ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်သးအခါ
နမ့ၢ်လဲၤခီဖျိဘၣ် န့ဆၢၣ်တၢ်ဘၣ်ဒိဘၣ်ထံးန့ၣ် အဝဲသ့ၣ်အတၢ်တူၢ်ဘၣ်အိၣ်ဒ်လဲၣ်န့ၣ် နၤစ့ၢ်ကီးနကသ့ၣ်ညါဘၣ်လီၤ. အဒိ, အဝဲသ့ၣ်တူၢ်ဘၣ် တၢ်ကိၢ်တၢ်ဂီၤ, တၢ်ပျံၤတၢ်ဖုး, တၢ်သးဟးဂီၤ, ခိၣ်နူာ်ဘံဘူ ဒီးကမံမီၢ်ပျီသီတၢ်န့ၣ်လီၤ. ပှၤအါဂၤသူၣ်ဟးဂီၤသးဟးဂီၤဝဲ ဒီးလီၤဘှံးလီၤတီၤဝဲ အဃိကီဝဲဒိၣ်မးလၢ အဝဲသ့ၣ်ကဆဲးအိၣ်မူဆူညါအဂီၢ်န့ၣ်လီၤ.
ခီဖျိလၢန့ဆၢၣ်တၢ်ဘၣ်ဒိဘၣ်ထံးအဃိ တၢ်လၢအအိၣ်ဒီးနၤ မ့ၢ်ဟါမၢ်ကွံာ်ဝဲခဲလၢာ်န့ၣ် နကဆိကမိၣ်လၢ နတူၢ်တၢ်တန့ၢ်လၢၤဘၣ်. ဒီးတကးဒံးဘၣ် ဖဲန့ၣ်နကတူၢ်ဘၣ်လၢ နတၢ်အိၣ်မူန့ၣ် အလုၢ်အပှ့ၤတအိၣ်လၢၤဘၣ်. ဘၣ်ဆၣ် လံာ်စီဆှံပာ်ဖျါဝဲလၢ ပတၢ်အိၣ်မူန့ၣ် အလုၢ်ဒိၣ်ပှ့ၤဒိၣ်ဝဲ ဒီးပအိၣ်ဒီးတၢ်မုၢ်လၢ်လၢခါဆူညါလီၤ.
တၢ်မ့ၢ်တၢ်တီလၢလံာ်စီဆှံပူၤန့ၣ် ဟ့ၣ်ပှၤတၢ်မုၢ်လၢ်နီၢ်ကီၢ်
စံၣ်တဲၤတဲလီၤတၢ် ၇:၈ တဲဝဲလၢ “တၢ်အကတၢၢ်န့ၣ်ဂ့ၤန့ၢ် တၢ်အခီၣ်ထံးတက့ၢ်လီၤ.” ဖဲနစးထီၣ်က့ၤ နတၢ်အိၣ်မူလၢအခီၣ်ထံးခီၣ်ဘိအခါန့ၣ် တမ့ၢ်တၢ်လၢအညီဘၣ်. ဘၣ်ဆၣ် နမ့ၢ်အိၣ်ဒီးတၢ်သူၣ်စူၤသးစူၤဒီး ဂုာ်ကျဲးစၢးက့ၤကယီကယီန့ၣ် နတၢ်အိၣ်သးကဂ့ၤထီၣ်ဝဲလီၤ.
လံာ်စီဆှံ ပာ်ဖျါဝဲလၢ ဆၢကတီၢ်လၢ ကဟဲဝဲန့ၣ် “တၢ်တနၢ်ဟူလၢၤဘၣ် တၢ်ဟီၣ်အသီၣ် ဒီးတၢ်ကဲးကိးပသူထီၣ် အသီၣ်လၢအပူၤဘၣ်.” (ယၡါယၤ ၆၅:၁၉) လၢယွၤအဘီအမုၢ် တၢ်ပၢဖီလာ်န့ၣ် ဟီၣ်ခိၣ်ကကဲထီၣ်က့ၤ ပၤရဒံစူးလီၤ. (စံးထီၣ်ပတြၢၤ ၃၇:၁၁, ၂၉) ဖဲန့ၣ်အခါ န့ဆၢၣ်တၢ်ဘၣ်ဒိဘၣ်ထံး တအိၣ်ထီၣ်နီတဘျီလၢၤဘၣ်. ဒီးတၢ်တူၢ်ဘၣ်လၢအမၤဘၣ်ဒိပှၤတဖၣ်န့ၣ် ကလီၤမၢ်ကွံာ်ဝဲလီၤထူလီၤယိာ်လီၤ. သ့တၢ်လၢာ်ကစၢ် အၢၣ်လီၤပှၤလၢ “တၢ်အခီၣ်ထံးတဖၣ်န့ၣ် တၢ်တသ့ၣ်နီၣ်ထီၣ်က့ၤဘၣ်အီၤဘၣ်. ဒီးတအိၣ်ထီၣ်လၢၤဘၣ်လၢ ပှၤအသးကံၢ်ပူၤဘၣ်.”—ယၡါယၤ ၆၅:၁၇.
တၢ်ဘၣ်တ့ကစၢ် ရဲၣ်ကျဲၤန့ၢ်ပှၤလၢ “ခါဆူညါတၢ်မုၢ်လၢ်” ဒီးလၢယွၤအဘီအမုၢ် တၢ်ပၢဖီလာ်န့ၣ် ပကဒိးန့ၢ်ဘၣ်တၢ်အိၣ်မူလၢ ပှဲၤဒီးတၢ်မုာ်တၢ်ခုၣ်န့ၣ် ဆိကမိၣ်ကွၢ်အီၤတက့ၢ်. (ယံးရမံယၤ ၂၉:၁၁) နမ့ၢ်သ့ၣ်ညါ တၢ်မ့ၢ်တၢ်တီန့ၣ် ကမၤစၢၤနၤလၢ နကနၢ်ပၢၢ်ထီၣ်လၢနတၢ်အိၣ်မူန့ၣ် အလုၢ်အပှ့ၤအိၣ်ဒံးဝဲလီၤ. စဲလံၤ လၢဘၣ်တၢ်ပာ်ဖျါထီၣ် အဂ့ၢ်လၢတၢ်မၤလိအခီၣ်ထံးန့ၣ် တဲဝဲ “နမ့ၢ်ဆိကမိၣ်ထံက့ၤ တၢ်လၢကစၢ်ယွၤ အဘီအမုၢ်ကမၤန့ၢ်ပှၤ လၢခါဆူညါန့ၣ် ကမၤစၢၤနၤလၢနကသးပ့ၤနီၣ်ကွံာ် တၢ်လၢအပူၤကွံာ်တဖၣ် ဒီးလဲၤခီဖျိ တၢ်လၢပတူၢ်ဘၣ်အီၤခဲအံၤတဖၣ်န့ၣ်လီၤ.”
အဃိ နတအဲၣ်ဒိးမၤလိအါထီၣ်ဘၣ်ဃးဒီး ယွၤအဘီအမုၢ်လၢ ကမၤဂ့ၤထီၣ်န့ၢ်ပှၤ ဟီၣ်ခိၣ် တၢ်အိၣ်သးတဖၣ်အံၤဘၣ်ဧါ. နမ့ၢ်မၤလိအါထီၣ်န့ၣ် အကမၤစၢၤနၤဒ်သိး နကသ့ၣ်ညါလၢ နတၢ်အိၣ်မူလၢ ဆၢကတီၢ်ခဲအံၤန့ၣ် အိၣ်ဒီးအလုၢ်အပှ့ၤလီၤ. တကးဒံးဘၣ် လၢညါနမ့ၢ်ထံၣ်ဘၣ်တၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤန့ၣ် နကနၢ်ပၢၢ်ထီၣ် တၢ်မုၢ်လၢ်လၢခါဆူညါအဂီၢ်လီၤ. ဘၣ်ဆၣ်လၢဆၢကတီၢ်ခဲအံၤန့ၣ် လံာ်စီဆှံဟ့ၣ်ပှၤ တၢ်ဟံးစုနဲၣ်ကျဲလၢကမၤစၢၤပှၤ ဖဲန့ဆၢၣ်တၢ်ဘၣ်ဒိဘၣ်ထံးကဲထီၣ်သးအခါလီၤ. ပကကွၢ်သကိးတၢ်အဒိတနီၤလီၤ.