ပသူလံာ်ဖိတဖၣ် ဒီးပစးထီၣ်တဲသကိးတၢ်ဒီး ပှၤဂၤကသ့ဒ်လဲၣ်

စးထီၣ်လၢ ၂၀၁၈, လါယနူၤအါရံၤန့ၣ်​ ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အကုခိၣ်န့ၣ်​ အိၣ်ဒီးတၢ်ဟ့ၣ်ကူၣ်လၢ ပကတဲသကိးတၢ်ဒီးပှၤဂၤအဂီၢ်လီၤ. ပဘၣ်တၢ်ဟ့ၣ်ဂံၢ်ဟ့ၣ်ဘါပှၤလၢ တမ့ၢ်ထဲပကနီၤလီၤ လံာ်လဲၢ်အဂီၢ်ဘၣ်​ လၢတၢ်န့ၣ်အလီၢ် ပကသးစၢၢ်ဆၢလၢ ပကတဲသကိးတၢ်ဒီး ပှၤလၢပထံၣ်ဘၣ်အီၤတဖၣ်လီၤ. ဒ်သိးပှၤစံၣ်တဲၤတဲလီၤတၢ်ဖိတဖၣ်​ ဆီတလဲဝဲ အတၢ်ဂ့ၢ်တၢ်ကျိၤလၢ ကတဲသကိးတၢ်ဒီး ဟံၣ်ကစၢ်ကသ့အဂီၢ် ပအိၣ်ဒီးတၢ်ဂီၤမူလၢ ဘၣ်ဃးဒီးတၢ်အဒိလၢ ပသူလံာ်စီဆှံဒီး တဲသကိးတၢ်ဒီး ပှၤဂၤကသ့ဒ်လဲၣ်န့ၣ်လီၤ. ပမၤဒ်အံၤန့ၣ်​ အခီပညီလၢ ဖဲပဟးစံၣ်တဲၤတဲလီၤတၢ် တဟံၣ်ဘၣ်တဟံၣ်အခါ ပတဘၣ်သူ လံာ်လဲၢ်တဖၣ်လၢၤဘၣ်န့ၣ်ဧါ. တမ့ၢ်ဒ်န့ၣ်ဘၣ်. အဒိ ဒ်သိးပစးထီၣ်တဲသကိးတၢ်ဒီး ပှၤဂၤကန့ၢ်အဂီၢ် လံာ်ဖိတဖၣ်​ ကဲဘျုးဒိၣ်မးလီၤ. ပမ့ၢ်သူလံာ်ဖိတခါဂ့ၤတခါဂ့ၤ ပသူတၢ်ဟ့ၣ်ကူၣ်လၢလာ်တဖၣ်အံၤသ့လီၤ–

1. ၁. သံကွၢ် တၢ်သံကွၢ်လၢ အိၣ်လၢလံာ်ကုခိၣ်.

2. ၂. ပၠးအီၤလံာ်စီဆှံအဆၢလၢ အပာ်ဖျါထီၣ်တၢ်စံးဆၢ လၢအအိၣ်လၢ လံာ်ကဘျံးပၤခံ အဖီခိၣ်ကတၢၢ်တက့ၢ်. တၢ်ဆၢကတီၢ်မ့ၢ်အိၣ်န့ၣ်​ ဖးဒီးတဲသကိးတၢ်ဂ့ၢ်လၢ အိၣ်လၢလံာ်ဖိအပူၤတက့ၢ်.

3. ၃. ဟ့ၣ်ဟံၣ်ကစၢ်လၢ လံာ်ဖိ ဒီးဟ့ၣ်ဂံၢ်ဟ့ၣ်ဘါအီၤလၢ ဖဲချုးအခါ ကဖးဝဲတၢ်ဂ့ၢ်လၢ အအိၣ်တ့ၢ်တဖၣ်တက့ၢ်.

4. ၄. တချုးနက့ၤဒံးဘၣ်န့ၣ်​ ပၠးအီၤ တၢ်သံကွၢ်လၢအိၣ်လၢ “ဆိကမိၣ်ကွၢ်” အဖီလာ်တဖၣ်​ ဒီးတဲအီၤလၢ လၢခံတဘျီ နကဟဲက့ၤဒီးတဲသကိး အတၢ်စံးဆၢလၢ လံာ်စီဆှံအပူၤတက့ၢ်.

ဖဲနက့ၤကဒါက့ၤအခါ နတဲသကိးတၢ်သံကွၢ်လၢ နသံကွၢ်တ့ၢ်အီၤအတၢ်စံးဆၢမ့ၢ်ဝံၤ သံကွၢ်တၢ်သံကွၢ်လၢ နကတဲသကိး လၢခံတဘျီအဂီၢ်တက့ၢ်. နသံကွၢ်အီၤ တၢ်သံကွၢ်လၢ အိၣ်လၢလံာ်လၢ ဘၣ်တၢ်ပာ်ဖျါထီၣ်အီၤလၢ လံာ်ဖိအလီၢ်ခံကတၢၢ်တကဘျံးအပူၤ မ့တမ့ၢ် လၢပပှာ်ယဲၤသန့အပူၤသ့လီၤ. ဖဲဆၢကတီၢ်လၢအကြၢးအဘၣ်န့ၣ်​ နစးထီၣ်သူ လံာ်လၢအမ့ၢ် တၢ်သးခုကစီၣ်လၢ ယွၤအအိၣ်​ မ့တမ့ၢ် လံာ်တဘ့ၣ်ဘ့ၣ်လၢ အအိၣ်လၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ်အပူၤသ့လီၤ.