မ့ၢ်နမဲာ်ကွၢ်တၢ်ဖဲလဲၣ်
“ပှၤလၢအအိၣ်ဝဲဆိးဝဲလၢ မူခိၣ်ဧၢ, ယကျ့ထီၣ်ယမဲာ်ဆူနၤလီၤ.”—စံးထီၣ်ပတြၢၤ ၁၂၃:၁.
၁, ၂. ကွၢ်တၢ်ဆူ ယဟိဝၤယွၤအအိၣ်န့ၣ် အခီပညီဒ်လဲၣ်.
ပအိၣ်မူဘၣ်လၢတၢ် “အဆၢအကတီၢ်လၢ အကီအခဲ” လီၤ. (၂ တံၤမသ့း ၃:၁) တချုးလၢ ယဟိဝၤယွၤ မၤလီၤမၢ်ကွံာ် တၢ်အၢတၢ်သီဒီးဒုးအိၣ်ထီၣ် တၢ်ဃူတၢ်ဖိးနီၢ်ကီၢ်လၢ ဟီၣ်ခိၣ်ဒံးဘၣ်န့ၣ် ပတၢ်အိၣ်မူကကီခဲ ဒိၣ်ထီၣ်ဝဲကွ့ၢ်ကွ့ၢ်လီၤ. လၢတၢ်န့ၣ်အဃိ ပကြၢးသံကွၢ်လီၤပသးလၢ ‘ဒ်သိးယကဒိးန့ၢ်ဘၣ် တၢ်မၤစၢၤဒီးတၢ်ဟံးစုနဲၣ်ကျဲအဂီၢ် မ့ၢ်ယကွၢ်တၢ်လၢ မတၤအအိၣ်လဲၣ်.’ ဘၣ်သ့ၣ်သ့ၣ် ပကစံးဆၢတဘျီဃီလၢ ပကွၢ်တၢ် “ဆူယဟိဝၤယွၤ” အအိၣ်လီၤ. ပမ့ၢ်စံးဆၢဒ်န့ၣ်န့ၣ် မ့ၢ်တၢ်စံးဆၢလၢ အဂ့ၤကတၢၢ်လီၤ.
၂ ကွၢ်တၢ်ဆူ ယဟိဝၤယွၤအအိၣ်န့ၣ် အခီပညီဒ်လဲၣ်. ဖဲပထံၣ်ဘၣ် တၢ်ကီတၢ်ခဲအခါ ပကွၢ်တၢ်လၢ ယဟိဝၤယွၤအအိၣ်ဧါ တကွၢ်ဧါန့ၣ် ပသ့ၣ်ညါအီၤကသ့ဒ်လဲၣ်. ပှၤကွဲးထါစံးထီၣ်ပတြၢၤ ပာ်ဖျါထီၣ်ဝဲလၢ ဖဲပလိၣ်ဘၣ်တၢ်မၤစၢၤအခါ အရ့ဒိၣ်လၢ ပကဘၣ်ကွၢ်တၢ်ဆူ ယဟိဝၤယွၤအအိၣ်လီၤ. (ဖး စံးထီၣ်ပတြၢၤ ၁၂၃:၁-၄ တက့ၢ်.) အဝဲတဲဝဲ ပကွၢ်တၢ်ဆူ ယဟိဝၤယွၤအအိၣ်န့ၣ် လီၤဂာ်ဒ်ကုၢ်တဂၤလၢ အကွၢ်တၢ်လၢ အကစၢ်အအိၣ်န့ၣ်လီၤ. လီၤဂာ်လိာ်အသးလၢ ကျဲဒ်လဲၣ်. ကုၢ်တဂၤကွၢ်တၢ်ဆူ အကစၢ်အအိၣ်န့ၣ် အခီပညီမ့ၢ်ဝဲ အဝဲဒိးသန့ၤထီၣ်အသးလၢ အကစၢ်အအိၣ် ဒ်သိးကဒိးန့ၢ်ဘၣ် တၢ်အီၣ်တၢ်အီ ဒီးတၢ်ဒီသဒၢအဂီၢ်လီၤ. ဘၣ်ဆၣ် ဒ်သိးအဝဲကသ့ၣ်ညါ အကစၢ်အတၢ်ဘၣ်သးအဂီၢ် အဝဲကဘၣ်ကွၢ် အကစၢ်ထီဘိလီၤ. ဝံၤဒီးအဝဲကဘၣ်မၤဒ် အကစၢ်အတၢ်ဘၣ်သးအသိးန့ၣ်လီၤ. ဒ်န့ၣ်သိးပဝဲစ့ၢ်ကီး ဒ်သိးပကသ့ၣ်ညါတၢ်လၢ ယဟိဝၤယွၤအဲၣ်ဒိးလၢပမၤတဖၣ် ဒီးပမၤထွဲအီၤကသ့အဂီၢ် ပကဘၣ်မၤလိအကလုၢ်ကထါ လီၤတံၢ်လီၤဆဲးထီဘိ ဒီးပကဘၣ်မၤထွဲအီၤလီၤ. ပမ့ၢ်မၤဒ်န့ၣ်န့ၣ် ပနာ်သ့သပှၢ်ကတၢၢ်လၢ ဖဲပလိၣ်ဘၣ်တၢ်မၤစၢၤအခါ ယဟိဝၤယွၤကမၤစၢၤပှၤလီၤ.—အ့းဖ့းစူး ၅:၁၇.
၃. ဒ်သိးပသုတကွၢ်တၢ်လၢ ယဟိဝၤယွၤအအိၣ်တဂ့ၤအဂီၢ် တၢ်မနုၤမၤတံာ်တာ်ပှၤသ့လဲၣ်.
၃ ပသ့ၣ်ညါလၢ ပကဘၣ်ကွၢ်တၢ်လၢ ယဟိဝၤယွၤအအိၣ်ထီဘိ ဘၣ်ဆၣ် တဘျီတခီၣ် ပသးကိၢ်တၢ်ဒံးလီၤ. ယ့ၣ်ၡူးအတံၤသကိး နီၢ်မၢ်သၤစ့ၢ်ကီး တၢ်ကဲထီၣ်အသးဒီးအီၤဒ်န့ၣ်လီၤ. အဝဲ “အတၢ်မၤအါအဃိဒီး, အသးကိၢ်” တၢ်လီၤ. (လူၤကၣ် ၁၀:၄၀-၄၂) နီၢ်မၢ်သၤမ့ၢ်ပှၤတီပှၤလိၤ ဒီးယ့ၣ်ၡူးအိၣ်ဘူးဒီးအီၤဘၣ်ဆၣ် အဝဲသးကိၢ်တၢ်ဒံးလီၤ. လၢတၢ်န့ၣ်အဃိ ပဝဲစ့ၢ်ကီးတဘျီတခီၣ် ပကသးကိၢ်တၢ်လီၤ. တၢ်မနုၤကမၤတံာ်တာ်ပှၤ ဒီးကဒုးအိၣ်ထီၣ်ပတၢ်သူၣ်ကိၢ်သးဂီၤ ဒ်သိးပသုတကွၢ်တၢ်လၢ ယဟိဝၤယွၤအအိၣ်တဂ့ၤအဂီၢ်လဲၣ်. လၢတၢ်မၤလိအံၤအပူၤ ပကတဲသကိးဘၣ်ဃး တၢ်လၢပှၤဂၤမၤဝဲသ့ၣ်တဖၣ် ဒုးအိၣ်ထီၣ်ပတၢ်သူၣ်ကိၢ်သးဂီၤ ဒီးမၤတံာ်တာ်ပှၤသ့ဒ်လဲၣ်. ဒီးပဆဲးကွၢ်တၢ်လၢ ယဟိဝၤယွၤအအိၣ်ကသ့ဒ်လဲၣ်.
ပှၤတီပှၤလိၤတဂၤ အတၢ်ခွဲးတၢ်ယာ်လီၤမၢ်ကွံာ်
၄. စီၤမိၤၡ့အတၢ်ခွဲးတၢ်ယာ်လၢ ကလဲၤနုာ်လီၤဘၣ်လၢ ကီၢ်တၢ်စံးပာ်အပူၤ လီၤမၢ်ကွံာ်ဝဲန့ၣ် ဘၣ်မနုၤအဃိ လီၤကမၢကမၣ်လဲၣ်.
၄ စီၤမိၤၡ့ကွၢ်တၢ်လၢ ယဟိဝၤယွၤအအိၣ် ဒ်သိးအကဒိးန့ၢ်ဘၣ် တၢ်ဟံးစုနဲၣ်ကျဲအဂီၢ်လီၤ. လံာ်စီဆှံပာ်ဖျါထီၣ်ဝဲလၢ စီၤမိၤၡ့အ “သူၣ်ဂၢၢ်သးကျၢၤဒ်အထံၣ်ပှၤလၢ အတအိၣ်ဖျါဘၣ် တဂၤအသိးလီၤ.” (ဖး ဧ့ၤဘြံၤ ၁၁:၂၄-၂၇ တက့ၢ်.) တကးဒံးဘၣ် တဲစ့ၢ်ကီးဝဲ “လၢကီၢ်အံၣ်စရ့လးအပူၤ ဝံတဂၤဒ်စီၤမိၤၡ့အသိးလၢ ယွၤကတိၤတၢ်ဒီးအီၤ မဲာ်သကိးမဲာ်န့ၣ် တအိၣ်ဘၣ်နီတစုနီတဂၤဘၣ်.” (၅ မိၤၡ့ ၃၄:၁၀, ခ့ခါစှီၤကျိာ်) စီၤမိၤၡ့မ့ၢ် ယဟိဝၤယွၤ အတံၤသကိးလၢအဂ့ၤ ဘၣ်ဆၣ် အတၢ်ခွဲးတၢ်ယာ်လၢ ကလဲၤနုာ်လီၤဘၣ်လၢ ကီၢ်တၢ်စံးပာ်အပူၤန့ၣ် လီၤမၢ်ကွံာ်ဝဲလီၤ. (၄ မိၤၡ့ ၂၀:၁၂) ဘၣ်မနုၤအဃိလဲၣ်.
၅-၇. ပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအပူၤ တယံာ်ဘၣ်ဒီး တၢ်ကဲထီၣ်အသးဒ်လဲၣ်. စီၤမိၤၡ့မၤဝဲဒ်လဲၣ်.
၅ ဖဲပှၤအံၣ်စရ့လးဖိတဖၣ် ဟးထီၣ်လၢကီၢ်အဲၤကူပတူးဝံၤ ခံလါဃၣ်ဃၣ်န့ၣ် တၢ်ကီတၢ်ခဲဖးဒိၣ် ဟဲအိၣ်ထီၣ်တခါလီၤ. တချုးဖဲ ပှၤအံၣ်စရ့လးဖိတဖၣ် လဲၤတုၤလၢ ကစၢၢ်စံၤနါဒံးဘၣ်အခါန့ၣ် အဝဲသ့ၣ်စးထီၣ်ကဒူးကဒ့ၣ်တၢ်လၢ ထံတအိၣ်ဘၣ်အဂ့ၢ်လီၤ. အဝဲသ့ၣ်ကဒူးကဒ့ၣ် စီၤမိၤၡ့ ဒီးစီၤမိၤၡ့သးဒိၣ်ထီၣ် အဝဲသ့ၣ်အဃိ “စီၤမိၤၡ့ကိးထီၣ်ယွၤ, ဒီးစံးဝဲဒၣ်, ယကမၤပှၤဂီၢ်မုၢ်အံၤဒ်လဲၣ်. ဘူးဒီးအကကွံာ်ယၤလၢလၢၢ်လီၤ.” (၂ မိၤၡ့ ၁၇:၄) ယဟိဝၤယွၤ ဟ့ၣ်လီၤစီၤမိၤၡ့ တၢ်ဟံးစုနဲၣ်ကျဲ လီၤတံၢ်လီၤဆဲးလီၤ. ယဟိဝၤယွၤ မၢအဟံးန့ၢ်နီၣ်ထိးဘိ ဒီးတီၢ်လၢၢ်လၢ ကစၢၢ်ဃိၤရ့းအလိၤန့ၣ်လီၤ. လံာ်စီဆှံတဲဝဲလၢ “စီၤမိၤၡ့မၤဒ်န့ၣ် လၢအံၣ်စရ့လး အသူၣ်က့သးပှၢ်အမဲာ်ညါလီၤ.” လၢတၢ်န့ၣ်အဃိ ထံဟဲထီၣ် ဒီးပှၤအံၣ်စရ့လးဖိတဖၣ် အီဘၣ်ထံ ဒီးတၢ်ဂ့ၢ်ကီတခါအံၤ ဘၣ်ဂီၢ်က့ၤဝဲလီၤ.—၂ မိၤၡ့ ၁၇:၅, ၆.
၆ လံာ်စီဆှံပာ်ဖျါထီၣ်ဝဲလၢ စီၤမိၤၡ့ကိးက့ၤဝဲ တၢ်လီၢ်အဝဲန့ၣ်အမံၤလၢ မးစၤ ဒီးမရံၤဘါလီၤ. မးစၤန့ၣ် အခီပညီမ့ၢ်ဝဲ “တၢ်လ့ပစီ” ဒီးမ့မ့ၢ် မရံၤဘါန့ၣ် အခီပညီမ့ၢ်ဝဲ “တၢ်အ့ၣ်လိာ်သး” လီၤ. ဘၣ်မနုၤအဃိလဲၣ်. ခီဖျိလၢ “ပှၤအံၣ်စရ့လးဖိ အတၢ်ထိၣ်အ့ၣ်လိာ်အသးအဃိ, ဒီးလၢအလ့ပစီယွၤအဃိ, ဖဲအစံး, ယွၤအိၣ်လၢပကျါ, တအိၣ်လဲၣ်န့ၣ်လီၤ.”—၂ မိၤၡ့ ၁၇:၇.
၇ တၢ်ကဲထီၣ်အသးလၢ မရံၤဘါန့ၣ် ယဟိဝၤယွၤတူၢ်ဘၣ်ဝဲဒ်လဲၣ်. ယဟိဝၤယွၤတူၢ်ဘၣ်ဝဲလၢ တမ့ၢ်ထဲ ပှၤအံၣ်စရ့လးဖိတဖၣ် ထီဒါစီၤမိၤၡ့ဘၣ် အဝဲသ့ၣ်ထီဒါ အီၤဒီးအတၢ်ပၢစ့ၢ်ကီးလီၤ. (ဖး စံးထီၣ်ပတြၢၤ ၉၅:၈, ၉ တက့ၢ်.) တၢ်လၢပှၤအံၣ်စရ့လးဖိတဖၣ် မၤဝဲန့ၣ်ကမၣ်လီၤ. ဘၣ်ဆၣ်စီၤမိၤၡ့မၤဝဲ တၢ်လၢအဘၣ်လီၤ. အဝဲကွၢ်တၢ်လၢ ယဟိဝၤယွၤအအိၣ် ဒီးမၤထွဲဝဲဒ် ကစၢ်ယွၤအတၢ်ဟံးစုနဲၣ်ကျဲအသိး လီၤတံၢ်လီၤဆဲးလီၤ.
၈. ဖဲပှၤအံၣ်စရ့လးဖိတဖၣ် အတၢ်လဲၤလၢ ပှၢ်မုၢ်ကနၢအပူၤဘူးကကတၢၢ်အခါ တၢ်ကဲထီၣ်အသးဒီး အဝဲသ့ၣ်ဒ်လဲၣ်.
၈ ပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအပူၤဝံၤ အနံၣ် ၄၀ ဃၣ်ဃၣ်အလီၢ်ခံ တၢ်ကဲထီၣ်ကဒီးအသးဒ်လဲၣ်. အဝဲသ့ၣ်အတၢ်လဲၤလၢ ပှၢ်မုၢ်ကနၢအပူၤဘူးကကတၢၢ်အခါ အဝဲသ့ၣ်လဲၤတုၤဖဲ တၢ်လီၢ်လၢအမ့ၢ်ကၤဒ့ၣ် လၢအဘူးဒီးကီၢ်တၢ်စံးပာ်လီၤ. တၢ်လီၢ်တတီၤအံၤ ဘၣ်တၢ်ကိးအီၤလၢ မရံၤဘါစ့ၢ်ကီးလီၤ.a (ကွၢ်တၢ်ဂ့ၢ်အဘျဲၣ်တက့ၢ်.) ဘၣ်မနုၤအဃိလဲၣ်. လၢတၢ်လီၢ်အဝဲအံၤန့ၣ် ပှၤအံၣ်စရ့လးဖိတဖၣ် ကဒူးကဒ့ၣ်ကဒီးတၢ်လၢ ထံတအိၣ်ဘၣ်အဂ့ၢ်အဃိလီၤ. (၄ မိၤၡ့ ၂၀:၁-၅) ဘၣ်ဆၣ် တဘျီအံၤ စီၤမိၤၡ့ မၤဘၣ်တၢ်ကမၣ်ဖးဒိၣ်တခါလီၤ.
၉. ယဟိဝၤယွၤ မၢစီၤမိၤၡ့မၤဝဲတၢ်မနုၤလဲၣ်. ဘၣ်ဆၣ် စီၤမိၤၡ့မၤဝဲဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၉ ဖဲပှၤအံၣ်စရ့လးဖိတဖၣ် ထီဒါတၢ်အခါ စီၤမိၤၡ့မၤဝဲဒ်လဲၣ်. ဒ်သိးကဒိးန့ၢ်ဘၣ် တၢ်ဟံးစုနဲၣ်ကျဲအဂီၢ် စီၤမိၤၡ့ကွၢ်ကဒီးတၢ်ဆူ ယဟိဝၤယွၤအအိၣ်လီၤ. ဘၣ်ဆၣ် တဘျီအံၤ ယဟိဝၤယွၤတမၢ အဝဲတီၢ်လၢၢ်ဘၣ်. ယဟိဝၤယွၤမၢ စီၤမိၤၡ့ ဟံးန့ၢ်နီၣ်ထိးဘိ, ကိးဖှိၣ်ပှၤဂီၢ်မုၢ်တဖၣ်လၢ လၢၢ်အမဲာ်ညါ ဒီးတဲတၢ်ဒီးလၢၢ်လီၤ. (၄ မိၤၡ့ ၂၀:၆-၈) စီၤမိၤၡ့မၤဝဲဒ် ယဟိဝၤယွၤတဲအီၤအသိးဧါ. တမၤဝဲဘၣ်. အဝဲအသးအ့န့ ဒီးအသးဒိၣ်ထီၣ်တၢ်အဃိ ကိးဃါဝဲပှၤဂီၢ်မုၢ်တဖၣ် “ဒီးစံးဘၣ်အီၤ, ပှၤပူထီၣ်ဖိသ့ၣ်ဧၢ, ကနၣ်တက့ၢ်, ပဘၣ်ဒုးဟဲထီၣ်ထံလၢလၢၢ်အပူၤအံၤ, လၢသုဂီၢ်စ့ၢ်ကီးဧါ.” ဒီးတီၢ်ဝဲလၢၢ် တဘျီတကးဘၣ် ခံဘျီလီၤ.—၄ မိၤၡ့ ၂၀:၁၀, ၁၁.
စီၤမိၤၡ့ တမၤထွဲဝဲ ယဟိဝၤယွၤ အတၢ်ဟံးစုနဲၣ်ကျဲ လၢအသီဘၣ်
၁၀. ဘၣ်မနုၤအဃိ ယဟိဝၤယွၤအသးဒိၣ်ထီၣ် စီၤမိၤၡ့လဲၣ်.
၁၀ ယဟိဝၤယွၤ အသးဒိၣ်ထီၣ်စီၤမိၤၡ့ဒိၣ်မးလီၤ. (၅ မိၤၡ့ ၁:၃၇; ၃:၂၆) ဘၣ်မနုၤအဃိလဲၣ်. ဘၣ်သ့ၣ်သ့ၣ်ကမ့ၢ်လၢ စီၤမိၤၡ့တမၤထွဲ ယဟိဝၤယွၤ အတၢ်ဟံးစုနဲၣ်ကျဲလၢ အသီအဃိလီၤ.
၁၁. စီၤမိၤၡ့တီၢ်လၢၢ်န့ၣ် ဘၣ်မနုၤအဃိ ဘၣ်သ့ၣ်သ့ၣ် ပှၤအံၣ်စရ့လးဖိတဖၣ် တဆိကမိၣ်ဝဲလၢ ယဟိဝၤယွၤ မၤတၢ်လီၤလးဘၣ်လဲၣ်.
၁၁ ဘၣ်သ့ၣ်သ့ၣ် ယဟိဝၤယွၤအသးထီၣ်တၢ်န့ၣ် တၢ်ဂ့ၢ်လၢအဂၤကအိၣ်ဝဲလီၤ. လၢၢ်လၢအအိၣ်လၢ တၢ်လီၢ်မရံၤဘါ အဆိကတၢၢ်တခါန့ၣ် အကိၤဒိၣ်မးအဃိ ပှၤမ့ၢ်တီၢ်အီၤ ထဲလဲၣ်ထဲလဲၣ်သနာ်က့ ပှၤတမုၢ်လၢ်လၢ ထံကဟဲထီၣ်ဘၣ်. ဘၣ်ဆၣ် လၢၢ်လၢအအိၣ်လၢ မရံၤဘါ ခံခါတခါန့ၣ် တမ့ၢ်ဒ်န့ၣ်ဘၣ်. လၢၢ်ဖဲန့ၣ်တဖၣ် မ့ၢ်ဝဲလၢၢ်ထူၣ် (limestone) လီၤ. လၢၢ်ထူၣ်န့ၣ် မ့ၢ်ဝဲလၢၢ်တကလုာ်လၢ အကပုာ်အဃိ ထံနုၤလီၤလၢလၢၢ်အပူၤ ဒီးပာ်ဖှိၣ်ထီၣ်အသးလၢ လၢၢ်အဖီလာ် ဒီးပှၤမ့ၢ်မၤဖျိလၢၢ်န့ၣ် အဝဲသ့ၣ်မၤန့ၢ်ဝဲထံသ့လီၤ. လၢတၢ်န့ၣ်အဃိ စီၤမိၤၡ့ ကလဲၤတဲတၢ်ဒီးလၢၢ်အလီၢ် အဝဲလဲၤတီၢ်ဝဲလၢၢ်အဃိ ဘၣ်သ့ၣ်သ့ၣ် ပှၤအံၣ်စရ့လးဖိတဖၣ် ကဆိကမိၣ်ဝဲလၢ တမ့ၢ်ယဟိဝၤယွၤ မၤတၢ်လီၤလးဘၣ် အဝဲသ့ၣ်ကဆိကမိၣ်ဝဲလၢ ထံဟဲထီၣ်ဒၣ်အတၢ်ဝဲလီၤ.b (ကွၢ်တၢ်ဂ့ၢ်အဘျဲၣ်တက့ၢ်.) ဘၣ်ဆၣ် ပတသ့ၣ်ညါလီၤတံၢ်ဘၣ်.
စီၤမိၤၡ့ထီဒါတၢ်ဒ်လဲၣ်
၁၂. ဘၣ်သ့ၣ်သ့ၣ် ယဟိဝၤယွၤအသးထီၣ် စီၤမိၤၡ့ဒီးစီၤအၤဟရိၣ်လၢ တၢ်ဂ့ၢ်မနုၤအဃိလဲၣ်.
၁၂ ဘၣ်သ့ၣ်သ့ၣ် ယဟိဝၤယွၤအသးထီၣ် စီၤမိၤၡ့ဒီးစီၤအၤဟရိၣ်န့ၣ် တၢ်ဂ့ၢ်လၢအဂၤကအိၣ်ဝဲလီၤ. စီၤမိၤၡ့တဲဘၣ် ပှၤဂီၢ်မုၢ်တဖၣ်လၢ “ပဘၣ်ဒုးဟဲထီၣ်ထံလၢလၢၢ်အပူၤအံၤ, လၢသုဂီၢ်စ့ၢ်ကီးဧါ.” ဖဲစီၤမိၤၡ့တဲဝဲလၢ “ပ” အခါ ဘၣ်သ့ၣ်သ့ၣ် အဲၣ်ဒိးတဲဝဲ အဝဲဒီးစီၤအၤဟရိၣ်လီၤ. ဒ်လဲၣ်ဂ့ၤဒ်လဲၣ်ဂ့ၤ မ့ၢ်လၢစီၤမိၤၡ့တဟ့ၣ် တၢ်လၤကပီၤခဲလၢာ်လၢ ယဟိဝၤယွၤအအိၣ် လၢတၢ်လီၤလးတခါအံၤအဃိ ဖျါလၢစီၤမိၤၡ့အတၢ်ကတိၤတဖၣ်အံၤ တအိၣ်ဒီးတၢ်ပာ်ကဲနီတစဲးဘၣ်. စံးထီၣ်ပတြၢၤ ၁၀၆:၃၂, ၃၃ တဲဝဲလၢ အဝဲသ့ၣ် “မၤသးထီၣ်အီၤဖဲ ထံမရံၤဘါ, ဒီးစီၤမိၤၡ့ ဘၣ်တၢ်အၢလၢအဃိလီၤ. မ့ၢ်ပှၤမၤကိၢ်မၤဂီၤအသးဒီး, ကတိၤကမၣ်ဝဲလၢ အပျုၤလီၤ.” c (ကွၢ်တၢ်ဂ့ၢ်အဘျဲၣ်တက့ၢ်.) (၄ မိၤၡ့ ၂၇:၁၄) စီၤမိၤၡ့ တမၤလၤကပီၤ ယဟိဝၤယွၤဒ် အကြၢးမၤဝဲအသိးဘၣ်. လၢတၢ်န့ၣ်အဃိ ယဟိဝၤယွၤတဲဘၣ် စီၤမိၤၡ့ဒီးစီၤအၤဟရိၣ်လၢ “သုဝဲခံဂၤလိာ် သုပူထီၣ်ယတၢ်မၤလိာ်” လီၤ. (၄ မိၤၡ့ ၂၀:၂၄, ခ့ခါစှီၤကျိာ်) အဝဲသ့ၣ်မၤဝဲဒ်န့ၣ်အဃိ မ့ၢ်ဝဲတၢ်ကမၣ်ဖးဒိၣ်တခါလီၤ.
၁၃. ယဟိဝၤယွၤစံၣ်ညီၣ်စီၤမိၤၡ့ဒ်န့ၣ်န့ၣ် ဘၣ်မနုၤအဃိ ကြၢးဝဲဘၣ်ဝဲလဲၣ်.
၁၃ ခီဖျိစီၤမိၤၡ့ ဒီးစီၤအၤဟရိၣ်တီခိၣ်ရိၤမဲ ယဟိဝၤယွၤအပှၤဂီၢ်မုၢ်အဃိ ယဟိဝၤယွၤ မုၢ်လၢ်တၢ်လၢ အဝဲသ့ၣ်အအိၣ်အါန့ၢ်ဒံးပှၤဂၤလီၤ. (လူၤကၣ် ၁၂:၄၈) လၢအပူၤကွံာ်န့ၣ် မ့ၢ်လၢပှၤအံၣ်စရ့လးဖိတဖၣ် ထီဒါတၢ်အဃိ ဖဲစိၤအဝဲန့ၣ် ပှၤအံၣ်စရ့လးဖိလၢ အအိၣ်အနံၣ် ၂၀ ဆူအဖီခိၣ်တဖၣ် တလဲၤနုာ်လီၤဘၣ်လၢ ကီၢ်တၢ်စံးပာ်အပူၤဘၣ်. (၄ မိၤၡ့ ၁၄:၂၆-၃၀, ၃၄) ဖဲစီၤမိၤၡ့ထီဒါတၢ်အခါ ယဟိဝၤယွၤ စံၣ်ညီၣ်အီၤဒ်အစံၣ်ညီၣ် ပှၤအံၣ်စရ့လးဖိတဖၣ်အသိးန့ၣ် မ့ၢ်တၢ်လၢအကြၢးဝဲဘၣ်ဝဲလီၤ. လၢတၢ်န့ၣ်အဃိ ဒ်ပှၤအံၣ်စရ့လးဖိလၢ အထီဒါတၢ်တဖၣ်အသိး စီၤမိၤၡ့စ့ၢ်ကီး တလဲၤနုာ်လီၤဘၣ်လၢ ကီၢ်တၢ်စံးပာ်အပူၤဘၣ်.
တၢ်လၢအဒုးအိၣ်ထီၣ်တၢ်ကီတၢ်ခဲ
၁၄, ၁၅. ဘၣ်မနုၤအဃိ စီၤမိၤၡ့ထီဒါ ယဟိဝၤယွၤလဲၣ်.
၁၄ ဘၣ်မနုၤအဃိ စီၤမိၤၡ့ထီဒါ ယဟိဝၤယွၤလဲၣ်. စံးထီၣ်ပတြၢၤ ၁၀၆:၃၂, ၃၃ တဲဝဲလၢ “မၤသးထီၣ်အီၤဖဲ ထံမရံၤဘါ, ဒီးစီၤမိၤၡ့ ဘၣ်တၢ်အၢလၢအဃိလီၤ. မ့ၢ်ပှၤမၤကိၢ်မၤဂီၤအသးဒီး, ကတိၤကမၣ်ဝဲလၢ အပျုၤလီၤ.” ပှၤအံၣ်စရ့လးဖိတဖၣ် ထီဒါယဟိဝၤယွၤအဃိ စီၤမိၤၡ့အသး ဒိၣ်ထီၣ်တၢ်လီၤ. လၢတၢ်န့ၣ်အဃိ အဝဲတပၢၤအသးဘၣ် ဒီးတချုးဖဲအဝဲတဲတၢ်န့ၣ် တဆိကမိၣ်ထံဝဲဘၣ်.
၁၅ အဆိကတၢၢ်တဘျီဖဲ ပှၤအံၣ်စရ့လးဖိတဖၣ် ကဒူးကဒ့ၣ်တၢ် ဘၣ်ဃးဒီးထံအခါ စီၤမိၤၡ့မၤဝဲတၢ်လၢအဘၣ်လီၤ. ဘၣ်ဆၣ်လၢခံတဘျီ စီၤမိၤၡ့ဟ့ၣ်အခွဲးလၢ တၢ်လၢပှၤဂၤမၤဝဲတဖၣ် ကမၤတံာ်တာ်အီၤ ဒီးမၤကိၢ်မၤဂီၤအသးအဃိ အဝဲတကွၢ်တၢ် ဆူယဟိဝၤယွၤအအိၣ်လၢၤဘၣ်. (၂ မိၤၡ့ ၇:၆) ဘၣ်သ့ၣ်သ့ၣ် ကမ့ၢ်လၢပှၤအံၣ်စရ့လးဖိတဖၣ် ထီဒါတၢ်အနံၣ်အါအလါအါလံအဃိ အဝဲအသးကလီၤဘှံး ဒီးကသူၣ်အ့န့ၢ်သးအ့န့လီၤ. မ့တမ့ၢ် ဘၣ်သ့ၣ်သ့ၣ် အဝဲကဆိကမိၣ်ထဲ အတၢ်သူၣ်ကိၢ်သးဂီၤတဖၣ်အဂ့ၢ် ဒီးတဆိကမိၣ်လၢ ကဘၣ်မၤလၤကပီၤယွၤဒ်လဲၣ်န့ၣ်ဘၣ်.
ပကဘၣ်ဆဲးကွၢ်တၢ်ဆူ ယဟိဝၤယွၤအအိၣ်ထီဘိ ဒီးဒိကနၣ်အကလုၢ်ထီဘိ
၁၆. ဘၣ်မနုၤအဃိ ပကြၢးဆိကမိၣ်ထံ တၢ်လၢစီၤမိၤၡ့မၤဝဲတဖၣ်လဲၣ်.
၁၆ စီၤမိၤၡ့ မ့ၢ်ဝံလၢအသးတီဘၣ်ဆၣ် အဝဲမ့ၢ်သးကိၢ်တၢ် ဒီးမၤဘၣ်တၢ်ကမၣ်န့ၣ် ပဝဲစ့ၢ်ကီး ပမၤဘၣ်တၢ်ကမၣ် သ့ညီညီဖိလီၤ. စီၤမိၤၡ့ဘူးကလဲၤနုာ်လီၤဘၣ်လၢ ကီၢ်တၢ်စံးပာ်အပူၤလံ ဒီးပဝဲစ့ၢ်ကီး ပဘူးကတုၤလၢ ဟီၣ်ခိၣ်သီလံ. (၂ ပ့းတရူး ၃:၁၃) ပတအဲၣ်ဒိးလၢ ပတၢ်ခွဲးတၢ်ယာ် လီၤဆီတခါအံၤ လီၤမၢ်ကွံာ်ဝဲဘၣ်. ဘၣ်ဆၣ် ဒ်သိးပကလဲၤနုာ်လီၤဘၣ်လၢ ဟီၣ်ခိၣ်သီအပူၤအဂီၢ် ပကဘၣ်ဆဲးကွၢ်တၢ်လၢ ယဟိဝၤယွၤအအိၣ် ဒီးဒိကနၣ်အကလုၢ်ထီဘိလီၤ. (၁ ယိၤဟၣ် ၂:၁၇) ပဟံးန့ၢ်တၢ်မၤလိလၢ စီၤမိၤၡ့အတၢ်ကမၣ် ကသ့ဒ်လဲၣ်.
တဘၣ်ပျဲ ပှၤအဂၤတဖၣ် မၤတံာ်တာ်နၤတဂ့ၤ
၁၇. ဖဲပသးအ့န့အခါ ဒ်သိးပကီၤပသးကန့ၢ်အဂီၢ် ပမၤတၢ်မနုၤသ့ဝဲလဲၣ်.
၁၇ ဖဲနသးအ့န့ထီၣ်တၢ်အခါ ဆဲးပာ်ဖျါထီၣ် တၢ်ကီၤသူၣ်ကီၤသးတက့ၢ်. ပဝဲတနီၤန့ၣ် ပကထံၣ်ဘၣ် တၢ်ကီတၢ်ခဲအလီၢ်လီၢ်တခါ တဘျီဝံၤတဘျီလီၤ. ဘၣ်ဆၣ်လံာ်စီဆှံ တဲဝဲလၢ “ပမၤတၢ်ဂ့ၤန့ၣ်, မ်ပသုတလီၤဘှံးလီၤတီၤတဂ့ၤ. အဂ့ၢ်ဒ်အံၤ, ပမ့ၢ်တလီၤဘှံးဘၣ်ဒီး, တုၤအမုၢ်အလါဘၣ်ဒီး, ပကကူးတၢ်န့ၣ်လီၤ.” (ကလၤတံ ၆:၉; ၂ သ့းစၤလနံ ၃:၁၃) ပှၤတဂၤဂၤ မ့တမ့ၢ် တၢ်တမံၤမံၤ မ့ၢ်မၤအ့န့ပသး တဘျီဝံၤတဘျီန့ၣ် တချုးလၢပတဲတၢ်အခါ မ့ၢ်ပဆိကမိၣ်ထံဧါ မ့ၢ်ပပၢၤပသးဧါ. (ကတိၤဒိ ၁၀:၁၉; ၁၇:၂၇; မးသဲ ၅:၂၂) ဖဲပှၤဂၤမၤသးဒိၣ်ထီၣ်ပှၤအခါ ပကဘၣ်ဟ့ၣ်အခွဲးလၢ ယဟိဝၤယွၤကပာ်ဖျါထီၣ် အတၢ်သးဒိၣ်လီၤ. (ဖး ရိမ့ၤ ၁၂:၁၇-၂၁ တက့ၢ်.) ပမၤအီၤကသ့ဒ်လဲၣ်. လၢပကသးဒိၣ်ထီၣ်တၢ်အလီၢ် လၢတၢ်သးစူၤအပူၤ ပအိၣ်ခိးယဟိဝၤယွၤလၢ ကမၤဘၣ်ဂီၢ်က့ၤတၢ်ဂ့ၢ်ကီလၢ တၢ်ဆၢကတီၢ်လၢ အကြၢးဝဲဘၣ်ဝဲလၢအဂီၢ်န့ၣ်လီၤ. ပမ့ၢ်တကွၢ်တၢ်လၢ ယဟိဝၤယွၤအအိၣ်ဘၣ် ဒီးဂုာ်ကျဲးစၢး ဟ့ၣ်ကၣ်က့ၤတၢ်လၢပနီၢ်ကစၢ်န့ၣ် ဖျါလၢပတပာ်ကဲ ယဟိဝၤယွၤဘၣ်.
၁၈. ဖဲပဒိးန့ၢ်ဘၣ် တၢ်ဟံးစုနဲၣ်ကျဲအသီအခါ ပကြၢးမၤဒ်လဲၣ်.
၁၈ မၤထွဲဒ် တၢ်ဟံးစုနဲၣ်ကျဲလၢ အဟဲထီၣ်သီတဖၣ်အသိး လီၤတံၢ်လီၤဆဲးတက့ၢ်. ယဟိဝၤယွၤ အတၢ်ဟံးစုနဲၣ်ကျဲလၢ အဟဲထီၣ်သီတဖၣ်န့ၣ် မ့ၢ်ပမၤထွဲအီၤ လီၤတံၢ်လီၤဆဲးဧါ. ပတကြၢးမၤဒ် ပမၤတ့ၢ်လၢညါအသိး ထီဘိဘၣ်. လၢတၢ်န့ၣ်အလီၢ် ယဟိဝၤယွၤ အတၢ်ဟံးစုနဲၣ်ကျဲအသီလၢ အဟ့ၣ်လီၤပှၤခီဖျိ အတၢ်ကရၢကရိန့ၣ် ပကြၢးမၤထွဲအီၤလၢအဆိအချ့လီၤ. (ဧ့ၤဘြံၤ ၁၃:၁၇) တကးဒံးဘၣ် ပကဘၣ်ပလီၢ်ပသး ဒ်သိးပသုတမၤအါန့ၢ် “တၢ်ကွဲးအသးအဖီခိၣ်” တဂ့ၤအဂီၢ်လီၤ. (၁ ကရံၣ်သူး ၄:၆) ပမ့ၢ်မၤထွဲယဟိဝၤယွၤ အတၢ်ဟံးစုနဲၣ်ကျဲ လီၤတံၢ်လီၤဆဲးန့ၣ် မ့ၢ်ဒၣ်ပဆဲးကွၢ်တၢ်ဆူအအိၣ်လီၤ.
ဖဲပှၤဂၤမၤကမၣ်တၢ်အခါ စီၤမိၤၡ့မၤဝဲဒ်လဲၣ် ဒီးပဟံးန့ၢ်တၢ်မၤလိ ကသ့ဒ်လဲၣ် (ကွၢ်လံာ်အဆၢ ၁၉)
၁၉. ဖဲပှၤဂၤမၤကမၣ်တၢ်အခါ ဒ်သိးပတၢ်ရ့လိာ်သးဒီး ယဟိဝၤယွၤ သုတဟးဂီၤတဂ့ၤအဂီၢ် ပကဘၣ်ဟးဆှဲးတၢ်မနုၤလဲၣ်.
၁၉ တဘၣ်ပျဲပှၤဂၤအတၢ်ကမၣ် မၤဘၣ်ဒိနတၢ်ရ့လိာ်သးဒီး ယဟိဝၤယွၤတဂ့ၤ. ပှၤဂၤမ့ၢ်မၤကမၣ်တၢ် ဒ်လဲၣ်ဂ့ၤဒ်လဲၣ်ဂ့ၤ ပမ့ၢ်ဆဲးကွၢ်တၢ်လၢ ယဟိဝၤယွၤအအိၣ်ထီဘိန့ၣ် ပတသးဒိၣ်ထီၣ်တၢ်ဘၣ် ဒီးပတၢ်ရ့လိာ်သးဒီး ယဟိဝၤယွၤစ့ၢ်ကီး တဟးဂီၤဘၣ်. လီၤဆီဒၣ်တၢ် ပမ့ၢ်အိၣ်ဒီးမူဒါ ဒ်စီၤမိၤၡ့အသိး လၢကစၢ်ယွၤအတၢ်ကရၢကရိအပူၤန့ၣ် ပကဘၣ်ပလီၢ်ပသး အါန့ၢ်ဒံးပှၤဂၤလီၤ. ပမူဒါမ့ၢ်အါန့ၣ် ယဟိဝၤယွၤမုၢ်လၢ်တၢ်လၢ ပအိၣ်ကအါစ့ၢ်ကီးလီၤ. (လူၤကၣ် ၁၂:၄၈) ဘၣ်ဆၣ် ပဝဲခဲလၢာ်ဒ်သိးပကပူၤဖျဲးအဂီၢ် ပကဘၣ်ဂုာ်ကျဲးစၢးဆူၣ်ဆူၣ် ဒီးဒိကနၣ် ယဟိဝၤယွၤအကလုၢ်လီၤ. (ဖံလံးပံၤ ၂:၁၂) ပမ့ၢ်အဲၣ်ယဟိဝၤယွၤနီၢ်ကီၢ်န့ၣ် တၢ်လၢကမၤလီၤဃံၢ်ပှၤ မ့တမ့ၢ် မၤလီၤဖးပှၤဒီး ယွၤအတၢ်အဲၣ်တအိၣ်နီတမံၤဘၣ်.—စံးထီၣ်ပတြၢၤ ၁၁၉:၁၆၅; ရိမ့ၤ ၈:၃၇-၃၉.
၂၀. ပကြၢးပာ်လီၤပသး ဂၢၢ်ဂၢၢ်ကျၢၤကျၢၤလၢ ပကမၤတၢ်မနုၤလဲၣ်.
၂၀ ပအိၣ်မူဘၣ်လၢ တၢ်ဆၢကတီၢ်လၢ အကီအခဲလီၤ. လၢတၢ်န့ၣ်အဃိ အရ့ဒိၣ်လၢ ပကဘၣ်ကွၢ်တၢ်ဆူ ယဟိဝၤယွၤလၢအ “အိၣ်ဝဲဆိးဝဲလၢမူခိၣ်” အအိၣ်ဒ်သိးပကသ့ၣ်ညါ တၢ်လၢအဝဲအဲၣ်ဒိးလၢပမၤတဖၣ် ကသ့အဂီၢ်လီၤ. ပတကြၢးပျဲ တၢ်လၢပှၤဂၤမၤဝဲတဖၣ် မၤဘၣ်ဒိပတၢ်ရ့လိာ်သးဒီး ယဟိဝၤယွၤဘၣ်. စီၤမိၤၡ့အတၢ်လဲၤခီဖျိန့ၣ် သိၣ်လိပှၤတၢ်မၤလိလၢ အရ့ဒိၣ်တခါလီၤ. ပသ့ၣ်ညါဘၣ်လၢ ဖဲပှၤဂၤမၤတၢ်ကမၣ်အခါ လၢပကသူၣ်ဒိၣ်သးဖျိးတၢ်အလီၢ် ပကဘၣ်ပာ်လီၤပသး ဂၢၢ်ဂၢၢ်ကျၢၤကျၢၤလၢ ပက “ကွၢ်တၢ်ဆူပကစၢ်အအိၣ် . . . တုၤအသူၣ်ကညီၤသးကညီၤပှၤလီၤ.”—စံးထီၣ်ပတြၢၤ ၁၂၃:၁, ၂.
a တၢ်လီၢ်မရံၤဘါအံၤ လီၤဆီလိာ်အသးဒီး တၢ်လီၢ်မရံၤဘါလၢ ဘၣ်တၢ်ကိးအီၤလၢ မးစၤန့ၣ်လီၤ. ဘၣ်ဆၣ် တၢ်လီၢ်ခံခါအံၤ ဘၣ်တၢ်ကိးအီၤလၢ မရံၤဘါ မ့ၢ်လၢပှၤအံၣ်စရ့လးဖိတဖၣ် အ့ၣ်လိာ်သး ဒီးကဒူးကဒ့ၣ်တၢ်လၢ ထံတအိၣ်ဘၣ်အဃိလီၤ.—ကွၢ်ဟီၣ်ခိၣ်ဂီၤလၢ အအိၣ်လၢ လံာ်လၢအမ့ၢ် တၢ်မၤစၢၤလၢ နကမၤလိ ယွၤအကလုၢ်ကထါအဂီၢ်, ကဘျံးပၤ ၃၈ တၢ်နီၤဖး ၇ အပူၤတက့ၢ်.
b ပှၤကူၣ်ဘၣ်ကူၣ်သ့ ဘၣ်ဃးလံာ်စီဆှံတဖၣ် ပာ်ဖျါဝဲလၢ ပှၤယူဒၤဖိ အတၢ်စံၣ်စိၤတဲစိၤတဲဝဲလၢ ပှၤလၢအထီဒါတၢ်တဖၣ် တဲဝဲလၢတၢ်လၢ စီၤမိၤၡ့မၤဝဲန့ၣ် တမ့ၢ်တၢ်လီၤလးဘၣ် ခီဖျိလၢ စီၤမိၤၡ့သ့ၣ်ညါဝဲလၢ ထံအိၣ်လၢ လၢၢ်န့ၣ်အပူၤအဃိလီၤ. လၢတၢ်န့ၣ်အဃိ အဝဲသ့ၣ် မၢစီၤမိၤၡ့ မၤတၢ်လီၤလးလၢ လၢၢ်လၢအဂၤတဖျၢၣ်လီၤ. ဘၣ်ဆၣ် တၢ်ဂ့ၢ်တဖၣ်အံၤ မ့ၢ်ဒၣ်ပှၤယူဒၤဖိ အတၢ်စံၣ်စိၤတဲစိၤတခါလီၤ.
c ကွၢ် The Watchtower, October 15, 1987, “Questions From Readers” တက့ၢ်.