမ့ၢ်ထိးဝဲ ပှၤတဂၤဂၤန့ၣ်​ ပှၤလၢအဘၣ်​ တၢ်ထိးအီၤတဂၤအံၤ ကဘၣ်ဆှုၣ်​ အကူအကၤ ဒီးကဘၣ်လုၢ်ထံ ဒီးကကဲထီၣ်ပှၤလၢ အတကဆှီဘၣ်​ တုၤလၢ ဟါလီၤခီလီၤ. ၁၂ သပၢၤဟီၣ်ခိၣ်လၢ ပှၤလၢအအိၣ်ဒီး တၢ်ဆါတခါအံၤ ထိးဘၣ်ဝဲန့ၣ်​ ကဘၣ်​ တၢ်မၤသ့ၣ်ဖးအီၤလီၤ. မ့မ့ၢ် သပၢၤသ့ၣ်န့ၣ်​ တၢ်ကဘၣ်သ့အီၤလၢ ထံလီၤ.+

၁၃ “‘ပှၤတဂၤအံၤ အတၢ်ဆါအထံ မ့ၢ်တဟးထီၣ်လၢၤဘၣ်​ ဒီးအတၢ်ဆါဘျါဝဲဝံၤ မ့ၢ်အိၣ်နွံသီ အလီၢ်ခံန့ၣ်​ အဝဲကဘၣ်ဆှုၣ်​ အကူအကၤ ဒီးကဘၣ်လုၢ်ထံဆှံ ဒီးကကဲထီၣ်ပှၤလၢ အကဆှီလီၤ.+ ၁၄ ဖဲဃိးသီတသီန့ၣ်  အဝဲကဘၣ်လဲၤစိာ်ဝဲ ထိၣ်လွံၢ်ခံဘ့ၣ်​ မ့တမ့ၢ် ထိၣ်ကးက့ၣ်ဖိခံဘ့ၣ်+ လၢယဟိဝၤယွၤ အမဲာ်ညါ လၢတၢ်အိၣ်ဖှိၣ်အဒဲ အတၢ်နုာ်လီၤအလီၢ် ဒီးကဘၣ်ဟ့ၣ်လီၤဝဲ ပှၤလုၢ်တၢ်ဒိၣ်လီၤ. ၁၅ ဒီးပှၤလုၢ်တၢ်ဒိၣ်​ ကလုၢ်ထီၣ်ဝဲ ထိၣ်တဖၣ်န့ၣ်လီၤ. တဘ့ၣ်လၢ တၢ်လုၢ်လၢ တၢ်ဒဲးဘးအဂီၢ် ဒီးအဝဲတဘ့ၣ်လၢ တၢ်လုၢ်ဒွဲၣ်အူ အဂီၢ်လီၤ. ဘၣ်ဃးဒီး တၢ်ဆါအံၤန့ၣ်​ ပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤတၢ် လၢအဂီၢ် လၢယဟိဝၤယွၤ အမဲာ်ညါလီၤ.

၁၆ “‘ပိာ်ခွါတဂၤ အချံအသၣ်အထံ မ့ၢ်ဟးထီၣ်န့ၣ်​ အဝဲကဘၣ်လုၢ်ထံ ဒီတဂၤညါ ဒီးကကဲထီၣ်ပှၤလၢ အတကဆှီဘၣ်​ တုၤလၢ ဟါလီၤခီလီၤ.+ ၁၇ ဒီးကယဲၢ်တၢ်ကူတၢ်ကၤ မ့တမ့ၢ် တၢ်လၢပှၤတ့အီၤလၢ ဆၣ်ဖိကီၢ်ဖိအဘ့ၣ်​ လၢပှၤပိာ်ခွါ အချံအသၣ်အထံ ဘၣ်အီၤန့ၣ်​ အဝဲ ကဘၣ်ဆှုၣ်အီၤလၢထံ ဒီးအကကဲထီၣ်​ တၢ်လၢ အတကဆှီဘၣ်​ တုၤလၢ ဟါလီၤခီလီၤ.

၁၈ “‘ပိာ်ခွါတဂၤ မ့ၢ်မံဃုာ်ဒီး ပိာ်မုၣ်တဂၤ ဒီးအချံအသၣ်အထံ မ့ၢ်ဟးထီၣ်န့ၣ်​ အဝဲသ့ၣ်​ ကဘၣ်လုၢ်ထံ ဒီးအဝဲသ့ၣ်​ ကကဲထီၣ်​ ပှၤလၢ အတကဆှီဘၣ်​ တုၤလၢ ဟါလီၤခီလီၤ.+

၁၉ “‘ပိာ်မုၣ်တဂၤ အသွံၣ်မ့ၢ်လီၤ ခီဖျိလၢ အလုၢ်အလၢ် ဟဲအဃိန့ၣ်​ အဝဲကကဲထီၣ်​ ပှၤလၢအတကဆှီဘၣ်​ နွံသီလီၤ.+ ဒီးပှၤတဂၤဂၤလၢ အထိးဘၣ်အီၤန့ၣ်​ တကဆှီဘၣ်​ တုၤလၢ ဟါလီၤခီလီၤ.+ ၂၀ ဖဲအလုၢ်အလၢ်ဟဲအခါ တၢ်တမံၤဂ့ၤတမံၤဂ့ၤ လၢအဝဲ မံနီၤဝဲလၢအလိၤ ဒီးတၢ်တမံၤဂ့ၤတမံၤဂ့ၤ လၢအဝဲ ဆ့ၣ်နီၤဝဲ လၢအလိၤန့ၣ်​ တကဆှီဘၣ်.+ ၂၁ ပှၤတဂၤဂၤလၢ အထိးဘၣ်​ အဝဲ အလီၢ်မံန့ၣ်​ ကဘၣ်ဆှုၣ်​ အကူအကၤ ဒီးကဘၣ်လုၢ်ထံ ဒီးကကဲထီၣ်ပှၤလၢ အတကဆှီဘၣ်​ တုၤလၢ ဟါလီၤခီလီၤ. ၂၂ ပှၤတဂၤဂၤ လၢအထိးဘၣ်ဝဲ တၢ်တမံၤမံၤလၢ ပိာ်မုၣ်တဂၤအံၤ ဆ့ၣ်နီၤဝဲလၢ အလိၤန့ၣ်​ ကဘၣ်ဆှုၣ်​ အကူအကၤ ဒီးကဘၣ်လုၢ်ထံ ဒီးကကဲထီၣ်ပှၤလၢ အတကဆှီဘၣ်​ တုၤလၢ ဟါလီၤခီလီၤ. ၂၃ အဝဲ မ့ၢ်ဆ့ၣ်နီၤလၢ လီၢ်မံခိၣ်မ့ၢ်ဂ့ၤ, တၢ်တမံၤမံၤ အဖီခိၣ်မ့ၢ်ဂ့ၤ, ပိာ်ခွါတဂၤ မ့ၢ်လဲၤထိးဘၣ်ဝဲန့ၣ်​ ပိာ်ခွါတဂၤအံၤ ကကဲထီၣ်​ ပှၤလၢအတကဆှီဘၣ်​ တုၤလၢ ဟါလီၤခီလီၤ.+ ၂၄ ဒီးပိာ်ခွါတဂၤ မ့ၢ်မံဃုာ်ဒီး ပိာ်မုၣ်တဂၤအံၤ ဒီးပိာ်မုၣ်အလုၢ်အလၢ် မ့ၢ်ဟဲလီၤဘၣ်လၢ ပိာ်ခွါအံၤအလိၤန့ၣ်+ ပိာ်ခွါတဂၤအံၤ ကကဲထီၣ်​ ပှၤလၢ အတကဆှီဘၣ်​ နွံသီလီၤ. ဒီးလီၢ်မံတခါဂ့ၤ တခါဂ့ၤလၢ ပိာ်ခွါတဂၤအံၤ မံနီၤဝဲလၢ အဖီခိၣ်န့ၣ်​ ကကဲထီၣ်တၢ်လၢ အတကဆှီဘၣ်လီၤ.

၂၅ “‘ပိာ်မုၣ်တဂၤ အသွံၣ်မ့ၢ်ဟဲလီၤ အါသီ+ လၢအတဘၣ်ဖဲ အလုၢ်အလၢ် ဟဲညီနုၢ် အဆၢကတီၢ်ဘၣ်+ မ့တမ့ၢ် အသွံၣ်​ မ့ၢ်ဟဲယံာ်န့ၢ်ဒံး ဒ်အလုၢ်အလၢ် ဟဲညီနုၢ်အသိးန့ၣ်​ ဖဲအသွံၣ်ဟဲ ဒီတကတီၢ်အခါ အဝဲ ကကဲထီၣ်​ ပှၤလၢ အတကဆှီဘၣ်​ ဒ်ဆၢကတီၢ်ဖဲ အလုၢ်အလၢ် ဟဲအသိးလီၤ. ၂၆ ဖဲပိာ်မုၣ်အံၤ အသွံၣ်လီၤ အဆၢကတီၢ် လီၢ်မံတခါဂ့ၤတခါဂ့ၤ လၢအဝဲမံလီၤဝဲ လၢအလိၤ ဒီးတၢ်တမံၤဂ့ၤတမံၤဂ့ၤ လၢအဝဲဆ့ၣ်နီၤဝဲ လၢအလိၤန့ၣ်​ တကဆှီဘၣ်+ ဒ်လီၢ်မံလၢ အဝဲမံနီၤဝဲ ဒီးတၢ်တမံၤဂ့ၤတမံၤဂ့ၤ လၢအဆ့ၣ်နီၤဝဲ ဖဲအလုၢ်အလၢ်ဟဲ အဆၢကတီၢ်န့ၣ်လီၤ. ၂၇ ပှၤတဂၤဂ့ၤတဂၤဂ့ၤ လၢအထိးဘၣ်ဝဲ တၢ်သ့ၣ်တဖၣ်န့ၣ်​ တကဆှီဘၣ်​ ဒီးကဘၣ်ဆှုၣ်​ အကူအကၤ ဒီးကဘၣ်လုၢ်ထံ ဒီးကကဲထီၣ်ပှၤလၢ အတကဆှီဘၣ်​ တုၤလၢ ဟါလီၤခီလီၤ.+

၂၈ “‘ပိာ်မုၣ်တဂၤအံၤ အသွံၣ်မ့ၢ်တဟဲလီၤလၢၤဘၣ်​ နွံသီဝံၤအလီၢ်ခံန့ၣ်​ အဝဲကကဆှီဝဲလီၤ.+ ၂၉ ဒီးဖဲဃိးသီတသီန့ၣ်​ အဝဲကဘၣ်လဲၤစိာ်ဝဲ ထိၣ်လွံၢ်ခံဘ့ၣ်​ မ့တမ့ၢ် ထိၣ်ကးက့ၣ်ဖိ ခံဘ့ၣ်+ ဒီးအဝဲကဘၣ်​ ဟ့ၣ်လီၤဝဲ ပှၤလုၢ်တၢ်ဒိၣ်​ လၢတၢ်အိၣ်ဖှိၣ်အဒဲ အတၢ်နုာ်လီၤ အလီၢ်လီၤ.+ ၃၀ ဒီးတဘ့ၣ်န့ၣ်​ ပှၤလုၢ်တၢ်ဒိၣ်​ ကလုၢ်ထီၣ်ဝဲလၢ တၢ်လုၢ်လၢ တၢ်ဒဲးဘးအဂီၢ် ဒီးအဝဲတဘ့ၣ်လၢ တၢ်လုၢ်ဒွဲၣ်အူအဂီၢ်လီၤ. ခီဖျိတၢ်လၢ အတကဆှီဘၣ်လၢ အဟးထီၣ်လၢ ပိာ်မုၣ်တဂၤအံၤ အလိၤအဃိန့ၣ်​ ပှၤလုၢ်တၢ်ဒိၣ်​ ကမၤဘၣ်လိာ်ဖိးဒ့က့ၤတၢ် လၢအဂီၢ် လၢယဟိဝၤယွၤ အမဲာ်ညါလီၤ.+

၃၁ “‘အဃိ သုကဘၣ်မၤစၢၤ ပှၤအံၣ်စရ့လးဖိ ဒ်သိး အဝဲသ့ၣ်​ ကကဆှီအဂီၢ် ဒီးဒ်သိး အသုတသံ ခီဖျိလၢ အမၤဘၣ်အၢ ယဒဲစီဆှံ လၢအအိၣ်လၢ အဝဲသ့ၣ်အကျါ အဃိတဂ့ၤလီၤ.+

၃၂ “‘အဝဲန့ၣ်​ မ့ၢ်တၢ်သိၣ်တၢ်သီလၢ အဘၣ်ဃးဒီး ပိာ်ခွါလၢ တၢ်ဆါအထံ ဟးထီၣ်လၢအလိၤ, ပိာ်ခွါလၢ အတကဆှီဘၣ်​ ခီဖျိလၢ အချံအသၣ်အထံ ဟးထီၣ်,+ ၃၃ ပိာ်မုၣ်​ ဖဲအလုၢ်အလၢ်ဟဲ အဆၢကတီၢ်,+ ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤလၢ တၢ်ဆါအထံ ဟးထီၣ်လၢအလိၤ+ ဒီးပိာ်ခွါလၢ အမံဃုာ်ဒီး ပိာ်မုၣ်လၢ အတကဆှီဘၣ်န့ၣ်လီၤ.’”

၁၆ ဖဲစီၤအၤဟရိၣ်​ အဖိခွါခံဂၤသံဝဲ ခီဖျိလၢ အဝဲသ့ၣ်​ ဟဲဘူးထီၣ်ဒီး ယဟိဝၤယွၤအဃိ+ ဝံၤအလီၢ်ခံ ယဟိဝၤယွၤ တဲတၢ်ဒီး စီၤမိၤၡ့ ၂ ဒီးယဟိဝၤယွၤ တဲဘၣ်စီၤမိၤၡ့လၢ “ယကလီၣ်ဖျါထီၣ်ယသး လၢတလါစီဆှံ အခိၣ်ကျး အဖီခိၣ်လၢ+ တၢ်အၢၣ်အပူၤလီၤ.+ အဃိ ဒ်သိး နဒီပုၢ်ဝဲၢ်ခွါ စီၤအၤဟရိၣ်​ သုတသံ တဂ့ၤအဂီၢ်+ တဲဘၣ်အီၤလၢ အဝဲ လဲၤနုာ်လီၤလၢ တၢ်လီၢ်စီဆှံကတၢၢ်တဒၢးလၢ+ အအိၣ်လၢ ယၣ်ဘျးသဒၢ အလီၢ်ခံလၢ+ တလါစီဆှံ အခိၣ်ကျး အမဲာ်ညါ တသ့ ကိးဆၢကတီၢ်ဒဲးဘၣ်.

၃ “ဖဲစီၤအၤဟရိၣ်​ ဟဲနုာ်လီၤလၢ တၢ်စီဆှံ အလီၢ်အခါ အဝဲ ကဘၣ်ဟဲမူၤဝဲ ကျီၢ်ဖါတဒု လၢတၢ်လုၢ်လၢ တၢ်ဒဲးဘးအဂီၢ်+ ဒီးသိဖါတဒုလၢ တၢ်လုၢ်ဒွဲၣ်အူ အဂီၢ်လီၤ.+ ၄ အဝဲ ကဘၣ်ကူထီၣ်ကၤထီၣ်​ ဆ့ဖးထီ စီဆှံလၢ အညၣ်ဂ့ၤတဘ့ၣ်,+ ဖျီၣ်ခံဖုၣ်ခီၣ်​ လၢအညၣ်ဂ့ၤ+ ဒီးအဝဲဘၣ်စၢထီၣ်​ ယီၢ်တကိးလၢ အညၣ်ဂ့ၤလၢ ဆ့ဖးထီအဂီၢ်+ ဒီးဖၢၣ်အခိၣ်လၢ ခိၣ်ဖၢၣ်လီၤဆီလၢ အညၣ်ဂ့ၤ တဘ့ၣ်န့ၣ်လီၤ.+ တၢ်သ့ၣ်တဖၣ်န့ၣ်​ မ့ၢ်တၢ်ကူတၢ်သိး စီဆှံလီၤ.+ အဃိ အဝဲ ကဘၣ်လုၢ်ထံ+ ဝံၤဒီးကူထီၣ်ကၤထီၣ်ဝဲလီၤ.

၅ “လၢပှၤအံၣ်စရ့လးဖိ ဒီတဖုအအိၣ်န့ၣ်​ အဝဲကဘၣ်ဟံးန့ၢ်ဝဲ မဲာ်တဲးလဲးဖါဖိခံဒု လၢတၢ်လုၢ်လၢ တၢ်ဒဲးဘးအဂီၢ် ဒီးသိဖါတဒု လၢတၢ်လုၢ်ဒွဲၣ်အူ အဂီၢ်လီၤ.+

၆ “ကျီၢ်ဖါလၢ အမ့ၢ် တၢ်လုၢ်လၢ အနီၢ်ကစၢ် အတၢ်ဒဲးဘးအဂီၢ်န့ၣ်​ စီၤအၤဟရိၣ်​ ကဘၣ်လဲၤမူၤဘူးထီၣ်ဝဲ ဒီးအဝဲ ကဘၣ်မၤ ဘၣ်လိာ်ဖိးဒ့က့ၤတၢ်လၢ အနီၢ်ကစၢ်+ ဒီးအဒူၣ်ဖိထၢဖိ* အဂီၢ်လီၤ.

၇ “ဒီးအဝဲ ကဟံးန့ၢ်ဝဲ မဲာ်တဲးလဲးခံဒု ဒီးကဒုးဆၢထၢၣ်ဝဲ လၢယဟိဝၤယွၤ အမဲာ်ညါ လၢတၢ်အိၣ်ဖှိၣ်အဒဲ အတၢ်နုာ်လီၤ အလီၢ်လီၤ. ၈ ဒီးစီၤအၤဟရိၣ်​ ကဘၣ်ဖးတၢ် ဘၣ်ဃးဒီး မဲာ်တဲးလဲး ခံဒုအံၤ ဒီးတဒုန့ၣ်​ ကမ့ၢ်ဝဲလၢ ယဟိဝၤယွၤအဂီၢ် ဒီးအဝဲတဒုန့ၣ်​ လၢဧ့စ့ၤစ့လး* အဂီၢ်လီၤ. ၉ ဒီးမဲာ်တဲးလဲး တဒုလၢ တၢ်ဖးလီၤဘၣ်အီၤ+ လၢယဟိဝၤယွၤ အဂီၢ်န့ၣ်​ စီၤအၤဟရိၣ်​ ကလဲၤမူၤဘူးထီၣ်အီၤ ဒီးကပာ်ပနီၣ်အီၤလၢ တၢ်လုၢ်လၢ တၢ်ဒဲးဘး အဂီၢ်လီၤ. ၁၀ မ့မ့ၢ် မဲာ်တဲးလဲးလၢ တၢ်ဖးလီၤဘၣ်အီၤလၢ ဧ့စ့ၤစ့လး အဂီၢ်န့ၣ်​ ကဘၣ်​ တၢ်ပာ်မူဒံးအီၤလၢ ယဟိဝၤယွၤ အမဲာ်ညါ ဒ်သိး တၢ်ကသူအီၤလၢ တၢ်မၤဘၣ်လိာ်ဖိးဒ့က့ၤတၢ်အဂီၢ် ဒီးကပျၢ်လီၤအီၤလၢ ပှၢ်မုၢ်ကနၢအပူၤလၢ ဧ့စ့ၤစ့လး အဂီၢ်လီၤ.+

၁၁ “ကျီၢ်ဖါလၢ အမ့ၢ် တၢ်လုၢ်လၢ အနီၢ်ကစၢ် အတၢ်ဒဲးဘးအဂီၢ်န့ၣ်​ စီၤအၤဟရိၣ်​ ကဘၣ်လဲၤမူၤဘူးထီၣ်ဝဲ ဒီးအဝဲ ကဘၣ်မၤ ဘၣ်လိာ်ဖိးဒ့က့ၤတၢ်လၢ အနီၢ်ကစၢ် ဒီးအဒူၣ်ဖိထၢဖိ အဂီၢ်လီၤ. ဒီးကျီၢ်ဖါလၢ အမ့ၢ်တၢ်လုၢ်လၢ အနီၢ်ကစၢ် အတၢ်ဒဲးဘးအဂီၢ်န့ၣ်​ အဝဲ ကမၤသံဝဲလီၤ.+

၁၂ “ဝံၤဒီး အဝဲကဘၣ်ဟံးန့ၢ် တၢ်စိာ်မ့ၣ်အူအ့ၣ်အခွး,+ မၤပှဲၤအီၤဒီး မ့ၣ်အူအ့ၣ်လၢ အအိၣ်လၢ တၢ်လုၢ်လီၢ်လၢ+ ယဟိဝၤယွၤ အမဲာ်ညါ ဒီးကဘၣ်ဟံးန့ၢ် တၢ်နၢမူခံစှီၤလီၤ.+ ဒီးအကဘၣ်​ လဲၤစိာ်နုာ်ဝဲလၢ ယၣ်ဘျးသဒၢ အလီၢ်ခံလီၤ.+ ၁၃ ဒီးဒ်သိး အသုတသံတဂ့ၤအဂီၢ် အဝဲ ကပာ်တၢ်နၢမူလၢ မ့ၣ်အူအ့ၣ်​ အဖီခိၣ်လၢ ယဟိဝၤယွၤ အမဲာ်ညါ+ ဒီးတၢ်နၢမူ အခုၣ်ကကျၢၢ်ဘၢဝဲ တလါစီဆှံ အခိၣ်ကျးလီၤ.+

၁၄ “အဝဲကဟံးန့ၢ်ဝဲ ကျီၢ်ဖါ အသွံၣ်တနီၤ+ ဒီးကဖှံဝဲ တၢ်သွံၣ်အံၤ လၢအစုနၢ လၢတလါစီဆှံ အခိၣ်ကျး အမဲာ်ညါလၢ မုၢ်ထီၣ်တကပၤလီၤ. အဝဲ ကဖှံဝဲ တၢ်သွံၣ်တနီၤလၢ အစုနၢ လၢတလါ အခိၣ်ကျး အမဲာ်ညါ နွံဘျီလီၤ.+

၁၅ “ဝံၤဒီး မဲာ်တဲးလဲးလၢ အမ့ၢ် တၢ်လုၢ်လၢ ပှၤဂီၢ်မုၢ်တဖၣ်​ အတၢ်ဒဲးဘး အဂီၢ်န့ၣ်+ အဝဲကမၤသံဝဲ ဒီးကလဲၤစိာ်နုာ်ဝဲ အသွံၣ်လၢ ယၣ်ဘျးသဒၢ အလီၢ်ခံ+ ဒီးကမၤဝဲ တၢ်သွံၣ်အံၤ+ ဒ်သိး အမၤဝဲ ကျီၢ်ဖါအသွံၣ်အသိး အဃိ ကဖှံဝဲလၢ တလါ အခိၣ်ကျး အမဲာ်ညါလီၤ.

၁၆ “ဒီးအဝဲ ကဘၣ်​ မၤဘၣ်လိာ်ဖိးဒ့က့ၤတၢ်လၢ တၢ်လီၢ်စီဆှံကတၢၢ်အဂီၢ် ခီဖျိလၢ ပှၤအံၣ်စရ့လးဖိတဖၣ်​ တကဆှီဘၣ်​ ဒီးလၢအဝဲသ့ၣ်​ အတၢ်ကမၣ်​ ဒီးတၢ်ဒဲးဘး အဃိလီၤ.+ ဒီးအဝဲ ကဘၣ်မၤဒ်န့ၣ်​ လၢတၢ်အိၣ်ဖှိၣ်အဒဲအဂီၢ် မ့ၢ်လၢ ဒဲအံၤအိၣ်ဝဲလၢ ပှၤအံၣ်စရ့လးဖိလၢ အတကဆှီဘၣ်တဖၣ်​ အကျါလီၤ.

၁၇ “စးထီၣ်ဖဲ စီၤအၤဟရိၣ်​ လဲၤနုာ်လီၤဝဲလၢ တၢ်လီၢ်စီဆှံကတၢၢ် ဒ်သိး ကမၤဘၣ်လိာ်ဖိးဒ့က့ၤတၢ်အဂီၢ် ဒီးတုၤလီၤလၢ အဟဲက့ၤထီၣ်န့ၣ်​ ပှၤတဘၣ်အိၣ်လၢ တၢ်အိၣ်ဖှိၣ်​ အဒဲပူၤ နီတဂၤဘၣ်. စီၤအၤဟရိၣ်​ ကမၤဘၣ်လိာ်ဖိးဒ့က့ၤတၢ်လၢ အနီၢ်ကစၢ်+ ဒီးအဒူၣ်ဖိထၢဖိအဂီၢ် ဒီးအံၣ်စရ့လး အတၢ်အိၣ်ဖှိၣ်ဒီတဖု အဂီၢ်လီၤ.+

၁၈ “ဒီးအဝဲကလဲၤဝဲလၢ တၢ်လုၢ်လီၢ်+ လၢအအိၣ်ဝဲလၢ ယဟိဝၤယွၤ အမဲာ်ညါ ဒီးကမၤဘၣ်လိာ်ဖိးဒ့က့ၤတၢ်လၢ တၢ်လုၢ်လီၢ်အဂီၢ် ဒီးကဟံးန့ၢ်ဝဲ ကျီၢ်ဖါ အသွံၣ်တနီၤ ဒီးမဲာ်တဲးလဲး အသွံၣ်တနီၤ ဒီးကထွါဝဲလၢ တၢ်လုၢ်လီၢ် အနၢၤတဖၣ်အလိၤလီၤ. ၁၉ ဒီးအဝဲ ကဘၣ်ဖှံ တၢ်သွံၣ်အံၤလၢ အစုနၢတဘိ လၢတၢ်လုၢ်လီၢ်အလိၤ နွံဘျီ ဒ်သိး တၢ်လုၢ်လီၢ် ကကဆှီဝဲ ဒီးဒ်သိး ကပာ်စီဆှံဝဲ ခီဖျိလၢ ပှၤအံၣ်စရ့လးဖိတဖၣ်​ တကဆှီဘၣ်​ အဃိလီၤ.

၂၀ “ဖဲအဝဲ မၤဘၣ်လိာ်ဖိးဒ့က့ၤတၢ်လၢ+ တၢ်လီၢ်စီဆှံကတၢၢ်အဂီၢ် ဒီးတၢ်အိၣ်ဖှိၣ်အဒဲ အတၢ်နုာ်လီၤအလီၢ်အဂီၢ် ဒီးတၢ်လုၢ်လီၢ်အဂီၢ် ဝံၤအခါ+ အဝဲ ကဘၣ်ဟဲမူၤဝဲ မဲာ်တဲးလဲးလၢ အမူဒံးတဒုလီၤ.+ ၂၁ ဒီးစီၤအၤဟရိၣ်​ ကပာ်လီၤဝဲ အစုခံခီလၢာ်လၢ မဲာ်တဲးလဲးလၢ အမူဝဲတဒုအံၤ အခိၣ်လိၤ ဒီးကအၢၣ်လီၤဝဲ ပှၤအံၣ်စရ့လးဖိ အတၢ်ကမၣ်​ ဒီးအတၢ်ဒဲးဘးခဲလၢာ် ဝံၤဒီးကပာ်လီၤဝဲ တၢ်ဒဲးဘးတဖၣ်အံၤလၢ မဲာ်တဲးလဲးအံၤ အခိၣ်လိၤလီၤ.+ ဒီးအကအးလီၤဝဲ မဲာ်တဲးလဲးအံၤလၢ ပှၤလၢအအိၣ်ဒီး မူဒါတဂၤန့ၣ်​ အစုပူၤ ဒီးပှၤတဂၤအံၤ ကလဲၤပျၢ်လီၤကွံာ်ဝဲ မဲာ်တဲးလဲးအံၤ လၢပှၢ်မုၢ်ကနၢ အပူၤလီၤ. ၂၂ အဝဲကပျၢ်လီၤ မဲာ်တဲးလဲးအံၤ လၢပှၢ်မုၢ်ကနၢ+ ဒီးမဲာ်တဲးလဲးအံၤ ကစိာ်ကွံာ် အဝဲသ့ၣ်​ အတၢ်ဒဲးဘးခဲလၢာ်+ ဆူပှၢ်မုၢ်ကနၢ အပူၤလီၤ.+

၂၃ “ဝံၤဒီးစီၤအၤဟရိၣ်​ ကဘၣ်လဲၤနုာ်လၢ တၢ်အိၣ်ဖှိၣ်​ အဒဲပူၤလီၤ. ဒီးတၢ်ကူတၢ်သိး လၢအညၣ်ဂ့ၤ လၢအဝဲ ကူထီၣ်ကၤထီၣ်ပာ်စၢၤဝဲ ဖဲအလဲၤနုာ်လၢ တၢ်လီၢ်စီဆှံကတၢၢ် အပူၤအခါန့ၣ်​ အဝဲ ကဘ့ၣ်လီၤဝဲ ဒီးကပာ်လီၤဝဲ ဖဲန့ၣ်လီၤ. ၂၄ ဒီးအဝဲကဘၣ်လုၢ်ထံဖဲ+ တၢ်စီဆှံအလီၢ် ဒီးကူထီၣ်ကၤထီၣ်​ အတၢ်ကူတၢ်သိးလီၤ.+ ဝံၤဒီး အဝဲ ကဟဲထီၣ်​ ဒီးကလုၢ်ထီၣ်ဝဲ အနီၢ်ကစၢ် အတၢ်လုၢ်ဒွဲၣ်အူ+ ဒီးပှၤဂီၢ်မုၢ် အတၢ်လုၢ်ဒွဲၣ်အူ+ ဒီးကမၤဘၣ်လိာ်ဖိးဒ့က့ၤတၢ်လၢ အနီၢ်ကစၢ်အဂီၢ် ဒီးလၢ ပှၤဂီၢ်မုၢ် အဂီၢ်လီၤ.+ ၂၅ ဒီးအဝဲ ကဒွဲၣ်အူထီၣ်ဝဲ တၢ်လုၢ်လၢ တၢ်ဒဲးဘးအဂီၢ် အသိ ဒ်သိး အကခုၣ်ထီၣ်​ အဂီၢ်လီၤ.

၂၆ “ပှၤပိာ်ခွါလၢ အပျၢ်လီၤဝဲ မဲာ်တဲးလဲး လၢဧ့စ့ၤစ့လး အဂီၢ်န့ၣ်+ ကဘၣ်ဆှုၣ်​ အတၢ်ကူတၢ်ကၤ, လုၢ်ထံလုၢ်နိ ဝံၤဒီး အဝဲဟဲက့ၤနုာ်လီၤလၢ ဒဲကဝီၤ အပူၤသ့လီၤ.

၂၇ “ဒီးကျီၢ်ဖါ ဒီးမဲာ်တဲးလဲးလၢ တၢ်လုၢ်လၢ တၢ်ဒဲးဘးအဂီၢ် လၢပှၤလဲၤစိာ်နုာ် အသွံၣ်လၢ တၢ်လီၢ်စီဆှံကတၢၢ်အပူၤ လၢတၢ်မၤဘၣ်လိာ်ဖိးဒ့က့ၤတၢ် အဂီၢ်န့ၣ်​ ပှၤကဘၣ်​ လဲၤစိာ်အီၤလၢ ဒဲကဝီၤအချၢလီၤ. ဒီးပှၤကဘၣ်ဒွဲၣ်အူထီၣ်​ အဘ့ၣ်, အညၣ်​ ဒီးအအ့ၣ်တဖၣ်လၢ မ့ၣ်အူလီၤ.+ ၂၈ ဒီးပှၤလၢ အဒွဲၣ်အူထီၣ်ကွံာ်တၢ် တဂၤန့ၣ်​ ကဘၣ်ဆှုၣ်​ အတၢ်ကူတၢ်ကၤ, လုၢ်ထံလုၢ်နိ ဝံၤဒီးအဝဲ ဟဲက့ၤနုာ်လီၤလၢ ဒဲကဝီၤ အပူၤသ့လီၤ.

၂၉ “ဖဲနွံလါတလါ လါထီၣ်အသီတဆံန့ၣ်​ ပှၤထံဖိကီၢ်ဖိမ့ၢ်ဂ့ၤ ပှၤထံဂၤကီၢ်ဂၤဖိလၢ အဟဲအိၣ်လၢ သုကျါမ့ၢ်ဂ့ၤ ကဘၣ်သိၣ်ဃီၣ်လီၤအသး* ဒီးတဘၣ်ဖံးတၢ်မၤတၢ် နီတမံၤဘၣ်.+ အဝဲန့ၣ်​ မ့ၢ်တၢ်သိၣ်တၢ်သီ လၢအဂၢၢ်ကျၢၤ လၢသုဂီၢ်လီၤ. ၃၀ ဖဲမုၢ်နံၤ အဝဲန့ၣ်​ သုကဘၣ်လိာ်ဖိးဒ့က့ၤဒီး+ ကစၢ်ယွၤ ဒ်သိး သုကကဆှီထီၣ်​ အဂီၢ်လီၤ. ဒီးလၢ ယဟိဝၤယွၤ အမဲာ်ညါန့ၣ်​ သုကကဆှီထီၣ်လၢ သုတၢ်ဒဲးဘး ခဲလၢာ်လီၤ.+ ၃၁ ဒီးမုၢ်နံၤ အဝဲန့ၣ်​ ကဘၣ်မ့ၢ်ဝဲ တၢ်အိၣ်ဘှံးအနံၤ လၢသုဂီၢ် ဒီးသုကဘၣ်​ သိၣ်ဃီၣ်လီၤသုသးလီၤ.*+ အဝဲန့ၣ်​ မ့ၢ်တၢ်သိၣ်တၢ်သီလၢ အဂၢၢ်ကျၢၤလီၤ.

၃၂ “ပှၤလုၢ်တၢ်ဒိၣ်​ လၢအဘၣ်တၢ်ဒိးဖှူအီၤ+ ဒီးဘၣ်တၢ်ပာ်ထီၣ်အီၤ ဒ်ပှၤလုၢ်တၢ်ဒိၣ်+ လၢအပၢ်အလီၢ်န့ၣ်+ ကမၤဘၣ်လိာ်ဖိးဒ့က့ၤတၢ် ဒီးကူထီၣ်သိးထီၣ်​ တၢ်ကူတၢ်သိး လၢအညၣ်ဂ့ၤတဖၣ်+ လၢအမ့ၢ် တၢ်ကူတၢ်သိး စီဆှံတဖၣ်လီၤ.+ ၃၃ ဒီးအဝဲ ကမၤဘၣ်လိာ်ဖိးဒ့က့ၤတၢ်လၢ တၢ်လီၢ်စီဆှံကတၢၢ်အဂီၢ်,+ တၢ်အိၣ်ဖှိၣ်အဒဲ+ ဒီးတၢ်လုၢ်လီၢ်အဂီၢ်လီၤ.+ ဒီးအဝဲ ကမၤဘၣ်လိာ်ဖိးဒ့က့ၤတၢ် လၢပှၤလုၢ်တၢ်ဒိၣ်တဖၣ်အဂီၢ် ဒီးအံၣ်စရ့လး အတၢ်အိၣ်ဖှိၣ်​ ဒီတဖုအဂီၢ်လီၤ.+ ၃၄ အဝဲန့ၣ်​ မ့ၢ်တၢ်သိၣ်တၢ်သီ လၢအဂၢၢ်ကျၢၤလၢ+ ပှၤအံၣ်စရ့လးဖိ ကဘၣ်လိာ်ဖိးဒ့က့ၤဒီး ကစၢ်ယွၤအဂီၢ် ဒီးဒ်သိး အဝဲသ့ၣ်​ ကကဆှီထီၣ်​ လၢအတၢ်ဒဲးဘးခဲလၢာ် တနံၣ်တဘျီ အဂီၢ်လီၤ.”+

အဃိ စီၤအၤဟရိၣ်​ မၤဝဲဒ် ယဟိဝၤယွၤ မၤလိာ် စီၤမိၤၡ့ အသိးန့ၣ်လီၤ.

၁၇ ယဟိဝၤယွၤ တဲဘၣ်​ စီၤမိၤၡ့လၢ ၂ “တဲဘၣ်​ စီၤအၤဟရိၣ်​ ဒီးအဖိခွါတဖၣ်​ ဒီးပှၤအံၣ်စရ့လးဖိ ခဲလၢာ်လၢ ‘အဝဲအံၤ မ့ၢ်တၢ်လၢ ယဟိဝၤယွၤ မၤလိာ်ဝဲလီၤ.

၃ “‘“အံၣ်စရ့လးပိာ်ခွါတဂၤဂၤ မ့ၢ်မၤသံ ကျီၢ်ဖါ တဒုမ့ၢ်ဂ့ၤ, သိဖါဖိ တဒုမ့ၢ်ဂ့ၤ, မဲာ်တဲးလဲး တဒုမ့ၢ်ဂ့ၤ လၢဒဲကဝီၤပူၤ မ့တမ့ၢ် လၢဒဲကဝီၤချၢန့ၣ်​ ၄ ခီဖျိလၢ အတဟဲမူၤဝဲလၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ် ဒ်သိး ကဟ့ၣ်လုၢ်ထီၣ်အီၤလၢ ယဟိဝၤယွၤအအိၣ်​ လၢယဟိဝၤယွၤ အဒဲစီဆှံ အမဲာ်ညါဘၣ်​ အဃိ တၢ်သွံၣ်​ ကလီၤတီလၢ အခိၣ်လိၤလီၤ. ခီဖျိလၢ အဝဲ လူလီၤဂၢ်လီၤ တၢ်သွံၣ်အဃိ အကဘၣ်​ တၢ်မၤသံအီၤလီၤ. ၅ အဃိ တၢ်လုၢ်တဖၣ်လၢ ပှၤအံၣ်စရ့လးဖိ ညီနုၢ်လုၢ်ထီၣ်ဝဲလၢ တၢ်ပျီပူၤန့ၣ်​ အဝဲသ့ၣ်​ ကဘၣ်ဟဲစိာ်ဝဲ လၢပှၤလုၢ်တၢ်ဒိၣ်အအိၣ်​ ဖဲတၢ်အိၣ်ဖှိၣ်အဒဲ အတၢ်နုာ်လီၤအလီၢ် လၢယဟိဝၤယွၤ အဂီၢ်လီၤ. အဝဲသ့ၣ်​ ကဘၣ်လုၢ်ထီၣ်​ တၢ်လုၢ်တဖၣ်အံၤ ဒ်တၢ်လုၢ်အိၣ်ဃူအိၣ်ဖိးတဖၣ်အသိး လၢယဟိဝၤယွၤ အအိၣ်လီၤ.+ ၆ ဒီးပှၤလုၢ်တၢ်ဒိၣ်​ ကဖှံဝဲတၢ်သွံၣ်အံၤလၢ ယဟိဝၤယွၤ အတၢ်လုၢ်လီၢ် လၢအအိၣ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ်အလိၤ ဒီးကဒွဲၣ်အူထီၣ်ဝဲ တၢ်အသိ ဒ်သိး အကခုၣ်ထီၣ်ဝဲ ဒ်တၢ်နၢမူလၢ အမၤမုာ် ယဟိဝၤယွၤ အသးအဂီၢ်လီၤ.+ ၇ ဒီးအဝဲသ့ၣ်​ တဘၣ်ဘူၣ်ထီၣ်ဘါထီၣ်*+ ဒီးလုၢ်ထီၣ်​ တၢ်လၢ တၢ်ဝံတၢ်နါ+ လၢအလီၤဂာ်ဒီး မဲာ်တဲးလဲးတဖၣ်​ အအိၣ်လၢၤဘၣ်. အဝဲန့ၣ်မ့ၢ်ဝဲ တၢ်သိၣ်တၢ်သီလၢ အဂၢၢ်အကျၢၤ လၢသုဂီၢ် တစိၤဘၣ်တစိၤလီၤ.”’

၈ “နကဘၣ်တဲ အဝဲသ့ၣ်လၢ ‘အံၣ်စရ့လးပိာ်ခွါမ့ၢ်ဂ့ၤ ပှၤထံဂၤကီၢ်ဂၤဖိလၢ အဟဲအိၣ်လၢ သုကျါမ့ၢ်ဂ့ၤ မ့ၢ်လုၢ်ထီၣ်​ တၢ်လုၢ်ဒွဲၣ်အူ မ့တမ့ၢ် တၢ်လုၢ် ၉ ဒီးမ့ၢ်တဟဲစိာ်ဝဲဆူ တၢ်အိၣ်ဖှိၣ်အဒဲ အတၢ်နုာ်လီၤအလီၢ် ဒ်သိးကလုၢ်ထီၣ်အီၤလၢ ယဟိဝၤယွၤအအိၣ်​ အဂီၢ်ဘၣ်န့ၣ်​ ကဘၣ်တၢ်မၤသံအီၤလီၤ.+

၁၀ “‘ပှၤအံၣ်စရ့လးဖိမ့ၢ်ဂ့ၤ ပှၤထံဂၤကီၢ်ဂၤဖိလၢ အဟဲအိၣ်လၢ သုကျါမ့ၢ်ဂ့ၤ မ့ၢ်အီၣ်တၢ်သွံၣ်​ တမံၤဂ့ၤတမံၤဂ့ၤန့ၣ်+ ယကထီဒါ ပှၤလၢ အအီၣ်တၢ်သွံၣ်တဂၤအံၤ ဒီးယကမၤသံအီၤလီၤ. ၁၁ တၢ်ကိးမံၤဒဲးလၢ အမူဝဲန့ၣ်​ အသးသမူအိၣ်လၢ အသွံၣ်ပူၤလီၤ.+ ဒီးယရဲၣ်လီၤကျဲၤလီၤလၢ သုက လုၢ်ထီၣ်အီၤလၢ တၢ်လုၢ်လီၢ် အဖီခိၣ်+ ဒ်သိး သုက မၤဘၣ်လိာ်ဖိးဒ့က့ၤတၢ်လၢ သုနီၢ်ကစၢ်အဂီၢ်လီၤ. တၢ်သွံၣ်န့ၣ်​ မ့ၢ်တၢ်လၢ အမၤဘၣ်လိာ်ဖိးဒ့က့ၤတၢ်+ ခီဖျိလၢ သးသမူလၢ အအိၣ်လၢ အပူၤ အဃိလီၤ. ၁၂ အဃိ ယတဲဘၣ်​ ပှၤအံၣ်စရ့လးဖိလၢ “သုတဘၣ်အီၣ်တၢ်သွံၣ်​ နီတဂၤဘၣ်. ဒီးပှၤထံဂၤကီၢ်ဂၤဖိ လၢအဟဲအိၣ်လၢ သုကျါန့ၣ်+ တဘၣ်အီၣ်​ တၢ်သွံၣ်​ နီတဂၤဘၣ်.”+

၁၃ “‘ပှၤအံၣ်စရ့လးဖိမ့ၢ်ဂ့ၤ ပှၤထံဂၤကီၢ်ဂၤဖိလၢ အဟဲအိၣ်လၢ သုကျါမ့ၢ်ဂ့ၤ လၢအလဲၤခးအီၣ်တၢ် ဒီးမၤန့ၢ်ဝဲ ဆၣ်ဖိကီၢ်ဖိအမံၤ မ့တမ့ၢ် ထိၣ်လၢ ပှၤအီၣ်အီၤန့ၢ်န့ၣ်​ အဝဲကဘၣ်လူလီၤ အသွံၣ်ဒီး+ မၤဘၢဝဲလၢ ဟီၣ်ခိၣ်ကမူၣ်လီၤ. ၁၄ တၢ်ကိးမံၤဒဲးလၢ အမူဝဲန့ၣ်​ အသးသမူ မ့ၢ်ဝဲအသွံၣ်​ ခီဖျိလၢ သးသမူအိၣ်ဝဲလၢ တၢ်သွံၣ်အပူၤ အဃိလီၤ. လၢတၢ်န့ၣ်အဃိ ယတဲဘၣ်​ ပှၤအံၣ်စရ့လးဖိလၢ “မ့ၢ်လၢ တၢ်ကိးမံၤဒဲးလၢ အမူဝဲန့ၣ်​ အသးသမူ မ့ၢ်ဝဲအသွံၣ်​ အဃိ သုတဘၣ်အီၣ်​ တၢ်လၢအမူဝဲ တမံၤဂ့ၤတမံၤဂ့ၤ အသွံၣ်တဂ့ၤ. ပှၤတဂၤဂ့ၤတဂၤဂ့ၤ လၢအအီၣ်​ တၢ်သွံၣ်န့ၣ်​ ကဘၣ်​ တၢ်မၤသံအီၤလီၤ.”+ ၁၅ ပှၤထံဖိကီၢ်ဖိမ့ၢ်ဂ့ၤ ပှၤထံဂၤကီၢ်ဂၤဖိမ့ၢ်ဂ့ၤ မ့ၢ်အီၣ်ဝဲ ဆၣ်ဖိကီၢ်ဖိလၢ ပှၤထံၣ်န့ၢ်အီၤလၢအသံ မ့တမ့ၢ် ဆၣ်ဖိကီၢ်ဖိလၢ ဆၣ်ဖိကီၢ်ဖိအမံၤတဒု အ့ၣ်ဖှီအီၤန့ၣ်+ အဝဲကဘၣ်ဆှုၣ်​ အတၢ်ကူတၢ်ကၤ, လုၢ်ထံလုၢ်နိ ဒီးတကဆှီဘၣ်​ တုၤလၢ ဟါလီၤခီလီၤ.+ ဖဲန့ၣ်အခါ အဝဲကကဆှီထီၣ်ဝဲလီၤ. ၁၆ ဘၣ်ဆၣ်​ အဝဲမ့ၢ်တဆှုၣ်​ အကူအကၤ ဒီးမ့ၢ်တလုၢ်ထံလုၢ်နိဘၣ်န့ၣ်​ အဝဲကဘၣ်ဟ့ၣ်​ တၢ်စံးဆၢလၢ အတၢ်ကမၣ်​ အဃိလီၤ.’”+

၁၈ ယဟိဝၤယွၤ ဆဲးတဲ စီၤမိၤၡ့လၢ ၂ “တဲဘၣ်​ ပှၤအံၣ်စရ့လးဖိတဖၣ်လၢ ‘ယမ့ၢ်သုကစၢ် ယဟိဝၤယွၤလီၤ.+ ၃ သုတဘၣ်အိၣ်ဒီး လုၢ်လၢ်သကဲာ်ပဝး ဒ်ပှၤအဲၤကူပတူးဖိ လၢသုအိၣ်တ့ၢ်လၢ အကီၢ်ပူၤန့ၣ်တဂ့ၤ. ဒီးသုတဘၣ်မၤဒ် ပှၤကနၤဧၣ်ဖိလၢ ယကဆှၢသုလၢ အကီၢ်ပူၤန့ၣ်တဂ့ၤ.+ သုတဘၣ်​ အိၣ်မူဒ် အဝဲသ့ၣ်​ အတၢ်ဘျၢတဖၣ်​ အသိးတဂ့ၤ. ၄ သုဘၣ်မၤထွဲ ယတၢ်သိၣ်တၢ်သီတဖၣ်​ ဒီးသုကဘၣ်​ အိၣ်မူပိာ်ထွဲ ယတၢ်ဘျၢတဖၣ်လီၤ.+ ယမ့ၢ် သုကစၢ် ယဟိဝၤယွၤလီၤ. ၅ သုကဘၣ်မၤထွဲ ယတၢ်ဘျၢ ဒီးယတၢ်သိၣ်တၢ်သီ တဖၣ်လီၤ. ပှၤတဂၤဂ့ၤ တဂၤဂ့ၤလၢ အမၤဝဲ ဒ်န့ၣ်န့ၣ်​ ကမူဝဲလၢ တၢ်သ့ၣ်တဖၣ်န့ၣ်​ အဃိလီၤ.+ ယမ့ၢ် ယဟိဝၤယွၤလီၤ.

၆ “‘နတဘၣ်​ မံဃုာ်ဒီး နဘူးနတံၢ်လၢ အဘူးဒီးနၤ နီတဂၤတဂ့ၤ.+ ယမ့ၢ် ယဟိဝၤယွၤလီၤ. ၇ နတဘၣ်မံဃုာ်ဒီး နပၢ်တဂ့ၤ. ဒီးနတဘၣ်​ မံဃုာ်ဒီး နမိၢ်တဂ့ၤ. အဝဲမ့ၢ်နမိၢ် အဃိ နတဘၣ်​ မံဃုာ်ဒီးအီၤတဂ့ၤ.

၈ “‘နတဘၣ်မံဃုာ်ဒီး နပၢ်အမါတဂ့ၤ.+ နမ့ၢ်မၤ ဒ်န့ၣ်န့ၣ်​ ကကဲထီၣ်​ တၢ်မဲာ်ဆှး လၢနပၢ် အဂီၢ်လီၤ.

၉ “‘နတဘၣ်မံဃုာ်ဒီး နဒီပုၢ်ဝဲၢ်မုၣ်တဂ့ၤ. အဝဲမ့မ့ၢ် နပၢ် အဖိမုၣ်မ့ၢ်ဂ့ၤ, နမိၢ် အဖိမုၣ်မ့ၢ်ဂ့ၤ ဒီးအဝဲမ့ၢ်အိၣ်ဖျဲၣ်ထီၣ်လၢ နဟံၣ်ဖိဃီဖိ အကျါမ့ၢ်ဂ့ၤ လၢဟံၣ်ဖိဃီဖိ အဂၤအကျါမ့ၢ်ဂ့ၤ နတဘၣ်​ မံဃုာ်ဒီးအီၤတဂ့ၤ.+

၁၀ “‘နဖိခွါ အဖိမုၣ်မ့ၢ်ဂ့ၤ, နဖိမုၣ်​ အဖိမုၣ်မ့ၢ်ဂ့ၤ နတဘၣ်မံဃုာ်ဒီး အဝဲသ့ၣ်တဂ့ၤ. အဝဲသ့ၣ်မ့ၢ် နသွံၣ်ထံဖံးညၣ်အဃိ အမ့ၢ်တၢ်လၢ အလီၤမဲာ်ဆှး လၢနဂီၢ်လီၤ.

၁၁ “‘နတဘၣ်မံဃုာ်ဒီး နပၢ်အမါ အဖိမုၣ်တဂ့ၤ. အဝဲမ့ၢ် နပၢ်အဖိ ဒီးအမ့ၢ် နဒီပုၢ်ဝဲၢ်မုၣ်လီၤ.

၁၂ “‘နတဘၣ်မံဃုာ်ဒီး နပၢ် အဒီပုၢ်ဝဲၢ်မုၣ်တဂ့ၤ. အဝဲမ့ၢ် နပၢ် အသွံၣ်ထံဖံးညၣ်လီၤ.+

၁၃ “‘နတဘၣ်​ မံဃုာ်ဒီး နမိၢ် အဒီပုၢ်ဝဲၢ်မုၣ်တဂ့ၤ. အဝဲမ့ၢ် နမိၢ် အသွံၣ်ထံဖံးညၣ်လီၤ.

၁၄ “‘နတဘၣ်​ မၤမဲာ်ဆှး နပၢ် အဒီပုၢ်ဝဲၢ်ခွါ ခီဖျိလၢ နမံဃုာ်ဒီး အမါန့ၣ်တဂ့ၤ. အဝဲကဲ နမုၢ်ဂၢ်လီၤ.+

၁၅ “‘နတဘၣ်မံဃုာ်ဒီး နဒဲၣ်မုၣ်တဂ့ၤ.+ အဝဲကဲ နဖိခွါအမါအဃိ နတဘၣ်​ မံဃုာ်ဒီးအီၤတဂ့ၤ.

၁၆ “‘နတဘၣ်မံဃုာ်ဒီး နဒီပုၢ်ဝဲၢ်ခွါ အမါတဂ့ၤ.+ နမ့ၢ်မၤ ဒ်န့ၣ်န့ၣ်​ ကကဲထီၣ်​ တၢ်မဲာ်ဆှး လၢနဒီပုၢ်ဝဲၢ်ခွါ အဂီၢ်လီၤ.

၁၇ “‘နတဘၣ်မံဃုာ်ဒီး ပိာ်မုၣ်တဂၤ ဒီးပိာ်မုၣ်တဂၤအံၤ အဖိမုၣ်မ့ၢ်ဂ့ၤ+ အလံၤမုၣ်မ့ၢ်ဂ့ၤ* စ့ၢ်ကီးဘၣ်. အဝဲသ့ၣ်န့ၣ်​ မ့ၢ်ဝဲပိာ်မုၣ်တဂၤအံၤ အဘူးအတံၢ်လၢ အဘူးဒီးအီၤ အဃိ မ့ၢ်တၢ်လၢ အလီၤမဲာ်ဆှးလီၤ.

၁၈ “‘ဖဲနမါအိၣ်မူဒံး အဆၢကတီၢ် နတဘၣ်​ ဟံးန့ၢ်အဒီပုၢ်ဝဲၢ်မုၣ်​ ဒ်နမါအသိး+ ဒီးမံဃုာ်ဒီးအီၤတဂ့ၤ. နမ့ၢ်မၤ ဒ်န့ၣ်န့ၣ်​ အဝဲသ့ၣ်​ ကပြၢလိာ်အသး ကဒဲကဒဲလီၤ.

၁၉ “‘နတဘၣ်မံဃုာ်ဒီး ပိာ်မုၣ်လၢ အတကဆှီဘၣ်ခီဖျိ လၢအလုၢ်အလၢ်ဟဲ အဃိန့ၣ်တဂ့ၤ.+

၂၀ “‘နတဘၣ်မံဃုာ်ဒီး ပှၤဂၤအမါတဂ့ၤ. နမ့ၢ်မၤ ဒ်န့ၣ်န့ၣ်​ မ့ၢ်နမၤ ဘၣ်အၢလီၤနသးလီၤ.+

၂၁ “‘နတဘၣ်​ ဟ့ၣ်အခွဲးလၢ နဖိနလံၤ ကဘၣ်တၢ်လုၢ်ထီၣ်အီၤလၢ ကစၢ်မိလးအအိၣ်​ နီတဂၤတဂ့ၤ.+ နတဘၣ်​ မၤစှၤလီၤ ကစၢ်ယွၤ အမံၤလၤသၣ်ကပီၤ ဒ်န့ၣ်တဂ့ၤ.+ ယမ့ၢ် ယဟိဝၤယွၤလီၤ.

၂၂ “‘နတဘၣ်​ မံဃုာ်ဒီး ပှၤပိာ်ခွါ ဒ်နမံဃုာ်ဒီး ပှၤပိာ်မုၣ်​ အသိးန့ၣ်တဂ့ၤ.+ အမ့ၢ်တၢ်လၢ အလီၤသးဘၣ်အၢလီၤ.

၂၃ “‘ပှၤပိာ်ခွါန့ၣ်​ တဘၣ်မံဃုာ်ဒီး ဆၣ်ဖိကီၢ်ဖိ ဒီးကဲထီၣ်ပှၤလၢ အတကဆှီဘၣ်​ လၢအဃိန့ၣ်တဂ့ၤ. ဒီးပှၤပိာ်မုၣ်န့ၣ်​ တဘၣ်ကျဲးစၢးဝဲ ဒ်သိး ကမံဃုာ်ဒီး ဆၣ်ဖိကီၢ်ဖိ အဂီၢ်ဘၣ်.+ အမ့ၢ်တၢ်လၢ အထီဒါလိာ်အသးဒီး န့ဆၢၣ်လီၤ.

၂၄ “‘သုတဘၣ်​ ဒုးကဲထီၣ်​ သုနီၢ်ကစၢ်လၢ ပှၤလၢအတကဆှီဘၣ်​ ခီဖျိလၢ တၢ်သ့ၣ်တဖၣ်န့ၣ်​ အဃိ နီတမံၤတဂ့ၤ. ပှၤကလုာ်တဖၣ်လၢ ယကနီဟးထီၣ်ကွံာ်လၢ သုမဲာ်ညါ ကဲထီၣ်ပှၤလၢ တကဆှီဘၣ်​ ခီဖျိလၢ တၢ်သ့ၣ်တဖၣ်န့ၣ်​ အဃိလီၤ.+ ၂၅ လၢတၢ်ဂ့ၢ်အံၤအဃိ ကီၢ်တကဆှီဘၣ်​ ဒီးယကစံၣ်ညီၣ်အီၤ ခီဖျိလၢ အဝဲသ့ၣ်​ အတၢ်ကမၣ်အဃိ ဒီးကီၢ်န့ၣ်​ ကဘှိးထီၣ်ကွံာ် ပှၤလၢအအိၣ်လၢ အပူၤလီၤ.+ ၂၆ ဘၣ်ဆၣ်​ မ့မ့ၢ်သုန့ၣ်​ သုကဘၣ်​ မၤထွဲယတၢ်ဘျၢ ဒီးယတၢ်သိၣ်တၢ်သီတဖၣ်လီၤ.+ ဒီးပှၤထံဖိကီၢ်ဖိမ့ၢ်ဂ့ၤ, ပှၤထံဂၤကီၢ်ဂၤဖိလၢ အဟဲအိၣ်​ လၢသုကျါမ့ၢ်ဂ့ၤ တဘၣ်မၤတၢ်လၢ အလီၤသးဘၣ်အၢတဖၣ်အံၤ နီတဂၤဘၣ်.+ ၂၇ မ့ၢ်လၢ ပှၤကီၢ်ဖိလၢ အအိၣ်ပာ်စၢၤဖဲအံၤ လၢသုမဲာ်ညါန့ၣ်​ မၤဝဲတၢ်လၢ အလီၤသးဘၣ်အၢတဖၣ်အံၤ ခဲလၢာ်အဃိ+ ကီၢ်န့ၣ်​ တကဆှီလၢၤဘၣ်. ၂၈ ဒီးခီဖျိလၢ သုတမၤဘၣ်အၢ ကီၢ်ဒ်န့ၣ်ဘၣ်​ အဃိ တမ့ၢ်လၢ ကီၢ်ကဘှိးထီၣ်ကွံာ်သု ဒ်ကီၢ်ကဘှိးထီၣ်ကွံာ် ပှၤကလုာ်တဖၣ်လၢ အအိၣ်ပာ်စၢၤဖဲန့ၣ်​ လၢသုမဲာ်ညါ အသိးန့ၣ်ဘၣ်. ၂၉ ပှၤလၢ အမၤတၢ်လၢ အလီၤသးဘၣ်အၢ တဖၣ်အံၤအကျါ တမံၤမံၤန့ၣ်​ ကဘၣ်တၢ်မၤသံ အဝဲသ့ၣ်ကိးဂၤဒဲးလီၤ. ၃၀ နဘၣ်မၤလၢပှဲၤ နမူဒါ ဒ်ယမၤလိာ်နၤအသိး ခီဖျိ နဟးဆှဲး လုၢ်လၢ်လၢ အလီၤသးဘၣ်အၢ လၢပှၤမၤတ့ၢ်လၢ နမဲာ်ညါလီၤ.+ ဒ်သိး နသုတမၤဘၣ်အၢလီၤနသး တဂ့ၤအဂီၢ် နတဘၣ်မၤ တၢ်သ့ၣ်တဖၣ်န့ၣ်ဘၣ်. ယမ့ၢ် သုကစၢ် ယဟိဝၤယွၤလီၤ.’”

၁၉ ယဟိဝၤယွၤ ဆဲးတဲ စီၤမိၤၡ့လၢ ၂ “တဲဘၣ်​ ပှၤအံၣ်စရ့လးဖိ ခဲလၢာ်လၢ ‘သုကစၢ် ယဟိဝၤယွၤ ယဲဒၣ်အံၤ ယစီဆှံအဃိ သုကဘၣ်စီဆှံလီၤ.+

၃ “‘သုဝဲကိးဂၤဒဲး သုကဘၣ်ပာ်ကဲ သုမိၢ်ဒီးသုပၢ်+ ဒီးသုကဘၣ်မၤထွဲ ယတၢ်သိၣ်တၢ်သီလၢ အဘၣ်ဃးဒီး မုၢ်အိၣ်ဘှံးနံၤလီၤ.+ ယမ့ၢ် သုကစၢ် ယဟိဝၤယွၤလီၤ. ၄ တဘၣ်ဃၣ်သုသးဆူ ယွၤလၢ အဘျုးတအိၣ်ဘၣ်တဖၣ်​ အအိၣ်တဂ့ၤ.+ တဘၣ်တ့ထီၣ်​ ယွၤတဖၣ်​ လၢထးတဂ့ၤ.+ ယမ့ၢ်သုကစၢ် ယဟိဝၤယွၤလီၤ.

၅ “‘သုမ့ၢ်လုၢ်ထီၣ်​ တၢ်လုၢ်အိၣ်ဃူအိၣ်ဖိးလၢ ယဟိဝၤယွၤ အအိၣ်န့ၣ်+ သုဘၣ်လုၢ်ထီၣ်အီၤ လၢကျဲလၢအဘၣ်​ ဒ်သိး သုကဒိးန့ၢ်ဘၣ်​ ကစၢ်ယွၤ အတၢ်ဘၣ်သး အဂီၢ်လီၤ.+ ၆ ဒီးသုကဘၣ်အီၣ်အီၤ ဖဲသုလုၢ်ထီၣ်အီၤအနံၤ ဒီးလၢခံတသီလီၤ. ဘၣ်ဆၣ်​ တၢ်လၢအအိၣ်တ့ၢ် တုၤလၢ သၢသီတသီန့ၣ်​ ကဘၣ်​ တၢ်ဒွဲၣ်အူထီၣ်အီၤ လၢမ့ၣ်အူလီၤ.+ ၇ ပှၤမ့ၢ်အီၣ်ဒံး ဆၣ်ဖိကီၢ်ဖိအညၣ်အံၤ ဖဲသၢသီတသီန့ၣ်​ အမ့ၢ်တၢ်လၢ အလီၤသးဘၣ်အၢ ဒီးတၢ်တတူၢ်လိာ်အီၤ လၢၤဘၣ်. ၈ ပှၤတဂၤဂၤလၢ အအီၣ်ဝဲန့ၣ်​ မ့ၢ်ဝဲ အတပာ်ကဲ တၢ်လၢ အစီဆှံလၢ အဘၣ်ဃးဒီး ယဟိဝၤယွၤ အဃိ အဝဲကဘၣ်​ ဟ့ၣ်တၢ်စံးဆၢ လၢအတၢ်ကမၣ်​ အဃိလီၤ. ဒီးအဝဲ ကဘၣ်တၢ်မၤသံအီၤလီၤ.

၉ “‘ဖဲသုကူးဘုလၢ သုစံာ်ပျီပူၤအခါ သုတဘၣ်ကူး သုစံာ်ပျီအနၢၣ်​ လၢာ်လၢာ်ဆ့ဆ့ဘၣ်. ဒီးသုတဘၣ်​ ထၢဖှိၣ်က့ၤ တၢ်လၢ အလီၤတဲာ်တဖၣ်ဘၣ်.+ ၁၀ ဒီးသုတဘၣ်​ ဒဲးစပံးသၣ်​ အဘျဲၣ်အစဲၢ်တဖၣ်​ လၢအအိၣ်တ့ၢ်လၢ သုစပံးကျီး အပူၤတဂ့ၤ. ဒီးတဘၣ်က့ၤထၢဖှိၣ်က့ၤ စပံးသၣ်လၢ အလီၤတဲာ်လၢ သုစပံးကျီး အပူၤတဂ့ၤ. သုကဘၣ်​ ပာ်တ့ၢ်အီၤလၢ ပှၤဖှီၣ်ဖိယာ်ဖိ+ ဒီးပှၤထံဂၤကီၢ်ဂၤဖိ အဂီၢ်လီၤ. ယမ့ၢ် သုကစၢ် ယဟိဝၤယွၤလီၤ.

၁၁ “‘သုတဘၣ်​ ဟုၣ်တၢ်တဂ့ၤ.+ သုတဘၣ်​ လီတၢ်တဂ့ၤ.+ ဒီးတဘၣ်​ လံၣ်အီၣ်လီအီၣ်လိာ် သုသးတဂၤဒီးတဂၤ တဂ့ၤ. ၁၂ သုတဘၣ်သူယမံၤ လၢသုက အၢၣ်လီၤကဘျံးကဘျၣ်တၢ် အဂီၢ်တဂ့ၤ.+ သုမ့ၢ်မၤဒ်န့ၣ်န့ၣ်​ မ့ၢ်သုမၤစှၤလီၤ သုကစၢ်ယွၤ အမံၤလၤသၣ်ကပီၤလီၤ. ယမ့ၢ် ယဟိဝၤယွၤလီၤ. ၁၃ တဘၣ်​ သူတၢ်လီတၢ်ဝ့ၤ ဒ်သိးသုကမၤန့ၢ်ဘၣ်​ ပှၤဂၤအတၢ်တဂ့ၤ.+ ဒီးသုတဘၣ်​ တမျာ်တၢ်တဂ့ၤ.+ သုတဘၣ်ဟံးဃာ် ပှၤလၢအဒိးငါအသးတဂၤ အဘူးအလဲ ဒီတနၤကျၢၤ တုၤလၢဂီၤခီတဂ့ၤ.+

၁၄ “‘သုတဘၣ်ဆိၣ်အၢ ပှၤလၢ အတနၢ်ဟူတၢ်တဂ့ၤ. ဒီးသုတဘၣ်ပာ်လီၤ တၢ်လီၤဃံၢ်အလီၢ် လၢပှၤမဲာ်တထံၣ်တၢ် အမဲာ်ညါတဂ့ၤ.+ သုကဘၣ်​ ပျံၤသုကစၢ်ယွၤလီၤ.+ ယမ့ၢ် ယဟိဝၤယွၤလီၤ.

၁၅ “‘ဖဲသုစံၣ်ညီၣ်န့ၢ်တၢ်လၢ ပှၤဂၤအဂီၢ်အခါ သုတဘၣ်​ စံၣ်ညီၣ်တၢ် တတီတလိၤတဂ့ၤ. ပှၤဖှီၣ်ဖိယာ်ဖိမ့ၢ်ဂ့ၤ, ပှၤထူးပှၤတီၤမ့ၢ်ဂ့ၤ သုတဘၣ်​ ကွၢ်ဒိၣ်ဆံးအါစှၤ အဝဲသ့ၣ်တဂ့ၤ.+ သုကဘၣ်​ စံၣ်ညီၣ်န့ၢ်တၢ်လၢ ပှၤဂၤအဂီၢ် တီတီလိၤလိၤလီၤ.

၁၆ “‘သုတဘၣ်​ ဟးတဲဟးဂီၤ ပှၤဂၤလၢ သုပှၤကလုာ် အကျါတဂ့ၤ.+ သုတဘၣ်မၤတၢ်လၢ အကဒုးအိၣ်ထီၣ်​ တၢ်လီၤဘၣ်ယိၣ်​ လၢပှၤဂၤ အသးသမူ အဂီၢ်တဂ့ၤ.+ ယမ့ၢ် ယဟိဝၤယွၤလီၤ.

၁၇ “‘သုတဘၣ်သးဟ့ သုဒီပုၢ်ဝဲၢ် လၢသုသးပူၤတဂ့ၤ.+ ဒ်သိးသုသုတပၣ်ဃုာ်လၢ တၢ်ဒဲးဘးအပူၤ ဒ်အီၤအသိး တဂ့ၤအဂီၢ်န့ၣ်​ သုကဘၣ်သိၣ်ဃီၣ်အီၤလီၤ.+

၁၈ “‘သုတဘၣ်​ ဟ့ၣ်ကၣ်က့ၤတၢ်တဂ့ၤ.+ ဒီးသုတဘၣ်စၢဃာ် ပှၤဂၤ အတၢ်ကမၣ်တဂ့ၤ. သုကဘၣ်​ အဲၣ်ပှၤလၢသုဃၢၤ ဒ်သုအဲၣ်လီၤ သုနီၢ်ကစၢ် အသးအသိးလီၤ.+ ယမ့ၢ် ယဟိဝၤယွၤလီၤ.

၁၉ “‘သုကဘၣ်မၤထွဲ ယတၢ်သိၣ်တၢ်သီတဖၣ်အံၤလီၤ. သုတဘၣ်​ ဒုးဒၢထီၣ်​ သုဆၣ်ဖိကီၢ်ဖိ တကလုာ် ဒီးဆၣ်ဖိကီၢ်ဖိ အဂၤတကလုာ်တဂ့ၤ. သုတဘၣ်ဖှံလီၤ တၢ်ချံခံခါလၢ အလီၤဆီလိာ်အသး လၢသုစံာ်ပျီပူၤတဂ့ၤ.+ ဒီးသုတဘၣ်​ ကူထီၣ်သိးထီၣ်​ တၢ်ကူတၢ်သိး လၢအဘၣ်တၢ်ထါအီၤ လၢလုၣ်လၢ အလီၤဆီလိာ်သး ခံခါတဂ့ၤ.+

၂၀ “‘ကုၢ်မုၣ်လၢ အဘၣ်​ တၢ်ပာ်ပနီၣ်ပာ်စၢၤအီၤလၢ ပိာ်ခွါအဂၤတဂၤအဂီၢ် ဘၣ်ဆၣ်​ ပှၤမ့ၢ်တဟ့ၣ်လီၤအပှ့ၤ* လၢအဂီၢ်ဒံးဘၣ်​ ဒီးအမ့ၢ်တဘၣ်​ တၢ်ပျၢ်လီၤကွံာ်အီၤ ဒံးဘၣ်​ ဒီးပှၤတဂၤဂၤ မ့ၢ်မံဃုာ်ဒီးအီၤန့ၣ်​ တၢ်သိၣ်ဃီၣ်​ ကဘၣ်အိၣ်ဝဲလီၤ. ဘၣ်ဆၣ်​ မ့ၢ်လၢ ကုၢ်မုၣ်တဂၤအံၤ တဘၣ်​ တၢ်ပျၢ်လီၤကွံာ်အီၤ ဒံးဘၣ်အဃိ ပှၤတဘၣ်​ မၤသံ အဝဲသ့ၣ်ဘၣ်. ၂၁ ပိာ်ခွါတဂၤန့ၣ်​ ကဘၣ်ဟဲမူၤ သိဖါတဒုလၢ တၢ်လုၢ်လၢ တၢ်ကမၣ်အဂီၢ် ဆူယဟိဝၤယွၤအအိၣ်​ လၢတၢ်အိၣ်ဖှိၣ်အဒဲ အတၢ်နုာ်လီၤအလီၢ်န့ၣ်လီၤ.+ ၂၂ ဒီးဒ်သိး ကမၤဘၣ်လိာ်ဖိးဒ့န့ၢ်က့ၤတၢ် လၢအဂီၢ်န့ၣ်​ ပှၤလုၢ်တၢ်ဒိၣ်​ ကလုၢ်ထီၣ်​ သိဖါလၢ တၢ်လုၢ်လၢ တၢ်ကမၣ်အဂီၢ် လၢယဟိဝၤယွၤ အမဲာ်ညါလီၤ. ဒီးတၢ်ဒဲးဘး လၢအမၤဝဲန့ၣ်​ ကပျၢ်ဝဲလီၤ.

၂၃ “‘ဖဲသုလဲၤနုာ်လီၤလၢ ကီၢ်ပူၤ ဒီးသူၣ်လီၤတၤသူတၤသၣ်​ အထူၣ်တမံၤဂ့ၤတမံၤဂ့ၤအခါ သုကဘၣ်ထံၣ်​ အသူအသၣ်ဒ် တၢ်လၢအတကဆှီဘၣ်​ ဒီးဒ်တၢ်လၢ အဘၣ်တၢ်တြီဃာ်အီၤ အသိးန့ၣ်လီၤ. လၢသၢနံၣ်အတီၢ်ပူၤန့ၣ်​ သုကဘၣ်ဟးဆှဲး တၤသၣ်တဖၣ်အံၤ ဒီးသုတဘၣ်အီၣ်အီၤဘၣ်. ၂၄ ဘၣ်ဆၣ်​ ဖဲလွံၢ်နံၣ်တနံၣ်န့ၣ်​ တၤသၣ်တဖၣ်အံၤ ကစီဆှံဝဲခဲလၢာ် ဒီးကမ့ၢ်ဝဲ တၢ်ဆၢကတီၢ်လၢ ပှၤကသးခု လၢယဟိဝၤယွၤ အမဲာ်ညါလီၤ.+ ၂၅ ဒီးဖဲယဲၢ်နံၣ်တနံၣ်န့ၣ်​ သုအီၣ်သ့ၣ်သၣ်တဖၣ်အံၤသ့ဝဲ အဃိ ဖဲသုဒဲးတၤသူတၤသၣ်​ အဆၢကတီၢ် သုဒဲးဃုာ်ဒီး သ့ၣ်သၣ်တဖၣ်အံၤ သ့ဝဲလီၤ. ယမ့ၢ်သုကစၢ် ယဟိဝၤယွၤလီၤ.

၂၆ “‘သုတဘၣ်​ အီၣ်တၢ်လၢ အပၣ်ဃုာ်ဒီးတၢ်သွံၣ်​ နီတမံၤတဂ့ၤ.+

“‘သုတဘၣ်​ ကၢ်တၢ်ဒွးတၢ် ဒီးအူတၢ်သမူတၢ် တဂ့ၤ.+

၂၇ “‘တံာ်ဖုၣ်လီၤ သုခိၣ်ဆူၣ်​ လၢအကပၤတဂ့ၤ. ဒီးသုတဘၣ်တံာ် သုခၣ်ဆူၣ်​ အနၢၣ်တဖၣ်တဂ့ၤ.+

၂၈ “‘သုတဘၣ်ကူးလီၤ သုဖံးသုညၣ်လၢ ပှၤသံအဃိတဂ့ၤ.+ ဒီးသုတဘၣ်​ ဆဲးယီၢ် လၢသုလိၤတဂ့ၤ. ယမ့ၢ် ယဟိဝၤယွၤလီၤ.

၂၉ “‘သုတဘၣ်​ မၤဟးဂီၤ သုဖိမုၣ်အလၤကပီၤ ခီဖျိ သုမၢအကဲ ပိာ်မုၣ်ဆါလီၤအီၣ်သးတဂ့ၤ.+ သုမ့ၢ်မၢအမၤ ဒ်န့ၣ်န့ၣ်​ သုကီၢ်ကဘၣ်အၢလၢ ပှၤလၢ အဆါလီၤအီၣ်အသး အဃိ ဒီးကပှဲၤဒီး တၢ်သကဲာ်ပဝး လၢအတဂ့ၤဘၣ်လီၤ.+

၃၀ “‘သုကဘၣ်မၤထွဲ ယတၢ်သိၣ်တၢ်သီလၢ အဘၣ်ဃးဒီး မုၢ်အိၣ်ဘှံးနံၤ+ ဒီးသုကဘၣ်​ ပာ်ဖျါထီၣ်​ တၢ်ယူးယီၣ်ပာ်ကဲ ယတၢ်စီဆှံအလီၢ်လီၤ. ယမ့ၢ် ယဟိဝၤယွၤလီၤ.

၃၁ “‘သုတဘၣ်ဃၣ်သုသး ဆူပှၤလၢ အဆဲးကျိးဒီးပှၤသံတဂ့ၤ.+ ဒီးသုတဘၣ်သံကွၢ်တၢ်လၢ ပှၤလၢအဟီဆိပာ်စၢၤတၢ် အအိၣ်တဂ့ၤ.+ သုမ့ၢ်မၤဒ်န့ၣ်န့ၣ်​ သုကကဲထီၣ်​ ပှၤလၢအတကဆှီဘၣ်လၢ အဝဲသ့ၣ်အဃိလီၤ. ယမ့ၢ် သုကစၢ် ယဟိဝၤယွၤလီၤ.

၃၂ “‘သုကဘၣ်​ ဂဲၤဆၢထၢၣ်လၢ ပှၤလၢအခိၣ်ဆူၣ်ဝါ အမဲာ်ညါ+ ဒီးသုကဘၣ်​ ပာ်ဖျါထီၣ်​ တၢ်ပာ်ကဲလၢ ပှၤသးပှၢ် အဖီခိၣ်လီၤ.+ ဒီးသုကဘၣ်ပျံၤ သုကစၢ်ယွၤလီၤ.+ ယမ့ၢ် ယဟိဝၤယွၤလီၤ.

၃၃ “‘သုတဘၣ်​ မၤအၢမၤသီ ပှၤထံဂၤကီၢ်ဂၤဖိ လၢအအိၣ်လၢ သုကီၢ်ပူၤတဂ့ၤ.+ ၃၄ ပှၤထံဂၤကီၢ်ဂၤဖိ လၢအအိၣ်ဝဲဆိးဝဲဒီးသုန့ၣ်​ သုကဘၣ်​ ပာ်အီၤ ဒ်ပှၤထံဖိကီၢ်ဖိတဂၤ အသိးလီၤ.+ ဒီးသုဘၣ်အဲၣ်အီၤ ဒ်သုအဲၣ်လီၤ သုနီၢ်ကစၢ်အသး အသိး, မ့ၢ်လၢ သုကဲတ့ၢ် ပှၤထံဂၤကီၢ်ဂၤဖိ လၢကီၢ်အဲၤကူပတူး အပူၤ အဃိလီၤ.+ ယမ့ၢ် သုကစၢ် ယဟိဝၤယွၤလီၤ.

၃၅ “‘ဖဲသုထိၣ်တၢ် တမံၤမံၤ, စီၤတၢ်တမံၤမံၤ မ့တမ့ၢ် ဃီၣ်တၢ်တမံၤမံၤအခါ သုတဘၣ်မၤတၢ် တတီတလိၤတဂ့ၤ.+ ၃၆ သုကဘၣ်သူ စီၤပီၢ်, စီၤပီၢ်သၣ်, နီၣ်ထိၣ်* ဒီးနီၣ်ဃီၣ်* လၢအဘၣ်​ လီၤတံၢ်လီၤဆဲးလီၤ.+ ယမ့ၢ် သုကစၢ် ယဟိဝၤယွၤ လၢအဒုးဟးထီၣ်သုလၢ ကီၢ်အဲၤကူပတူး အပူၤလီၤ. ၃၇ သုကဘၣ်အိၣ်မူမၤထွဲ ယတၢ်ဘျၢခဲလၢာ် ဒီးယတၢ်သိၣ်တၢ်သီ ခဲလၢာ်လီၤ.+ ယမ့ၢ် ယဟိဝၤယွၤလီၤ.’”

၂၀ ယဟိဝၤယွၤ ဆဲးတဲဘၣ်​ စီၤမိၤၡ့လၢ ၂ “နဘၣ်တဲ ပှၤအံၣ်စရ့လးဖိလၢ ‘ပှၤအံၣ်စရ့လးဖိ တဂၤဂၤမ့ၢ်ဂ့ၤ, ပှၤထံဂၤကီၢ်ဂၤဖိလၢ အအိၣ်ဝဲလၢ အံၣ်စရ့လး အကီၢ်ပူၤမ့ၢ်ဂ့ၤ, မ့ၢ်ဟ့ၣ်လီၤ အဖိအလံၤလၢ ကစၢ်မိလး အအိၣ်န့ၣ်​ ကဘၣ်​ တၢ်မၤသံအီၤ သပှၢ်တၢၢ်လီၤ.+ ပှၤအိၣ်လၢ ကီၢ်ပူၤ ကဘၣ်ကွံာ်သံအီၤ လၢလၢၢ်လီၤ. ၃ မ့ၢ်လၢ အဝဲဟ့ၣ်လီၤ အဖိအလံၤတနီၤ လၢကစၢ်မိလးအအိၣ်​ ဒီးမၤဘၣ်အၢ ယတၢ်စီဆှံအလီၢ် ဒီးတပာ်ကဲ ယမံၤစီဆှံဘၣ်အဃိ ယကထီဒါအီၤ ဒီးယကမၤသံအီၤလီၤ.+ ၄ အဝဲမ့ၢ်ဟ့ၣ်လီၤ အဖိအလံၤလၢ ကစၢ်မိလးအအိၣ်​ ဒီးပှၤကီၢ်ဖိတဖၣ်​ မ့ၢ်တပာ်သ့ၣ်ညါအသးဘၣ်​ ဒီးမ့ၢ်တမၤသံအီၤဘၣ်န့ၣ်+ ၅ ယကထီဒါအီၤ ဒီးအဒူၣ်ဖိထၢဖိလၢ ယနီၢ်ကစၢ်လီၤ.+ အဝဲ ဒီးပှၤကိးဂၤဒဲး လၢအနုာ်လီၤ ပၣ်ဃုာ်ဒီးအီၤ လၢကဘူၣ်ထီၣ်ဘါထီၣ်* ကစၢ်မိလးန့ၣ်​ ယကမၤသံ အဝဲသ့ၣ်လီၤ.

၆ “‘ပှၤတဂၤ အသးမ့ၢ်တတီဘၣ်* ခီဖျိလၢ အဃၣ်အသးလၢ ပှၤလၢဆဲးကျိးဒီးပှၤသံ+ မ့တမ့ၢ် ပှၤလၢအဟီဆိပာ်စၢၤတၢ်တဖၣ်+ အအိၣ်န့ၣ်​ ယကထီဒါအီၤ ဒီးမၤသံအီၤလီၤ.+

၇ “‘ယမ့ၢ်သုကစၢ် ယဟိဝၤယွၤ အဃိ သုကဘၣ်​ ပာ်စီဆှံသုသး ဒီးကဲထီၣ်ပှၤလၢ အစီဆှံလီၤ.+ ၈ သုကဘၣ်အိၣ်မူမၤထွဲ ယတၢ်သိၣ်တၢ်သီတဖၣ်လီၤ.+ ယမ့ၢ် ယဟိဝၤယွၤ လၢအပာ်စီဆှံသုလီၤ.+

၉ “‘ပှၤတဂၤဂၤ မ့ၢ်ဆိၣ်အၢ အမိၢ် မ့တမ့ၢ် အပၢ်န့ၣ်​ အဝဲကဘၣ်​ တၢ်မၤသံအီၤ သပှၢ်ကတၢၢ်လီၤ.+ မ့ၢ်လၢ အဝဲ ဆိၣ်အၢအမိၢ် မ့တမ့ၢ် အပၢ် အဃိ အသွံၣ်န့ၣ်​ ကလီၤတီလၢ အနီၢ်ကစၢ် အခိၣ်လိၤလီၤ.

၁၀ “‘ပိာ်ခွါလၢ မၤကမၣ်မုၣ်ကမၣ်ခွါဒီး* ပှၤဂၤအမါန့ၣ်​ ကဘၣ်တၢ်မၤသံအီၤ သပှၢ်ကတၢၢ်လီၤ. အဝဲသ့ၣ်* ကဘၣ်တၢ်မၤသံအီၤလီၤ.+ ၁၁ ပှၤတဂၤလၢ အမံဃုာ်ဒီး အပၢ်အမါန့ၣ်​ မ့ၢ်ဒၣ်​ အမၤမဲာ်ဆှး အပၢ်လီၤ.+ ဒီးပှၤခံဂၤအံၤ ကဘၣ်​ တၢ်မၤသံ အဝဲသ့ၣ်​ သပှၢ်ကတၢၢ်လီၤ. အဝဲသ့ၣ်​ အသွံၣ်​ ကလီၤတီလၢ အနီၢ်ကစၢ် အခိၣ်လိၤလီၤ. ၁၂ ပှၤတဂၤ မ့ၢ်မံဃုာ်ဒီး အဒဲၣ်မုၣ်န့ၣ်​ ပှၤခံဂၤအံၤ ကဘၣ်တၢ်မၤသံ အဝဲသ့ၣ်​ သပှၢ်ကတၢၢ်လီၤ. အမ့ၢ်တၢ်လၢ အထီဒါလိာ်အသးဒီး န့ဆၢၣ်​ ဒီးအဝဲသ့ၣ်​ အသွံၣ်​ ကလီၤတီလၢ အနီၢ်ကစၢ် အခိၣ်လိၤလီၤ.+

၁၃ “‘ပိာ်ခွါတဂၤ မ့ၢ်မံဃုာ်ဒီး ပိာ်ခွါတဂၤ ဒ်ပှၤမံဃုာ်ဒီး ပိာ်မုၣ်အသိးန့ၣ်​ ပှၤခံဂၤအံၤ ကဘၣ်တၢ်မၤသံအဝဲသ့ၣ်​ သပှၢ်ကတၢၢ်လီၤ. မ့ၢ်ဒၣ်​ အဝဲသ့ၣ်​ မၤတၢ်လၢ အလီၤသးဘၣ်အၢတမံၤ+ ဒီးအဝဲသ့ၣ်​ အသွံၣ်​ ကလီၤတီလၢ အနီၢ်ကစၢ် အခိၣ်လိၤလီၤ.

၁၄ “‘ပှၤတဂၤ မ့ၢ်ဟံးန့ၢ်ပိာ်မုၣ်တဂၤ ဒီးဟံးန့ၢ်စ့ၢ်ကီး ပိာ်မုၣ်တဂၤန့ၣ်​ အမိၢ်န့ၣ်​ အမ့ၢ်တၢ်လၢ အလီၤမဲာ်ဆှးလီၤ.+ ပှၤသၢဂၤလၢာ် ကဘၣ်​ တၢ်ဒွဲၣ်အူထီၣ်​ အဝဲသ့ၣ်​ လၢမ့ၣ်အူ+ ဒ်သိး လုၢ်လၢ်သကဲာ်ပဝးလၢ အလီၤမဲာ်ဆှး သုတအိၣ်လၢ သုကျါလၢၤတဂ့ၤ အဂီၢ်လီၤ.

၁၅ “‘ပိာ်ခွါတဂၤ မ့ၢ်မံဃုာ်ဒီး ဆၣ်ဖိကီၢ်ဖိန့ၣ်​ အကဘၣ်တၢ်မၤသံအီၤ သပှၢ်ကတၢၢ်လီၤ. ဒီးသုကဘၣ်မၤသံ ဆၣ်ဖိကီၢ်ဖိအံၤ စ့ၢ်ကီးလီၤ.+ ၁၆ ပိာ်မုၣ်တဂၤ မ့ၢ်ကျဲးစၢး ဒ်သိး ကမံဃုာ်ဒီး ဆၣ်ဖိကီၢ်ဖိန့ၣ်​ နကဘၣ်မၤသံအီၤ ဒီးဆၣ်ဖိကီၢ်ဖိအံၤလီၤ.+ အဝဲသ့ၣ်​ ကဘၣ်တၢ်မၤသံအီၤ သပှၢ်ကတၢၢ်လီၤ. ဒီးအဝဲသ့ၣ်​ အသွံၣ်​ ကလီၤတီလၢ အနီၢ်ကစၢ် အခိၣ်လိၤလီၤ.

၁၇ “‘ပှၤတဂၤ မ့ၢ်မံဃုာ်ဒီး အဒီပုၢ်ဝဲၢ်မုၣ်မ့ၢ်ဂ့ၤ, အပၢ်အဖိမုၣ်မ့ၢ်ဂ့ၤ, အမိၢ်အဖိမုၣ်မ့ၢ်ဂ့ၤန့ၣ်​ အမ့ၢ်တၢ်လၢ အလီၤမဲာ်ဆှးလီၤ.+ ပှၤကဘၣ်မၤသံ အဝဲသ့ၣ်လၢ ကမျၢၢ်အမဲာ်ညါလီၤ. မ့ၢ်ဒၣ်​ အဝဲ မၤမဲာ်ဆှး အဒီပုၢ်ဝဲၢ်မုၣ်​ ဒီးအကဘၣ်​ ဟ့ၣ်တၢ်စံးဆၢ လၢအတၢ်ကမၣ်​ အဃိလီၤ.

၁၈ “‘ပှၤတဂၤ မ့ၢ်မံဃုာ်ဒီး ပိာ်မုၣ်တဂၤ ဖဲအလုၢ်အလၢ်ဟဲ အဆၢကတီၢ်န့ၣ်​ မ့ၢ်ဒၣ်​ အဝဲသ့ၣ်​ ပာ်ဖျါထီၣ်လၢ အဝဲသ့ၣ်​ တပာ်ကဲ တၢ်သွံၣ်ဘၣ်+ ဒီးတၢ်ကဘၣ်​ မၤသံ အဝဲသ့ၣ်​ ခံဂၤလၢာ်လီၤ.

၁၉ “‘နတဘၣ်မံဃုာ်ဒီး နမိၢ်အဒီပုၢ်ဝဲၢ်မုၣ်​ မ့တမ့ၢ် နပၢ် အဒီပုၢ်ဝဲၢ်မုၣ်တဂ့ၤ. နမ့ၢ်မၤဒ်န့ၣ်န့ၣ်​ မ့ၢ်ဒၣ်​ နမၤမဲာ်ဆှး ပှၤလၢအမ့ၢ် နသွံၣ်ထံဖံးညၣ်+ ဒီးသုခံဂၤကဘၣ်​ ဟ့ၣ်တၢ်စံးဆၢ လၢသုတၢ်ကမၣ်အဃိလီၤ. ၂၀ ပှၤတဂၤလၢ အမံဃုာ်ဒီး အဖါတံၢ် အမါန့ၣ်​ မ့ၢ်အမၤမဲာ်ဆှး အဖါတံၢ်လီၤ.+ ဒီးအဝဲသ့ၣ်​ ကဘၣ်​ ဟ့ၣ်တၢ်စံးဆၢ လၢအတၢ်ဒဲးဘး အဃိလီၤ. အဝဲသ့ၣ်ခံဂၤ ကဘၣ်သံ ဖဲအဖိတအိၣ်ထီၣ်ဒံးဘၣ်​ အခါလီၤ. ၂၁ ပှၤတဂၤလၢ အဟံးန့ၢ် အဒီပုၢ်ဝဲၢ်ခွါ အမါန့ၣ်​ အမ့ၢ်တၢ်လၢ အလီၤသးဘၣ်အၢလီၤ.*+ အဝဲ မၤမဲာ်ဆှး အဒီပုၢ်ဝဲၢ်ခွါ ဒီးပှၤခံဂၤအံၤ ကဘၣ်သံ ဖဲအဖိတအိၣ်ထီၣ်ဒံးဘၣ်​ အခါလီၤ.

၂၂ “‘သုဘၣ်အိၣ်မူမၤထွဲ ယတၢ်ဘျၢခဲလၢာ် ဒီးယတၢ်သိၣ်တၢ်သီ ခဲလၢာ်လီၤ.+ သုမ့ၢ်မၤဒ်န့ၣ်န့ၣ်​ ကီၢ်တဘ့ၣ်လၢ ယကဒုးလဲၤအိၣ်သုန့ၣ်​ တဘှိးထီၣ်ကွံာ်သုဘၣ်.+ ၂၃ သုတဘၣ်​ အိၣ်မူပိာ်ထွဲဒ် ပှၤကလုာ်တဖၣ်လၢ ယကနီဟးထီၣ်ကွံာ်လၢ သုမဲာ်ညါ အတၢ်ဘျၢတဖၣ်​ အသိးတဂ့ၤ.+ အဝဲသ့ၣ်​ မၤဝဲ တၢ်သ့ၣ်တဖၣ်န့ၣ်​ ခဲလၢာ် ဒီးယသးဘၣ်အၢ အဝဲသ့ၣ်လီၤ.+ ၂၄ အဃိ ယတဲသုလၢ “သုကမၤန့ၢ် အဝဲသ့ၣ်​ အထံကီၢ် ဒီးယကဟ့ၣ်လီၤသု ကီၢ်တဘ့ၣ်အံၤ လၢတၢ်နုၢ်ထံ ဒီးကနဲစီ ယွၤလီၤဝဲလၢ အပူၤလီၤ.+ ယၤအံၤ ယမ့ၢ် သုကစၢ် ယဟိဝၤယွၤလၢ အပာ်လီၤဆီသုဒီး ပှၤအဂၤ ခဲလၢာ်လီၤ.”+ ၂၅ ဒီးသုဘၣ်ပဲာ်ဖးနီၤဖး ဆၣ်ဖိကီၢ်ဖိလၢ အကဆှီ ဒီးဆၣ်ဖိကီၢ်ဖိလၢ အတကဆှီဘၣ်​ ဒီးထိၣ်တဖၣ်လၢ အကဆှီ ဒီးထိၣ်တဖၣ်လၢ အတကဆှီဘၣ်လီၤ.+ ဆၣ်ဖိကီၢ်ဖိ, ထိၣ်​ ဒီးတၢ်သးသမူလၢ အဟူးဂဲၤလၢ ဟီၣ်ခိၣ်လိၤ တနီၤန့ၣ်​ ယပာ်ပနီၣ်န့ၢ်သု ဒ်တၢ်လၢ အတကဆှီဘၣ်​ အသိးလီၤ. သုတဘၣ်​ ဒုးကဲထီၣ်​ သုနီၢ်ကစၢ်လၢ တၢ်လၢ အလီၤသးဘၣ်အၢ ခီဖျိလၢ တၢ်သ့ၣ်တဖၣ်န့ၣ်​ တမံၤမံၤအဃိ တဂ့ၤ.+ ၂၆ သုကစၢ် ယဟိဝၤယွၤ ယဲဒၣ်အံၤ ယစီဆှံအဃိ သုကဘၣ်စီဆှံ လၢယမဲာ်ညါလီၤ.+ ယပာ်လီၤဆီသုဒီး ပှၤအဂၤ ခဲလၢာ် ဒ်သိး သုကကဲထီၣ်​ ယတၢ်အဂီၢ်လီၤ.+

၂၇ “‘ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ လၢအမၤတၢ်ဒ်ပှၤလၢ အဆဲးကျိးဒီးပှၤသံ မ့တမ့ၢ် အကဲ ပှၤလၢအဟီဆိပာ်စၢၤတၢ်န့ၣ်​ ကဘၣ်​ တၢ်မၤသံအီၤ သပှၢ်ကတၢၢ်လီၤ.+ ပှၤကဘၣ်​ ကွံာ်သံအီၤလၢလၢၢ် ဒီးအသွံၣ်န့ၣ်​ ကလီၤတီလၢ အနီၢ်ကစၢ် အခိၣ်လိၤလီၤ.’”

၂၁ ယဟိဝၤယွၤ တဲဘၣ်​ စီၤမိၤၡ့လၢ “တဲဘၣ်​ စီၤအၤဟရိၣ်​ အဖိခွါ လၢအမ့ၢ် ပှၤလုၢ်တၢ်ဒိၣ်တဖၣ်လၢ ‘ပှၤလုၢ်တၢ်ဒိၣ်န့ၣ်​ တဘၣ်မၤဘၣ်အၢလီၤအသးလၢ ပှၤသံ လၢပှၤဂီၢ်မုၢ်အကျါ အဃိ နီတဂၤဘၣ်.*+ ၂ ဘၣ်ဆၣ်​ အဝဲမၤဘၣ်အၢလီၤအသးလၢ အဘူးအတံၢ်လၢ အဘူးဒီးအီၤ လၢအမ့ၢ် အမိၢ်, အပၢ်, အဖိမုၣ်ဖိခွါ ဒီးအဒီပုၢ်ဝဲၢ်ခွါအဃိန့ၣ်​ သ့ဝဲလီၤ. ၃ ဒီးအဒီပုၢ်ဝဲၢ်မုၣ်​ မ့မ့ၢ် မုၣ်ကနီၤစီဆှံ လၢအတဆီဟံၣ်ဆီဃီဒံးဘၣ်​ ဒီးအိၣ်တပူၤဃီဒီးအီၤန့ၣ်​ အဝဲ မၤဘၣ်အၢလီၤအသးလၢ အဝဲဒၣ်အဃိ သ့လီၤ. ၄ အဝဲတဘၣ်​ မၤဘၣ်အၢအသး ဒီးဒုးကဲထီၣ်အနီၢ်ကစၢ်လၢ ပှၤလၢ အတကဆှီဘၣ်လၢ ပိာ်မုၣ်တဂၤလၢ အအိၣ်ဒီးအဝၤ လၢအပှၤဂီၢ်မုၢ်အကျါ အဃိဘၣ်. ၅ ပှၤလုၢ်တၢ်ဒိၣ်တဖၣ်န့ၣ်​ တဘၣ်လူၤ အခိၣ်ဆူၣ်ဘၣ်,+ တဘၣ်လူၤ အနၢ်ပာ်ထံး အဆူၣ်ဘၣ်​ ဒီးတဘၣ်ကူးလီၤ အနီၢ်ကစၢ်အသးဘၣ်.*+ ၆ ပှၤလုၢ်တၢ်ဒိၣ်သ့ၣ်တဖၣ်​ ကဘၣ်အိၣ်စီဆှံလၢ ကစၢ်ယွၤ အမဲာ်ညါ+ ဒီးအဝဲသ့ၣ်​ တဘၣ်မၤစှၤလီၤ ကစၢ်ယွၤ အမံၤလၤသၣ်ကပီၤဘၣ်.+ အဝဲသ့ၣ်​ မ့ၢ်ပှၤလၢ အလုၢ်ထီၣ်​ ယဟိဝၤယွၤ အတၢ်လုၢ်တဖၣ်​ လၢမ့ၣ်အူ လၢအမ့ၢ် တၢ်အီၣ်လၢ အဘၣ်တၢ်လုၢ်ထီၣ်အီၤလၢ ကစၢ်ယွၤအအိၣ်​ အဃိ အဝဲသ့ၣ်​ ကဘၣ်စီဆှံလီၤ.+ ၇ ပှၤလုၢ်တၢ်ဒိၣ်န့ၣ်​ စီဆှံလၢ ကစၢ်ယွၤ အမဲာ်ညါအဃိ အဝဲသ့ၣ်​ တဘၣ်​ ဆီဟံၣ်ဆီဃီဒီး ပိာ်မုၣ်​ ဆါလီၤအီၣ်သး+ မ့တမ့ၢ် ပိာ်မုၣ်လၢ အတကဲ မုၣ်ကနီၤစီဆှံဘၣ်​ မ့တမ့ၢ် ပိာ်မုၣ်လၢအဝၤ မၤကတၢၢ်ကွံာ် အတၢ်ဆီဟံၣ်ဆီဃီဒီးအီၤ တဂၤန့ၣ်ဘၣ်.+ ၈ မ့ၢ်လၢ အဝဲလုၢ်ထီၣ်​ တၢ်အီၣ်လၢ ကစၢ်ယွၤ အမဲာ်ညါအဃိ နကဘၣ်​ ပာ်စီဆှံအီၤလီၤ.+ ယၤ, ယဟိဝၤယွၤ လၢအပာ်စီဆှံသုန့ၣ်​ စီဆှံဝဲအဃိ ပှၤလုၢ်တၢ်ဒိၣ်န့ၣ်​ ကဘၣ်စီဆှံဝဲလၢ နမဲာ်ညါလီၤ.+

၉ “‘ပှၤလုၢ်တၢ်ဒိၣ်​ အဖိမုၣ်​ မ့ၢ်ဒုးကဲထီၣ်​ အနီၢ်ကစၢ်လၢ ပှၤလၢ အတကဆှီဘၣ်​ ခီဖျိလၢ အကဲပိာ်မုၣ်လၢ အဆါလီၤအီၣ်သး အဃိန့ၣ်​ မ့ၢ်ဝဲ အမၤစှၤလီၤ အပၢ်အလၤကပီၤလီၤ. အဃိ အဝဲကဘၣ်​ တၢ်ဒွဲၣ်အူထီၣ်အီၤလၢ မ့ၣ်အူလီၤ.+

၁၀ “‘ပှၤတဂၤလၢ အကဲထီၣ်​ ပှၤလုၢ်တၢ်ခိၣ်အဒိၣ်ကတၢၢ်လၢ အဒီပုၢ်ဝဲၢ် ပှၤလုၢ်တၢ်ဒိၣ်တဖၣ်​ အကျါန့ၣ်​ သိလၢတၢ်ဒိးဖှူတၢ်အဂီၢ်+ ဘၣ်တၢ်လူလီၤအီၤ လၢအခိၣ်လိၤ ဒီးအဘၣ်​ တၢ်ပာ်ထီၣ်အီၤလၢ အကသိးဝဲ ပှၤလုၢ်တၢ်ဒိၣ်​ အတၢ်ကူတၢ်ကၤတဖၣ်လီၤ.+ အဝဲတဘၣ်ပာ် အခိၣ်ဆူၣ်ဖုရုဘၣ်​ ဒီးတဘၣ်ဖှီညာ် အတၢ်ကူတၢ်သိးဘၣ်.+ ၁၁ အဝဲ တဘၣ်လဲၤမၤဘူး ပှၤသံနီတဂၤဘၣ်+ ဒီးအဝဲ တဘၣ်​ မၤဘၣ်အၢလီၤအသးလၢ အမိၢ်မ့ၢ်ဂ့ၤ, အပၢ်မ့ၢ်ဂ့ၤ အဃိဒၣ်လဲာ်ဘၣ်. ၁၂ မ့ၢ်လၢ တၢ်ဟ့ၣ်လုၢ်ထီၣ်သး အတၢ်ပနီၣ်တခါ လၢအမ့ၢ် ကစၢ်ယွၤအသိလၢ တၢ်ဒိးဖှူတၢ်အဂီၢ်+ အိၣ်လၢအလိၤအဃိ အဝဲ တဘၣ်​ ဟးထီၣ်လၢ တၢ်စီဆှံအလီၢ်ဘၣ်​ ဒီးအဝဲ တဘၣ်မၤစှၤလီၤ ကစၢ်ယွၤ အတၢ်စီဆှံအလီၢ် အလၤကပီၤဘၣ်.+ ယမ့ၢ် ယဟိဝၤယွၤလီၤ.

၁၃ “‘အဝဲ ကဘၣ်ဟံးန့ၢ်အမါလၢ မုၣ်ကနီၤစီဆှံလီၤ.+ ၁၄ အဝဲ တဘၣ်​ ဆီဟံၣ်ဆီဃီဒီး မုၣ်ကမဲမ့ၢ်ဂ့ၤ, ပိာ်မုၣ်လၢ အဝၤ မၤကတၢၢ်ကွံာ် အတၢ်ဆီဟံၣ်ဆီဃီဒီးအီၤ မ့ၢ်ဂ့ၤ, ပိာ်မုၣ်လၢ အတကဲ မုၣ်ကနီၤစီဆှံဘၣ်​ မ့ၢ်ဂ့ၤ, ပိာ်မုၣ်​ ဆါလီၤအီၣ်သး မ့ၢ်ဂ့ၤန့ၣ်ဘၣ်. အဝဲ ကဘၣ်ဟံးန့ၢ် အမါလၢ မုၣ်ကနီၤစီဆှံ လၢအပှၤဂီၢ်မုၢ် အကျါလီၤ. ၁၅ ယမ့ၢ်ယဟိဝၤယွၤ လၢအပာ်စီဆှံအီၤ အဃိ အဝဲ တဘၣ်မၤဘၣ်အၢ အစၢၤအသွဲၣ်​ လၢအပှၤဂီၢ်မုၢ် အကျါဘၣ်.’”+

၁၆ ယဟိဝၤယွၤ ဆဲးတဲ စီၤမိၤၡ့လၢ ၁၇ “တဲဘၣ်​ စီၤအၤဟရိၣ်လၢ ‘ပိာ်ခွါတဂၤဂ့ၤ တဂၤဂ့ၤလၢ နစၢၤနသွဲၣ်​ တဖၣ်အကျါလၢ အနီၢ်ခိက့ၢ်ဂီၤ တလၢတပှဲၤဘၣ်န့ၣ်​ လဲၤလၢ တၢ်လုၢ်လီၢ်အအိၣ်​ ဒ်သိး ကလုၢ်ထီၣ်တၢ်အီၣ်​ ဒ်တၢ်လုၢ်လၢ ကစၢ်ယွၤအအိၣ်အသိး တန့ၢ် နီတဘျီဘၣ်. ၁၈ ပှၤပိာ်ခွါလၢ အလဲၤလၢ တၢ်လုၢ်လီၢ်အအိၣ်​ တန့ၢ်ဘၣ်န့ၣ်​ မ့ၢ်ဝဲပိာ်ခွါ တဂၤဂ့ၤတဂၤဂ့ၤ လၢအနီၢ်ခိက့ၢ်ဂီၤ တလၢတပှဲၤဘၣ်​ ဒ်သိးဒီး ပှၤပိာ်ခွါလၢ အမဲာ်တထံၣ်တၢ်ဘၣ်, ပှၤလၢအခီၣ်ဟးဂီၤ, ပှၤလၢအနါဒ့တူာ်, ပှၤလၢ အစုဖုၣ်ထီခီၣ်ဖုၣ်ထီ, ၁၉ ပှၤလၢအစုကၢ်, ပှၤလၢအခီၣ်ကၢ်, ၂၀ ပှၤလၢအပျိၢ်သကူး, ပှၤလၢအနီၢ်ဖုၣ်ဖုၣ်ဖိ, ပှၤလၢ အအိၣ်ဒီး မဲာ်ချံတၢ်ဆါ, ပှၤလၢအအိၣ်ဒီး တၢ်သးဃ့, ပှၤလၢအအိၣ်ဒီး တၢ်ဖှီ မ့တမ့ၢ် ပှၤလၢအဒံၣ်ချံ ဘၣ်ဒိလီၤ.+ ၂၁ လၢပှၤလုၢ်တၢ်ဒိၣ်​ စီၤအၤဟရိၣ်​ အစၢၤအသွဲၣ်တဖၣ်အကျါ ပိာ်ခွါလၢ အနီၢ်ခိက့ၢ်ဂီၤ တလၢတပှဲၤဘၣ်န့ၣ်​ တဘၣ်လဲၤ လၢတၢ်လုၢ်လီၢ်အအိၣ်​ ဒ်သိး ကလုၢ်ထီၣ်​ တၢ်လုၢ်လၢမ့ၣ်အူ လၢယဟိဝၤယွၤ အအိၣ်ဘၣ်. မ့ၢ်လၢ အနီၢ်ခိက့ၢ်ဂီၤ တလၢတပှဲၤဘၣ်အဃိ အဝဲ တဘၣ်လဲၤလၢ တၢ်လုၢ်လီၢ်အအိၣ်​ ဒ်သိး ကလုၢ်ထီၣ်​ တၢ်အီၣ်​ လၢကစၢ်ယွၤ အအိၣ်ဘၣ်. ၂၂ မ့မ့ၢ်တၢ်အီၣ်လၢ အဘၣ်တၢ်လုၢ်ထီၣ်အီၤလၢ ကစၢ်ယွၤအအိၣ်​ လၢအမ့ၢ် တၢ်လၢအစီဆှံနီၢ်ကီၢ်+ ဒီးတၢ်လၢအစီဆှံန့ၣ်+ အဝဲအီၣ်ဝဲသ့လီၤ. ၂၃ ဘၣ်ဆၣ်​ မ့ၢ်လၢ အနီၢ်ခိက့ၢ်ဂီၤ တလၢပှဲၤဘၣ်အဃိ အဝဲ ဟဲဘူးဒီး ယၣ်ဘျးသဒၢ တန့ၢ်ဘၣ်+ ဒီးအဝဲလဲၤလၢ တၢ်လုၢ်လီၢ် တန့ၢ်ဘၣ်.+ ဒီးအဝဲ တဘၣ်မၤစှၤလီၤ ယတၢ်စီဆှံအလီၢ် အလၤကပီၤဘၣ်,+ မ့ၢ်လၢ ယမ့ၢ် ယဟိဝၤယွၤ လၢအပာ်စီဆှံ အဝဲသ့ၣ်​ အဃိလီၤ.’”+

၂၄ ဒီးစီၤမိၤၡ့ တဲဘၣ်​ စီၤအၤဟရိၣ်​ ဒီးအဖိခွါတဖၣ်​ ဒီးပှၤအံၣ်စရ့လးဖိ ခဲလၢာ်လီၤ.

၂၂ ယဟိဝၤယွၤ တဲစီၤမိၤၡ့လၢ ၂ “တဲဘၣ်​ စီၤအၤဟရိၣ်​ ဒီးအဖိခွါတဖၣ်လၢ အဝဲသ့ၣ်​ ကဘၣ်ပလီၢ်အသး ဒ်သိး အသု တသူကမၣ်​ ပှၤအံၣ်စရ့လးဖိ အတၢ်လုၢ်စီဆှံတဖၣ်​ လၢအဝဲသ့ၣ်​ ပာ်စီဆှံလၢ ယဂီၢ်+ ဒီးမၤစှၤလီၤ ယမံၤစီဆှံ အလၤကပီၤ တဂ့ၤအဂီၢ်လီၤ.+ ယမ့ၢ် ယဟိဝၤယွၤလီၤ. ၃ တဲဘၣ်​ အဝဲသ့ၣ်လၢ ‘ခါဆူညါ ဖဲသုစၢၤသုသွဲၣ်​ တဂၤဂ့ၤတဂ့ၤ တကဆှီဘၣ်​ အဆၢကတီၢ်န့ၣ်​ အဝဲ မ့ၢ်ဟဲဘူးဒီး တၢ်လုၢ်စီဆှံလၢ ပှၤအံၣ်စရ့လးဖိတဖၣ်​ ပာ်စီဆှံလၢ ယဟိဝၤယွၤ အဂီၢ်န့ၣ်​ အဝဲကဘၣ်​ တၢ်မၤသံအီၤ ဒီးကဘၣ်တၢ်မၤလီၤမၢ်ကွံာ်အီၤလၢ ယမဲာ်ညါလီၤ.+ ယမ့ၢ် ယဟိဝၤယွၤလီၤ. ၄ စီၤအၤဟရိၣ်​ အစၢၤအသွဲၣ်​ တဂၤဂ့ၤတဂၤဂ့ၤ တချုးလၢ အဝဲ ကဆှီထီၣ်က့ၤ ဒံးဘၣ်န့ၣ်​ အအီၣ်တၢ်လၢ အစီဆှံတဖၣ်​ တသ့ဒံးဘၣ်.+ အဝဲသ့ၣ်​ ကဲထီၣ်ပှၤလၢ အတကဆှီဘၣ်​ သ့ခီဖျိ အအိၣ်ဒီး တၢ်ဆါအၢမ့ၢ်ဂ့ၤ,+ တၢ်ဆါထံ ဟးထီၣ်လၢ အတၢ်မ့ၢ်ဂ့ၤ,+ အထိးဘၣ်​ ပှၤတဂၤလၢ အကဲပာ်စၢၤ ပှၤလၢ အတကဆှီဘၣ်​ ခီဖျိလၢ အထိးဘၣ်​ ပှၤသံအဃိမ့ၢ်ဂ့ၤ,+ အချံအသၣ်အထံ ဟးထီၣ်မ့ၢ်ဂ့ၤ,+ ၅ အထိးဘၣ်​ တၢ်သးသမူလၢ အလဲၤတၢ် ဒီဖုဒီဂီၢ် လၢအတကဆှီဘၣ်​ မ့ၢ်ဂ့ၤ+ မ့တမ့ၢ် အထိးဘၣ်​ ပှၤတဂၤလၢ အတကဆှီဘၣ်​ ခီဖျိလၢ တၢ်ဂ့ၢ်တမံၤဂ့ၤတမံၤဂ့ၤ အဃိန့ၣ်လီၤ.+ ၆ ပှၤတဂၤလၢ အထိးဘၣ်​ တၢ်သ့ၣ်တဖၣ်အံၤ တမံၤမံၤန့ၣ်​ တကဆှီဘၣ်​ တုၤလၢ ဟါခီ ဒီးတဘၣ်အီၣ်ဝဲ တၢ်လၢအစီဆှံ တမံၤဂ့ၤတမံၤဂ့ၤဘၣ်. ဒီးအဝဲ ကဘၣ်လုၢ်ထံလီၤ.+ ၇ ဖဲမုၢ်လီၤနုာ်အခါ အဝဲ ကကဆှီထီၣ်​ ဒီးဖဲန့ၣ်​ ဝံၤအလီၢ်ခံ အဝဲအီၣ်တၢ်လၢ အစီဆှံ သ့လီၤ. တၢ်အဝဲန့ၣ်​ မ့ၢ်တၢ်လၢ ယဟ့ၣ်လီၤ အဝဲသ့ၣ်​ ဒ်တၢ်အီၣ်​ အသိးလီၤ.+ ၈ ဒီးအဝဲ တဘၣ်အီၣ်ဝဲ ဆၣ်ဖိကီၢ်ဖိလၢ ပှၤထံၣ်န့ၢ်အီၤလၢအသံ မ့တမ့ၢ် ဆၣ်ဖိကီၢ်ဖိလၢ ဆၣ်ဖိကီၢ်ဖိအမံၤတဒု အ့ၣ်ဖှီအီၤ ဒ်သိးအသု တကဲထီၣ်ပှၤလၢ အတကဆှီဘၣ်​ ခီဖျိလၢ တၢ်သ့ၣ်တဖၣ်န့ၣ်​ အဃိ တဂ့ၤအဂီၢ်လီၤ.+ ယမ့ၢ် ယဟိဝၤယွၤလီၤ.

၉ “‘ဒ်သိး အဝဲသ့ၣ်​ သုတဘၣ်​ တၢ်ဒဲးဘး ဒီးသံခီဖျိလၢ အဝဲသ့ၣ်​ မၤဘၣ်အၢ တၢ်လၢ အစီဆှံတဖၣ်အဃိ တဂ့ၤအဂီၢ်န့ၣ်​ အဝဲသ့ၣ်​ ကဘၣ်ဒိကနၣ်​ ယတၢ်မၤလိာ်လီၤ. ယမ့ၢ် ယဟိဝၤယွၤလၢ အပာ်စီဆှံ အဝဲသ့ၣ်လီၤ.

၁၀ “‘ပှၤလၢ အတအိၣ်ဒီး တၢ်ခွဲးတၢ်ယာ်ဘၣ်န့ၣ်* အီၣ်တၢ်လၢ အစီဆှံ တန့ၢ် နီတမံၤဘၣ်.+ ပှၤထံဂၤကီၢ်ဂၤဖိလၢ အဟဲအိၣ်ဒီး ပှၤလုၢ်တၢ်ဒိၣ်မ့ၢ်ဂ့ၤ, ပှၤလၢ အဒိးငါအသးလၢ တၢ်မၤအဂီၢ်မ့ၢ်ဂ့ၤ အီၣ်တၢ်လၢ အစီဆှံ တန့ၢ်နီတမံၤဘၣ်. ၁၁ ဘၣ်ဆၣ်​ ပှၤတဂၤဂၤလၢ ပှၤလုၢ်တၢ်ဒိၣ်​ ပှ့ၤအီၤလၢ အစ့န့ၣ်​ အအီၣ်ဝဲ တၢ်လၢအစီဆှံ သ့လီၤ. ဒီးကုၢ်လၢ အအိၣ်ဖျဲၣ်ထီၣ်လၢ ပှၤလုၢ်တၢ်ဒိၣ်​ အဟံၣ်ပူၤန့ၣ်​ အီၣ်ဝဲ ပှၤလုၢ်တၢ်ဒိၣ်​ အတၢ်အီၣ်သ့ဝဲစ့ၢ်ကီးလီၤ.+ ၁၂ ပှၤလုၢ်တၢ်ဒိၣ်​ အဖိမုၣ်​ မ့ၢ်ဆီဟံၣ်ဆီဃီဒီး ပှၤလၢအတမ့ၢ် ပှၤလုၢ်တၢ်ဒိၣ်ဘၣ်န့ၣ်​ အဝဲ တဘၣ်အီၣ်​ တၢ်လၢအစီဆှံ လၢပှၤလုၢ်ထီၣ်အီၤတဖၣ်လၢၤဘၣ်. ၁၃ ဘၣ်ဆၣ်​ ပှၤလုၢ်တၢ်ဒိၣ်​ အဖိမုၣ်န့ၣ်​ မ့ၢ်ကဲထီၣ်​ မုၣ်ကမဲ မ့တမ့ၢ် အဝၤ မ့ၢ်မၤကတၢၢ်ကွံာ် အတၢ်ဆီဟံၣ်ဆီဃီဒီးအီၤ ဒီးအဖိ မ့ၢ်တအိၣ်ဘၣ်​ ဒီးမ့ၢ်ဟဲက့ၤအိၣ်လၢ အပၢ်အဟံၣ်​ ဒ်အသးစၢ်ခါ အသိးန့ၣ်​ အဝဲ ကအီၣ်ဘၣ်ဝဲ အပၢ် အတၢ်အီၣ်လီၤ.+ ဘၣ်ဆၣ်​ ပှၤလၢအတအိၣ်ဒီး တၢ်ခွဲးတၢ်ယာ်ဘၣ်န့ၣ်​ တဘၣ်အီၣ်ဝဲဘၣ်.

၁၄ “‘ပှၤပိာ်ခွါတဂၤ မ့ၢ်အီၣ်ကမၣ်ဘၣ်ဖုး တၢ်လၢအစီဆှံန့ၣ်​ အဝဲ ကဘၣ်ဟဲစိာ် တၢ်လုၢ်စီဆှံအဂၤ လၢပှၤလုၢ်တၢ်ဒိၣ်အအိၣ်​ တကးဒံးဘၣ်​ အကဘၣ်ဟ့ၣ်အါထီၣ်ဝဲ ယဲၢ်ပူတပူလီၤ.+ ၁၅ အဃိ ပှၤလုၢ်တၢ်ဒိၣ်တဖၣ်​ တဘၣ်မၤဘၣ်အၢ တၢ်လုၢ်စီဆှံတဖၣ်လၢ ပှၤအံၣ်စရ့လးဖိတဖၣ်​ ဟဲမၤဘူၣ်လီၤဝဲလၢ ယဟိဝၤယွၤအအိၣ်+ ၁၆ ဒီးဒုးအိၣ်ထီၣ်​ တၢ်စံၣ်ညီၣ်လၢ ပှၤအံၣ်စရ့လးဖိ အဖီခိၣ်​ ခီဖျိလၢ ပှၤအံၣ်စရ့လးဖိ အီၣ်ဘၣ်တၢ်လၢ အစီဆှံတဖၣ်​ အဃိန့ၣ်တဂ့ၤ. ယမ့ၢ် ယဟိဝၤယွၤလၢ အပာ်စီဆှံ အဝဲသ့ၣ်လီၤ.’”

၁၇ ယဟိဝၤယွၤ ဆဲးတဲစီၤမိၤၡ့လၢ ၁၈ “တဲဘၣ်​ စီၤအၤဟရိၣ်​ ဒီးအဖိခွါတဖၣ်​ ဒီးပှၤအံၣ်စရ့လးဖိတဖၣ်လၢ ‘ပှၤအံၣ်စရ့လးဖိ တဂၤ မ့တမ့ၢ် ပှၤထံဂၤကီၢ်ဂၤဖိ လၢကီၢ်အံၣ်စရ့လး အပူၤတဂၤ မ့ၢ်ဟ့ၣ်လုၢ်ထီၣ်ဝဲ တၢ်လုၢ်ဒွဲၣ်အူ+ လၢယဟိဝၤယွၤအအိၣ်​ ဒ်သိး ကမၤလၢပှဲၤ အတၢ်အၢၣ်လီၤ မ့ၢ်ဂ့ၤ ဒ်တၢ်လုၢ်လၢ တၢ်သးအိၣ်အပူၤ မ့ၢ်ဂ့ၤန့ၣ်+ ၁၉ အဝဲကဘၣ်​ ဟ့ၣ်လုၢ်ထီၣ်ဝဲ ကျီၢ်ဖါ မ့တမ့ၢ် သိဖါဖိ မ့တမ့ၢ် မဲာ်တဲးလဲးဖါလၢ အလၢအပှဲၤတဒု+ ဒ်သိး အဝဲကဒိးန့ၢ်ဘၣ်​ ကစၢ်ယွၤ အတၢ်ဘၣ်သး အဂီၢ်လီၤ. ၂၀ သုတဘၣ်​ ဟ့ၣ်လုၢ်ထီၣ်​ ဆၣ်ဖိကီၢ်ဖိလၢ အအိၣ်ဒီး တၢ်တလၢတပှဲၤ နီတမံၤဘၣ်.+ သုမ့ၢ်ဟ့ၣ်လုၢ်ထီၣ်တၢ် ဒ်န့ၣ်န့ၣ်​ သုတဒိးန့ၢ်ဘၣ်​ အတၢ်ဘၣ်သးဘၣ်.

၂၁ “‘ပှၤတဂၤဂၤ မ့ၢ်လုၢ်ထီၣ်​ တၢ်လုၢ်အိၣ်ဃူအိၣ်ဖိးလၢ+ ယဟိဝၤယွၤအအိၣ်​ ဒ်သိး ကမၤလၢပှဲၤ တၢ်အၢၣ်လီၤ မ့တမ့ၢ် ဒ်တၢ်လုၢ်လၢ တၢ်သးအိၣ်အပူၤန့ၣ်​ အကဘၣ်လုၢ်ထီၣ်​ ကျီၢ် မ့တမ့ၢ် သိ မ့တမ့ၢ် မဲာ်တဲးလဲးလၢ အလၢအပှဲၤတဒု ဒ်သိး ကဒိးန့ၢ်ဘၣ်​ ကစၢ်ယွၤ အတၢ်ဘၣ်သး အဂီၢ်လီၤ. ဆၣ်ဖိကီၢ်ဖိ တဒုအံၤန့ၣ်​ တဘၣ်အိၣ်ဒီး တၢ်တလၢတပှဲၤ နီတခါဘၣ်. ၂၂ ဆၣ်ဖိကီၢ်ဖိလၢ တၢ်လုၢ်အဂီၢ်န့ၣ်​ အမဲာ် တဘၣ်ဘျီၣ်ဘၣ်, အဃံတဘၣ်ကၢ် နီတဘိဘၣ်, အတဘၣ်​ ဘၣ်ကူးဘၣ်ကွးဘၣ်, အတဘၣ်အိၣ်ဒီး အထူးဘၣ်, အတဘၣ်အိၣ်ဒီး တၢ်သးဃ့ဘၣ်, အတဘၣ်အိၣ်ဒီး တၢ်ဖှီဘၣ်. တၢ်သ့ၣ်တဖၣ်အံၤ သုတဘၣ်​ ဟဲစိာ်လၢ ယဟိဝၤယွၤ အအိၣ်ဘၣ်​ ဒီးသုတဘၣ်​ လုၢ်ထီၣ်အီၤလၢ ယဟိဝၤယွၤ အတၢ်လုၢ်လီၢ် အဖီခိၣ်ဘၣ်. ၂၃ နလုၢ်ထီၣ်​ ကျီၢ်ဖါတဒု မ့တမ့ၢ် သိတဒု လၢအစုဖုၣ်ထီခီၣ်ဖုၣ်ထီ ဒ်တၢ်လုၢ်လၢ တၢ်သးအိၣ်အပူၤ သ့ဝဲလီၤ. ဘၣ်ဆၣ်​ နမ့ၢ်လုၢ်ထီၣ်​ တၢ်သ့ၣ်တဖၣ်အံၤလၢ တၢ်လုၢ်လၢ တၢ်အၢၣ်လီၤအဂီၢ်န့ၣ်​ တၢ်တတူၢ်လိာ်အီၤဘၣ်. ၂၄ ဆၣ်ဖိကီၢ်ဖိလၢ အဒံၣ်ချံ ဘၣ်ဒိမ့ၢ်ဂ့ၤ, သဘှံးမ့ၢ်ဂ့ၤ, အဘၣ်တၢ်ဒ့ကွံာ် အဒံၣ်မ့ၢ်ဂ့ၤန့ၣ်​ သုတဘၣ်​ ဟဲစိာ်အီၤ လၢယဟိဝၤယွၤ အအိၣ်ဘၣ်. ဒီးသုတဘၣ်​ လုၢ်ထီၣ်​ ဆၣ်ဖိကီၢ်ဖိ ဒ်အံၤတဖၣ်လၢ သုကီၢ်ပူၤဘၣ်. ၂၅ ပှၤထံဂၤကီၢ်ဖိ မ့ၢ်ဟ့ၣ်လီၤသု ဆၣ်ဖိကီၢ်ဖိဒ်န့ၣ်တဖၣ်န့ၣ်​ သုတဘၣ်လုၢ်ထီၣ်အီၤ ဒ်တၢ်အီၣ်လၢ ကစၢ်ယွၤ အမဲာ်ညါအသိးဘၣ်. အမ့ၢ်တၢ်လၢ အဘၣ်အၢ ဒီးတလၢတပှဲၤဘၣ်​ အဃိ သုမ့ၢ်ဟ့ၣ်လုၢ်ထီၣ်​ တၢ်သ့ၣ်တဖၣ်န့ၣ်န့ၣ်​ သုတဒိးန့ၢ်ဘၣ်​ အတၢ်ဘၣ်သးဘၣ်.’”

၂၆ ယဟိဝၤယွၤ ဆဲးတဲ စီၤမိၤၡ့လၢ ၂၇ “ဖဲကျီၢ်ဖါ မ့တမ့ၢ် သိဖါ မ့တမ့ၢ် မဲာ်တဲးလဲး ဟဲအိၣ်ဖျဲၣ်ထီၣ်အခါ အကဘၣ်အိၣ်ဒီး အမိၢ်နွံသီလီၤ.+ ဘၣ်ဆၣ်​ စးထီၣ်ဖဲဃိးသီတသီ ဒီးဆူမဲာ်ညါန့ၣ်​ သုဟ့ၣ်လီၤအီၤဒ် တၢ်လုၢ်လၢ မ့ၣ်အူလၢ ယဟိဝၤယွၤအအိၣ်​ ဒီးအဝဲက တူၢ်လိာ်အီၤလီၤ. ၂၈ ကျီၢ်မ့ၢ်ဂ့ၤ သိမ့ၢ်ဂ့ၤ သုတဘၣ်မၤသံအီၤ ဒီးအဖိ လၢတနံၤဃီ အတီၢ်ပူၤဘၣ်.+

၂၉ “သုမ့ၢ် ဟ့ၣ်လုၢ်ထီၣ်​ တၢ်လုၢ်စံးဘျုးစံးဖှိၣ်က့ၤလၢ ယဟိဝၤယွၤအအိၣ်န့ၣ်+ သုကဘၣ်ဟ့ၣ်လုၢ်ထီၣ်အီၤ လၢကျဲလၢအဘၣ်​ ဒ်သိး သုကဒိးန့ၢ်ဘၣ်​ ကစၢ်ယွၤ အတၢ်ဘၣ်သး အဂီၢ်လီၤ. ၃၀ ဒီးပှၤကဘၣ်အီၣ်အီၤ ဖဲမုၢ်နံၤ အဝဲန့ၣ်လီၤ. သုတဘၣ်​ ပာ်ဃာ်အီၤ တုၤလၢဂီၤခီ နီတစဲးဘၣ်.+ ယမ့ၢ် ယဟိဝၤယွၤလီၤ.

၃၁ “သုကဘၣ်​ အိၣ်မူမၤထွဲ ယတၢ်မၤလိာ်တဖၣ်လီၤ.+ ယမ့ၢ် ယဟိဝၤယွၤလီၤ. ၃၂ သုတဘၣ်​ မၤစှၤလီၤ ယမံၤစီဆှံ အလၤကပီၤ တဂ့ၤ.+ ယကဘၣ်​ တၢ်ပာ်စီဆှံယၤ လၢပှၤအံၣ်စရ့လးဖိတဖၣ်​ အကျါလီၤ.+ ယမ့ၢ်ယဟိဝၤယွၤ လၢအပာ်စီဆှံသု+ ၃၃ ဒီးအဒုးဟးထီၣ်သုလၢ ကီၢ်အဲၤကူပတူး ဒ်သိး ယကပာ်ဖျါထီၣ်န့ၢ်သုလၢ ယမ့ၢ် ကစၢ်ယွၤလီၤ.+ ယမ့ၢ်ယဟိဝၤယွၤလီၤ.”

၂၃ ယဟိဝၤယွၤ ဆဲးတဲ စီၤမိၤၡ့လၢ ၂ “တဲဘၣ်​ ပှၤအံၣ်စရ့လးဖိလၢ ‘ယဟိဝၤယွၤ အဘူၣ်တဖၣ်လၢ သုကဘၣ်မၤန့ၣ်*+ မ့ၢ်ဝဲ တၢ်အိၣ်ဖှိၣ်စီဆှံတဖၣ်လီၤ. တၢ်သ့ၣ်တဖၣ်အံၤ မ့ၢ်ဝဲ ယဘူၣ်တဖၣ်လီၤ.

၃ “‘သုအိၣ်ဒီး မုၢ်နံၤဃုသီ လၢသုကမၤတၢ်မၤ အဂီၢ်လီၤ. ဘၣ်ဆၣ်​ နွံသီတသီန့ၣ်​ မ့ၢ်တၢ်အိၣ်ဘှံးအနံၤ+ ဒီးမ့ၢ်ဝဲ တၢ်အိၣ်ဖှိၣ်စီဆှံအနံၤလီၤ. အဃိ သုတဘၣ်​ မၤတၢ်မၤ နီတမံၤဘၣ်. ဖဲသုအိၣ်တၢ်လီၢ် တပူၤဂ့ၤတပူၤဂ့ၤန့ၣ်​ မုၢ်နံၤအံၤ မ့ၢ်ဝဲ မုၢ်အိၣ်ဘှံးနံၤလၢ ယဟိဝၤယွၤ အဂီၢ်လီၤ.+

၄ “‘ယဟိဝၤယွၤ အဘူၣ်တဖၣ်န့ၣ်​ သုကဘၣ်မၤအီၤ ဖဲတၢ်ဆၢကတီၢ် ဘၣ်အခါလီၤ. တၢ်သ့ၣ်တဖၣ်အံၤ မ့ၢ်ဝဲ တၢ်အိၣ်ဖှိၣ်စီဆှံတဖၣ်လီၤ. ၅ လါအဆိကတၢၢ်တလါ, လါထီၣ်​ ၁၄ သီတသီ+ ဖဲမုၢ်လီၤနုာ် အဆၢကတီၢ်န့ၣ်* မ့ၢ်ဝဲ ဘူၣ်လဲၤကပာ်လၢ+ ယဟိဝၤယွၤ အဂီၢ်လီၤ.

၆ “‘ဖဲလါအဝဲန့ၣ်​ ၁၅ သီတသီန့ၣ်​ ဘူၣ်ကိၣ်လၢ အတပၣ်ဒီးကိၣ်မံၣ်ဘၣ်​ လၢယဟိဝၤယွၤ အဂီၢ် ကစးထီၣ်ဝဲလီၤ.+ သုကဘၣ်အီၣ်​ ကိၣ်လၢအတပၣ်ဒီး ကိၣ်မံၣ်ဘၣ်​ နွံသီလီၤ.+ ၇ အဆိကတၢၢ်တသီန့ၣ်​ သုကဘၣ်မၤ တၢ်အိၣ်ဖှိၣ်စီဆှံလီၤ.+ သုတဘၣ်​ မၤတၢ်မၤဆူၣ်ဆူၣ်​ နီတခါဘၣ်. ၈ လၢတၢ်န့ၣ်အလီၢ် သုကဘၣ်​ လုၢ်ထီၣ်​ တၢ်လုၢ်လၢမ့ၣ်အူလၢ ယဟိဝၤယွၤအအိၣ်​ နွံသီလီၤ. ဒီးဖဲနွံသီတသီန့ၣ်​ တၢ်အိၣ်ဖှိၣ်စီဆှံ ကဘၣ်ဝဲလီၤ. သုတဘၣ်​ မၤတၢ်မၤဆူၣ်ဆူၣ်​ နီတမံၤဘၣ်.’”

၉ ယဟိဝၤယွၤ ဆဲးတဲ စီၤမိၤၡ့လၢ ၁၀ “တဲပှၤအံၣ်စရ့လးဖိလၢ ‘ဖဲသုလဲၤနုာ်လီၤလၢ ကီၢ်တဘ့ၣ်လၢ ယကဟ့ၣ်လီၤသု ဒီးဖဲသုကူးဘုအခါ သုကဘၣ်လဲၤစိာ် တၤသၣ်ဆိအဘု တကဒိၣ်လၢ+ ပှၤလုၢ်တၢ်ဒိၣ်​ အအိၣ်လီၤ.+ ၁၁ ဒီးဖဲမုၢ်အိၣ်ဘှံးနံၤဝံၤ အလီၢ်ခံတသီန့ၣ်​ ပှၤလုၢ်တၢ်ဒိၣ်​ ကဝံၢ်ဝၢ်ဝဲ ဘုတကဒိၣ်န့ၣ်​ လၢအလီၢ်ခံ ဒီးအမဲာ်ညါ လၢယဟိဝၤယွၤ အမဲာ်ညါ ဒ်သိး သုကန့ၢ်ဘၣ်​ အတၢ်ဘၣ်သး အဂီၢ်လီၤ. ၁၂ ဖဲမုၢ်နံၤလၢ ပှၤလုၢ်တၢ်ဒိၣ်​ ဝံၢ်ဝၢ်ဘုကဒိၣ်​ လၢသုဂီၢ်န့ၣ်​ သုကဘၣ်လုၢ်ထီၣ်​ သိဖါဖိ လၢအလၢအပှဲၤ လၢအအိၣ်တနံၣ်​ ဒ်တၢ်လုၢ်မ့ၣ်အူအသိး လၢယဟိဝၤယွၤ အအိၣ်လီၤ. ၁၃ ဒီးတၢ်လုၢ်ဘုန့ၣ်​ ကဘၣ်မ့ၢ်ဝဲ ကိၣ်ကမူၣ်လၢအဂ့ၤ ခံကံလိ* လၢအဃါဃုာ်အသးဒီးသိ ဒ်အမ့ၢ် တၢ်လုၢ်လၢမ့ၣ်အူလၢ ယဟိဝၤယွၤအအိၣ်​ ဒီးမ့ၢ်ဝဲ တၢ်နၢမူလၢ အမၤမုာ်အသးလီၤ. မ့မ့ၢ် စပံးထံလၢ တၢ်လုၢ်တၢ်ပာ် အဂီၢ်န့ၣ်​ ကဘၣ်မ့ၢ်ဝဲ စပံးထံ တလံးထၢၣ်လီၤ.* ၁၄ တချုးလၢ သုဟဲစိာ် တၢ်လုၢ်လၢ ကစၢ်ယွၤ အအိၣ်ဒံးဘၣ်​ အနံၤန့ၣ်​ သုတဘၣ်အီၣ်​ ကိၣ်မ့ၢ်ဂ့ၤ, ဘုဝဲာ်မ့ၢ်ဂ့ၤ, ဘုစဲၤသံသိမ့ၢ်ဂ့ၤန့ၣ်ဘၣ်. အဝဲန့ၣ်​ မ့ၢ်တၢ်သိၣ်တၢ်သီ လၢအဂၢၢ်အကျၢၤလၢ သုဒီးသုစၢၤသုသွဲၣ်​ ခဲလၢာ်အဂီၢ် ဖဲသုအိၣ်တၢ်လီၢ် တပူၤဂ့ၤတပူၤဂ့ၤလီၤ.

၁၅ “‘စးထီၣ်ဖဲ မုၢ်အိၣ်ဘှံးနံၤ ဝံၤအလီၢ်ခံတသီ လၢအမ့ၢ် မုၢ်နံၤလၢ သုလဲၤစိာ် ဘုတကဒိၣ်လၢ တၢ်လုၢ်ဝံၢ်ဝၢ် အဂီၢ်န့ၣ်​ သုကဘၣ်​ ဂံၢ်အါထီၣ်ဒံး နွံနွံလီၤ.*+ အနွံတဖၣ်န့ၣ်​ တနွံစုာ်စုာ် ကဘၣ်အိၣ်ဝဲ နွံသီပှဲၤပှဲၤလီၤ. ၁၆ သုကဘၣ်ဂံၢ် တုၤလီၤလၢ နွံနွံဝံၤအလီၢ်ခံတသီ အဃိကအိၣ်ဝဲအသီ ၅၀+ ဝံၤဒီးသုကဘၣ်ဟဲစိာ် ဘုစဲၤသံသိ ဒ်တၢ်လုၢ်ဘုလၢ ယဟိဝၤယွၤ အအိၣ်အသိးလီၤ.+ ၁၇ သုကဘၣ်တ့ ကိၣ်ခံလိၣ်​ လၢသုအိၣ်တၢ်လီၢ် ဒီးဟဲစိာ်အီၤ ဒ်တၢ်လုၢ်ဝံၢ်ဝၢ်အသိးလီၤ. ဒီးကိၣ်အံၤန့ၣ်​ သုကဘၣ်တ့အီၤလၢ ကိၣ်ကမူၣ်လၢအဂ့ၤ ခံကံလိလီၤ. သုကဘၣ်​ ကုၢ်အီၤဒီး ကိၣ်မံၣ်+ ဒ်အမ့ၢ် တၤသၣ်ဆိ လၢယဟိဝၤယွၤ အဂီၢ်လီၤ.+ ၁၈ ဒီးဖဲသုဟဲစိာ် ကိၣ်ခံလိၣ်အံၤအခါ သုကဘၣ်ဟဲမူၤစ့ၢ်ကီး သိဖိလၢ အလၢအပှဲၤ လၢအအိၣ်တနံၣ်​ နွံဒု ဒီးကျီၢ်ဖိတဒု, ဒီးသိဖါ ခံဒုလီၤ.+ တၢ်သ့ၣ်တဖၣ်န့ၣ်​ ကမ့ၢ်ဝဲ တၢ်လုၢ်ဒွဲၣ်အူလၢ ယဟိဝၤယွၤအဂီၢ် ဃုာ်ဒီး တၢ်လုၢ်ဘု ဒီးစပံးထံလၢ တၢ်လုၢ်တၢ်ပာ် အဂီၢ်လီၤ. ဒီးအမ့ၢ်ဝဲ တၢ်လုၢ်လၢမ့ၣ်အူ ဒီးတၢ်နၢမူလၢ အမၤမုာ် ယဟိဝၤယွၤ အသးလီၤ. ၁၉ ဒီးသုကဘၣ်လုၢ်ထီၣ်​ မဲာ်တဲးလဲးဖိတဒု ဒ်တၢ်လုၢ်လၢ တၢ်ဒဲးဘးအဂီၢ်+ ဒီးသိဖါဖိ ခံဒုလၢ အသးအိၣ်တနံၣ်​ ဒ်တၢ်လုၢ်အိၣ်ဃူအိၣ်ဖိး အသိးလီၤ.+ ၂၀ ဒီးသိဖါဖိခံဒု ဒီးတၤသၣ်ဆိ အကိၣ်န့ၣ်​ ပှၤလုၢ်တၢ်ဒိၣ်​ ကဝံၢ်ဝၢ်ဝဲ လၢအလီၢ်ခံဒီး အမဲာ်ညါ ဒ်တၢ်လုၢ်ဝံၢ်ဝၢ်အသိး လၢယဟိဝၤယွၤ အမဲာ်ညါလီၤ. တၢ်သ့ၣ်တဖၣ်န့ၣ်​ မ့ၢ်ဝဲ တၢ်လၢအစီဆှံလၢ ယဟိဝၤယွၤအမဲာ်ညါ ဒီးမ့ၢ်ဝဲ ပှၤလုၢ်တၢ်ဒိၣ်​ အတၢ်လီၤ.+ ၂၁ ဖဲမုၢ်နံၤ အဝဲန့ၣ်​ သုကဘၣ်​ ဘိးဘၣ်သ့ၣ်ညါလၢ+ တၢ်အိၣ်ဖှိၣ်စီဆှံ ကဘၣ်ဝဲတခါ လၢသုဂီၢ်လီၤ. သုတဘၣ်​ မၤတၢ်မၤဆူၣ်ဆူၣ်​ နီတခါဘၣ်. အဝဲန့ၣ်မ့ၢ်ဝဲ တၢ်သိၣ်တၢ်သီလၢ အဂၢၢ်အကျၢၤ လၢသု ဒီးသုစၢၤသုသွဲၣ်ခဲလၢာ်အဂီၢ် ဖဲသုအိၣ်လၢတၢ်လီၢ် တပူၤဂ့ၤ တပူၤဂ့ၤလီၤ.

၂၂ “‘ဖဲသုကူးဘုလၢ သုဟီၣ်ခိၣ်လီၢ်အခါ သုတဘၣ်ကူး သုစံာ်ပျီအနၢၣ်​ လၢာ်လၢာ်ဆ့ဆ့ဘၣ်. ဒီးသုတဘၣ်ထၢဖှိၣ်က့ၤ တၢ်လၢအအိၣ်တ့ၢ်တဖၣ်ဘၣ်.+ သုကဘၣ်​ ပာ်တ့ၢ်အီၤလၢ ပှၤဖှီၣ်ဖိယာ်ဖိ+ ဒီးပှၤထံဂၤကီၢ်ဂၤဖိ အဂီၢ်လီၤ.+ ယမ့ၢ် သုကစၢ် ယဟိဝၤယွၤလီၤ.’”

၂၃ ယဟိဝၤယွၤ ဆဲးတဲ စီၤမိၤၡ့လၢ ၂၄ “တဲဘၣ်​ ပှၤအံၣ်စရ့လးဖိ တဖၣ်လၢ ‘ဖဲလါနွံလါတလါ, လါထီၣ်တသီန့ၣ်​ သုကဘၣ်အိၣ်ဘှံး လၢသုတၢ်မၤ ခဲလၢာ်လီၤ. ပှၤကဘိးဘၣ်သ့ၣ်ညါဝဲ မုၢ်နံၤအဝဲအံၤ ခီဖျိ ကွဲၤသီၣ်ထီၣ်​ ဒ်သိး သုကသ့ၣ်နီၣ်ထီၣ်လၢ မုၢ်နံၤအံၤ+ မ့ၢ်တၢ်အိၣ်ဖှိၣ်စီဆှံ အဂီၢ်လီၤ. ၂၅ သုတဘၣ်​ မၤတၢ်မၤဆူၣ်ဆူၣ်​ နီတခါဘၣ်​ ဒီးသုကဘၣ်လုၢ်ထီၣ်​ တၢ်လုၢ်လၢမ့ၣ်အူ လၢယဟိဝၤယွၤ အအိၣ်လီၤ.’”

၂၆ ယဟိဝၤယွၤ ဆဲးတဲ စီၤမိၤၡ့လၢ ၂၇ “ဖဲလါနွံလါတလါ, လါထီၣ်​ အသီတဆံန့ၣ်​ မ့ၢ်ဝဲ တၢ်မၤဘၣ်လိာ်ဖိးဒ့က့ၤတၢ် အမုၢ်နံၤလီၤ.+ သုကဘၣ်မၤ တၢ်အိၣ်ဖှိၣ်စီဆှံ ဒီးသုကဘၣ်​ သိၣ်ဃီၣ်လီၤသုသးလီၤ.*+ ဒီးသုကဘၣ်လုၢ်ထီၣ်​ တၢ်လုၢ်လၢမ့ၣ်အူ လၢယဟိဝၤယွၤ အအိၣ်လီၤ. ၂၈ မ့ၢ်လၢမုၢ်နံၤအဝဲန့ၣ်​ မ့ၢ်ဝဲ တၢ်မၤဘၣ်လိာ်ဖိးဒ့က့ၤတၢ် အမုၢ်နံၤ လၢတၢ်ကမၤဘၣ်လိာ်ဖိးဒ့က့ၤတၢ်လၢ+ သုဂီၢ် လၢသုကစၢ်ယဟိဝၤယွၤ အမဲာ်ညါအဃိ သုတဘၣ်​ မၤတၢ်မၤ နီတမံၤဘၣ်. ၂၉ ဖဲတၢ်တနံၤန့ၣ်​ ပှၤလၢ အတသိၣ်ဃီၣ်လီၤအသးဘၣ်န့ၣ်* ကဘၣ်​ တၢ်မၤသံကွံာ်အီၤလီၤ.+ ၃၀ ဒီးဖဲ တၢ်တနံၤန့ၣ်​ ပှၤတဂၤဂ့ၤတဂၤဂ့ၤလၢ အမၤတၢ်မၤ တမံၤဂ့ၤတမံၤဂ့ၤန့ၣ်​ ယကမၤဟးဂီၤကွံာ်အီၤလီၤ. ၃၁ သုတဘၣ်မၤတၢ်မၤ နီတမံၤတဂ့ၤ. အဝဲန့ၣ်​ မ့ၢ်ဝဲ တၢ်သိၣ်တၢ်သီလၢ အဂၢၢ်အကျၢၤလၢ သုဒီးသုစၢၤသုသွဲၣ်​ ခဲလၢာ်အဂီၢ် ဖဲသုအိၣ်တၢ်လီၢ် တပူၤဂ့ၤတပူၤဂ့ၤလီၤ. ၃၂ အမ့ၢ်ဝဲ မုၢ်အိၣ်ဘှံးအနံၤလၢ သုကဘၣ်အိၣ်ဘှံး လၢသုတၢ်မၤ ခဲလၢာ်လီၤ. အဃိ ဖဲလါထီၣ်​ ၉ သီတသီ ဟါလီၤခီန့ၣ်​ သုကဘၣ်​ သိၣ်ဃီၣ်လီၤသုသးလီၤ.+ သုကဘၣ်မၤထွဲ သုမုၢ်အိၣ်ဘှံးအနံၤအံၤ အတၢ်ဘျၢ စးထီၣ်လၢ ဟါလီၤခီ တုၤလီၤလၢ လၢခံတသီ ဟါလီၤခီလီၤ.”

၃၃ ယဟိဝၤယွၤ ဆဲးတဲ စီၤမိၤၡ့လၢ ၃၄ “တဲဘၣ်​ ပှၤအံၣ်စရ့လးဖိတဖၣ်လၢ ‘လါနွံလါတလါ, လါထီၣ်​ ၁၅ သီတသီန့ၣ်​ သုကဘၣ်​ မၤဘူၣ်ဒဲ လၢအယံာ်ဝဲ နွံသီ လၢယဟိဝၤယွၤ အဂီၢ်လီၤ.+ ၃၅ ဖဲအဆိကတၢၢ်တနံၤန့ၣ်​ သုကဘၣ်မၤ တၢ်အိၣ်ဖှိၣ်စီဆှံ ဒီးသုတဘၣ်​ မၤတၢ်မၤဆူၣ်ဆူၣ်​ နီတမံၤဘၣ်. ၃၆ သုကဘၣ်​ လုၢ်ထီၣ်​ တၢ်လုၢ်လၢ မ့ၣ်အူလၢ ယဟိဝၤယွၤအအိၣ်​ နွံသီလီၤ. ဖဲဃိးသီတသီန့ၣ်​ သုကဘၣ်မၤ တၢ်အိၣ်ဖှိၣ်စီဆှံ+ ဒီးလုၢ်ထီၣ်တၢ်လုၢ်လၢ မ့ၣ်အူလၢ ယဟိဝၤယွၤ အအိၣ်လီၤ. အဝဲန့ၣ်​ မ့ၢ်တၢ်အိၣ်ဖှိၣ်လီၤဆီလီၤ. သုတဘၣ်​ မၤတၢ်မၤဆူၣ်ဆူၣ်​ နီတမံၤဘၣ်.

၃၇ “‘ဘူၣ်သ့ၣ်တဖၣ်အံၤ+ မ့ၢ်ဝဲ ယဟိဝၤယွၤ အဘူၣ်တဖၣ်​ ဒီးသုကဘၣ်မၤအီၤ* ဒ်တၢ်အိၣ်ဖှိၣ်စီဆှံတဖၣ်​ အသိးလီၤ.+ ဖဲန့ၣ်အခါ သုကဘၣ်​ လုၢ်ထီၣ်တၢ်လုၢ်လၢ မ့ၣ်အူလၢ ယဟိဝၤယွၤအအိၣ်​ လၢအမ့ၢ် တၢ်လုၢ်ဒွဲၣ်အူ+ ဃုာ်ဒီး တၢ်လုၢ်ဘု+ ဒီးစပံးထံလၢ တၢ်လုၢ်တၢ်ပာ်အဂီၢ်+ ဒ်တၢ်ပာ်ပနီၣ်ဃာ်အီၤလၢ မုၢ်နံၤတသီစုာ်စုာ် အဂီၢ်လီၤ. ၃၈ ထဲန့ၣ်တကးဒံးဘၣ်​ သုကဘၣ်​ ဆဲးအိၣ်မူမၤထွဲ မုၢ်အိၣ်ဘှံးနံၤ လၢယဟိဝၤယွၤအဂီၢ်+ ဒီးဆဲးဟ့ၣ်လုၢ်ထီၣ်​ သုတၢ်ဟ့ၣ်တဖၣ်,+ သုတၢ်လုၢ်လၢ တၢ်အၢၣ်လီၤအဂီၢ်+ ဒီးသုတၢ်လုၢ်လၢ တၢ်သးအိၣ်အပူၤ+ လၢသုကြၢးဟ့ၣ်လီၤ ယဟိဝၤယွၤလီၤ. ၃၉ ဖဲသုပာ်ဖှိၣ်​ တၢ်လၢ အမဲထီၣ်သၣ်ထီၣ်လၢ ဟီၣ်ခိၣ်ဝံၤအခါ, ဘၣ်ဖဲလါနွံလါတလါ, လါထီၣ်​ ၁၅ သီတသီန့ၣ်​ သုကဘၣ်​ မၤယဟိဝၤယွၤအဘူၣ်​ လၢအယံာ်ဝဲ နွံသီလီၤ.+ ဖဲအဆိကတၢၢ်တသီန့ၣ်​ သုကဘၣ်အိၣ်ဘှံး လၢသုတၢ်မၤ ခဲလၢာ်လီၤ. ဒီးဖဲဃိးသီတသီန့ၣ်​ သုကဘၣ်အိၣ်ဘှံး လၢသုတၢ်မၤ ခဲလၢာ်လီၤ.+ ၄၀ ဖဲအဆိကတၢၢ်တသီန့ၣ်​ သုကဘၣ်ဟံးန့ၢ် သ့ၣ်အဃံအလၤတဖၣ်​ အသၣ်, သ့ၣ်စူၣ်ပလိၣ်​ အဒိတဖၣ်,+ သ့ၣ်ခဲ အဒ့တဖၣ်, ပံၢ်သလီ လၢအအိၣ်လၢတၢ်တြီၤပူၤ အဒ့တဖၣ်​ ဒီးသုအိၣ်ဒီး တၢ်သးခုလၢ+ ယဟိဝၤယွၤ အမဲာ်ညါ နွံသီလီၤ.+ ၄၁ သုကဘၣ်​ မၤဘူၣ်အံၤလၢ ယဟိဝၤယွၤအဂီၢ် တနံၣ်န့ၣ်​ နွံသီလီၤ.+ သုကဘၣ်မၤဘူၣ်အံၤလၢ လါနွံလါတလါ ဒီးအဝဲန့ၣ်​ ကမ့ၢ်တၢ်သိၣ်တၢ်သီလၢ အဂၢၢ်အကျၢၤလၢ သုဒီး သုစၢၤသုသွဲၣ်​ ခဲလၢာ် အဂီၢ်လီၤ. ၄၂ သုကဘၣ်အိၣ်လၢ ဒဲပူၤနွံသီလီၤ.+ ပှၤအံၣ်စရ့လးဖိ ခဲလၢာ်န့ၣ်​ ကဘၣ်အိၣ်​ လၢဒဲတဖၣ်အပူၤ ၄၃ ဒ်သိး သုစၢၤသုသွဲၣ်လၢ အကဟဲတဖၣ်​ ကသ့ၣ်ညါဝဲလၢ+ ဖဲယဒုးဟးထီၣ်​ ပှၤအံၣ်စရ့လးဖိတဖၣ်​ လၢကီၢ်အဲၤကူပတူးအခါ ယဒုးအိၣ်အဝဲသ့ၣ်​ လၢဒဲတဖၣ်​ အပူၤန့ၣ်လီၤ.+ ယမ့ၢ်သုကစၢ် ယဟိဝၤယွၤလီၤ.’”

၄၄ အဃိ စီၤမိၤၡ့တဲဘၣ်​ ပှၤအံၣ်စရ့လးဖိတဖၣ်လၢ ယဟိဝၤယွၤ အဘူၣ်တဖၣ်​ အဂ့ၢ်လီၤ.

၂၄ ယဟိဝၤယွၤ ဆဲးတဲ စီၤမိၤၡ့လၢ ၂ “ဒ်သိးမ့ၣ်အူ ကကဲၤဝဲလၢ မ့ၣ်အူဒၢ အခွးတဖၣ်အပူၤ ထီဘိအဂီၢ် မၤလိာ် ပှၤအံၣ်စရ့လးဖိလၢ အကဟဲစိာ်န့ၢ်နၤ သ့ၣ်စၤယံး အသိစီလၢ မ့ၣ်အူဒၢ အခွးတဖၣ်​ အဂီၢ်တက့ၢ်.+ ၃ စီၤအၤဟရိၣ်​ ကဘၣ်ရဲၣ်လီၤကျဲၤလီၤတၢ် ဒ်သိး မ့ၣ်အူဒၢအခွးတဖၣ်လၢ တၢ်အိၣ်ဖှိၣ်အဒဲပူၤ လၢယၣ်ဘျးသဒၢ အမဲာ်ညါ* လၢအဘူးဒီး တၢ်အၢၣ်လီၤအီလီၤအတလါန့ၣ်​ ကကပီၤဝဲလၢ ယဟိဝၤယွၤ အမဲာ်ညါထီဘိ, စးထီၣ်လၢဟါခီ တုၤလၢ ဂီၤခီလီၤ. အဝဲန့ၣ်​ မ့ၢ်ဝဲ တၢ်သိၣ်တၢ်သီလၢ အဂၢၢ်အကျၢၤ လၢသုကဘၣ်​ မၤထွဲအီၤ တစိၤဘၣ်တစိၤလီၤ. ၄ မ့ၣ်အူဒၢအခွးတဖၣ်လၢ အအိၣ်လၢ မ့ၣ်အူဒၢထူစီအလိၤန့ၣ်+ အဝဲ ကဘၣ်​ ကတဲာ်ကတီၤဝဲလၢ ယဟိဝၤယွၤအမဲာ်ညါ ထီဘိန့ၣ်လီၤ.

၅ “နကဘၣ်ဟံးန့ၢ် ကိၣ်ကမူၣ်လၢအဂ့ၤ ဒီးကုၢ်ကဲထီၣ်အီၤ လၢကိၣ်လၢ အလီၤဂာ်ဒ် ကိၣ်ထံဖှံၣ်အသိး ၁၂ လိၣ်လီၤ. ကိၣ်တလိၣ်စုာ်စုာ်န့ၣ်​ နဘၣ်တ့အီၤလၢ ကိၣ်ကမူၣ်​ ခံကံလိလီၤ.* ၆ ကိၣ်သ့ၣ်တဖၣ်အံၤန့ၣ်​ နကဘၣ်​ ပာ်လီၤအီၤ ခံပူၣ်လၢ စီၢ်နီၤခိၣ်ထူစီ အဖီခိၣ်​ လၢယဟိဝၤယွၤ အမဲာ်ညါလီၤ.+ ဒီးတပူၣ်န့ၣ်​ ကိၣ်ကဘၣ်အိၣ်ဝဲ ဃုလိၣ်လီၤ.+ ၇ နကဘၣ်ပာ်လီၤ လီၢ်ဘၣ်​ လၢကိၣ်တပူၣ်စုာ်စုာ် အဖီခိၣ်လီၤ. ဒီးလၢကိၣ်တဖၣ်​ အလီၢ်န့ၣ်​ လီၢ်ဘၣ်​ ကကဲဝဲ တၢ်လုၢ်လၢမ့ၣ်အူလၢ ယဟိဝၤယွၤအအိၣ်​ ဒ်တၢ်လၢ အခၢၣ်စးတၢ်လုၢ် ဒီတခါ အသိးလီၤ.+ ၈ ဖဲမုၢ်အိၣ်ဘှံးနံၤ တုၤတဘျီဂ့ၤ တဘျီဂ့ၤန့ၣ်​ အဝဲ ကဘၣ်ပာ်လီၤဝဲ ကိၣ်ဒ်အံၤ လၢယဟိဝၤယွၤ အမဲာ်ညါ ထီဘိလီၤ.+ အဝဲန့ၣ်​ မ့ၢ်ဝဲ တၢ်အၢၣ်လီၤအီလီၤ လၢအဂၢၢ်အကျၢၤ လၢယၤ ဒီးပှၤအံၣ်စရ့လးဖိတဖၣ်​ အဘၢၣ်စၢၤလီၤ. ၉ ဒီးကိၣ်န့ၣ်​ ကကဲထီၣ်​ စီၤအၤဟရိၣ်​ ဒီးအဖိခွါတဖၣ်​ အတၢ်လီၤ.+ လၢယဟိဝၤယွၤ အတၢ်လုၢ်လၢ မ့ၣ်အူတဖၣ်အကျါန့ၣ်​ ကိၣ်တဖၣ်အံၤ မ့ၢ်တၢ်လၢ အစီဆှံနီၢ်ကီၢ် ဒီးမ့ၢ်ဝဲလၢ ပှၤလုၢ်တၢ်ဒိၣ်​ အဂီၢ်အဃိ အဝဲသ့ၣ်​ ကအီၣ်ဝဲလၢ တၢ်စီဆှံအလီၢ်လီၤ.+ အဝဲန့ၣ်​ မ့ၢ်ဝဲ တၢ်သိၣ်တၢ်သီလၢ အဂၢၢ်အကျၢၤန့ၣ်လီၤ.”

၁၀ လၢပှၤအံၣ်စရ့လးဖိတဖၣ်အကျါ ပှၤတဂၤလၢ အမိၢ်မ့ၢ်ဝဲ အံၣ်စရ့လးမုၣ်​ ဒီးအပၢ်မ့ၢ်ဝဲ ပှၤအဲၤကူပတူးဖိန့ၣ်+ ထိလိာ်အသးဒီး ပှၤအံၣ်စရ့လးဖိတဂၤ လၢဒဲကဝီၤအပူၤလီၤ. ၁၁ ဒီးအံၣ်စရ့လးမုၣ်​ အဖိခွါတဂၤအံၤန့ၣ်​ ဒုၣ်ဒွဲၣ်​ ကစၢ်ယွၤအမံၤ ဒီးဆိၣ်အၢ ကစၢ်ယွၤအမံၤလီၤ.+ အဃိ ပှၤလဲၤကိးအီၤလၢ စီၤမိၤၡ့အအိၣ်လီၤ.+ ပှၤတဂၤအံၤ အမိၢ်န့ၣ်မ့ၢ်ဝဲ နီၢ်ၡလိမံး လၢအမ့ၢ် ပှၤဒၣ်ဖိ စီၤဒံးဘရံၤ အဖိမုၣ်လီၤ. ၁၂ ဒီးပှၤဖီၣ်ဃာ်အီၤ တုၤလၢ ယဟိဝၤယွၤ ပာ်ဖျါထီၣ်န့ၢ် အဝဲသ့ၣ်​ လၢအတၢ်ဆၢတဲာ် လီၤတံၢ်လီၤဆဲးလီၤ.+

၁၃ ယဟိဝၤယွၤတဲ စီၤမိၤၡ့လၢ ၁၄ “ဟဲကိး ပှၤလၢအဆိၣ်အၢတၢ် တဂၤန့ၣ်​ လၢဒဲကဝီၤအချၢ ဒီးပှၤကိးဂၤဒဲးလၢ အနၢ်ဟူ အဆိၣ်အၢတၢ်န့ၣ်​ ကဘၣ်ပာ်လီၤအစုလၢ အဝဲ အခိၣ်လိၤ ဒီးပှၤအံၣ်စရ့လးဖိခဲလၢာ် ကဘၣ်ကွံာ်သံအီၤလၢ လၢၢ်လီၤ.+ ၁၅ ဒီးနကဘၣ်တဲ ပှၤအံၣ်စရ့လးဖိတဖၣ်လၢ ‘ပှၤတဂၤဂ့ၤတဂၤဂ့ၤ မ့ၢ်ဆိၣ်အၢ ကစၢ်ယွၤန့ၣ်​ အဝဲကဘၣ်​ ဟ့ၣ်တၢ်စံးဆၢ လၢအတၢ်ဒဲးဘး အဃိလီၤ. ၁၆ ပှၤလၢအဒုၣ်ဒွဲၣ်​ ယဟိဝၤယွၤအမံၤန့ၣ်​ ကဘၣ်တၢ်မၤသံအီၤ သပှၢ်ကတၢၢ်လီၤ.+ ပှၤအံၣ်စရ့လးဖိခဲလၢာ် ကဘၣ်ကွံာ်သံအီၤ လၢလၢၢ် သပှၢ်ကတၢၢ်လီၤ. ပှၤထံဂၤကီၢ်ဂၤဖိမ့ၢ်ဂ့ၤ, ပှၤအံၣ်စရ့လးဖိမ့ၢ်ဂ့ၤ မ့ၢ်ဒုၣ်ဒွဲၣ်​ ကစၢ်ယွၤအမံၤန့ၣ်​ ကဘၣ်တၢ်မၤသံအီၤ ဒ်သိးသိးလီၤ.

၁၇ “‘ပှၤတဂၤ မ့ၢ်မၤသံဘၣ်​ ပှၤအဂၤတဂၤန့ၣ်​ အဝဲ ကဘၣ်တၢ်မၤသံအီၤ သပှၢ်ကတၢၢ်လီၤ.+ ၁၈ ဒ်သးသမူလၢ သးသမူအဂီၢ်အသိး ပှၤတဂၤဂ့ၤတဂၤဂ့ၤ မ့ၢ်မၤသံ ဆၣ်ဖိကီၢ်ဖိအဒၢန့ၣ်​ အဝဲကဘၣ်က့ၤလိးက့ၤဝဲ အပှ့ၤလီၤ. ၁၉ ပှၤတဂၤ မ့ၢ်မၤဘၣ်ဒိဝဲ ပှၤအဂၤတဂၤန့ၣ်​ အဝဲကဘၣ်​ တၢ်မၤအီၤ ဒ်အမၤပှၤ အသိးလီၤ.+ ၂၀ အဃိ ဃံလၢဃံအဂီၢ်,* မဲာ်ချံလၢ မဲာ်ချံအဂီၢ် ဒီးမဲလၢ မဲအဂီၢ်လီၤ. အဝဲမၤဘၣ်ဒိ ပှၤတဂၤန့ၣ်​ ဒ်လဲၣ်ဒ်လဲၣ်န့ၣ်​ အဝဲ ကဘၣ်​ တၢ်မၤဘၣ်ဒိက့ၤအီၤ ဒ်န့ၣ်အသိးလီၤ.+ ၂၁ ပှၤလၢအမၤသံ ဆၣ်ဖိကီၢ်ဖိတဒုန့ၣ်​ ကဘၣ်က့ၤလိးက့ၤဝဲ အပှ့ၤလီၤ.+ မ့မ့ၢ်ပှၤလၢ အမၤသံ ပှၤကညီတဂၤန့ၣ်​ ကဘၣ်တၢ်မၤသံအီၤလီၤ.+

၂၂ “‘မ့ၢ်လၢ ယမ့ၢ်သုကစၢ် ယဟိဝၤယွၤအဃိ လၢပှၤအံၣ်စရ့လးဖိ အဂီၢ်မ့ၢ်ဂ့ၤ, လၢပှၤထံဂၤကီၢ်ဂၤဖိ အဂီၢ်မ့ၢ်ဂ့ၤ တၢ်သိၣ်တၢ်သီ အိၣ်ဝဲ တမံၤဃီလီၤ.’”+

၂၃ စီၤမိၤၡ့ တဲဘၣ်​ ပှၤအံၣ်စရ့လးဖိတဖၣ်​ ဝံၤဒီး အဝဲသ့ၣ်​ လဲၤကိးထီၣ်ဝဲ ပှၤတဂၤလၢ အဆိၣ်အၢတၢ် လၢဒဲကဝီၤအချၢ ဒီးအဝဲသ့ၣ်​ ကွံာ်သံအီၤ လၢလၢၢ်လီၤ.+ အဃိ ပှၤအံၣ်စရ့လးဖိတဖၣ် မၤဝဲဒ် ယဟိဝၤယွၤ မၤလိာ်ဝဲ စီၤမိၤၡ့အသိးလီၤ.

၂၅ ယဟိဝၤယွၤ ဆဲးတဲတၢ်ဒီး စီၤမိၤၡ့လၢ ကစၢၢ်စံၤနါအလိၤ ဒီးတဲဝဲလၢ ၂ “တဲဘၣ်​ ပှၤအံၣ်စရ့လးဖိတဖၣ်လၢ ‘ဖဲသုလဲၤနုာ်လီၤလၢ ကီၢ်တဘ့ၣ်လၢ ယကဟ့ၣ်လီၤသုအခါ+ သုကဘၣ်​ မၤထွဲယဟိဝၤယွၤ အတၢ်သိၣ်တၢ်သီလၢ အဘၣ်ဃးဒီး တၢ်အိၣ်ဘှံးအနံၣ်​ ဒီးပာ်အိၣ်ဘှံး သုထံကီၢ်လီၤ.+ ၃ နကဘၣ်ဖှံလီၤ တၢ်ချံလၢ နစံာ်ပျီပူၤ ဃုနံၣ်​ ဒီးနဘၣ်ပဲာ်ဟိကဆှီထီၣ်​ နစပံးကျီး ဃုနံၣ်​ ဒီးနကဘၣ်​ ပာ်ဖှိၣ်​ တၢ်လၢအမဲထီၣ်သၣ်ထီၣ်​ လၢဟီၣ်ခိၣ်လီၤ.+ ၄ မ့မ့ၢ် နွံနံၣ်တနံၣ်န့ၣ်​ ကဘၣ်မ့ၢ် တၢ်အိၣ်ဘှံးအနံၣ်လၢ ထံကီၢ်အဂီၢ် ဒ်တၢ်အိၣ်ဘှံးအနံၣ်လၢ အဘၣ်တၢ်ပာ်စီဆှံအီၤလၢ ယဟိဝၤယွၤ အဂီၢ်လီၤ. အဃိ နတဘၣ်​ ဖှံတၢ်ချံလၢ နစံာ်ပျီပူၤဘၣ်​ ဒီးနတဘၣ်​ ပဲာ်ဟိကဆှီထီၣ်​ နစပံးကျီးဘၣ်. ၅ ဖဲသုကူးဘုဝံၤ အလီၢ်ခံ ဘုလၢအဟဲမဲထီၣ်​ လၢအနီၢ်ကစၢ် ခီဖျိတၢ်ချံလၢ အအိၣ်လီၤတဲာ်လၢ ဟီၣ်ခိၣ်လိၤအဃိန့ၣ်​ သုတဘၣ်​ ကူးအီၤဘၣ်. ဒီးစပံးမုၢ်လၢ သုတပဲာ်ဟိကဆှီဘၣ်န့ၣ်​ သုတဘၣ်​ ထၢဖှိၣ်အသၣ်ဘၣ်. သုကဘၣ်​ ပာ်အိၣ်ဘှံးထံကီၢ် တနံၣ်လီၤ. ၆ ဘၣ်ဆၣ်​ တၢ်လၢအမဲထီၣ်သၣ်ထီၣ်လၢ ထံကီၢ် ဖဲထံကီၢ် အတၢ်အိၣ်ဘှံးအနံၣ်​ အတီၢ်ပူၤန့ၣ်​ ကကဲထီၣ်​ တၢ်အီၣ်​ လၢနဂီၢ်, နကုၢ်မုၣ်ကုၢ်ခွါတဖၣ်​ အဂီၢ်, နပှၤမၤတၢ်ဖိလၢ အဒိးငါအသးတဖၣ်​ အဂီၢ်, ပှၤထံဂၤကီၢ်ဂၤဖိလၢ အဟဲအိၣ်ဒီးနၤအဂီၢ် ၇ ဒီးလၢ ဆၣ်ဖိကီၢ်ဖိ အဒၢတဖၣ်​ ဒီးဆၣ်ဖိကီၢ်ဖိ အမံၤတဖၣ်လၢ နထံကီၢ်ပူၤ အဂီၢ်လီၤ. တၢ်လၢ အမဲထီၣ်သၣ်ထီၣ်လၢ ထံကီၢ်ပူၤခဲလၢာ်န့ၣ်​ ကကဲထီၣ်​ တၢ်အီၣ်လီၤ.

၈ “‘သုကဘၣ်ဂံၢ် တၢ်အိၣ်ဘှံးအနံၣ်​ နွံဘျီ လၢအမ့ၢ် နွံနံၣ်​ အဘျီနွံဘျီလီၤ. အဃိ တၢ်အိၣ်ဘှံးအနံၣ်​ နွံဘျီအတီၢ်ပူၤန့ၣ်​ ကယံာ်ဝဲ ခဲလၢာ်ခဲဆ့ ၄၉ နံၣ်လီၤ. ၉ ဒီးဖဲနွံလါတလါ, လါထီၣ်အသီတဆံ, ဖဲတၢ်မၤဘၣ်လိာ်ဖိးဒ့က့ၤတၢ် အမုၢ်နံၤန့ၣ်+ သုကဘၣ်​ အူထီၣ်ကွဲၤ အကလုၢ်ဖးဒိၣ်လီၤ. ဒီးသုကဘၣ်​ အူထီၣ်ကွဲၤ တုၤလၢပှၤခဲလၢာ်လၢ သုကီၢ်အပူၤ နၢ်ဟူဘၣ်ဝဲလီၤ. ၁၀ သုကဘၣ်​ ပာ်စီဆှံ အနံၣ်​ ၅၀ နံၣ်တနံၣ်​ ဒီးဘိးဘၣ်သ့ၣ်ညါ တၢ်ထူၣ်ဖျဲးလၢ ပှၤလၢအအိၣ်လၢ ထံကီၢ်ပူၤ ကိးဂၤဒဲးအဂီၢ်လီၤ.+ တၢ်တနံၣ်န့ၣ်​ ကကဲထီၣ်​ ကၠူဘလံၤ* လၢသုဂီၢ် ဒီးသုဝဲကိးဂၤဒဲး ကန့ၢ်ဘၣ်ကဒါက့ၤ သုတၢ်စုလီၢ်ခီၣ်ခိၣ်​ ဒီးသုကက့ၤလၢ သုနီၢ်ကစၢ် အဒူၣ်ဖိထၢဖိ အအိၣ်လီၤ.+ ၁၁ အနံၣ်​ ၅၀ နံၣ်တနံၣ်န့ၣ်​ ကကဲထီၣ်​ ကၠူဘလံၤ လၢသုဂီၢ်လီၤ. သုတဘၣ်ဖှံလီၤ တၢ်ချံဘၣ်​ ဒီးသုတဘၣ်​ ကူးဘုလၢ အဟဲမဲထီၣ်​ လၢအနီၢ်ကစၢ် ခီဖျိတၢ်ချံလၢ အအိၣ်လီၤတဲာ်လၢ ဟီၣ်ခိၣ်လိၤ အဃိဘၣ်. ဒီးစပံးမုၢ်လၢ သုတပဲာ်ဟိကဆှီဘၣ်န့ၣ်​ သုတဘၣ်​ ထၢဖှိၣ်အသၣ်ဘၣ်.+ ၁၂ အမ့ၢ်ဝဲ ကၠူဘလံၤ ဒီးကဘၣ်မ့ၢ် တၢ်လၢအစီဆှံ လၢသုဂီၢ်လီၤ. သုကအီၣ်ဘၣ်​ တၢ်လၢ အမဲထီၣ်သၣ်ထီၣ်​ လၢအနီၢ်ကစၢ် လၢထံကီၢ်ပူၤန့ၣ်လီၤ.+

၁၃ “‘ဖဲကၠူဘလံၤ အနံၣ်န့ၣ်​ သုဝဲကိးဂၤဒဲး ကန့ၢ်ဘၣ်ကဒါက့ၤ သုတၢ်စုလီၢ်ခီၣ်ခိၣ်​ တဖၣ်လီၤ.+ ၁၄ ဒီးသုမ့ၢ်ဆါန့ၢ် ပှၤဂၤ တၢ်တမံၤမံၤမ့ၢ်ဂ့ၤ, ပှ့ၤတၢ်လၢအအိၣ်​ တမံၤမံၤမ့ၢ်ဂ့ၤ သုတဘၣ်​ လံၣ်အီၣ်လီအီၣ်လိာ်သး တဂၤဒီးတဂၤဘၣ်.+ ၁၅ နမ့ၢ်ပှ့ၤ ဟီၣ်ခိၣ်လၢ ပှၤဂၤအအိၣ်န့ၣ်​ နကဘၣ်ဒွး တၢ်ဆၢကတီၢ်လၢ ကၠူဘလံၤအနံၣ်​ ပူၤကွံာ်န့ၢ် ပှဲၤနံၣ်လံလဲၣ်န့ၣ်လီၤ. ဒီးအဝဲမ့ၢ်ဆါန့ၢ်နၤန့ၣ်​ အဝဲ ကဘၣ်ဒွးအပှ့ၤ ဒ်နကထၢဖှိၣ်​ တၢ်လၢ အကမဲထီၣ်သၣ်ထီၣ်တဖၣ်​ ကန့ၢ်ပှဲၤနံၣ်ဒံးလဲၣ်န့ၣ်လီၤ.+ ၁၆ နကကူးဘၣ်​ တၢ်လၢ အမဲထီၣ်သၣ်ထီၣ်တဖၣ်​ ကန့ၢ်ထဲလဲၣ်န့ၣ်​ အဝဲ ကဆါန့ၢ်နၤ ဟီၣ်ခိၣ်အပှ့ၤ ထဲန့ၣ်လီၤ. အဃိ တၢ်ဆၢကတီၢ် မ့ၢ်အိၣ်ဒံးအါနံၣ်​ တချုးလၢ ကၠူဘလံၤအနံၣ်​ ဘၣ်ဒံးဘၣ်န့ၣ်​ အဝဲ မၤအါထီၣ်​ အပှ့ၤသ့လီၤ. တၢ်ဆၢကတီၢ် မ့ၢ်အိၣ်ဒံး စှၤနံၣ်န့ၣ်​ အဝဲ ကြၢးမၤစှၤလီၤ အပှ့ၤလီၤ. ၁၇ ပှၤလၢသုကျါ တဂၤဂ့ၤတဂၤဂ့ၤ တဘၣ်လံၣ်အီၣ်လီအီၣ်​ ပှၤဂၤဘၣ်.+ သုကဘၣ်​ ပျံၤသုကစၢ်ယွၤ+ မ့ၢ်လၢ ယမ့ၢ်သုကစၢ် ယဟိဝၤယွၤ အဃိလီၤ.+ ၁၈ ဒ်သိး သုကအိၣ်ဘၣ်လၢ ထံကီၢ်အံၤအပူၤ ဘံၣ်ဘံၣ်ဘၢဘၢအဂီၢ် သုကဘၣ်မၤထွဲ ယတၢ်ဘျၢတဖၣ်​ ဒီးသုကဘၣ်​ အိၣ်မူပိာ်ထွဲ ယတၢ်သိၣ်တၢ်သီတဖၣ်လီၤ.+ ၁၉ ဟီၣ်ခိၣ်​ ကဟ့ၣ်ထီၣ်​ အတၤသူတၤသၣ်+ ဒီးသုကအီၣ်ဘၣ်တၢ် ဘျဲဘျဲ ဒီးသုကအိၣ်ဘၣ်ဖဲန့ၣ်​ ဘံၣ်ဘံၣ်ဘၢဘၢလီၤ.+

၂၀ “‘ဘၣ်ဆၣ်​ ဘၣ်သ့ၣ်သ့ၣ်​ သုကတဲဘၣ်ဖုးလၢ “ပမ့ၢ်တဖှံဘၣ်တၢ်ချံ ဒီးပာ်ဖှိၣ်တၢ်လၢ အမဲထီၣ်သၣ်ထီၣ်ဘၣ်န့ၣ်​ လၢနွံနံၣ်တနံၣ်​ အတီၢ်ပူၤ ပကအီၣ်ဘၣ်​ တၢ်မနုၤလဲၣ်.”+ ၂၁ လၢဃုနံၣ်တနံၣ်န့ၣ်​ ယကဆှၢလီၤ ယတၢ်ဆိၣ်ဂ့ၤ လၢသုဂီၢ် ဒီးသုဟီၣ်ခိၣ်​ ကဒုးမဲထီၣ်သၣ်ထီၣ်​ တၢ်အီၣ်လၢ ကယၢဝဲလၢ သၢနံၣ်အဂီၢ်လီၤ.+ ၂၂ ဒီးဖဲဃိးနံၣ်တနံၣ်န့ၣ်​ သုကဖှံတၢ်ချံ ဒီးတချုးလၢ သုကူးတၢ်လၢ အမဲထီၣ်သၣ်ထီၣ်ဖဲ ခွံနံၣ်တနံၣ်​ ဒံးဘၣ်န့ၣ်​ သုကဆဲးအီၣ်​ တၢ်လၢအမဲထီၣ်သၣ်ထီၣ်​ လၢအလီၢ်လံၤတဖၣ် လၢသုကူးအီၤ ဖဲဃုနံၣ်တနံၣ်​ အတီၢ်ပူၤလီၤ.

၂၃ “‘လၢယတၢ်ထံၣ်န့ၣ်​ သုကဲပှၤထံဂၤကီၢ်ဂၤဖိ ဒီးသုကဲပှၤလၢ အဟဲအိၣ်လၢ ထံကီၢ်ပူၤလီၤ.+ ဒီးထံကီၢ်တဘ့ၣ်အံၤ မ့ၢ်ယတၢ်အဃိ+ သုတဘၣ်ဆါလီၤ ဟီၣ်ခိၣ်အလီၢ်တဖၣ်​ ဒ်သိး အကကဲ ပှၤဂၤအတၢ် ထီဘိဘၣ်.+ ၂၄ လၢထံကီၢ်လၢ သုကအိၣ်လၢ အပူၤန့ၣ်​ သုကဘၣ်ဟ့ၣ်အခွဲးလၢ ပှၤကပှ့ၤက့ၤ ဟီၣ်ခိၣ်လီၢ်လီၤ.

၂၅ “‘သုသကိးတဂၤ မ့ၢ်ဖှီၣ်လီၤ ဒီးမ့ၢ်ဆါလီၤ အဟီၣ်ခိၣ်န့ၣ်​ ပှၤပှ့ၤက့ၤတၢ် လၢအမ့ၢ် အဘူးအတံၢ်လၢ အဘူးဒီးအီၤတဂၤန့ၣ်​ ကဘၣ်ဟဲပှ့ၤက့ၤ တၢ်လၢအဘူးအတံၢ်တဂၤအံၤ ဆါလီၤဝဲန့ၣ်လီၤ.+ ၂၆ ပှၤပှ့ၤက့ၤတၢ်တဂၤ မ့ၢ်တအိၣ်ဘၣ်​ သနာ်က့ လၢခံ အနီၢ်ကစၢ် မ့ၢ်ကဲဒိၣ်ထီၣ်ဒီး အကျိၣ်စ့မ့ၢ်ယၢလၢ ကပှ့ၤက့ၤတၢ်အဂီၢ်န့ၣ်​ အဝဲပှ့ၤက့ၤအီၤသ့လီၤ. ၂၇ အဝဲဆါဝဲ ဟီၣ်ခိၣ်​ အိၣ်ပှဲၤနံၣ်လံလဲၣ်န့ၣ်​ အဝဲကဘၣ်​ ဒွးကွၢ်ဝဲ အပှ့ၤလီၤ. ဒီးကဘၣ်ထုးထီၣ်က့ၤ တၢ်အပှ့ၤအံၤလၢ အဆါလီၤတ့ၢ်ဝဲ ဟီၣ်ခိၣ်အံၤ အပှ့ၤအကျါ ဒီးအပှ့ၤလၢ အအိၣ်တ့ၢ်တဖၣ်န့ၣ်​ အဝဲ ကဘၣ်ဟ့ၣ်က့ၤ ပှၤလၢအပှ့ၤတၢ်တဂၤန့ၣ်လီၤ. ဒီးအဝဲ ကန့ၢ်ဘၣ်ကဒါက့ၤ အဟီၣ်ခိၣ်လီၤ.+

၂၈ “‘ဘၣ်ဆၣ်​ အတၢ်မ့ၢ်တယၢဘၣ်​ လၢကပှ့ၤကဒါက့ၤအီၤ အဂီၢ်ဘၣ်န့ၣ်​ တၢ်လၢ အဆါကွံာ်ဝဲန့ၣ်​ ကအိၣ်ဒံးလၢ ပှၤပှ့ၤတၢ်တဂၤန့ၣ်​ အစုပူၤ တုၤလၢ ကၠူဘလံၤ အနံၣ်လီၤ.+ ဒီးဖဲကၠူဘလံၤ အနံၣ်န့ၣ်​ အဝဲ ကန့ၢ်ကဒါက့ၤ အဟီၣ်ခိၣ်​ ဒီးကကဲထီၣ်က့ၤ အတၢ်လီၤ.+

၂၉ “‘ပှၤတဂၤ မ့ၢ်ဆါလီၤကွံာ် ဟံၣ်တဖျၢၣ်လၢ အအိၣ်လၢ ဝ့ၢ်လၢအအိၣ်ဒီး အဒူၣ်အပူၤန့ၣ်​ စးထီၣ်ဖဲ အဝဲဆါဝဲအမုၢ်နံၤ တုၤလၢအပှဲၤထီၣ်တနံၣ်န့ၣ်​ အဝဲအိၣ်ဒီး တၢ်ခွဲးတၢ်ယာ်လၢ ကပှ့ၤကဒါက့ၤဝဲလီၤ.+ အဃိ တၢ်ခွဲးတၢ်ယာ်လၢ အကပှ့ၤက့ၤဝဲန့ၣ်​ ကအိၣ်ဝဲ တနံၣ်ပှဲၤပှဲၤလီၤ. ၃၀ ဘၣ်ဆၣ်​ လၢတနံၣ်အတီၢ်ပူၤ အဝဲ မ့ၢ်တပှ့ၤက့ၤ ဟံၣ်လၢ အအိၣ်လၢ ဝ့ၢ်လၢအအိၣ်ဒီး အဒူၣ်​ အပူၤဘၣ်န့ၣ်​ အကကဲထီၣ်ဝဲ ပှၤလၢအပှ့ၤတၢ်တဂၤ အတၢ် ဒီးအစၢၤအသွဲၣ်တဖၣ်အတၢ် အစိၤစိၤအဃၣ်ဃၣ်လီၤ. ဒီးဖဲကၠူဘလံၤ ဘၣ်အခါန့ၣ်​ အတဘၣ်​ ဟ့ၣ်က့ၤဝဲဘၣ်. ၃၁ မ့မ့ၢ်ဟံၣ်​ လၢအအိၣ်ဝဲလၢ သဝီလၢ အဒူၣ်တအိၣ်ဘၣ်​ အပူၤန့ၣ်​ အကဘၣ်တၢ်ပာ်ပနီၣ်အီၤ ဒ်ဟီၣ်ခိၣ်လီၢ်တဖၣ်​ အသိးအဃိ တၢ်ပှ့ၤက့ၤအီၤသ့ ကိးဆၢကတီၢ်ဒဲးလီၤ. တကးဒံးဘၣ်​ ဖဲကၠူဘလံၤ ဘၣ်အခါန့ၣ်​ ပှၤကဘၣ်​ ဟ့ၣ်က့ၤအီၤလၢ အကစၢ်လၢ အခီၣ်ထံးတဂၤ အအိၣ်လီၤ.

၃၂ “‘မ့မ့ၢ် ပှၤလ့ၤဝံဖိတဖၣ်​ အဟံၣ်လၢ အအိၣ်လၢ အဝဲသ့ၣ်​ အဝ့ၢ်တဖၣ်အပူၤန့ၣ်+ ပှၤလ့ၤဝံဖိတဖၣ်​ အိၣ်ဒီးတၢ်ခွဲးတၢ်ယာ်လၢ ကပှ့ၤက့ၤတၢ်အဂီၢ် ထီဘိလီၤ. ၃၃ ပှၤလ့ၤဝံဖိတဖၣ်​ အဟံၣ်လၢအအိၣ်လၢ အဝ့ၢ်ပူၤန့ၣ်​ မ့ၢ်ဝဲ အဝဲသ့ၣ်​ အတၢ်စုလီၢ်ခီၣ်ခိၣ်​ လၢပှၤအံၣ်စရ့လးဖိတဖၣ်​ အကျါလီၤ.+ အဃိ အဝဲသ့ၣ်​ မ့ၢ်တပှ့ၤက့ၤဝဲ အဟံၣ်လၢ အဆါကွံာ်ဝဲ လၢအအိၣ်လၢ အဝ့ၢ်ပူၤဘၣ်န့ၣ်​ ဖဲကၠူဘလံၤဘၣ်အခါ ပှၤကဘၣ်ဟ့ၣ်က့ၤ အဝဲသ့ၣ်လီၤ.+ ၃၄ ဒီးတၢ်ပျီလၢ ဆၣ်ဖိကီၢ်ဖိတဖၣ်အဂီၢ်+ လၢအအိၣ်ဝးတရံး အဝဲသ့ၣ်​ အဝ့ၢ်တဖၣ်န့ၣ်​ မ့ၢ်ဝဲ အဝဲသ့ၣ်​ အတၢ် လီၤစိၤလီၤထီ အဃိ ပှၤတဘၣ်​ ဆါလီၤအီၤဘၣ်.

၃၅ “‘နသကိး လၢအအိၣ်ဘူးဒီးနၤ မ့ၢ်ဖှီၣ်လီၤ ဒီးလုၢ်အီၣ်အသးသမူ မ့ၢ်တန့ၢ်ဘၣ်န့ၣ်​ ဒ်သိး အဝဲ ကဆဲးအိၣ်မူအဂီၢ် နကဘၣ်​ မၤစၢၤအီၤ+ ဒ်နမၤစၢၤ ပှၤထံဂၤကီၢ်ဂၤဖိ ဒီးပှၤလၢ အဟဲအိၣ်လၢ သုကျါတဂၤ အသိးလီၤ.+ ၃၆ နတဘၣ်ဃ့အီၤ စ့အအ့ၣ်ဘၣ်​ ဒီးနတဘၣ်​ အီၣ်စ့အ့ၣ်​ လၢအအိၣ်ဘၣ်.+ နကဘၣ်​ ပျံၤနကစၢ်ယွၤ+ ဒီးနသကိး ကဆဲးအိၣ်မူလီၤ. ၃၇ နတဘၣ်​ ဟ့ၣ်လိၢ်အီၤစ့ လၢနကန့ၢ်ဘၣ်​ စ့အ့ၣ်အဂီၢ်ဘၣ်.+ ဒီးနတဘၣ်​ ဟ့ၣ်အီၤ တၢ်အီၣ်​ ဒ်သိးနကန့ၢ်ဘၣ်က့ၤ လၢအအိၣ်​ အါန့ၢ်အလီၢ်ဘၣ်. ၃၈ ယမ့ၢ်သုကစၢ် ယဟိဝၤယွၤ လၢအဒုးဟးထီၣ်သုလၢ ကီၢ်အဲၤကူပတူးအပူၤ+ ဒ်သိး ယကဟ့ၣ်လီၤသုလၢ ကီၢ်ကနၤဧၣ်​ ဒီးဒ်သိး ယကပာ်ဖျါထီၣ်လၢ ယမ့ၢ် သုကစၢ်ယွၤ အဂီၢ်လီၤ.+

၃၉ “‘ဒီးနသကိးလၢ အအိၣ်ဘူးဒီးနၤ မ့ၢ်ဖှီၣ်လီၤ ဒီးမ့ၢ်ဆါလီၤကွံာ်အသး လၢနအိၣ်န့ၣ်+ နတဘၣ်​ မၢဆူၣ်အီၤလၢ အကမၤတၢ်ဒ် ကုၢ်အသိးဘၣ်.+ ၄၀ နကဘၣ်​ ရ့ဒီးအီၤ ဒ်ပှၤအဒိးငါအသးလၢ တၢ်မၤအဂီၢ်+ ဒီးဒ်ပှၤထံဂၤကီၢ်ဂၤဖိလၢ အဟဲအိၣ်လၢ သုကျါအသိးန့ၣ်လီၤ. အဝဲ ကဘၣ်မၤနတၢ်မၤ တုၤလၢ ကၠူဘလံၤ ဘၣ်အခါလီၤ. ၄၁ ဖဲန့ၣ်အခါ အဝဲဒီးအဖိတဖၣ်​ ကဟးထီၣ်ကွံာ်လၢနအိၣ်​ ဒီးကက့ၤကဒါက့ၤလၢ အဘူးအတံၢ်တဖၣ်အအိၣ်​ ဒီးဆူအမိၢ်ပၢ်ဖံဖု လၢပျၢၤတဖၣ်​ အဟီၣ်ခိၣ်လီၢ်န့ၣ်လီၤ.+ ၄၂ နီၢ်ကီၢ်န့ၣ်​ အဝဲသ့ၣ်​ မ့ၢ်ယကုၢ်တဖၣ်လၢ ယဒုးဟးထီၣ်အီၤ လၢကီၢ်အဲၤကူပတူးအပူၤလီၤ.+ အဃိ အဝဲသ့ၣ်​ တဘၣ်ဆါလီၤ အနီၢ်ကစၢ်အသးဒ် ကုၢ်ဘၣ်တၢ်ဆါလီၤအီၤ အသိးဘၣ်. ၄၃ သုတဘၣ်​ ဆီၣ်တံၢ်မၤနၢၤ အဝဲသ့ၣ်တဂ့ၤ.+ သုကဘၣ်​ ပျံၤသုကစၢ်ယွၤလီၤ.+ ၄၄ သုကုၢ်မုၣ်ကုၢ်ခွါတဖၣ်​ ကဘၣ်မ့ၢ်ပှၤကလုာ်လၢ အအိၣ်ဝးတရံးသုလီၤ. ဒီးသုကဘၣ်ပှ့ၤ ကုၢ်မုၣ်​ မ့တမ့ၢ် ကုၢ်ခွါလၢ အဝဲသ့ၣ်​ အအိၣ်လီၤ. ၄၅ ဒီးပှၤထံဂၤကီၢ်ဂၤဖိလၢ အဟဲအိၣ်လၢသုကျါ+ ဒီးအဝဲသ့ၣ်​ အဟံၣ်ဖိဃီဖိ လၢအဟဲအိၣ်ဖျဲၣ်ထီၣ်လၢ သုကီၢ်ပူၤန့ၣ်​ သုပှ့ၤအဝဲသ့ၣ်​ ဒ်ကုၢ်တဖၣ်အသိး သ့ဝဲ ဒီးအဝဲသ့ၣ်​ ကကဲထီၣ်​ သုတၢ်လီၤ. ၄၆ သုဟ့ၣ်လီၤ အဝဲသ့ၣ်​ ဒ်တၢ်န့ၢ်သါ လၢသုဖိခွါတဖၣ်​ အအိၣ်သ့လီၤ. ဒီးအဝဲသ့ၣ်​ ကန့ၢ်သါဘၣ်ဝဲ ဒ်အတၢ်အသိး ထီဘိ ဒီးသုသူ အဝဲသ့ၣ်​ ဒ်ပှၤမၤတၢ်ဖိတဖၣ်​ သ့လီၤ. ဘၣ်ဆၣ်​ မ့မ့ၢ်သုဒီပုၢ်ဝဲၢ် ပှၤအံၣ်စရ့လးဖိ ကဒဲကဒဲန့ၣ်​ သုတဘၣ်​ ဆီၣ်တံၢ်မၤနၢၤလိာ်သုသးဘၣ်.+

၄၇ “‘ဘၣ်ဆၣ်​ ပှၤထံဂၤကီၢ်ဂၤဖိလၢ အဟဲအိၣ်လၢသုကျါ မ့ၢ်ကဲဒိၣ်ထီၣ်​ ဒီးနဒီပုၢ်ဝဲၢ် ပှၤအံၣ်စရ့လးဖိတဂၤဂၤ လၢအအိၣ်ဘူးဒီးအီၤ မ့ၢ်ဖှီၣ်လီၤ ဒီးအမ့ၢ် ဘၣ်ဆါလီၤကွံာ်အသးလၢ ပှၤထံဂၤကီၢ်ဂၤဖိလၢ အဟဲအိၣ်လၢ သုကျါတဂၤအံၤအအိၣ်​ မ့တမ့ၢ် အဒူၣ်ဖိထၢဖိတဂၤဂၤ အအိၣ်န့ၣ်​ ၄၈ အဝဲအိၣ်ဒီး တၢ်ခွဲးတၢ်ယာ်လၢ ကပှ့ၤလီၤက့ၤအသး ထီဘိလီၤ. ဒီးအဒီပုၢ်ဝဲၢ်တဂၤဂၤ ပှ့ၤက့ၤအီၤသ့လီၤ.+ ၄၉ အဖါတံၢ် မ့တမ့ၢ် အဖါတံၢ်အဖိခွါ ပှ့ၤက့ၤအီၤ သ့ဝဲစ့ၢ်ကီးလီၤ. မ့တမ့ၢ် အဘူးအတံၢ်လၢ အဘူးဒီးအီၤ တဂၤဂ့ၤ တဂၤဂ့ၤ လၢအမ့ၢ် အဒူၣ်ဖိထၢဖိန့ၣ်​ ပှ့ၤက့ၤအီၤသ့လီၤ.

“‘မ့တမ့ၢ်ဘၣ်​ အဝဲမ့ၢ်ကဲဒိၣ်ထီၣ်န့ၣ်​ အဝဲ ပှ့ၤလီၤက့ၤအသး သ့လီၤ.+ ၅၀ အဝဲကဘၣ်​ ဒွးသကိးဒီး ပှၤလၢအပှ့ၤအီၤတဂၤ ဒီးကဘၣ်ဂံၢ်နံၣ်တဖၣ်​ စးထီၣ်ဖဲ အဝဲဆါလီၤအသး တုၤလၢ ကၠူဘလံၤအနံၣ်+ ဒီးအဝဲဆါလီၤအသး အပှ့ၤ ကဘၣ်​ လီၤပလိာ်လိာ်သး ဒီးနံၣ်တဖၣ်အံၤလီၤ.+ ဒီးမုၢ်နံၤတဖၣ်လၢ အဝဲမၤတၢ်မၤ ဖဲနံၣ်တဖၣ်န့ၣ်​ အတီၢ်ပူၤန့ၣ်​ အပှ့ၤ ကဘၣ်ထဲသိးဒီး ပှၤတဂၤလၢ အဒိးငါအသး လၢတၢ်မၤအဂီၢ် အဘူးအလဲ အိၣ်ဝဲအသိးန့ၣ်လီၤ.+ ၅၁ ဒီးတၢ်ဆၢကတီၢ် မ့ၢ်အိၣ်ဒံး အါနံၣ်တချုးလၢ ကၠူဘလံၤ ဘၣ်ဒံးဘၣ်န့ၣ်​ ဒ်သိး ကပှ့ၤလီၤက့ၤအသး အဂီၢ် အဝဲကဘၣ်ဟ့ၣ်လီၤ တၢ်အပှ့ၤ ဒ်နံၣ်လၢ အအိၣ်တ့ၢ်တဖၣ်အံၤ အိၣ်ဝဲအသိးလီၤ. ၅၂ ဘၣ်ဆၣ်​ တချုးလၢ ကၠူဘလံၤ ဘၣ်ဒံးဘၣ်​ တၢ်ဆၢကတီၢ် မ့ၢ်အိၣ်တ့ၢ်က့ၤ ထဲစှၤကိာ်နံၣ်န့ၣ်​ အဝဲကဘၣ်ဒွးကွၢ် အပှ့ၤ ဒီးအဝဲ ကဘၣ်ဟ့ၣ်က့ၤ တၢ်အပှ့ၤ ဒ်နံၣ်လၢ အအိၣ်တ့ၢ်တဖၣ်​ အိၣ်ဝဲအသိးလီၤ. ၅၃ တနံၣ်ဘၣ်တနံၣ်န့ၣ်​ အဝဲကဆဲးမၤ အကစၢ်အတၢ်မၤ ဒ်ပှၤလၢ အဒိးငါအသးလၢ တၢ်မၤအဂီၢ်အသိး ဒီးနကဘၣ်​ ပာ်သူၣ်ပာ်သး ဒ်သိး အကစၢ် သုတဆီၣ်တံၢ်မၤနၢၤအီၤ တဂ့ၤအဂီၢ်လီၤ.+ ၅၄ ဘၣ်ဆၣ်​ အဝဲ ပှ့ၤလီၤက့ၤအသးဒ်န့ၣ်​ မ့ၢ်တန့ၢ်ဘၣ်န့ၣ်​ အဝဲဒီးအဖိတဖၣ်​ ကထူၣ်ဖျဲးထီၣ်ဖဲ ကၠူဘလံၤ အနံၣ်န့ၣ်လီၤ.+

၅၅ “‘ပှၤအံၣ်စရ့လးဖိန့ၣ်​ မ့ၢ်ယကုၢ်တဖၣ်လီၤ. အဝဲသ့ၣ်​ မ့ၢ်ယကုၢ်တဖၣ်လၢ ယဒုးဟးထီၣ်အီၤ လၢကီၢ်အဲၤကူပတူးအပူၤလီၤ.+ ယမ့ၢ်သုကစၢ် ယဟိဝၤယွၤလီၤ.

၂၆ “‘သုတဘၣ်တ့ထီၣ်​ ယွၤလၢ အဘျုးတအိၣ်ဘၣ်​ တဖၣ်တဂ့ၤ+ ဒီးသုတဘၣ်​ သူၣ်ထီၣ်​ တၢ်ဂီၤတၢ်ဖှီၣ်မ့ၢ်ဂ့ၤ+ လၢၢ်ထူၣ်စီဆှံမ့ၢ်ဂ့ၤတဂ့ၤ. ဒီးလၢၢ်လၢ ပှၤစိးပျၤအီၤန့ၣ်​ သုတဘၣ်​ ဆီလီၤအီၤ+ လၢသုထံကီၢ်အပူၤ ဒ်သိး သုကဘါထီၣ်အီၤ အဂီၢ်တဂ့ၤ.+ ယမ့ၢ် သုကစၢ် ယဟိဝၤယွၤလီၤ. ၂ သုကဘၣ်မၤထွဲ ယတၢ်သိၣ်တၢ်သီလၢ အဘၣ်ဃးဒီး မုၢ်အိၣ်ဘှံးနံၤ* ဒီးပာ်ဖျါထီၣ်​ တၢ်ယူးယီၣ်ပာ်ကဲလၢ ယတၢ်စီဆှံ အလီၢ် အဖီခိၣ်လီၤ. ယမ့ၢ် ယဟိဝၤယွၤလီၤ.

၃ “‘သုမ့ၢ်လဲၤတၢ် ဒ်ယတၢ်ဘျၢတဖၣ်အသိး ဒီးအိၣ်မူမၤထွဲ ယတၢ်မၤလိာ်တဖၣ်န့ၣ်+ ၄ ယကဒုးစူၤလီၤန့ၢ်သု မူခိၣ်ထံ လၢတၢ်ဆၢကတီၢ်လၢ အကြၢးဝဲဘၣ်ဝဲ+ ဒီးတၢ်ကမဲထီၣ်သၣ်ထီၣ်​ လၢကီၢ်ပူၤ+ ဒီးသ့ၣ်ထူၣ်တဖၣ်​ လၢပျီပူၤန့ၣ်​ ကသၣ်ထီၣ်ဝဲလီၤ. ၅ ဒီးသုကယီၢ်ဘု တုၤလၢ တၢ်ဒဲးစပံးသၣ်​ အဆၢကတီၢ် ဒီးသုကဒဲး စပံးသၣ်​ တုၤလၢ တၢ်ဖှံလီၤ တၢ်ချံ အဆၢကတီၢ်လီၤ. သုကအီၣ်ဘၣ်​ ဘျဲဘျဲ ဒီးသုကအိၣ်ဘၣ်​ ဘံၣ်ဘံၣ်ဘၢဘၢ လၢသုထံကီၢ်ပူၤလီၤ.+ ၆ ယကဟ့ၣ်လီၤသုလၢ တၢ်မုာ်တၢ်ခုၣ်လၢ ထံကီၢ်အပူၤ+ ဒီးသုကမံ ဒီးပှၤတမၤပျံၤမၤဖုးသု နီတဂၤဘၣ်.+ ဒီးယကဒုးဟးထီၣ်ကွံာ် ဆၣ်ဖိကီၢ်ဖိ အအၢလၢ သုထံကီၢ်ပူၤ ဒီးတၢ်ဒုးတၢ်ယၤ တဟဲအိၣ်ထီၣ်လၢ သုထံကီၢ်ပူၤဘၣ်. ၇ သုကလူၤ သုဒုၣ်သုဒါ သပှၢ်ကတၢၢ် ဒီးသုကမၤနၢၤ အဝဲသ့ၣ်လၢနးလီၤ. ၈ သုယဲၢ်ဂၤန့ၣ်​ ကလူၤပှၤအဂၤ ၁၀၀ ဒီးသုအဂၤ ၁၀၀ န့ၣ်​ ကလူၤပှၤအဂၤ ၁၀,၀၀၀ လီၤ. ဒီးသုကမၤနၢၤ သုဒုၣ်သုဒါတဖၣ်​ လၢနးလီၤ.+

၉ “‘ယကဆိၣ်ဂ့ၤသု ဒီးဒုးသၣ်ထီၣ်သု ဒီးမၤအါထီၣ်ဂီၢ်ထီၣ်​ သုဖိသုလံၤတဖၣ်+ ဒီးယကမၤ လၢထီၣ်ပှဲၤထီၣ်​ ယတၢ်အၢၣ်လီၤအီလီၤဒီးသုလီၤ.+ ၁၀ ဖဲသုအီၣ်ဒံး တၢ်အလီၢ်လံၤ လၢအမဲထီၣ်သၣ်ထီၣ်​ လၢအပူၤကွံာ်တနံၣ်န့ၣ်​ သုကဘၣ်​ မၤပျီကွံာ် တၢ်အလီၢ်လံၤတဖၣ်အံၤ ဒ်သိးတၢ်လီၢ်ကအိၣ်လၢ တၢ်လၢ အမဲထီၣ်သၣ်ထီၣ်​ အသီတဖၣ်​ အဂီၢ်လီၤ. ၁၁ ဒီးယကပာ် ယဒဲစီဆှံ လၢသုကျါ+ ဒီးယတပာ်တ့ၢ်သုဘၣ်. ၁၂ ယကလဲၤတၢ်လၢ သုကျါ ဒီးယကကဲ သုကစၢ်ယွၤလီၤ.+ မ့မ့ၢ်သုန့ၣ်​ သုကကဲထီၣ်​ ယပှၤဂီၢ်မုၢ်လီၤ.+ ၁၃ ယမ့ၢ်သုကစၢ် ယဟိဝၤယွၤ လၢအဒုးဟးထီၣ်သုလၢ ကီၢ်အဲၤကူပတူး ဒ်သိးသုသု တကဲဘၣ်အဝဲသ့ၣ်​ အကုၢ်လၢၤတဂ့ၤအဂီၢ်လီၤ. ဒီးယမၤကၢ်ကွံာ် သုနီၣ်ယိးဘိ ဒီးယဒုးဟးသု ဘျၢဘျၢလီၤ.

၁၄ “‘ဘၣ်ဆၣ်​ သုမ့ၢ်တဒိကနၣ်​ ယကလုၢ်ဘၣ်​ ဒီးသုမ့ၢ် တမၤထွဲ တၢ်မၤလိာ်တဖၣ်အံၤ ခဲလၢာ်ဘၣ်+ ၁၅ ဒီးသုမ့ၢ်တကနၣ်ဃုာ် ယတၢ်ဘျၢတဖၣ်ဘၣ်+ ဒီးသုမ့ၢ်သးဘၣ်အၢ ယတၢ်သိၣ်တၢ်သီတဖၣ်​ တုၤလၢ သုတမၤထွဲ ယတၢ်မၤလိာ်တဖၣ်ဘၣ်​ ဒီးတလူၤပိာ်ထွဲ ယတၢ်အၢၣ်လီၤအီလီၤဘၣ်န့ၣ်+ ၁၆ ယကမၤသု ဒ်အံၤလီၤ. ယကသိၣ်ဃီၣ်သုလၢ တၢ်လီၤပျံၤလီၤဖုး လၢအမ့ၢ် တၢ်ပသိၣ်ဆါ ဒီးတၢ်လိၤကိၢ်ဒိၣ်ဒိၣ်​ တုၤလၢ သုမဲာ်ချံ ကဒုထီၣ်​ ဒီးသုဂံၢ်သုဘါ လၢာ်ဝဲလီၤ. ဒီးသုကဖှံလီၤ တၢ်ချံကလီကလီ ခီဖျိလၢ သုဒုၣ်သုဒါ ကဟဲအီၣ်ကွံာ် တၢ်လၢ အမဲထီၣ်သၣ်ထီၣ်တဖၣ်​ အဃိလီၤ.+ ၁၇ ယကထီဒါသု ဒီးသုဒုၣ်သုဒါ ကမၤနၢၤသုလီၤ.+ ဒီးပှၤလၢအသးဟ့သုန့ၣ်​ ကဆီၣ်တံၢ်မၤနၢၤသု+ ဒီးပှၤမ့ၢ်တလူၤသု နီတဂၤဘၣ်​ သနာ်က့ သုကဃ့ၢ်ကွံာ်လီၤ.+

၁၈ “‘တၢ်မ့ၢ်မၤအသး ဒီးသုဒ်အံၤဒၣ်လဲာ် သုမ့ၢ်တဒိကနၣ်​ ယကလုၢ်ဒံးဘၣ်န့ၣ်​ ယကသိၣ်ဃီၣ်​ အါထီၣ်သု နွံစးလၢ သုတၢ်ဒဲးဘး အဃိလီၤ. ၁၉ ယကမၤကၢ်ကွံာ် သုတၢ်ပာ်ထီၣ်ထီသး လၢအဆူၣ်အကိၤ ဒီးဒုးကဲထီၣ်​ သုမူခိၣ်ဒ်ထးအသိး*+ ဒီးသုဟီၣ်ခိၣ်န့ၣ်​ ဒ်တိၢ်ဘီအသိးလီၤ.* ၂၀ ဒီးခီဖျိတၢ်တမဲထီၣ်သၣ်ထီၣ်​ လၢသုကီၢ်ပူၤဘၣ်+ ဒီးသ့ၣ်ထူၣ်လၢ သုကီၢ်ပူၤ တသၣ်ထီၣ်ဘၣ်အဃိ သုဂံၢ်သုဘါ ကလၢာ်ကွံာ် ခီလီလီန့ၣ်လီၤ.

၂၁ “‘ဒီးသုမ့ၢ်ဆဲးထီဒါယၤ ဒီးသုမ့ၢ်တဒိကနၣ်​ ယကလုၢ်ဒံးဘၣ်န့ၣ်​ ယကသိၣ်ဃီၣ်* အါထီၣ်သုနွံစး ဒ်သုတၢ်ဒဲးဘး အိၣ်ဝဲအသိးလီၤ. ၂၂ ဆၣ်ဖိကီၢ်ဖိ အမံၤတဖၣ်​ လၢပျီပူၤန့ၣ်​ ယကပျဲလီၤ အီၤလၢသုကျါ+ ဒီးအဝဲသ့ၣ်​ ကမၤသံ သုဖိ+ ဒီးမၤဟးဂီၤ သုဆၣ်ဖိကီၢ်ဖိအဒၢ ဒီးကမၤစှၤလီၤ သုနီၣ်ဂံၢ် ဒီးသုကျဲတဖၣ်​ ကအိၣ်ခီလီလီန့ၣ်လီၤ.+

၂၃ “‘သုမ့ၢ်ထံၣ်ဘၣ်​ တၢ်သ့ၣ်တဖၣ်န့ၣ်​ ဒီးသုမ့ၢ်တတူၢ်လိာ်ဒံး ယတၢ်သိၣ်က့ၤသီက့ၤ ဒံးဘၣ်+ ဒီးသုမ့ၢ် ဆဲးပာ်လီၤသုသးလၢ သုကမၤတၢ်လၢ အထီဒါယၤန့ၣ်​ ၂၄ ယၤစ့ၢ်ကီး ယကမၤတၢ်လၢ အထီဒါသု ဒီးယကသိၣ်ဃီၣ်​ အါထီၣ်သု နွံစးလၢ သုတၢ်ဒဲးဘး အဃိလီၤ. ၂၅ မ့ၢ်လၢ သုမၤဟးဂီၤ တၢ်အၢၣ်လီၤအီလီၤအဃိ ယကဒုးလီၤဘၣ်​ တၢ်ဟ့ၣ်ကၣ်အနးတဘ့ၣ်​ လၢသုလိၤလီၤ.+ သုမ့ၢ်ပာ်ဖှိၣ်ထီၣ်သုသးလၢ သုဝ့ၢ်ပူၤန့ၣ်​ ယကပျဲလီၤ တၢ်ဆူးတၢ်ဆါ လၢသုကျါ+ ဒီးသုကဘၣ်​ တၢ်ဟ့ၣ်လီၤသုလၢ သုဒုၣ်သုဒါ အစုပူၤလီၤ.+ ၂၆ ဖဲယထုးကွံာ် သုတၢ်အီၣ်ခဲလၢာ်အခါ+ ပှၤပိာ်မုၣ်အဂၤ တဆံန့ၣ်​ ကကုၢ်ကိၣ်လၢ ဖၣ်ကပူၤထဲတဖျၢၣ်အပူၤ ဒီးကစီၤဝဲကိၣ်​ ဒီးကနီၤလီၤန့ၢ်သုလီၤ.+ သုကအီၣ်ဘၣ်တၢ် ဘၣ်ဆၣ်​ သုတအီၣ်ဘၣ်​ ဘျဲဘျဲဘၣ်.+

၂၇ “‘သုမ့ၢ်ထံၣ်ဘၣ်​ တၢ်သ့ၣ်တဖၣ်န့ၣ်​ ဘၣ်ဆၣ်​ သုမ့ၢ်တဒိကနၣ်​ ယကလုၢ်ဘၣ်​ ဒီးသုမ့ၢ် ဆဲးပာ်လီၤသုသးလၢ သုကမၤတၢ်လၢ အထီဒါယၤန့ၣ်​ ၂၈ ယကထီဒါသု ဆူၣ်န့ၢ်အလီၢ်+ ဒီးယကသိၣ်ဃီၣ်​ အါထီၣ်သု နွံစး လၢသုတၢ်ဒဲးဘး အဃိလီၤ. ၂၉ သုကဘၣ်အီၣ်က့ၤ သုဖိမုၣ်ဖိခွါတဖၣ်​ အညၣ်လီၤ.+ ၃၀ ဒီးယကမၤဟးဂီၤ သုတၢ်လီၢ်ထီၣ်ထီတဖၣ်+ ဒီးယကကူာ်လီၤကွံာ် သုတၢ်လုၢ်တၢ်နၢမူ အလီၢ်တဖၣ်​ ဒီးယကပာ် ပူၣ်ထီၣ်သုစိၣ်​ လၢသုတၢ်ဂီၤတၢ်ဖှီၣ်​ လၢအဟးဂီၤ ဒီးအလီၤသးဘၣ်အၢတဖၣ်* အဖီခိၣ်+ ဒီးယကဃၣ်ကွံာ် ယသးလၢ သုအိၣ်​ ခီဖျိလၢ ယသးဘၣ်အၢသု အဃိလီၤ.+ ၃၁ ဒီးယကမၤဟးဂီၤ သုဝ့ၢ်တဖၣ်+ ဒီးသုတၢ်လီၢ်စီဆှံတဖၣ်လီၤ. ဒီးတၢ်နၢမူလၢ အဟဲလၢသု တၢ်လုၢ်တၢ်ပာ်တဖၣ်​ အအိၣ်န့ၣ်​ တမၤမုာ် ယသးလၢၤဘၣ်. ၃၂ ဒီးယကဒုးအိၣ်သယုၢ် သုထံကီၢ်+ ဒီးသုဒုၣ်သုဒါလၢ အကအိၣ်ဝဲလၢ အပူၤန့ၣ်​ ကကွၢ်ထံဝဲ ဒီးကကမၢကမၣ်ဝဲလီၤ.+ ၃၃ ဒီးယကမၤ လီၤပြံလီၤပြါသုလၢ ပှၤကလုာ်တဖၣ်အကျါ+ ဒီးယကထုးထီၣ်​ နးတဘ့ၣ်လၢ အကပိာ်ထီၣ်သုခံ+ ဒီးသုထံကီၢ် ကအိၣ်သယုၢ်+ ဒီးသုဝ့ၢ်တဖၣ်​ ကဟးဂီၤလၢာ်စီလီၤ.

၃၄ “‘ဖဲသုအိၣ်လၢ သုဒုၣ်သုဒါ အထံကီၢ်အခါ သုကီၢ်ကအိၣ်ဘှံးဘၣ်​ ဖဲအအိၣ်သယုၢ် ဒီတကတီၢ်န့ၣ်လီၤ. ဖဲန့ၣ်အခါ ထံကီၢ်ကအိၣ်ဘှံးဘၣ်​ မ့ၢ်လၢ တၢ်အိၣ်ဘှံးအနံၣ်​ လၢအပူၤကွံာ်န့ၣ်​ အတအိၣ်ဘှံးဘၣ်ဘၣ်​ အဃိလီၤ.+ ၃၅ ဖဲထံကီၢ်အိၣ်သယုၢ် ဒီတကတီၢ်န့ၣ်​ အကအိၣ်ဘှံးဘၣ်​ မ့ၢ်လၢ ဖဲသုအိၣ်လၢ ထံကီၢ်ပူၤအခါ မ့ၢ်တုၤလၢ တၢ်အိၣ်ဘှံးအနံၣ်န့ၣ်​ အတအိၣ်ဘှံးဘၣ်ဝဲ အဃိလီၤ.

၃၆ “‘မ့မ့ၢ် ပှၤလၢအပူၤဖျဲးတဖၣ်န့ၣ်+ ဖဲအဝဲသ့ၣ်အိၣ်လၢ အဒုၣ်အဒါတဖၣ်​ အကီၢ်ပူၤအခါ ယကမၤပှဲၤ အဝဲသ့ၣ်​ အသးဒီး တၢ်သူၣ်ပျံၤသးဖုးလီၤ. အဃိ အဝဲသ့ၣ်​ ကဃ့ၢ်ကွံာ် လၢသ့ၣ်လၣ်သီၣ်လၢ ကလံၤအူဝဲ အဃိ ဒီးကဃ့ၢ်ဝဲဒ် ပှၤလၢ အဃ့ၢ်ပူၤဖျဲးအသး လၢနးအသိးလီၤ. ဒီးပှၤတလူၤ အဝဲသ့ၣ်​ နီတဂၤဘၣ်​ သနာ်က့ အဝဲသ့ၣ်​ ကလီၤဃံၢ်ဝဲလီၤ.+ ၃၇ ပှၤတလူၤ အဝဲသ့ၣ်​ နီတဂၤဘၣ်​ သနာ်က့ အဝဲသ့ၣ်​ ကလီၤဃံၢ်ဒိးလိာ်အသး တဂၤဒီးတဂၤ ဒ်ပှၤလၢ အဃ့ၢ်ကွံာ် လၢနးအသိးလီၤ. ဒီးသုတြီဆၢက့ၤ သုဒုၣ်သုဒါ တနၢၤဘၣ်.+ ၃၈ သုကသံ လၢပှၤကလုာ်တဖၣ်အကျါ+ ဒီးသုဒုၣ်သုဒါတဖၣ်​ အကီၢ်န့ၣ်​ ကအီၣ်ကွံာ်သုလီၤ. ၃၉ သုဝဲလၢ အအိၣ်တ့ၢ်ဒံးတဖၣ်န့ၣ်​ ကဟးဂူာ်ဟးဂီၤ ကယီကယီလၢ သုဒုၣ်သုဒါတဖၣ်​ အထံကီၢ်အပူၤ+ ခီဖျိလၢ သုတၢ်ကမၣ်​ ဒီးသုပၢ်တဖၣ်​ အတၢ်ကမၣ်​ အဃိလီၤ.+ ၄၀ ဖဲန့ၣ်အခါ အဝဲသ့ၣ်​ ကအၢၣ်လီၤ အတၢ်ကမၣ်+ ဒီးအပၢ် အတၢ်ကမၣ်​ ဒီးကအၢၣ်လီၤဝဲလၢ အဝဲသ့ၣ်​ တအိၣ်ဒီး တၢ်သးတီဘၣ်လီၤ. ဒီးကအၢၣ်လီၤဝဲလၢ အဝဲသ့ၣ်ထီဒါယၤ ခီဖျိလၢ အဝဲသ့ၣ်တအိၣ်ဒီး တၢ်သးတီဘၣ်​ အဃိလီၤ.+ ၄၁ အဃိ ယကမၤတၢ်လၢ အထီဒါ အဝဲသ့ၣ်+ ခီဖျိလၢ ယကဆှၢ အဝဲသ့ၣ်လၢ အဒုၣ်အဒါတဖၣ်​ အထံကီၢ်ပူၤလီၤ.+

“‘ဒီးဖဲန့ၣ်​ ဘၣ်သ့ၣ်သ့ၣ်​ အဝဲသ့ၣ်​ ကဆီၣ်လီၤအသး*+ ဝံၤဒီး အဝဲသ့ၣ်​ ကလိးက့ၤအပှ့ၤလၢ အတၢ်ဒဲးဘး အဂီၢ်လီၤ. ၄၂ ဒီးယကသ့ၣ်နီၣ်ထီၣ်​ ယတၢ်အၢၣ်လီၤအီလီၤလၢ ယမၤတ့ၢ်ဒီး စီၤယၤကိာ်,+ တၢ်အၢၣ်လီၤအီလီၤ လၢယမၤတ့ၢ်ဒီး စီၤအံၤစဲး+ ဒီးယကသ့ၣ်နီၣ်ထီၣ်​ ယတၢ်အၢၣ်လီၤအီလီၤ လၢယမၤတ့ၢ်ဒီး စီၤအၤဘြၤဟၣ်+ ဒီးယတသးပ့ၤနီၣ်​ ထံကီၢ်ဘၣ်. ၄၃ ဒီးဖဲအဝဲသ့ၣ်​ ဟးထီၣ်လၢ ထံကီၢ်ပူၤ ဒီးထံကီၢ် အိၣ်သယုၢ်ဝဲအခါ တၢ်ကဒုးအိၣ်ဘှံးက့ၤ ထံကီၢ်လၢ+ အတၢ်အိၣ်ဘှံးအနံၣ်လၢ အတလၢဝဲတဖၣ်​ အဃိလီၤ. ဒီးမ့ၢ်လၢ အဝဲသ့ၣ်​ တကနၣ်ဃုာ် ယတၢ်သိၣ်တၢ်သီတဖၣ်ဘၣ်​ ဒီးသးဘၣ်အၢ ယတၢ်ဘျၢတဖၣ်အဃိ အဝဲသ့ၣ်​ ကလိးက့ၤအပှ့ၤလၢ အတၢ်ကမၣ်​ အဂီၢ်လီၤ.+ ၄၄ တၢ်မ့ၢ်ကဲထီၣ်အသး ဒ်အံၤခဲလၢာ်သနာ်က့ ဖဲအဝဲသ့ၣ်​ အိၣ်လၢ ဒုၣ်ဒါတဖၣ်​ အကီၢ်ပူၤအခါ ယတပာ်တ့ၢ်အဝဲသ့ၣ်​ လၢာ်လၢာ်ဆ့ဆ့ နီတဘျီဘၣ်+ ဒီးယတပာ်တ့ၢ် အဝဲသ့ၣ်​ တုၤလၢ အဝဲသ့ၣ်ဟးဂီၤခဲလၢာ်ဘၣ်. ယမ့ၢ်မၤဘၣ်ဖုးဒ်န့ၣ်န့ၣ်​ ယတၢ်အၢၣ်လီၤအီလီၤဒီး အဝဲသ့ၣ်​ ကဟးဂီၤဝဲလီၤ.+ ယမ့ၢ် အဝဲသ့ၣ်​ အကစၢ် ယဟိဝၤယွၤလီၤ. ၄၅ ဒ်သိး အဝဲသ့ၣ်​ ကဒိးန့ၢ်ဘၣ်​ အဘျုးအဂီၢ် ယကသ့ၣ်နီၣ်ထီၣ်​ ယတၢ်အၢၣ်လီၤအီလီၤလၢ ယမၤတ့ၢ်ဒီး အဝဲသ့ၣ်​ အမိၢ်ပၢ်ဖံဖု လၢပျၢၤတဖၣ်လီၤ.+ ယဒုးဟးထီၣ်​ အဝဲသ့ၣ်​ အမိၢ်ပၢ်ဖံဖု လၢပျၢၤတဖၣ်လၢ ကီၢ်အဲၤကူပတူးအပူၤ လၢပှၤကလုာ်တဖၣ်အမဲာ်ညါ+ ဒ်သိး ယကပာ်ဖျါထီၣ်လၢ ယမ့ၢ် အဝဲသ့ၣ်​ အကစၢ်ယွၤလီၤ. ယမ့ၢ် ယဟိဝၤယွၤလီၤ.’”

၄၆ တၢ်သ့ၣ်တဖၣ်န့ၣ်​ မ့ၢ်တၢ်ဘျၢ, တၢ်မၤလိာ် ဒီးတၢ်သိၣ်တၢ်သီတဖၣ်​ လၢယဟိဝၤယွၤ ဒုးအိၣ်ထီၣ်ဝဲလၢ အဝဲ ဒီးပှၤအံၣ်စရ့လးဖိ အဘၢၣ်စၢၤ လၢကစၢၢ်စံၤနါအလိၤ ခီဖျိလၢ စီၤမိၤၡ့လီၤ.+

၂၇ ယဟိဝၤယွၤ ဆဲးတဲ စီၤမိၤၡ့လၢ ၂ “တဲဘၣ်​ ပှၤအံၣ်စရ့လးဖိလၢ ‘ပိာ်ခွါတဂၤမ့ၢ် မၤဝဲတၢ်အၢၣ်လီၤ လီၤဆီ+ ဒ်သိး ကအးလီၤပှၤတဂၤလၢ ယဟိဝၤယွၤအအိၣ်န့ၣ်​ တၢ်ပာ်ပနီၣ်အပှ့ၤလၢ ပှၤတဂၤဂၤအဂီၢ်န့ၣ်​ အိၣ်ဝဲဒ် လာ်အံၤအသိးလီၤ. ၃ လၢပှၤပိာ်ခွါလၢ အသးအိၣ်အနံၣ်​ ၂၀ တုၤလၢ ၆၀ အဂီၢ်န့ၣ်​ တၢ်ပာ်ပနီၣ်အပှ့ၤ ကအိၣ်ဝဲ စ့ၡက့လး* ၅၀ ဒ်တၢ်စီဆှံအလီၢ် အၡက့လး အသိးလီၤ. ၄ ဘၣ်ဆၣ်​ မ့မ့ၢ်လၢ ပိာ်မုၣ်အဂီၢ်န့ၣ်​ တၢ်ပာ်ပနီၣ်​ အပှ့ၤ ကအိၣ်ဝဲ စ့ၡက့လး ၃၀ လီၤ. ၅ ဒီးလၢပှၤလၢ အသးအိၣ်​ ၅ နံၣ်​ တုၤလၢ အနံၣ်​ ၂၀ အဂီၢ်န့ၣ်​ တၢ်ပာ်ပနီၣ်​ အပှ့ၤ ကအိၣ်ဝဲ စ့ၡက့လး ၂၀ လၢပှၤပိာ်ခွါအဂီၢ် ဒီးစ့ၡက့လး ၁၀ လၢပိာ်မုၣ်​ အဂီၢ် လီၤ. ၆ ဒီးပှၤလၢ အသးအိၣ်​ တလါ တုၤလၢ ယဲၢ်နံၣ်အဂီၢ်န့ၣ်​ တၢ်ပာ်ပနီၣ်​ အပှ့ၤ ကအိၣ်ဝဲ စ့ ၅ ၡက့လး လၢပှၤပိာ်ခွါအဂီၢ် ဒီး စ့ ၃ ၡက့လး လၢပှၤပိာ်မုၣ်​ အဂီၢ်လီၤ.

၇ “‘ပှၤလၢ အသးအိၣ်​ အနံၣ်​ ၆၀ ဒီးဆူအဖီခိၣ်​ အဂီၢ်န့ၣ်​ တၢ်ပာ်ပနီၣ်​ အပှ့ၤ ကအိၣ်ဝဲ စ့ ၁၅ ၡက့လး လၢပှၤပိာ်ခွါအဂီၢ် ဒီးၡက့လး ၁၀ လၢပှၤပိာ်မုၣ်​ အဂီၢ်လီၤ. ၈ ဘၣ်ဆၣ်​ အဝဲမ့မ့ၢ် ပှၤလၢအဖှီၣ်​ တုၤဒၣ်လဲာ် အစ့တယၢဘၣ်လၢ အကဟ့ၣ်တၢ်အပှ့ၤ+ ဒ်တၢ်ပာ်ပနီၣ်​ အပှ့ၤအိၣ်ဝဲအသိးဘၣ်န့ၣ်​ ပှၤတဂၤန့ၣ်​ ကဘၣ်ဆၢထၢၣ်လၢ ပှၤလုၢ်တၢ်ဒိၣ်​ အမဲာ်ညါ ဒီးပှၤလုၢ်တၢ်ဒိၣ်​ ကက့ၤပာ်ပနီၣ်က့ၤ ပှၤတဂၤန့ၣ်​ အပှ့ၤလီၤ. ဒီးပှၤလုၢ်တၢ်ဒိၣ်​ ကပာ်ပနီၣ်က့ၤ တၢ်အပှ့ၤ ဒ်ပှၤလၢ အမၤတၢ်အၢၣ်လီၤတဂၤ အတၢ်အိၣ်ဝဲ အသိးလီၤ.+

၉ “‘ပှၤတဂၤ မ့ၢ်အၢၣ်လီၤလၢ ကဟ့ၣ်လီၤ ဆၣ်ဖိကီၢ်ဖိလၢ ပှၤဟ့ၣ်လုၢ်ထီၣ်အီၤ လၢယဟိဝၤယွၤ အအိၣ်​ န့ၢ်ဝဲတဒုန့ၣ်​ တၢ်လၢပှၤဟ့ၣ်လီၤ ယဟိဝၤယွၤ တမံၤဂ့ၤတမံၤဂ့ၤန့ၣ်​ ကကဲထီၣ်​ တၢ်လၢအစီဆှံလီၤ. ၁၀ ပှၤတဘၣ်​ ခီလဲ အတဂ့ၤဘၣ်​ လၢအဂ့ၤ ဒီးအဂ့ၤလၢ အတဂ့ၤဘၣ်န့ၣ်ဘၣ်. အဃိ ပှၤမ့ၢ်ခီလဲ ဆၣ်ဖိကီၢ်ဖိ တဒု လၢဆၣ်ဖိကီၢ်ဖိ အဂၤတဒုန့ၣ်​ ဆၣ်ဖိကီၢ်ဖိလၢ အခီၣ်ထံးတဒု ဒီးဆၣ်ဖိကီၢ်ဖိလၢ ပှၤခီလဲဒီးအီၤတဒုန့ၣ်​ ကကဲထီၣ်​ တၢ်လၢအစီဆှံ ခံဒုလၢာ်လီၤ. ၁၁ ဘၣ်ဆၣ်​ ပှၤတဂၤမ့ၢ်အၢၣ်လီၤလၢ ကဟ့ၣ်လီၤ ဆၣ်ဖိကီၢ်ဖိလၢ အတကဆှီဘၣ်+ လၢပှၤဟ့ၣ်လုၢ်ထီၣ်အီၤ လၢယဟိဝၤယွၤအအိၣ်​ တန့ၢ်ဘၣ်န့ၣ်​ အဝဲကဒုးဆၢထၢၣ်ဝဲ ဆၣ်ဖိကီၢ်ဖိအံၤလၢ ပှၤလုၢ်တၢ်ဒိၣ်​ အမဲာ်ညါလီၤ. ၁၂ ဒီးဆၣ်ဖိကီၢ်ဖိ တဒုန့ၣ်​ အဂ့ၤဧါ တဂ့ၤဘၣ်ဧါန့ၣ်​ ပှၤလုၢ်တၢ်ဒိၣ်​ ကကွၢ်ဝဲ ဒီးကပာ်ပနီၣ်​ အပှ့ၤလီၤ. ဒီးဒ်ပှၤလုၢ်တၢ်ဒိၣ်​ ပာ်ပနီၣ်​ အပှ့ၤအသိးန့ၣ်​ အပှ့ၤကအိၣ်ဝဲ ဒ်န့ၣ်လီၤ. ၁၃ ဘၣ်ဆၣ်​ လၢခံ အဝဲ မ့ၢ်အဲၣ်ဒိး ပှ့ၤကဒါက့ၤဝဲ ဆၣ်ဖိကီၢ်ဖိအံၤန့ၣ်​ အဝဲကဘၣ်​ ဟ့ၣ်ဝဲ ဒ်တၢ်ပာ်ပနီၣ်​ အပှ့ၤ အိၣ်ဝဲအသိး ဒီးဟ့ၣ်အါထီၣ်​ ယဲၢ်ပူတပူလီၤ.+

၁၄ “‘ပှၤတဂၤ မ့ၢ်ပာ်စီဆှံ အဟံၣ်​ ဒ်တၢ်လၢအစီဆှံ လၢယဟိဝၤယွၤ အဂီၢ်န့ၣ်​ ပှၤလုၢ်တၢ်ဒိၣ်​ ကကွၢ်ဝဲ ဟံၣ်အံၤ အဂ့ၤဧါ တဂ့ၤဘၣ်ဧါ ဒီးကပာ်ပနီၣ်​ အပှ့ၤလီၤ. ဒီးဒ်ပှၤလုၢ်တၢ်ဒိၣ်​ ပာ်ပနီၣ်​ အပှ့ၤအသိးန့ၣ်​ အပှ့ၤကအိၣ်ဝဲ ထဲန့ၣ်လီၤ.+ ၁၅ ဘၣ်ဆၣ်​ ပှၤလၢ အပာ်စီဆှံ အဟံၣ်တဂၤအံၤ မ့ၢ်အဲၣ်ဒိး ပှ့ၤကဒါက့ၤ အဟံၣ်န့ၣ်​ အဝဲကဘၣ်​ ဟ့ၣ်ဝဲစ့ ဒ်တၢ်ပာ်ပနီၣ်​ အပှ့ၤ အိၣ်ဝဲအသိး ဒီးကဘၣ်ဟ့ၣ်အါထီၣ်​ ယဲၢ်ပူတပူလီၤ. ဒီးဟံၣ်န့ၣ်​ ကကဲထီၣ်​ အတၢ်လီၤ.

၁၆ “‘ပှၤတဂၤ မ့ၢ်ပာ်စီဆှံအစံာ်ပျီတက့လၢ ယဟိဝၤယွၤအဂီၢ်န့ၣ်​ တၢ်ပာ်ပနီၣ်စံာ်အပှ့ၤ ဒ်တၢ်ချံလၢ ပှၤကဘၣ်ဖှံလီၤဝဲလၢစံာ်ပူၤ လိၣ်ဝဲထဲလဲၣ်အသိးလီၤ. အဃိ မ့ၢ်လိၣ်ဘၣ်​ ဘုမုယီၤအချံ အကံလိ ၁၃၀* လၢစံာ်ပျီအဂီၢ်န့ၣ်​ တၢ်ကပာ်ပနီၣ်​ စံာ်အပှ့ၤလၢ စ့ၡက့လး ၅၀ လီၤ. ၁၇ အဝဲမ့ၢ်ပာ်စီဆှံ အစံာ်ပျီဖဲ ကၠူဘလံၤအနံၣ်န့ၣ်*+ တၢ်ပာ်ပနီၣ်အပှ့ၤ ကအိၣ်ဒ် လၢထးအသိးလီၤ. ၁၈ အဝဲမ့ၢ်ပာ်စီဆှံဝဲ အစံာ်ပျီ ဖဲကၠူဘလံၤ ဝံၤအလီၢ်ခံန့ၣ်​ ပှၤလုၢ်တၢ်ဒိၣ်​ ကဒွးကွၢ်ဝဲ နံၣ်လၢအအိၣ်တ့ၢ်တဖၣ်​ တချုးလၢ ကၠူဘလံၤ ဘၣ်ဒံးဘၣ်​ ဒီးကမၤစှၤလီၤ တၢ်ပာ်ပနီၣ်အပှ့ၤလီၤ.+ ၁၉ ဘၣ်ဆၣ်​ ပှၤလၢ အပာ်စီဆှံစံာ်ပျီတဂၤ မ့ၢ်အဲၣ်ဒိး ပှ့ၤကဒါက့ၤ အစံာ်ပျီန့ၣ်​ အဝဲကဘၣ်ဟ့ၣ်လီၤစ့ ဒ်တၢ်ပာ်ပနီၣ်အပှ့ၤ အိၣ်ဝဲအသိး တကးဒံးဘၣ်​ အကဘၣ်ဟ့ၣ်အါထီၣ်အပှ့ၤ ယဲၢ်ပူတပူ ဝံၤဒီးစံာ်ပျီန့ၣ်​ ကကဲထီၣ်​ ကဒါက့ၤအတၢ်လီၤ. ၂၀ ဒီးအဝဲ မ့ၢ်တပှ့ၤကဒါက့ၤ အစံာ်ပျီဘၣ်​ ဒီးပှၤမ့ၢ်ဆါလီၤအီၤ လၢပှၤဂၤအအိၣ်န့ၣ်​ အဝဲပှ့ၤကဒါက့ၤဝဲ တန့ၢ်လၢၤဘၣ်. ၂၁ ဖဲကၠူဘလံၤ ဘၣ်အခါန့ၣ်​ စံာ်ပျီအံၤ ကကဲထီၣ်ဝဲ တၢ်လၢအစီဆှံ လၢယဟိဝၤယွၤ အဂီၢ် ဒီးကဘၣ်တၢ်ပာ်လီၤဆီအီၤ လၢအဂီၢ်လီၤ. အဃိ စံာ်ပျီအံၤ ကကဲထီၣ်ဝဲ ပှၤလုၢ်တၢ်ဒိၣ်​ အတၢ်လီၤ.+

၂၂ “‘ပှၤတဂၤ မ့ၢ်ပှ့ၤစံာ်ပျီလၢ အတမ့ၢ် အတၢ်စုလီၢ်ခီၣ်ခိၣ်​ လၢအန့ၢ်သါဘၣ်ဝဲ+ ဒီးအမ့ၢ်ပာ်စီဆှံဝဲလၢ ယဟိဝၤယွၤအအိၣ်န့ၣ်​ ၂၃ ပှၤလုၢ်တၢ်ဒိၣ်​ ကဒွးကွၢ်ဝဲ နံၣ်လၢအအိၣ်တ့ၢ်တဖၣ်​ တချုးလၢ ကၠူဘလံၤ ဘၣ်ဒံးဘၣ်​ ဒီးဖဲတၢ်တနံၤန့ၣ်​ အဝဲကပာ်ပနီၣ်​ အပှ့ၤလီၤ.+ အမ့ၢ်ဝဲတၢ်လၢ အစီဆှံလၢ ယဟိဝၤယွၤအဂီၢ်လီၤ. ၂၄ ဒီးဖဲကၠူဘလံၤ အနံၣ်န့ၣ်​ စံာ်ပျီအံၤ ကကဲထီၣ်က့ၤဝဲ ပှၤလၢအဆါတ့ၢ်စံာ်ပျီ လၢအမ့ၢ် စံာ်ကစၢ်တဂၤန့ၣ်​ အတၢ်လီၤ.+

၂၅ “‘တၢ်အပှ့ၤ ကိးခါဒဲးန့ၣ်​ ပှၤကဘၣ်​ ပာ်ပနီၣ်အီၤ ဒ်တၢ်စီဆှံအလီၢ် အၡက့လးအိၣ်ဝဲ အသိးလီၤ. တၡက့လးန့ၣ်​ ကဘၣ်လီၤလၢ က့ရၤ* ၂၀ လီၤ.

၂၆ “‘ပှၤတဂၤဂ့ၤ တဂၤဂ့ၤ တဘၣ်​ ပာ်စီဆှံဝဲ ဆၣ်ဖိကီၢ်ဖိ အဖိဝဲၢ်ကိဘၣ်, မ့ၢ်လၢ အအိၣ်ဖျဲၣ်ထီၣ်ပာ်စၢၤ ဒ်တၢ်အဝဲၢ်ကိလၢ ယဟိဝၤယွၤ အဂီၢ်အဃိလီၤ.+ ကျီၢ်ဖါအဝဲၢ်ကိ မ့ၢ်ဂ့ၤ သိအဝဲၢ်ကိမ့ၢ်ဂ့ၤ အကဲပာ်စၢၤ ယဟိဝၤယွၤ အတၢ်လီၤ.+ ၂၇ ဘၣ်ဆၣ်​ အဝဲမ့ၢ်ပှ့ၤကဒါက့ၤ ဆၣ်ဖိကီၢ်ဖိလၢ အတကဆှီဘၣ်တဒု အဖိဝဲၢ်ကိန့ၣ်​ အဝဲကဘၣ်ဟ့ၣ်လီၤစ့ ဒ်တၢ်ပာ်ပနီၣ်အပှ့ၤ အိၣ်ဝဲအသိး တကးဒံးဘၣ်​ အကဘၣ်​ ဟ့ၣ်အါထီၣ်အပှ့ၤ ယဲၢ်ပူတပူလီၤ.+ အမ့ၢ်တပှ့ၤကဒါက့ၤဝဲဘၣ်န့ၣ်​ ကဘၣ်တၢ်ဆါလီၤကွံာ်အီၤ ဒ်တၢ်ပာ်ပနီၣ်အပှ့ၤ အိၣ်ဝဲအသိးလီၤ.

၂၈ “‘ဒီးပှၤတဂၤ မ့ၢ်ပာ်လီၤဆီ အပှၤမ့ၢ်ဂ့ၤ, အဆၣ်ဖိကီၢ်ဖိမ့ၢ်ဂ့ၤ, အစံာ်ပျီမ့ၢ်ဂ့ၤ လၢယဟိဝၤယွၤအဂီၢ် လီၤစိၤန့ၣ်* ပှၤဆါလီၤကွံာ်အီၤ တန့ၢ်လၢၤဘၣ်​ ဒီးပှၤပှ့ၤက့ၤဝဲ တန့ၢ်လၢၤဘၣ်. တၢ်လၢ ပှၤပာ်လီၤဆီအီၤလၢ ယဟိဝၤယွၤ အဂီၢ်ကိးမံၤဒဲးန့ၣ်​ မ့ၢ်ဝဲ တၢ်လၢအစီဆှံနီၢ်ကီၢ် လၢအဂီၢ်လီၤ.+ ၂၉ ဒီးပှၤတဂၤ မ့ၢ်ဘၣ်တၢ်ပာ်အီၤ လၢတၢ်ဟးဂီၤအဂီၢ်န့ၣ်​ ပှၤပှ့ၤက့ၤအီၤ တန့ၢ်လၢၤဘၣ်.+ အဝဲကဘၣ်တၢ်မၤသံအီၤ သပှၢ်ကတၢၢ်လီၤ.+

၃၀ “‘တၢ်လၢ အမဲထီၣ်သၣ်ထီၣ်​ လၢစံာ်ပျီပူၤမ့ၢ်ဂ့ၤ, သ့ၣ်သၣ်တဖၣ်မ့ၢ်ဂ့ၤ, ကယဲၢ်တၢ်လၢ အမဲထီၣ်သၣ်ထီၣ်လၢ ထံကီၢ်ပူၤ ဆံဆဲၣ်ပူတပူန့ၣ်+ မ့ၢ်ယဟိဝၤယွၤ အတၢ်လီၤ. အမ့ၢ်ဝဲ တၢ်လၢအစီဆှံ လၢယဟိဝၤယွၤ အဂီၢ်လီၤ. ၃၁ ပှၤတဂၤ မ့ၢ်အဲၣ်ဒိးပှ့ၤကဒါက့ၤ တၢ်လၢအပၣ်ဃုာ်လၢ အတၢ်ဆံဆဲၣ်ပူတပူအကျါ တမံၤဂ့ၤ တမံၤဂ့ၤန့ၣ်​ အဝဲကဘၣ်​ ဟ့ၣ်အါထီၣ်အပှ့ၤ ယဲၢ်ပူတပူလီၤ. ၃၂ မ့မ့ၢ် တၢ်ဆံဆဲၣ်ပူတပူ လၢအဘၣ်ဃးဒီး ကျီၢ်, သိ ဒီးမဲာ်တဲးလဲးန့ၣ်​ မ့ၢ်ဝဲဒ်အံၤလီၤ. ဖဲပှၤကွၢ်သိ ဂံၢ်ဝဲအဆၣ်ဖိကီၢ်ဖိတဖၣ်အခါ* ဖဲအဂံၢ်ပှဲၤထီၣ်ဝဲ တုၤလၢ အဒုတဆံ ကိးဘျီဒဲးန့ၣ်​ တၢ်တဒုန့ၣ်​ ကကဲထီၣ်တၢ်လၢ အစီဆှံလၢ ယဟိဝၤယွၤအဂီၢ်လီၤ. ၃၃ ဆၣ်ဖိကီၢ်ဖိ တဒုအံၤ မ့ၢ်အဂ့ၤဧါ တဂ့ၤဘၣ်ဧါန့ၣ်​ အဝဲတဘၣ်​ သမံသမိးအီၤဘၣ်. ဒီးအဝဲတဘၣ်​ ခီလဲအီၤလၢ ဆၣ်ဖိကီၢ်ဖိအဂၤတဒုဘၣ်. အဝဲမ့ၢ်မၤဝဲဒ်န့ၣ်န့ၣ်​ ဆၣ်ဖိကီၢ်ဖိ ခံဒုလၢာ် ကကဲထီၣ်တၢ်လၢ အစီဆှံ+ ဒီးတၢ်ပှ့ၤက့ၤအီၤ တသ့လၢၤဘၣ်.’”

၃၄ တၢ်သ့ၣ်တဖၣ်န့ၣ်​ မ့ၢ်ဝဲ တၢ်မၤလိာ်တဖၣ်​ လၢပှၤအံၣ်စရ့လးဖိတဖၣ်အဂီၢ် လၢယဟိဝၤယွၤ ဟ့ၣ်လီၤဝဲ စီၤမိၤၡ့ လၢကစၢၢ်စံၤနါအလိၤလီၤ.+