ဒ်သိးပဟံၣ်ဖိဃီဖိ ကအိၣ်ဒီးတၢ်သးခုအဂီၢ် ပလိၣ်ဘၣ်တၢ်မနုၤလဲၣ်

လံာ်စီဆှံတဲဝဲဒ်လဲၣ်​

“ပှၤလၢအနၢ်ဟူ ကစၢ်ယွၤ အကလုၢ်ကထါဒီး မၤထွဲဝဲန့ၣ်​ ကသးခုဝဲလီၤ.”—လူၤကၣ်​ ၁၁:၂၈, ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ.

လံာ်စီဆှံတဆၢအံၤ အကဲဘျုးလၢနဂီၢ်ဒ်လဲၣ်​

ဟံၣ်ဖိဃီဖိတဖၣ်​ ကအိၣ်ဒီး တၢ်အဲၣ်တၢ်ကွံ အနီၢ်ကီၢ်.—အ့းဖ့းစူး ၅:၂၈, ၂၉.

ဟံၣ်ဖိဃီဖိတဖၣ်​ ကအိၣ်ဒီးတၢ်ပာ်ကဲလိာ်သး တဂၤဒီးတဂၤ.—အ့းဖ့းစူး ၅:၃၃.

ဟံၣ်ဖိဃီဖိတဂၤဒီးတဂၤ ကနာ်န့ၢ်လိာ်သး ထီဘိ. —မၢ်ကူး ၁၀:၆-၉.

တၢ်လၢလံာ်စီဆှံတဲဝဲန့ၣ်​ ပနာ်အီၤသ့ သပှၢ်ကတၢၢ်ဧါ

ပနာ်အီၤသ့ခီဖျိလၢ တၢ်ဂ့ၢ်လၢ တၢ်ဖီလာ်အဃိ.

• ကစၢ်ယွၤ ဒုးအိၣ်ထီၣ်ဝဲ ဟံၣ်ဖိဃီဖိ အဆိကတၢၢ်တဒူၣ်. လံာ်စီဆှံတဲဝဲလၢ “ဒူၣ်ဖိထၢဖိခဲလၢာ် . . . ဒိးန့ၢ်ဘၣ်အမံၤ” ခီဖျိလၢယဟိဝၤယွၤ. (အ့းဖ့းစူး ၃:၁၄, ၁၅) လံာ်စီဆှံတဆၢအံၤ အဲၣ်ဒိးတဲဝဲလၢ ဟံၣ်ဖိဃီဖိ တၢ်ရဲၣ်တၢ်ကျဲၤ ဟဲကဲထီၣ်အသး ခီဖျိလၢ ယဟိဝၤယွၤ ဒုးအိၣ်ထီၣ်အီၤအဃိလီၤ. ဘၣ်မနုၤအဃိ တၢ်ဂ့ၢ်တခါအံၤ မ့ၢ်တၢ်လၢအရ့ဒိၣ်လဲၣ်.

  ဆိကမိၣ်ကွၢ်– အဒိ, နအီၣ်တၢ်အီၣ်တခါမ့ၢ်ဝံၣ်န့ၣ်​ နကအဲၣ်ဒိးသ့ၣ်ညါလၢ ပှၤဖီအီၣ်ဝဲဒ်လဲၣ်. ဒ်သိးနကသ့ၣ်ညါအဂီၢ် နကသံကွၢ်မတဂၤလဲၣ်. နကသံကွၢ်ပှၤလၢ အဖီအီၣ်တၢ်အီၣ်တခါအံၤ.

  ဒ်န့ၣ်အသိး မ့ၢ်လၢ ယဟိဝၤယွၤ ဒုးအိၣ်ထီၣ်​ ဟံၣ်ဖိဃီဖိတၢ်ရဲၣ်တၢ်ကျဲၤအဃိ ဒ်သိးပဟံၣ်ဖိဃီဖိ ကအိၣ်ဒီး တၢ်သးခုအဂီၢ် ပကဘၣ်ဃ့တၢ်ဟ့ၣ်ကူၣ်လၢ ယဟိဝၤယွၤအအိၣ်.—၁ မိၤၡ့ ၂:၁၈-၂၄.

• ကစၢ်ယွၤသးအိၣ်ပှၤ. ဟံၣ်ဖိဃီဖိတဖၣ်​ မ့ၢ်ဃုသ့ၣ်ညါ ယဟိဝၤယွၤ အတၢ်ဟ့ၣ်ကူၣ်လၢ လံာ်စီဆှံအပူၤန့ၣ်​ ဂ့ၤဒိၣ်မး. ဘၣ်မနုၤအဃိ ဂ့ၤဝဲလဲၣ်. မ့ၢ်လၢ ကစၢ်ယွၤ ‘သးအိၣ်ပှၤ’ အဃိ. (၁ ပ့းတရူး ၅:၆, ၇) ယဟိဝၤယွၤသးအိၣ်မၤစၢၤနၤ သပှၢ်တၢၢ် ဒီးအတၢ်ဟ့ၣ်ကူၣ်တဖၣ်န့ၣ်​ ကဲဘျုးလၢနဂီၢ် ကိးဆၢကတီၢ်ဒဲး.—ကတိၤဒိ ၃:၅, ၆; ယၡါယၤ ၄၈: ၁၇, ၁၈.