ဖၤရိၤ အတၢ်မံမီၢ်တဖၣ် အဂ့ၢ်

ပူၤကွံာ်လံခံနံၣ်လံ. ယိၤသးအိၣ်ဒံးဒၣ်လၢဃိာ်ပူၤန့ၣ်လီၤ. ပှၤကွၢ်တၢ်အီအခိၣ်တသ့ၣ်နီၣ်ထီၣ်အီၤဘၣ်. ဘၣ်မုၢ်တနၤန့ၣ် ဖၤရိၤမံမီၢ် တၢ်မံမီၢ်လီၤဆီဒိၣ်မး ခံခါန့ၣ်လီၤ. ဆိကမိၣ်ဝဲဒၣ်လၢ မ့ၢ်အခီပညီကအိၣ်ဒ်လဲၣ်န့ၣ်လီၤ. လၢတၢ်ဂီၤအံၤအပူၤန့ၣ် နထံၣ်အဝဲမံဧါ. လၢခံတဂီၤန့ၣ် ဖၤရိၤကိးနုာ်အပှၤကူၣ်ဘၣ်ကူၣ်သ့တဖၣ်ဒီး တဲဘၣ်အဝဲသ့ၣ် တၢ်လၢအမံမီၢ်တ့ၢ်ဝဲန့ၣ်လီၤ. ဘၣ်ဆၣ် တဲဖျါထီၣ်ဝဲသ့ၣ် တၢ်မံမီၢ်အခီပညီတဘၣ်ဘၣ်.

အၢၣ်, တုၤခဲအံၤမးဒီး ပှၤကွၢ်တၢ်အီအခိၣ် သ့ၣ်နီၣ်ထီၣ်က့ၤယိၤသးန့ၣ်လီၤ. အဝဲပတံထီၣ်တၢ်ဆူဖၤရိၤအအိၣ်လၢ, ‘ဖဲယလီၤလၢဃိာ်ပူၤအခါ ယထံၣ်ဘၣ်တ့ၢ်ပှၤလၢ အတဲဖျါထီၣ် တၢ်မံမီၢ်အခီပညီသ့ အိၣ်လၢဃိာ်ပူၤတဂၤလီၤ.’ တုၤနုၤတစု ဖၤရိၤမၢပှၤထုးထီၣ်ယိၤသးလၢဃိာ်ပူၤ ဒီးကိးနုာ်အီၤဆူအမဲာ်ညါ လၢအချ့လီၤ.

ဖၤရိၤတဲဘၣ်ယိၤသး အတၢ်မံမီၢ်တဖၣ်လီၤ. ‘ယၤကစၢ်စီၤပၤ ယမံမီၢ်ဒီးထံၣ် ဂီၤဖံးမိၢ်လၢ အဘီၣ်ဒီးဃံလၤ နွံဒုန့ၣ်လီၤ. ဝံၤဒီး ယထံၣ်ကဒီးဂီၤဖံးမိၢ်လၢ အဃံဖျါဒီးဃဲၤဝဲဒိၣ်မး နွံဒုန့ၣ်လီၤ. ဂီၤဖံးမိၢ်ဃဲၤနွံဒုန့ၣ်အီၣ်ကွံာ်ဝဲ ဂီၤဖံးမိၢ်အဘီၣ်နွံဒုန့ၣ်လီၤ.

‘ယတၢ်မံမီၢ်လၢခံတခါအပူၤန့ၣ် ယထံၣ်ဘုနွံစဲၤလၢ အကံၢ်ပှဲၤကၢကလၢၤ, သၣ်ထီၣ်လၢဘုတထူၣ်ဃီအပူၤန့ၣ်လီၤ. ဝံၤဒီးယထံၣ်ကဒီး ဘုစဲၤလၢအဘံၣ်တာ်ဒီးတဆးဘၣ် နွံစဲၤကဒီးန့ၣ်လီၤ. ဘုစဲၤအဃဲၤဘံၣ်တာ်လၢအတဆး နွံစဲၤန့ၣ် အီၣ်ကွံာ်ဝဲ ဘုစဲၤလၢအဘီၣ်ဒီးဆးနွံစဲၤန့ၣ်လီၤ.’

ယိၤသးပတံထီၣ်တၢ်ဆူဖၤရိၤ ဒ်အံၤန့ၣ်လီၤ. ‘တၢ်မံမီၢ်ခံခါအံၤအခီပညီဒ်သိးသိးလီၤ. ဂီၤဖံးမိၢ်လၢအဘီၣ်နွံဒုဒီး ဘုစဲၤအဘီၣ်နွံစဲၤန့ၣ်မ့ၢ်နွံနံၣ်လီၤ. ဂီၤဖံးမိၢ်ဃဲၤသံဃဲၤကျိနွံဒုဒီး ဘုစဲၤလၢဘံၣ်တာ်ဒီးတဆးဘၣ်နွံစဲၤန့ၣ် အဲၣ်ဒိးစံးဝဲဆူညါနွံနံၣ်ကဒီးန့ၣ်လီၤ. လၢအဲၤကူပတူးအံၤ တၢ်အီၣ်ကူးအီပှဲၤဒိၣ်သး ကအိၣ်ဝဲနွံနံၣ်လီၤ. ဝံၤဒီး တၢ်သၣ်ဝံၤလီၤဒိ ကဟဲပိာ်ထီၣ်အခံနွံနံၣ်န့ၣ်လီၤ.’

ဒ်န့ၣ်ဒီး, ယိၤသးစံးဘၣ်တဲဘၣ်ကဒီး ဖၤရိၤဒ်အံၤလီၤ. ‘ဖဲတၢ်အီၣ်ကူးအီပှဲၤအိၣ်နွံနံၣ်အတီၢ်ပူၤန့ၣ် ဃုထၢပှၤကူၣ်ဘၣ်ကူၣ်သ့တဂၤဒီး ပာ်အီၤလၢ ကစူးရိပာ်ဖှိၣ်တၢ်အီၣ်တၢ်အီအဂီၢ်တက့ၢ်. မ့ၢ်မၤဒ်အံၤသၢပျၢၤ တၢ်သၣ်ဝံၤလီၤဒိလၢခံနွံနံၣ်အတီၣ်ပူၤ ပှၤတသၣ်ဝံၤလီၤဒိလၢၤဘၣ်.’

ဖၤရိၤဘၣ်အသးလၢတၢ်ဟ့ၣ်ကူၣ်အံၤလီၤ. ဒီးပာ်ဝဲယိၤသးလၢ ပှၤကစူးရိပာ်ဖှိၣ်တၢ်အီၣ် အလီၢ်အလၤန့ၣ်လီၤ. တုၤနုၤတစု, လၢအဲၤကူပတူးဒီကီၢ်ညါအပူၤ ဖၤရိၤမ့ၢ်ဝံၤန့ၣ် ယိၤသးမ့ၢ် ပှၤအကါဒိၣ်ကတၢၢ်န့ၣ်လီၤသၢၣ်.

ဃိးနံၣ်ဝံၤအလီၢ်ခံ, ဖဲတၢ်သၣ်ဝံၤလီၤဒိအိၣ်အခါ ယိၤသးထံၣ်ပှၤတနီၤဟဲဝဲလီၤ. မ့ၢ်မတၤသ့ၣ်တဖၣ်လဲၣ်န့ၣ် နသ့ၣ်ညါဧါ. အဝဲၢ်အဂၤ ၁၀ လီၤသၢၣ်. လၢကီၢ်ကနၤဧၣ်န့ၣ် တၢ်အီၣ်တအိၣ်လၢၤဘၣ်အဃိ အပါပၢ်ပျၢ်လီၤအဝဲသ့ၣ် ဆူကီၢ်အဲၤကူပတူးလီၤ. ယိၤသးတိၢ်နီၢ်အဝဲၢ်သ့ၣ်တဖၣ်ဘၣ်လီၤ. အဝဲၢ်သ့ၣ်တဖၣ်တခီ တိၢ်နီၣ်အီၤတဘၣ်ဘၣ်. ဘၣ်မနုၤအဃိလဲၣ်နသ့ၣ်ညါဧါ. ယိၤသးန့ၣ် ဒိၣ်ထီၣ်ဝဲလံဒီး ကူကၤဃာ်ဝဲ တၢ်ကူတၢ်ကၤအလီၤဆီစ့ၢ်ကီး အဃိလီၤ.

ယိၤသးသ့ၣ်နီၣ်ထီၣ်က့ၤဝဲ ဖဲအနီၢ်ဆံးအခါ လၢအတၢ်မံမီၢ်အပူၤ အဝဲၢ်တဖၣ်ဟဲတီၤလီၤကဒွံကျိာ် လၢအမဲာ်ညါန့ၣ်လီၤ. သုသ့ၣ်နီၣ်ထီၣ် သုဖးဘၣ်တ့ၢ်တၢ်ဂ့ၢ်အံၤန့ၣ်ဧါ. လၢတၢ်န့ၣ်အဃိ ယိၤသးနၢ်ပၢၢ်ဝဲ ပှၤလၢအဆှၢလီၤအီၤဆူအဲၤကူပတူး လၢအိၣ်ဒီးအဂ့ၢ်အပီၢ်န့ၣ် မ့ၢ်ဒၣ်ယွၤန့ၣ်လီၤ. ယိၤသးမၤမနုၤလဲၣ် နသ့ၣ်ညါဧါ. ပကွၢ်သကိးတက့ၢ်.